افكارنا وتجهيزاتنا استعدادا لاستقبال المولود التانى ...

الله المستعان

انا عايزة انزل اجيب لنفسي شوية غيارات وهدوم للبيت لبعد الولاده

احتمال على نص الاسبوع كده ربنا ييسر

وهاتى البريست بادز استعمال مرة واحده بالشريط الاصق بلاش التانيه اللى من غير شريط لاصق لانها بتحتاج كل شوية تضبطى المسائل

طيب يا امهات ياللي منتظرين البيبي التانى انا بفكر في البيبي فون ايه رايكم؟

كان ليا واحده صاحبتى عندها طفلين وكان ده الطفل التالت بقت تقفل عليه الاوضه بعد ما تامنها طبعا علشان لو البيبي اتحرك

وتقوم تشوف اللي وراها

لان اولادها كانوا معتبرينه اللعبه بتاعتهم

وكانت تشغل للبيبي الجهاز بحيث انه اول ما يصحى تاخد بالها وتروحله وهو برضو علشان يعرف ينام بهدوء من غير ما حد يصحيه

الموضوع ده بيتكلم عن الحمل التانى

http://forums.3roos.com/showthread.php?t=531247

طبعا اهم حاجه مننساش هديه البيبي لاخوه الكبير

ياريت لو حد عنده افكار يقلها

انا مثلا بفكر في السكوتر

http://forums.3roos.com/showthread.php?t=451493

شهيدة;12749901:
طبعا اهم حاجه مننساش هديه البيبي لاخوه الكبير

ياريت لو حد عنده افكار يقلها

انا مثلا بفكر في السكوتر

عارفة يا شهيدة ممكن برضو تجيبي لعمر لعبة بازل هيحبها برضو وهيحط تركيزه فيها
ده لو مش عنده انما لو عنده بلاش عشان لازم تكون حاجة جديدة عليه واول مرة تيجي له

ان شاء الله البنات هيفيدوكي اكتر

فكرة ولو انى جبتله قبل كده بازل بس ملفتش نظره اوى

هوا بيحب الحاجات الميكانيكيه زى العربيات والحاجات دى فبقول بمكن يحب السكوتر علشان كده

بنات الحكاية دي سمعتها وحبيت اقول لكو عليها بم اننا ان شاء الله منتظرين البيبي التاني

كان مرة واحدة اتصلت بدكتر ياسر نصر وقالت له انها اول ما ولدت بنتها التانية خافت على الاولى من الغيرة والكلام ده فاهملت التانية وباقت مامتها هي اللي تشوف طلباتها وهي اهتمت اكتر بالبنت الاولى عشان مش تحسسها انه فيه حاجة جديدة يعني وان مامتها بتحبها لسة المهم البنتين كبرو على كده والبنت الكبيرة اتعلقت جدا بمامتها والتانية العكس ومش بتحب اختها الكبيرة دي لان مامتها واخدة بالها منها اكتر من الصغيرة ولحد البنات دول ما كبرو ودخلو المدرسة يعني هي بتتصل بالدكتور والانين كانو دخلو المدرسة بس ما زالت البنت الكبيرة متعلقة جدا بمامتها والصغيرة مش بتحب اختها خالص ومامتها مهملة معاها
هههههههههههههههههه

بس ده برضو مش صح والام اتصرفت غلط
فعلا لازم نعمل زي الرسول ما قال
اعدلو بينهم ولو في القبلة
يعني القبلة اقل حاجة لازم نعدل فيها برضو عشان يطلعو بيحبو بعض ومافيش غيره


ربنا يقدرنا على اللي جاي يااااااااااااارب

عارفة كمان يا شهيدة
فيه الميكانو لو تعرفيه

اللعبة دي فيها ذكاء فظيع ما شاء الله بس ممكن عمر يكون صغير عليها انا مش جبتها لمعاذ لسة برضو كمان عشان بيكون فيها مسامير واجزاء صغيرة ممكن لاقدر الله يحطوها في بؤهم
بس لو لقيتي حاجة للسن ده هيحبها بم انه يعني بيحب الفك والتركيب وكده وكمان بتنمي مهارات كتيرة اوي عندهم

طبعا اللى الام عملته ده غلط كبير
وفعلا الحل هو التوازن والعدل

ده احنا حتى امة وسط

فالاهتمام بالاتنين لازم بس الفكرة ان الامور تيجى للطفل الكبير بالتدريج
يعنى انا شايفه ان عمر مش متصور فكرة ان في بيبي جاى

تصرفاته كلها غيره عليا وخوف عليا بس مرة واحده هيلاقي ادامه طفل جديد

ده في رايي صدمة ليه وتقريبا دى اكبر صدمة هيواجهها في الموضوع ده

فالمفروض اننا مثلا نهتم بالطفل الكبير في الاول اكتر ولما نيجى نتعامل مع الطفل الصغير نشركه معانا في الغيار مثلا هات البامبرز خد ارمى البامبرز

ياااه شوف البيبي ده صغير وبيعمل دوشة انما انت كبير وشاطر وبتسمع كلام ماما

وبالتدريج يبدا يحس بوجود الطفل الصغير وانه اخوه


حاجه كمان
كان في دكتور بيتكلم مش فاكرة اسمه يمكن يكون ياسر نصر بيقول متربطيش حبك للطفل بافعاله

يعنى تقوليله مثلا ماما بتحبك علشان انت بتسمع كلامها

ده غلط

المفروض نقله انت شاطر علشان بتسمع كلام ماما

اه الميكانو هايل بس ده تقريبا بيبقى من سن 4 او 5 سنين

بس افكار حلوة فعلا لو ام عندها ابن في المرحله دى ممكن تجيبه

انا بقول لو كان بنت كان الموضوع هيبقى سهل عروسه ولا علبه مكياج ولا اكسسوريز

انما ولد تحسي الحاجات اللى تعجبه قليله

من الحاجات برضو اللى تنفع هدايا للطفل الكبير بس محتاجه سن كبير شوية الاب توب اللى فيه قران او بيقول حروف وكلمات

هوا ينفع سن صغير بس اعتقد ان الافضل للسن الصفير حاجات تحركهم اكتر منها حاجات تعليميه

فعلا يا شهيدة الميكانو والاب توب المعلم ده محتاجين سن كبير شوية عن ولادنا

عارفة ادخلي محلات العاب الذكاء هم في السن ده محتاجين الحاجات دي اكتر ولو مش لقيتي حاجة مناسبة يبقى هو السكوتر فعلا حلو وان شاء الله عمر يحبه ويحب البيبي يااااااااااااااااااااااااارب

المشكله يا ايمى ان اغلب اللعب تلاقي مكتوب عليها من3 سنين

كان الاصغر من كده ملوش نفس او مهمل
عموما هحاول فعلا انزل وابص على محلات اللعب

لا يا شهيدة اللعب المكتوب عليها كده عادي مش اساسي يعني تكون فعلا من تلات سنين
بس لعب الذكاء دي كل ام عارفة قدرات ابنها وهل هيقدر فعلا يلعب باللعبة دي تجيبهاله وبيكون فيه حاجات سهلة اكيد للسن بتاع سنتين ده

فينكم يا حلوين؟

يلا عايزين نخلص تجهيزاتنا قبل ما نتقل اكتر من كده

ورمضان داخل عالابواب كل عام وانتم بخير

لبنات القاهره المعلومة دى تفيدكم

في كارفور العبور محل بيبي شوب وويف كيدز الاتنين عاملين سيل

بس نصيحه متشتروش منهم داخلى ابدا لان اسعارهم غاليه
احنا عندنا القطن المصري لا يعلى عليه وارخص كتير

يعنى انا شفت هناك السلوبت الداخلى نص كم ب 30 ج
في حين انى جايبه بابيون سلوبيت نص كم ب 12ج

دى شوية افكار جمعتها من النت ممكن تفيدنا في التجهيزات والاستعدادات

تنضيف الشقه

شراء الادوات الازمة للنضافه
تنضيف المكتبات والبوفيه والنيش تنضيف عميق
تنضيف تحت السرير والالادراج في غرف النوم تنضيف عميق
اعاده تنظيم الغرف والدواليب
تنضيف الحيطان
تنضيف المطبخ والتلاجه تنضيف عميق
غسل السجاجيد والستائر
التاكد من الانتهاء من غسل جميع الملابس والمكواه

تحضير الاكلات

تحمير لسان عصفور ووضعه في غلب بالتلاجه لاسقاطه في الشوربة
سلق اللوبيا والفاصوليا البيضاء ووضعها بالفريزر
ضرب الطماطم في الخلاط ووضعها في الفريزر
ضرب البصا والتوم كذلك في الخلاط ووضعهم في اكياس بالفريزر
تقطيع الفلفل الاخضر مكعبات ووضعه في الفريزر
تعصيج اللحمة المفرومة ووضعها بالفريزر
تجهيز الفراخ البانيه والبفتيك متبلين وتجهيزهم بالبيض والبقسماط ووضعهم في الفريزر شرط الفصل بينهم بورق زبده او اكياس بلاستيك منعا لالتصاقها ببعضها البعض
تجهيز الفراخ للشوي بتتبيلتها
وتجهيز فراخ اخرى للسلق
عمل صينيه بطاطس بالفراخ ووضعها مستويه في الفريزر
تجهيز وعمل شاورما اللحم والفراخ ووضعها بالفريزر
عمل صينيه مكرونة بالباشمل وكوسه بالباشمل ووضعهم بالفريزر وهم مستويين
عمل صينيه مسقعه وتسويتها ثم وضعها بالفريزر
عمل كباب حله وتقسيمه وجبات ووضعه بالفريزر
عمل عجينة البيتزا وتوضع بالفريزر وممكن تجهيز صينيه البيتزا بمكوناتها وتسويتها وتقطيعها ثم وضعها بالفريزر
او تسويتها نص سوا ووضعها بالفريزر
عمل كيكه وتقطيعها ووضعها بالفريزر

تعبت من الكتابه بس دى حاجات جمعتها من النت منها ما يصلح لى ومنها مالا يصلح بس قلت احطها هنا علشان غيري يستفاد منها

وان شاء الله بكمل قريبا