:: عبث صغيري , وعصبيتي .. عطوني حلوول ..! ::

حزن ناعم;12510490:
ام علاوي الله يهديهم .. ويخلف تعبتنا

احس انج تتكلمين عني .. تذبحني استكشافاته طاقه مو طبيعيه

يوم اللي اعصب عليه اضربه على ايده .. واذا بيسوي جريمه يطالعني ويضحك ويجود ايده على طول هههه فديته سيدون

طبيعيه عصبيتش خيو .. طول اليوم يشتغل في الكهرباء في المطبخ في الثياب في الرسيفر في في في ولايخلص الشغل اوفرتايم .. وخاصه اذا ابوه مايتواجد بكثره ..

اطلعي به روحي بيت ابوش .. اني من يتعبني اطلع به اريح عند امي لان احس يبي ليي بريك قوي وياه

الله يهدي الجميع

~ om 7o0or ~;12510642:
هههههههههههههه سوري يعني
بس مادري ليش ياتني الضحكه
مو متخيله الكرسي

الله يعينج صج
انه بنتي سنه و3 شهور ومن الحين تفر راسي فر

أم مرااام;12510677:
عندناا و عندج خيرر ياا أم علاااوووي

و هذي الطفووولة و هذي شقااوتهاا

بس انتين استهدي بالله و صلي ع النبي و حااوولي قدر الامكاان اتسيطرين ع اعصااابج و اتقللين من الضرب

لأنه الضرب بالمرة ماا منه فاايدة و لاا نتيجة بالعكس يزيد العنااد و الشقاااووة

و الحل الووحيد الصبر و طوووولة البااال

و الدعااء الداائم لهم بالهدااااية و التووفيق

! أنــثــى !;12510679:
الامهات ذكرو كل اللي بقوله ، بس عندي اضافة ثانية .


حركة حبس الطفل في غرفة لوحده ، و قفلها عليه ، جدا جدا خطيرة على عاطفته و نفسيته .. لأنه لحظتها بكون في حالة خووف شديد من وحدته و من الموقف اللي صار فيه ، و قلق لوضعه ، و متشتت و يمكن تحضره حالة الندم على اللي سواه لكن و لا طريقة يقدر يوصلها بها مشاعره لأمه و هي شديدة الغضب معاه . تقدرين تتخلين اي قد صعبه عليه هالحالة ؟




بالاضافة الى انه على قولتنا يمكن ينزهق ، و الله لا يقوله تصيده حالة ما يفارقه للأبد من ورا الزهقة وووواجد قصص جذي .



....................


اني ولدي الكبير ماشاء الله هادىء و ركوود و ما يعصبني الا نادرا الحمدلله ، لكن الصغير مطلع عيووني كل يومه ينفر اشياء و يخرب و مستحيل يشوف كاس و ما يكسره و يكب الا فيه ! و هو نتفة .. و بصراحة صدق صغير لكن اول ايام الا صار جذي ضربته ، و بعدين قعدت مع نفسي و فكرت و قررت انه اترك الضرب و امسك نفسي قد مااقدر ، تدرين ليش ؟


لأنه وحدة من قرايبنا عندها ولد جا بعد 3 اولاد ، لكن هالولد بالذات طلع عيوونها المسكينة ، واجد حركي و عفاس و يختلف عن اخوانه في كل شي ، و هي تضربه ما عندها حل غير الضرب ، و تعرفين الضرب يشفي الغليل حتى لو في طفل !!!!


و النتيجة انه بالبحراني الفصيح ( تشوولع ) و صارت من تشوووف ام تضرب ولدها تنصحها و تنهيها عن الضرب و اني من ضمنهم ، مو لأنها شافتني اضرب لأنه اذا بضرب يكون بشكل سري هههه ، قدام و لا احد حتى زوجي ، بس لأنها لاحظتني بعض الاوقات اشكي تعبي من ولدي الصغير لأمي و احط عليه :( ، تقول لا تطحنين عليه مثل مااني طحنت على فلان و اختسف ، بالاضافة الى انه كل اللي حواليش بتظل ببالهم فكرة انه هالولد شيطون و متعب و يسبب المشاكل و النتايج كلش مو حلوة في حق الطفل ، و ممكن ما ترضينها له ! و هذي نصيحة لكل الامهات ..


و الله يخلي اولادنا و اولادكم و يهديهم .

ترنيمة شاعر;12510735:

هلا ام علاااوي الله يعينش

عندنا وعندش خير

اني افكر اخذ ليها الخيمة وبحط كل العابها فيها علشان ما تفكر تطلع منها:struggle:

كريم كراميل;12510958:
هلا حبيبتي
عندنا وعندكم خير
انا موظفة ودوامي طووووووووووووووووويل ... يعني لما ارجع البيت اكون على اخري من التعب والارهاق .... ويقابلوني بناتي بالزفة .... صياح وعفسة ... وطلبات ماليها اول ولا اخر ... صراحة اطول بالي عالاخر ... بس اكثر شي يتعبني السهر ... (بناتي يسهرو وينامو النهار وما قدرت اعدل نومهم) يعني من الساعة 10 اكون خلاااااااااااص .... اعصابي بدت تنهار ... ومو قادرة افتح عيوني من التعب .... وبنتي الكبيرة متل ابنك ... حركية بشكل مبالغ فيها ... ماقدر اغفل عنها ثواني والا تكون عاملة مصيبة ..... كمثال هداك اليوم على الساعة 11 بالليل جهزتها للنوم ورحت ابدل حفاض اختها الا انتبه اني مو سامعة صوتها ... رحت ادور عليها لقيتهاا مذوبة شوكلاتة جلاكسي في كوب ماي .... وتاخذ من الشوكلاتة وتمسح اطرافها وشعرها .... ما بقي من جسمها شي ما صار مغطي ........... اخخخخخخخخخخخخخ ... داك اليوم صارخت لين حسيت بانه راح تجيني جلطة :sick::sick:... وطبعاً ساعة في الحمام حتى نضفت ... وباقي عفستها ما تقل عن هالمستوي ... بس لما احس بنفسي راح انفجر وامد ايدي عليها استغفر واكثر من الاستغفار ... وادعي لها بالهداية




المهم حبابة ... اخيراً اتخلصت منها :mad::mad: ودخلتها الروضة ... والحمدلله حالنا اتعدل ... صارت طاقتها كلها تخلصها في اللعب هنيك ... وتجي البيت مهدودة ... ومن بعد صلاة العشاء البيت كله نايم


احمدك يارب

عنوني;12510985:
الله يساعدش خيو وولدش بالهعمر اكيد بسوي وبفر راسج فر خخخ

عن نفسي راح اقول لج تجربتي يمكن تستفيدي

طبعا المطبخ الحمد لله المنيوم وابد ما اخليه مفتوح إله لمه اني اشتغل عشان اسمعها

وشفت شنو الأشياء إله اهيه تندمج فيه واحدها عليه مثلا التلفزيون معنه ناس وايد يقولون لا تعودون عيالكم بس لو نحسبها تره الياهل ما يقعد وايد بجنب التلفزيون إذا نوعتين ليه في الأنشطه

عن بنتي تحب التلوين وساعات اني اقول ليها ماما ابي اشوف تلوينش وله ترسمني عن يازعم وترسم ابوها خخخ وكله شخابيط

خليت لها كورنر في الصاله حتى كرسي وطاوله للتلوين

والياهل يتعود على ما تعودينه يسوي

يعني حتى في الترتيب انتين عوديه وهو يتعلم واشوف بنتي كل ما تكبر تتعلم

والحين عن يازعم الكورنر مالها ما تخلي احد يدخل فيه إله مرتب خخخ معنه اهيه ما ترتب عن يازعم ترتب خخخخ



وعن الأشياء السيفتي في سنتربوينت بتلاقين هناك انواع كثير لسيفتي الطفل تقدرين تستخدمينها معني ما احتجت ليها وكنت باخذ بس الحمدلله ما احتجتها



اتنمنى اكون افدتج واسمحي لي على الإطاله

عنوني;12511008:
شي ثاني حبيت اضيفه

مثلا اذا ابنج سوو شي غلط حاول انج تشوفي إلي ما يحبه خخخ وتعافبينه فيه وخصوصا لو وصخ وله لعوز

اشوف بنتي قبل تحب تسبح الحين لا

بس من تسوي شي اقول ليها يلا حمام

تقول ليش

اقول لها ايه لانش لعوزتين وانين لازم تكونين نظيفه والماما ما تحب تشوفش جديه

والحين احسها من تلعوز على طول تروح تيب في الكلينكس وتمشش خخخ وقليل ما تلعوز

ما اقول انها مو ياهله وتلعوز نفسها

بس يساعد في انه الطفل بعد يتعلم النظافه

*ام وسام*;12511180:
انا كمان معاناة شديدة مع وسام هذي الايام .. اكييييييييد في احد وسوس له في اذنه انه قرب على الـ 4 سنين ..

وانا بعرف هذا العمر جنااااااااااان ... والله انا ابوه نصييييييييييييييح لين نتعب كل يوم بالمساء مافي فايدة وكل يوم ضرب
زوجب قالي الضرب هذا ما بيجيب نتيجة .. خلينا نجرب طريقة ثانية .. انتظرناه ولما بدأ الفن ... شاله ابوه جلسه بسريره وبنظره غاضبة قاله ولا حركة ... وجلس يبكي يبكي وبعدها استسلم ويريد ينزل وابوه يقوله لا ... الى ان جلس ربع ساعة وابوه قاله انا حبستك لانك عملت كدة واذا تاني عملت شي بحبسك مرة ثانية وقال اسف والحمد لله جلسنا طول المساء مرتاحين

جربي هذي الطريقة .. الحبسسسسسسسسسسسسس

<<um malak;12511267:
الله يهديه ويخليه ويحفظه لج ولابوه

اني بعد كل اعصب عليها معنى بنتي اصغرمن ولدش مااقدر اجود اعصابي اذا تسوي شي

لكن مو صوب ابوها اخاف ما يرضى عليها لان ههه ساعات اتمنى على طول يكون موجود عشان ما اعصب عليها

لان ادري ان هذا مو أسلوب حق تربيه صح والعصبيه والضرب يخلونهم يعصبون زياده ويضربون

لان اشوفها اذا اكلمها تعصب بعد او تضرب بنت عمتها مسكينه دابحتنها من الضرب والعض :mad:امفشلتني

يالله الله يهديهم ويخليهم ويكبرهم

بسمة أطفالي;12516319:
شخبار علااوي اليوم

وشخبار ام علااوي من امس

وشخبار عفسة الكراسي :)

بسمة أطفالي;12516335:
على فكرة ام علااوي ترى الموقف اللي سسوه فيني عيالي من يومين توني من اشوي منكلة واجبي اليوم

والباقي خليته لبكرة لان تعبت من قلب

للاسف ماصورت الحجرة قبل وبعد:sick: