:: عبث صغيري , وعصبيتي .. عطوني حلوول ..! ::

Za.Za;12508812:

صدق هالمرحله كلش صعبه اني بتي للحين ماوصلت لهالعمر اللي الطاقه تكون فيه متفجره بس اشوف الاطفال اللي حولي ويش مسويين من اهواااال ..

احس حتى لو شريتين العاب ولهيتينهم تظل فيهم طاقه يبون يطلعونها بشكل جريمه ..
بس انتين حاولي وياه مثل ماقالت بلوسموز بطريقه كرسي العقاب وان شاء الله تفيد ..

فعلا مرحله عمريه صعبه ..

كل شي يبون يتعبثون فيه ويجربونه ويلعبون فيه !!!

:confused: ...

,

بالنسبه للكرسي العقاب جربته قبل ..

مثل ما قلت بردي على بلسوميز ...

انقلب العقاب لضحك ولعب :worn_out: ..!

,

الله يعينا ويحفظهم ..!

ايه خيو بتفيد وياش واجد لوحة النجوم الين بدربينه للحمام لأن بنتي الحين مستانسة منها واجد تشجع تروح الحمام بس علشان أحط اليها نجمة

ام حمود 2005;12509028:
ايه خيو بتفيد وياش واجد لوحة النجوم الين بدربينه للحمام لأن بنتي الحين مستانسة منها واجد تشجع تروح الحمام بس علشان أحط اليها نجمة

يااارب ..

ان شاء الله تنفع ,

بعد شهر رمضان ببداء بأذن الله ..

رحلة التخلص من البامبرز ..!

رابنزول;12509145:

ام علاوي حاسة بمعاناتش وقاعدة اتذكر جرايم اللي تصير عندي

المشكلة ان احنا نعرف ان الضرب مو حل ولا احنا قادرين نتركه

الله يصبرنا ويهدي اطفالنا والطفل عنده طاقة الام صعب تطلعها منه كل يوم

انتظري عليه سنة وسجليه بروضة او حضانة حتى لو مايروح يويا بس

على الاقل بيغير جوو شوي

فعلا الضرب مو حل ..!!

وانا قلت على السنه القادمه بسجله على بالرووضه ..

وهو يرتاح وانا ارتاح من عبثه :) ..

,

ومشكووره على طلتك خيوو ..!

ياعمري نفس حالتي
امس غفلت عنها على الابتوب
دخلت غرفتي لقيتها ماسكه اللوشن الجونسن وكاتته على الرخام وزين انه ماجا الموكيت والا كان مايطلع
انا بنتي راعيت حوسه لدرجت الحمامات اسكرها دايم والمطبخ دايم مقفل وغرفتي صايره اقفلها
كنت اضربها ضرب مو طبيعي قبل بس مره ضربتها وكسرت خاطري ةتبت ماعاد اضربها
وبعد كل هالقرق خخخخخخخ
حاولي تشغلين طاقته بشي معين مثل الالعاب اللي تجي احجام كبيره
والاماكن اللي تخافين منها والشغل فيها كثير قفليها والحمد لله ماشرب الديتول
وانشالله ابنات مايقصرون معاك

ربيعيه;12509396:

الضرب الي اعطيتيه ولدك مو نتيجة عبثه نتيجة نفسيتك اكيد كنت مضايقه علشان كده تعاملتي معاه بهالاسلوب

لان اذا كنا معصبين مساكين لو يتكلمو بالزايد صرخنا عليهم

اما عبثه بالصابون اسمحي لي الغلط منك لانه من الادوات الي المفروض ترفع في رف عالي بعيد عن الطفل

وهذا وقت حركتهم واكتشافهم مانقدر نمنعهم ولا نعاقبهم لو طول الوقت لا تعمل لا تقول لا تتحرك بينفجر وبيكون عنده ردة فعل

فالافضل يكون با سلوب مثلا تقولي له جيب هالشيء جابه ورماه وهاي التصرف يصير عند اطفالنا وحنا عيب لا ترمي ونصرخ

المفروض نمثل اليهم الطريقه مثل علاو اعطيك كلينكس اذا قال ايوى تعطيه بايده وتقولي تفضل والطفل مع التكرار في كل شيء يتعلم

اسفه طولت عليك وتقبلي قرقرتي بصدر رحب حتى لو خارج الموضوع

خييو والله ما كنت مضاايقه ابدا ..

بالعكس كنت اشتغل وافصل لثياب وغسيل وهيك من الاعمال اليوميه ..!

وراح المطبخ وهو ديتول صابو غسيل الايدي ..

واخذه وفعل فعلته ..

وبعد الا صاار تضاايقت عدل واخترب مزاجي ..!!!

,

لانه طلعت لي شغله جديده متعسره وصعبه !

وثاني شي يعني الواحد ما يغفل عنه ثانيه لازم جرايم :confused: ..

,

هو مطييع بالغالب ..

بس الجرايم يسويها ويدري غلط حتى لما اطيح عليه مرات يشرد !!

,

وبالعكس حبيت تواجد بالموضوع ..

وبالنصايح والخبره :thumbs_up: ..!

سندريلا الكون;12509440:
ياعمري نفس حالتي
امس غفلت عنها على الابتوب
دخلت غرفتي لقيتها ماسكه اللوشن الجونسن وكاتته على الرخام وزين انه ماجا الموكيت والا كان مايطلع
انا بنتي راعيت حوسه لدرجت الحمامات اسكرها دايم والمطبخ دايم مقفل وغرفتي صايره اقفلها
كنت اضربها ضرب مو طبيعي قبل بس مره ضربتها وكسرت خاطري ةتبت ماعاد اضربها
وبعد كل هالقرق خخخخخخخ
حاولي تشغلين طاقته بشي معين مثل الالعاب اللي تجي احجام كبيره
والاماكن اللي تخافين منها والشغل فيها كثير قفليها والحمد لله ماشرب الديتول
وانشالله ابنات مايقصرون معاك

انا بعد كل شي اسكره !

بس عاد الواحد يغفل وينسى ...

,

عنده العاب الدنيا كبار وصغار وكل شي ..

يلعب شوي ويمل يحب يكتشف ويحووس ..!

,

وراح للصابون غسيل الايدي لانه محطون عند حنفية المااي ..

واقتنصه :confused: ..!

ويزعم يغسل ايده على الكرسي وغسل الكرسي ويااه!!

,

الله يحفظهم ويهدينا ويهديهم !

مشكووره خيتو ..

ام علاوي اسلوب الضرب خطأ معروف بس مانملك انفسنا لان تعب شغل وتنظيف وملاحقهم وفي النهاية دمار شاامل من كذا نعصب معاهم ونضربهم ضغوط الحياة تحكم ومن تجربتي كأم لطفلين ان اذا اعاملهم بهدوء يصيروا اهدأ بس ماعندي صبر وارد انتكس للضرب وهم يحبوا لفت الانتباه من مللهم ما بحط اللوم عليش او عليه الإثنين اليهم اسبابهم الطفل عنده طاقة يبغى يطلعها ومتملل والأم من التعب ماتتحمل تبغى المكان نظيف وتبغى الراحة وفي النهاية كل شي يبغى له صبر الله يلهمنا الصبر ونربيهم تربية صالحة والله يهدينا ويهديهم

السلام عليكم
عذرا عزيزتي بس الله عاطنش الطفل امانه يعني تحافظين على الامانه كذا؟
عندما تضربينه فإنك تبعثين برسالة له تقولين فيها تصرف هكذا أي بعنف عندما تواجهك مشكلة لاتحاول فهم الطرف الاخر..........
امضي الوقت بجانبه اقراي له قصة علميه الالوان الاشكال حاولي ان تمرحي معه لا ان تعتبريه مصدر ازعاج (لاتعادي الايام فتعاديك)
يقول امامنا ومقتدنا الامام السجاد في رسالة الحقوق (في حق الصغير)
وحق الصغير رحمته في تعليمه والعفو عنه والتستر عليه والرفق به والمعونة له.
مع تمنياتي القلبية بهدايهته.
فالبرعم الصغير عندما يريد ان يكبر لايحتاج الى عاصفة تقلعهبل هواء عليل...........

ايسمار;12509601:
ام علاوي اسلوب الضرب خطأ معروف بس مانملك انفسنا لان تعب شغل وتنظيف وملاحقهم وفي النهاية دمار شاامل من كذا نعصب معاهم ونضربهم ضغوط الحياة تحكم ومن تجربتي كأم لطفلين ان اذا اعاملهم بهدوء يصيروا اهدأ بس ماعندي صبر وارد انتكس للضرب وهم يحبوا لفت الانتباه من مللهم ما بحط اللوم عليش او عليه الإثنين اليهم اسبابهم الطفل عنده طاقة يبغى يطلعها ومتملل والأم من التعب ماتتحمل تبغى المكان نظيف وتبغى الراحة وفي النهاية كل شي يبغى له صبر الله يلهمنا الصبر ونربيهم تربية صالحة والله يهدينا ويهديهم

صحيح جبتيهاا عايشه الوضع تمام ههههه ..

نعرف انو الضرب مش اسلوب حضاري ولا صحيح !

,

لكن نلجاء له بعد الانفجاار !

الله يهدينا ويهديهم يااارب ..

,

ومشكووره حبي على التوواجد :)

ام مريم ملاك منار;12509660:
السلام عليكم
عذرا عزيزتي بس الله عاطنش الطفل امانه يعني تحافظين على الامانه كذا؟
عندما تضربينه فإنك تبعثين برسالة له تقولين فيها تصرف هكذا أي بعنف عندما تواجهك مشكلة لاتحاول فهم الطرف الاخر..........
امضي الوقت بجانبه اقراي له قصة علميه الالوان الاشكال حاولي ان تمرحي معه لا ان تعتبريه مصدر ازعاج (لاتعادي الايام فتعاديك)
يقول امامنا ومقتدنا الامام السجاد في رسالة الحقوق (في حق الصغير)
وحق الصغير رحمته في تعليمه والعفو عنه والتستر عليه والرفق به والمعونة له.
مع تمنياتي القلبية بهدايهته.
فالبرعم الصغير عندما يريد ان يكبر لايحتاج الى عاصفة تقلعهبل هواء عليل...........

حبيبتي ..

اكيد اماانه والعب معاه اقضي معاه اوقات حلوه ..

وبشكل او اخر هذا ولدي واحبه ..!

,

ما تدرين شكثر تضايقت بعد الموقف بشكل عام لاني ما احب اضربه ..!

بس صدر مني هيك لا شعووريا ..!

وقلت افتح الموضوع ابحث حلول والكلام الا قلتيه اعرفه 100% ..

,

كنت ابحثعن حلوول تلهي عن العبث بكل شي واي شي ..

عمووما شكرا لك تواجد ..!

أوركيدة السماء;12509697:

الجاهل العبيث عبيث من صغره الله يعينش ويساعدش عندنا وعندش خير

عندكم ولدي الله يهديه بهدايته يارب العالمين
من صغره عبيث في كل شي مايخلي حاجه ودون نظرات الخبث اللي دايم يناظرنا بها تقولي عين عمد يعني
ماخلى كهرب ماخلى نشاف ماخلى شامبو ماخلى كبت ماخلى ملابس الا لعب فيهم ماقصر علي واني طبعا ماعندي الا الضرب ثم الضرب ثم الضرب لاني عصبيه حدي حدي حدي وما اتحمل انظف واتعب وبعدين خمس دقايق ماكأني مسويه شي تتعب نفسيتي
وابوهم الله يسلمه مو دايم في البيت كل في العمل حتى خميس وجمعه والله تعبت ياام علاووووي اكثر منش
وولدي من النوع اللي يسلك حاله يعني حتى لو شلت عنه الاشياء الخطيره وادوات التنظيف
يتعلق كأنه سبال ويتطاول الاغراض ماخليت كرسي في البيت الا رميته ولا زال الامر كماهو عليه
الحين عمره 6 سنوات صحيح خف شوي عن الحركه والعبث في الاشياء لكن مازلنا نعاني منه ومن اخته
الله يهديهم يارب

وما اقول غير بيكبرو وبتنسي شقاهم شوي بس بتجيبي غيرهم وهذه هي الحياة

الله يعينش انا بعد يحط له كراسي ويركب ويطال الا ما يقدر يطاله ,

يقال انه هذا الشي ذكاء وفطنه هههههههه ..!

,

انا اجمع اجمع مو كل مره اضرب ..

الاشياء البسيطه تعدي ..

بس انفجااري كارثه ..!

,

والله يحفظهم ويهديهم يارب ..

ومشكووره كثير على المشااركه وطرح تجربتك F:

ام علاوي الله يهديهم .. ويخلف تعبتنا

احس انج تتكلمين عني .. تذبحني استكشافاته طاقه مو طبيعيه

يوم اللي اعصب عليه اضربه على ايده .. واذا بيسوي جريمه يطالعني ويضحك ويجود ايده على طول هههه فديته سيدون

طبيعيه عصبيتش خيو .. طول اليوم يشتغل في الكهرباء في المطبخ في الثياب في الرسيفر في في في ولايخلص الشغل اوفرتايم .. وخاصه اذا ابوه مايتواجد بكثره ..

اطلعي به روحي بيت ابوش .. اني من يتعبني اطلع به اريح عند امي لان احس يبي ليي بريك قوي وياه

الله يهدي الجميع

هههههههههههههه سوري يعني
بس مادري ليش ياتني الضحكه
مو متخيله الكرسي

الله يعينج صج
انه بنتي سنه و3 شهور ومن الحين تفر راسي فر

عندناا و عندج خيرر ياا أم علاااوووي

و هذي الطفووولة و هذي شقااوتهاا

بس انتين استهدي بالله و صلي ع النبي و حااوولي قدر الامكاان اتسيطرين ع اعصااابج و اتقللين من الضرب

لأنه الضرب بالمرة ماا منه فاايدة و لاا نتيجة بالعكس يزيد العنااد و الشقاااووة

و الحل الووحيد الصبر و طوووولة البااال

و الدعااء الداائم لهم بالهدااااية و التووفيق

الامهات ذكرو كل اللي بقوله ، بس عندي اضافة ثانية .


حركة حبس الطفل في غرفة لوحده ، و قفلها عليه ، جدا جدا خطيرة على عاطفته و نفسيته .. لأنه لحظتها بكون في حالة خووف شديد من وحدته و من الموقف اللي صار فيه ، و قلق لوضعه ، و متشتت و يمكن تحضره حالة الندم على اللي سواه لكن و لا طريقة يقدر يوصلها بها مشاعره لأمه و هي شديدة الغضب معاه . تقدرين تتخلين اي قد صعبه عليه هالحالة ؟




بالاضافة الى انه على قولتنا يمكن ينزهق ، و الله لا يقوله تصيده حالة ما يفارقه للأبد من ورا الزهقة وووواجد قصص جذي .



....................


اني ولدي الكبير ماشاء الله هادىء و ركوود و ما يعصبني الا نادرا الحمدلله ، لكن الصغير مطلع عيووني كل يومه ينفر اشياء و يخرب و مستحيل يشوف كاس و ما يكسره و يكب الا فيه ! و هو نتفة .. و بصراحة صدق صغير لكن اول ايام الا صار جذي ضربته ، و بعدين قعدت مع نفسي و فكرت و قررت انه اترك الضرب و امسك نفسي قد مااقدر ، تدرين ليش ؟


لأنه وحدة من قرايبنا عندها ولد جا بعد 3 اولاد ، لكن هالولد بالذات طلع عيوونها المسكينة ، واجد حركي و عفاس و يختلف عن اخوانه في كل شي ، و هي تضربه ما عندها حل غير الضرب ، و تعرفين الضرب يشفي الغليل حتى لو في طفل !!!!


و النتيجة انه بالبحراني الفصيح ( تشوولع ) و صارت من تشوووف ام تضرب ولدها تنصحها و تنهيها عن الضرب و اني من ضمنهم ، مو لأنها شافتني اضرب لأنه اذا بضرب يكون بشكل سري هههه ، قدام و لا احد حتى زوجي ، بس لأنها لاحظتني بعض الاوقات اشكي تعبي من ولدي الصغير لأمي و احط عليه :( ، تقول لا تطحنين عليه مثل مااني طحنت على فلان و اختسف ، بالاضافة الى انه كل اللي حواليش بتظل ببالهم فكرة انه هالولد شيطون و متعب و يسبب المشاكل و النتايج كلش مو حلوة في حق الطفل ، و ممكن ما ترضينها له ! و هذي نصيحة لكل الامهات ..


و الله يخلي اولادنا و اولادكم و يهديهم .