حياكم في تجمع حوامل وامهات قطر لشهر رجب لعام 1431ه 2010م

هلا فيج حبيبتي .... :):)

صباح الخير ،،،

اول شي بقولكم عني اليوم وبعدين برد عليكم
اليوم رحت بيت يدتي كالعاده جمعتنا وطلعت من وهل عال9 رحنا انا واليهال وريلي بيت هله لانهم بيسافرون اليوم الفجر
المهم كنا كلنا هناك حريم العيال والعيال شوي الا اختفو اليهال وخوات ريلي ال2 الصغار وياهم
عقب شوي جات اخت ريلي قالت لنا كلنا يالله تعالو الغرفه الي هناك
رحنا الا كل اليهال لابسين كبابيس عيد الميلاد ونفافيخ وشموع وكيكه كبيرة على هلو كيتي
لان عيد ميلاد بناتي يصادف الاحد الجاي فديتهم بيكملون سنتين وهم بيكونون مسافرين يقولون خاطرنا نسوي لهم
والله استااانست واستانسو اليهال كلهم وسوو شراخيه وصورناهم
والهديه عبارة عن سيكل حق كل وحده من البنات واسويرة من محل سمو
ماقصرو فديتهم :)

الورد :
بخصوص ولد ولا بنت ، اول شي هاي نعمه ورزق ونصيب من رب العالمين ، والحمدلله بنت ولا ولد مب لازم مكس اهم شي عندج ياهل صاحي وكامل وسليم تفرحين فيه يقولج ماما يحسسج بالامومه هاي بروحها نعمه
والله في ناس يذبحون نفسهم على ياهل واحنا نتشرط
وبعدين مثل ماقالت لولو الابو هو الي يحدد يعني ولدهم السبب هع
والبنت نعمه وبالعكس تكون حنونه عالام وصديقتها وبركه
تعرفين انا واخواني وخواتي كلنا بجرنا اولاد الا اخوي بجره بنت كانت والله من درينا استانسنا واااايد بالعكس كلش عادي والحمدلله عنده ولد وراها على طول
وكل امر المومن خير والخيره فيما اختاره الله
شالفايده يجيني ولد مريض ولا معاق ولا اي شي
اهم شي يكون
طفل كامل الخلق والخلق والحمدلله على كل حال ،
واهم شي انتي نفسج تكونين مقتنعه ومومنه وراضيه مب مهم الناس لان اللي يفكرون جذي اسمحيلي
بس عقلهم صغيييير جدا وسطحيين وتافهين بعد وضعف ايمان انزين كيفي معصبة انا
وقولي في ناس مب لاقين وانا عندي هالقمر حبيبتي بنتي
وقولي الحمدلله على النعمه ،
انزين بقولج انا وحده من ربع الدوام لما درت اني حامل الحين الا تقولي مب تسوينها وتجيبين توم قلت لها الي يجي من الله عادي ماعندي اعتراض
تقول لا لان ان جبتي توم بتجيبين بنات وكفايه عليج توام البنات الي عندج!!!
اشدخل ؟؟؟
قلت لها الحمدلله عندي ولدين وبنتين وان جو بنات الحمدلله وان كانو اولاد الحمدلله ( يعني الحين اشدخلج انتي ) قلت لها لاتقولين جذي بنت ولا ولد ادعي بالطفل السليم والذؤية الصالحه خل الله يرزقج صفي النيه هي معرسه من 8 سنوات تقريبا وماعندها بيبيز .....
واصلا هالمرة فيني بيبي واحد

اليجنت :
احس ستايلج كان حلوو ونعوم عليج بالعافيه ،والحلاق عندج الي فالستي لما كانو عيالي الاولاد صغار كنت احلق لهم هناك .....

بدور:
ردو عليج البنات بس انتي ليش مخليتهم هالمده مرة ثانيه ع طووول اخذيهم ....

قمر:
حبيبتي حاولي ماتطلعين فترة الظهر وترهقين نفسج ودوم حطي حبة كافي في الشنطه احتياط لما تصيدج لوعه او دورة ، انا لما اكون حامل اي طلعه فالشمس تتعبني واااايد ،، وماعليج شر ، واحتياط سوي تحاليل شامله يمكن عندج نقص حديد .....