طفلك حركي جدا ما يقعد طفلك متى تكلم طفلك دايما امام التلفاز ادخلي وقلولي لي

F: بانتظار تجاربكم و خبراتكم

هلا خيووو

اني وديته حق دكتور سمع اسمه امين الساعاتي

وسوا ليه فحص وقال لينا سمعه سليم 100% ومافييه شي كلش

ويوم وديناه حق دكتور مال نطق قال لينا يمكن لانه جاي قاصر من جدي بيتأخر في النطق

عادي حبيبتي انا ولدي ماتكلم الا بعد السنتين وما احد يفهمه لازم اظلني اترجم للناس واحرف طايره واحرف ملووحه يعني <كتاب .تتاب -كت كات .تت تات -عصفر. عفثول>الحين عمره 5سنوات الحمدالله الله يحفظه واخوانه ظليت معاه لين تعدل حرف الكاف والكلمات تعدلت بسباقي عليه شوي والايام كفيله بتعديله انشاء الله لاتخافين الاطفال قدرات ولي الثان عمره سنة و5 اشهر مامشى لين الحن وخليت عادي دامته ماعنده شي في الكالسيوم يمشي متى ما راق بدا يتوقف وحبه حبه ياشيخه يمديهم بس الله يديم الصحة على عيالي وعيال المسلين وشفي كل مريض قولو آمين.

حبي الغالي مبروك على سلامته بس زين سويتين وديتنه احس من توسوسين و تضربين اخماس فس اسداس
ترا اني عندي ندر اني اصوم 30 يوم ادا طلع سمع ولدي سليم والله حبيب قريب ما قصر و هالاسبوع ببدأ اصومهم جنني هالطرزان عقب ما رخصوا من المستشفى صار دليع .... مفصخ و بس يركض و يصرخ هوووو هيييي هاااااا
صدق احس الاولاد يتأخرون مو مثل البنات بس بعد فروق فرديا مثلا اني ولدي يعرف يركب على السرير بنتي يمكن لعمرها سنتين تخاف على عمرها تركب على السرير احس ان في فرق من هالناحية و هو مجنني من الربو و الصخونة و الزكام ينزل في صدره من جدي خلاني ما اثق في صحته ابدا مناعته ضعيفه واجد يوم كنت حامل فيه كله مرقدة سكري مرتفع مرتفع و احس هدا اللي اثر على صدره


الفيروز1399
صحيح اختي الله يطمن قلبش و يخلي اليج اولادك و يبلغج فيهم يارب و اولا الناس كلهم
لا على المشي اني مع انه حركي بس مشه عمره سنة و 3 شهور مع انه حبه صغير 8 شهور وولد اخوي ما حبه الا شوي و مشى ماشاء الله 11 شهر
يعني اهم شي الكالسيوم و فيتامين د اللي من الشمس اللي نص اولاد الخليج يعانون نقص منه لان حرارة الشمس تمنعنا نطلعهم

في انتظار ردودكم يا امهات

وديت بنتي اخصائية النطق والسمع والحمدالله الحمدالله ماطلع فيها توحد .... بس فيه فرط حركة ... يعني فيها فرط حركة واللي يأدي لقلة الانتباه عشان جذه بنتي ماتفهم وتستوعب اوكي فيها نشااااااط ماشاء الله زايد فما تبا تيلس حتى كل حد يقولي نبا نشوفها مره جالسه .... والحين يعطونها كلاسات والحمدالله اجوفها احسن تتعلم انا اقول يمكن هالاشيا انا اقدر اعلمها بس يمكن عشان ما افضى اشتغل ارد وبنتي الي خمس شهور مثل سوبر قلو من ارجع ... ماقدر اعطي الكبيره كامل حقها .... مادري بس حبيبتي الحين تستوعب وهدت الحمدالله بس موو كثير بس احسن الحمدالله والله يفرحني فيها يارب ادعولها ...

without_horizon الحمد لله على سلامتها .... و ما عليها شر ..... هالدكاترة يشلعون القلب و الله

تصدقين دكتور عندها هو من العايلة الحاكمة ادن و انف وحنجرة كنت موديه ولد لادنه يوم قالوا ما يسمع وو طلع فيه دكتور قديم الف عيب قال يحتاج سماعات ووو و الله لا يعود الشر

قال لي يسمع من حركاته .... بس بعد تاك
ي سوي له اي بي ار المهم و في نفس الوقت قال اختي ولدج ما بيتكلم بسرعة اللي هايبر و يتحرك بهالطريقة ما يتكلم بسرعة

بس انه بنتظر الين سنة و 8 شهور يعني لرمضان ادا ما تكلم بوديه و بدعي من الشافي المعافي و اللي خلق له لسان و ادن يخليها يتكلم

و احس من تجربتي كمدرسه انها فروق فرديه يعني تيج وحدة لسان طويل وش طوله و تقولين لها حلي يا ابنتيه تقول معلمة ما اعرف و تيج وحدة ما تنطق ما تتكلم و تشوف ورقتها تقول لين ما شاء الله
بس كام طبعا خايفة عليه و ميته خوف بصراحة

بس خلي بنتج على طول في حظنج و تعاملي معاها معاملة كبار يعني عطيها اوامر روحي ييبي الكلينكس يبي الرضاعة حسسيها بالثقة بنفسها

ترى الثقة تصنع المعجزات

ايي خيوو without_horizon صح كلامش

اني بعد قالوا ليي الجااهل الحركي مايحط باله في شي غير اللعب والحركه

وصدق الحين اشوف حمود واجد هدأ عن قبل وصار ينتبه حق كلشي

بس سالفة الكلام الا مو راضي يتكلم خخخخخخخخ

متى يتكلم خاطري اسمعه يقول كلام هههههههههههههههههه

مش عيب ان الطفل يكون حركي
لكن العيب ان لو زادت عن حدها
اهمله فهذا راح يأثر على طفلي
في التركيز ولما يقل تركيزه راح يقل ذكائه
وتفكيره
لذلك يا اخواتي على كل ام لما تكون حركة
طفالها زايده تعرضه على طبيب
وهذا مو عيب حتى تطمن
الطبيب راح يقولك اذا حركته طبيعيه ولا زايده
اذا زايده راح يكتب لك علاج لتقليل الحركه
وبذلك راح يركز اكثر ويفكر مضبوط
وشكرا

حبي الغالي بيتكلم بادن الله تعالى .... بس علينا نجتهد و نحط بالنا بالدعاء و الملاحظة و العلاج و كلام النسوان

لان كلام النسوان الامهات يعني الجدات يجي عن خبره طويلة في تربية الاولاد و الاحفاد و بنات الخوات وووو

المهم سوي نفسي قطعت التلفزون عنه .... اللهم الا وقت الاكل نشغل له بارني و يقعد كانه صنم قدامه ما يتحرك و حتى الاكل ينقع في بوزه بالغصب يبلعه

ثاني شي اكلمه في وجهه و اركز قمنا نسمي الحليب دودو و نسمي اليه بعض الاشياء البسيطة و اوجه اليه اوامر عشان اهم شي المخ اهم من تأخر النطق يعني جيب لي كدا و كدا تعال ورايي نسويه كأنه عود من بعده بيبي صغير و هو كبر

ثالث شي نطلعه يختلط ايا الناس

اليوم اختي وبتها و اخوي و مرته جاينا ... فقام يا زعم يستحي منهم يطلع و يدخل .... فقالت لي اختي انه واجد تغير صار يحس بالناس اللي حواليه اكثر و خاطره يندمج

و طلعت عنه و لحقني قال لي مممممممما بدون ماما بس مممممممممممممما كانه غنمه حبيبي هالولد

و قال لامي بعد اوووودوووووووا

بس تطور زيادة في الدكاء الحركي ما شاء الله عليه عكس اخته الحجية البارحة حاول يشجح من السرير و ركب فوق ظهر سرير امي جنن امي جنون و قالت لي تعالى ولدش هدا من الشطانة ما يتحجه متشبلي فوق السرير

والله يارب يسمعني صوته

اعلمه هاليومين الادان ان يحط اياديه فوق اداينه و يقول الله اكبر الله اكبر

بس لقط هوو يحط اصابيعه داخل اداينه و يقوووول اااااااااااا ااااااااااااااااااااا ييييييييي ييييييييي بس ماعليه الانسان يتعلم بالمحاولة و الخطأ

احلى من الورد صحيح اختي في حبوب تهدأ ...... تصدقين ان انا و زوجي بطيئين الحركة زوجي من النوع الكسوول اللي ما يتحرك ابدا بس يتكلم واجد وانا لا حركة ولا كلام هدوء

بنتي طلعت على ابوها ما تتحرك بس همها السوالف و المشاكل و هاليومين الفتن مهتمة فيهم تساسر و تقول خبر تفتن على الخدامة

بس هالولد خالط اخواني كل واحد ماخد منه ميزة من اخوي العود ماخد سرعة المشي و من اخوي الوسطي ماخد الهدوء و الوسامة و الابتسامة و من اخوي الصغير ماخد التسلط فوق الطاولات و الاسرة .....

يله اللي يدخل يقول هالدعاء اياي

اللهم اشف كل مريض اللهم عاف كل عليل اللهم فرج عن كل مريض اللهم انت الشافي انت الكافي انت المعافي انت الدى لا ترد سائلا بك انت يا الله و بشفاءك و دواءك دوا ولدي و اولاد كل من يقرأ معي هدا الدعاء وحدك طرقت بابك يا الله يا سميع يا مجيب ثقتي بك ياربي وليس بسواك

بانتظاركم اخواتي ....

اليوم مسكين رجع صخن بس قاعد يحاول يقول مممممما ممممممما

و اليوم بدت اول يوم اوفي ندري لاني ندرت صيام 30 يوم ادا طلع سمعه سليم .....كل ادن 15 يوم واليوم هو اول يوم هو يعني مو شرط قبل رمضان لا على طول العمر بس الله يقدرني و اوفيه بسرعة

و الله يسمعني صوته و هدرته و لغوته و يبط راسي و يندرني من الكلام و انا امل منه و ربي يخليه قاريء للقران الكريم و حافظ له يا رب

اللهم شاف كل مريض و اطلق لسان ولدي و كل ولد و بنت يا الله يا سميع يا مجيب

للهم امين