العرائس الجزائريات..هنا سيكون ملتقانا..

شمعة الجزائر;12184582:
السلام عليكم
وشراكم بنات بلادي الزينات
اول حاجة نحب نباركلم كلكم وربي يتمملكم على خير ويجمعكم بازواجكم
ثاني حاجة انا شفت هذي اللمة الحلوة ماشاء الله من فترة وكنت مرة على مرة نضرب طلة واليوم قررت نسجل عجبني المنتدى وفيه بزاف جزائريات وزيد هاذي اللمة الحلوة
مع اني مشغولة مع الدراسة ولاامتحانات..بنات ادعولي ربي يوفقني وينجحني

بصراحة انا منيش مخطوبة بصح المفروض راني معاكم دركا مخطوبة ونجهز وفرحانة
بصح ربي ماكتبش ....:'(

معليش بنات منيش حابة نكثر عليكم الهدرة ونخسرلكم القوسطو نتاعكم
منبعد ان شاء الله راني نرجع ونكمل

المهم الف الف مبروك ليكم كامل ربي يكملكم ويهنيكم مع ازواجكم

ssamou19;12184661:
مساء الخير شمعة الجزائر و مرحبا بيك بيناتنا و ماتتقلقيش ختي راكي قلتيها من المفروض راني مخطوبة بصح ربي ماكتبش ايلا كان من مكتوبك راهي كملت فرحتك بصح نقولك و عسى ان تكرهو شيء و هو خير لكم ....و هذي ماكاتيب الله ماكيش عارفة الخير منين يجيك و ان شاء الله ربي يكتبلك واحد خير و تضوي شمعتك يا شمعة الجزائر .....و ان شاء الله ربي يوفقك في قرايتك و ينجحك دورك راكي في امتحانات ركزي فيها و الباقي كلش يفوت و يجيك ولد لحلال ليسر خاطرك

شمعة الجزائر;12184776:
شكرا ليك اختي سامو على الرد
والله غير كلامك دخل في خاطري
راني مؤمنة بقضاء الله واللي كتبها ربي فيها الخير
وحكايتي باختصار هيا انو كان فيه مشروع خطوبة بصح للاسف اهلي رافضين فكرة الخطوبة تماما وانا مازلني نقرا
وحتى كي نكمل قرايتي يعني بعد 3 سنين رايحة تكون كاينة بزاف عوائق لهذا الزواج
بصح راني راضية باللي يكتبهالي ربي والحمد لله راني شادة في ربي ودايما ندعي ربي يسهلي ويكتبلي اللي فيه الخير ويفرحني
و الواحد مايعرف واش رايح يصرا منا لغدوا ومايعرفش كيفاش حتى يجيه الفرج و تسهل الامور
يارب

ḆŌ₦Ťầầ ĚĽЗ§ẩŁŁ;12187449:
شمعه حنونتي
اسمحيلي نهدرلك حاجه
انا زوجي
دوق عندي معاه 15 عام نعرفوه و13 عام مارياج
تعرفي لو كان نقلك خطبني اكتر من 15مرات وهو الي روتور الي رورتور:worn_out:
وبابا يقولووه لالالالالالالالالالالالالالالالالا
بنتي ما تدهياش لو كان واش ما يصرا
علاش
باسك كنت صح صغيره يعني عندي 17سنه وحبينا بعضانا
وقعدنا عام كيف كيف ومبعد كملت الباك
راح جاب مواليه تاعو من الدزاير(احنا ساكنين في غزه)
وانا خليت عمامي ويما يقنعوه
وهكذا تخطبنا ومن بعد بعام تزوجنا
تعرفي كل شي مكتوب والله انا قلت جامي نديه بابا راسو يابس وكان حا بيخليني
نروح نقرا عند عمي في المانيا بصاح الحب واش يديرررررررر
وهكذا خلاص تزوجنا
اللي نقصدوه حبيبتي لوكان يحبك صح يصبر عليكككككك
ربي يجمعكم في الحلال:L:

ssamou19;12184855:
الوالدين ديما يشوفو بنتهم مازلت صعيرة على الزواج و سيرتو كي عدتي تقراي يعني مازال قدامك حوايج اهم من الزواج ...و والديك يخمو كي والديا حتا انا لخطرا لولة ماقبلوش بيه قالولو مازالت تقر و كملت و عاود رجع قالولو مازالت صغيرة و حابة تخدم كل خطرا يديرولو سبا بصح كي عاد مكتبهولي ربي سبحانو راني رانا مخطوبين و الحمد لله و دارنا فرحانين بيه و عاجبهم و قبل كلنو يتكسلو عليه المخلوق علابيها حنونة قتلك ماتعلرفي الخير منين يجيك .....3.ممكن سؤال هذا لي خطبك تعرفيه من قبل

ssamou19;12185058:
هههههههه عرفتك مالا حنونة ديري كيما انا بقيت معاها 12 سنة حتان فرج ربي و قبلو دارنا يسناك تكملي قرايتك و مبعد اي تبانلك شحال من طريق ماكيش عارفة واش يسرا منا لغدوا ان شاء الله يكون من مكتوبك حنونة و يفرح قلبك ....كملي انتي قرايتك و من بعد كي تكملي قوليلو يزيد يرجع يهدر من باباك و يشوف واش يقولو لخاطر والديك دارو السبا يالقرايا انا و الله قعدت معاه 12 سنة حتان قبلو انا تاعي سامط بقى يانسيستي قالولو تقرا ستنا معايا و بقينا كيف كيف حتان كملت قرايتي و مبعد قالولو صغيرة و حابة تخدم بقينا كيف كيف عاود رجع لبابا قالو معليش نحط لكلمة و تبقى تخدم و نسناها حتان تكبر ....هههههههههه مالقاش بابا راسو معاه ....ابقاو مع بعض و ماتفشلوش من اوول محاولة ديروها ايلا تحبو بعضاكم ان شاء الله تتغلبو على كلش

السلام عليكم ورحم الله وبركاته..

حبيبتي شمعة والله كلنا عدينا على هد المشاكل..

انا خطيبي 3 سنين وهو يخطب فيا..

وبابا يرجعوا..

في الاول كي قالتلو يما لبابا بلي راهو جاي ماحابش يشوفو مام با..

وقاللها ماكالاه يجي مازالت بنتي صغيرة وتقرا..

وبعدها بعام كل ما يحب يقدم نفس الشي ما يحبش...قاللها حتى تكمل قرايتها..

وثالث عام بالسيف اقنعناه يهدر معاه...

ولا دارلي 100 سبة..

القراية..مع اني العام الجاي ان شاء الله نخلص..

وبعدها قال ما عندوش السكنة..

وانا قلت عادي نكريو كما الناس الكل..

ونتعاونو ونديرو الدار مع بعض..

بزاف ناس دارو هكدا واحنا ما زلنا صغار..


المهم بسيف قبل وجا خطيبي مع ابوه وهدرو مع بابا..

وقال لهم خلاص..بصح ما يصير والو حتى نهار تكمل قرايتها..

يعني هدرة برك..وهو يعتبر حكمني وخلاص..

وماكاه الخروج مع بعض..وما كاين والو..حتى الخاتم مازال ما لبسناهش..

ودرك خطيبي او ناوي السمانة الجاية يجي يهدر معاه على الفاتحة..

امه حابة تعمل الفاتحة..وتجيبلي الخاتم..وحتى ماما حايبة..

بصح بابا راسه خشين..مع انه هو اوسي 5 سنين وهو يضرب باش ادا ماما..

انا متفائلة..بصح خايفة..

وهو قالي ان شاء الله انقنعو..

والله مسكين ساعات يعز بيا..



ادعيولي ربي يسهللي ..ويقبل بابا..


ابقاي متفائلة حبيبتي..

وما تخافيش انتوما ابقاو حاكمين في بعض..وخليو عندكم ثقة في بعض..

وكاين بيت شعري يقول..

ادا الشعب يوما اراد الحياة.. فلا بد ان يستجيب القدر..


يعني ادا حبيتي حاجة بزاف..ربي يمدهالك..

وابوك اكيد يقتنع كما اقتانعو اللي قبلو..


بالتوفيق..

دمتم بود..

اختى الهاشمية يعطيك الصحة ومشكورة . على حساب واش قلتيلى عوايدهم مختالفين شويا
احنا بالجمعة ندو كل انواع الحلويات التقليدية الشابة وكذلك الطمينة ولعروسة عدنا تكسى كل اهل العريس يعنى والديه خياتو وخاوتو ولكبارات نتاع العايلة نتاعو
ومادا بيا لى عندها افكار شابة حول هدى العادة تقولنا يعنى مقترحات واش نمدو
وربي يوفقنا كامل ان شاء الله رانى ننتاضر فى تفاعلكم

صفاء الحنونة;12189690:
اختى الهاشمية يعطيك الصحة ومشكورة . على حساب واش قلتيلى عوايدهم مختالفين شويا
احنا بالجمعة ندو كل انواع الحلويات التقليدية الشابة وكذلك الطمينة ولعروسة عدنا تكسى كل اهل العريس يعنى والديه خياتو وخاوتو ولكبارات نتاع العايلة نتاعو
ومادا بيا لى عندها افكار شابة حول هدى العادة تقولنا يعنى مقترحات واش نمدو
وربي يوفقنا كامل ان شاء الله رانى ننتاضر فى تفاعلكم

حبيبتي صفاء ..

حكينا على هدا الموضوع بالصفحات اللي فات..

والبنات ماشاء الله حطو افكار رووعة..

شوفيهم..

واكيد رح يزيدو يجاوبوكي هنا ان شاء الله..

دمتي بود..

البنات حبيت تعطوني افكاركم لتعطير حوايج جهازكم..


انا نحط في الفاليزات الصابون..

باش تقعد فيهم ريحة الصابون..

وانتوما؟؟؟؟؟؟

ssamou راني لاباس الحمد لله

طريقتك هايلة :thumbs_up: يعطيك الصحة و ان شاء الله نجربها بصح وشنو المينيدو ^o) مافهمتوش هههه

لونا انا تاني نعمل الصابون في لي فاليز طرقة ناجحة وفي بعض الاحيان نبخ العطر في الفاليزا ونعاوض قشي ونغلقها

ღ MiMi ღ;12190136:

lona ربي يسهلك حنونة و يقبل باباك ادعي ربي و ما تخافيش باذن الله كل شي يجوز

و ما تنسايش تبشرينا و تفرحينا معاك :)

تعرفي البارح كنت نخمم في موضوع التعطير و لقيت موضوع شباب هنا و ان شاء الله ندير منو

http://forums.3roos.com/showthread.php?t=427010

عجبتني الفكرة الثانية

mais دوماج ما خرجوش تصاور انا خممت نحطهم في تول و نرميهم في الخزانة
و بين الحوايج و في الفاليزات
كيما هكدا

و ان شاء الله البنات يزيدو يعطونا افكارهم

صفاء البنات هدرو على هذا الموضوع حوسي في الردود السابقة و درك تصيبيهم

و قالو افكار شبان

شكرا حبيبتي ميمي..

الافكار اللي في الموضوع مليحة..

انا عاملة اكياس بالاورجونزا..

وجبت صابونة دوف قطعتها قطع صغيرة..وحطيتها في الاكياس..

وحطيتها في الخزانة..

وتقدري اوسي تحطي الصابون كامل ومغلف..

يعني اللي شريتيه للجهاز..

حطيه مع الحوايج باش يعطرهملك..

ssamou19;12190536:

مساء الخير عليكم ان شاء الله راكم كامل بخير ....ميمي واش راكي حنونة ...لونا ربي يسهلك ان شاء الله و تكمل فرحتك و يقبل باباك ان شاء الله ادعي ربي و صلي ركعتين و ادعي .....لاجلك سوف اتغير ...الحمد لله ليعجبوكم لمودال علبالك هذو حيجابات تركية و كاين بزاف حوانت يسلعو من الترك ايلا تعرفي كاش واحد فيهم وصيه و اديلو المودال كوبيه في التلفون و اديه يشوفو بالاك يجيبلك ايلا لقا مام انا عجبوني كي عاد مافيهمش الاكسسوار بزاف ان شاء الله نلقاو كيفهم

بالنسبة لطريقة تعطير الملابس عندي 2 طرق مضمونين و الله كل مانفتح قشي تخرج الريحة من لفاليزا تقول هذا وين رشيت الريحة.....شوفي انا جايبة لقطن لمدور لينديماكي بيه و ندير فيه ريحتي انا مدايرا نوا المهم تكون ريحة مليحة و معمرة لقطن شحال من وحدة و حاطتهم بين القش يعني مطبقة القش و حاطة بين التطبيقات لقطن و مبعد نقفل الفاليزا و الله يالبنات الريحة قاعدة شادة في القش لخاطر الفاليزا مقفولة و مام في خزانتي دايرتها بين حوايجي روعة ......و كاين الطريقة هذي تاني روعة تجيبي نفس لقطن و ديري فيه المينيدو ليتشلي بيه القش باش يبقى يفوح بريحة مليحة ديري في لقطن و لا ديري 2 قطن و ديري المينيدو بيناتهم و حطيه في القش انا هذي الطريقة دايرتها في ليكوفرولي و الكوات و الزورة و تاني الريحة شادا في القش ....و معروف المينيدو ريحتو تقعد في القش
بصح انتي ماتخفيهش بالما ديريه خاثر

و هذا المينيدو ليمعرفاتوش كاين كامل الروايح لافندر خوخ ياسمين انا ندير بزاق قطن و حليب ريحتو هايلة كي تروحو تشريو شمو و خيرو الي تعجبكم لاخطر ريحتو قاوية تشميها مام الشكارة مقفولة و كاين قرع كبار و صغار

والله فكرة رووعة سامو..

انشاء الله نشري وحدة ونعملها..

شكرا..

لاجلك سوف اتغير;12190646:
لونا انا تاني نعمل الصابون في لي فاليز طرقة ناجحة وفي بعض الاحيان نبخ العطر في الفاليزا ونعاوض قشي ونغلقها

فعلا طريقة الصابون ناجحة جدا..

ونموت على ريحة الصابون في الحوايج..

شكرا حبوبة..

ssamou19 طريقتك جيدة يا سلام عليك افكارك دائما جيدة

منين راكي تجيبيهم

ssamou يعطيك الصحة تعبتك معايا خلاص فهمتو و عرفتو ما كنتش نريزوني ههههه


lona فكرتك تاني مليحة يعطيك الصحة

و موالفة تاني كل ما نجبدو صابونة جديدة نخبي الكارط تاعها و نحطو بين القش و دايما نوصي ماما ما ترميهش

لأجلك سوف أتغير بصحتك حنونة المهم كي عجبك و ربي يسهلك في الحوايج لي بقاو

بصحتك حنونة القفطان تلبسيه بالصحة و لهنا و مس خسارة فيه ايلا عاد عاجبك ..هههههههههههه و الله فكرة الريحة جاتني من راسي كنا في عرس في الصحرا و من عادتهم يديرو لبخور انا مانحملش ريحتو تجيني ديقة و نتخنق مانعرف انا برك و لا كاين ليكيفي لخاطر شفت الناس كل نورمال غير انا ليضاقت نفسي و هذ لبخور ريحتو قاوية بزاف و كنت هازة في الساك بوشات تاع ماكياج و الريحة درت شوية في يدي و حطيتها على نيفي و مبعد تفكرت عندي لقطن درت فيه و قعدت نشم و كي حطو لعشا حشمت نرمي لقطن في السنية حطيتو في صدري ......... و الله يالبنات كي روحت لدار و بدلت قشي و انا نحي طلعت الريحة و السوتيان يفوح بالريحة من لتم عدت ندير في لقطن و نحط بين القش و نجحت معايا الفكرة ...

لونا جربيها و الله تلقاي نتيجة هايلة انا تاني كنت ندير صابون بصح كاين ليمتبقاش ريحتو بزاف ابار واحد بقات ريحتو شادة لوقت طويل بالموليف جاي ارونج و مرسوم تشينة ...هذا تاع الصع ريحتو بقات في قشي و مام الريحة هايلة

ميمي تعبك راحة حنونة

ღ MiMi ღ مشكورة اختي وربي يسهلك امورك حبوبتي

لاجلك سوف اتغير;12190771:

لبنات اليوم جبت قرفطاني من عند الخياط بصراحة عجبني وانشاء الله نوريهلكم هو غالي لكن ماشي خصارة

بالصحا والهنا حبيبتي..

بما انه عجبك فاكييد مليح بزاف..

وماخساراش في روحك..

حاولي توريهولنا باش نشوفو الموديل..

ssamou19;12190970:
بصحتك حنونة القفطان تلبسيه بالصحة و لهنا و مس خسارة فيه ايلا عاد عاجبك ..هههههههههههه و الله فكرة الريحة جاتني من راسي كنا في عرس في الصحرا و من عادتهم يديرو لبخور انا مانحملش ريحتو تجيني ديقة و نتخنق مانعرف انا برك و لا كاين ليكيفي لخاطر شفت الناس كل نورمال غير انا ليضاقت نفسي و هذ لبخور ريحتو قاوية بزاف و كنت هازة في الساك بوشات تاع ماكياج و الريحة درت شوية في يدي و حطيتها على نيفي و مبعد تفكرت عندي لقطن درت فيه و قعدت نشم و كي حطو لعشا حشمت نرمي لقطن في السنية حطيتو في صدري ......... و الله يالبنات كي روحت لدار و بدلت قشي و انا نحي طلعت الريحة و السوتيان يفوح بالريحة من لتم عدت ندير في لقطن و نحط بين القش و نجحت معايا الفكرة ...

لونا جربيها و الله تلقاي نتيجة هايلة انا تاني كنت ندير صابون بصح كاين ليمتبقاش ريحتو بزاف ابار واحد بقات ريحتو شادة لوقت طويل بالموليف جاي ارونج و مرسوم تشينة ...هذا تاع الصع ريحتو بقات في قشي و مام الريحة هايلة

ميمي تعبك راحة حنونة

والله رب صدفة خير من الف ميعاد..

ساعات بالصدفة نتعلمو حوايج بزاف..

شكرا سامو..

وان شاء الله انديرها اليوم..

دمتي بود..

ssamou19;12191122:

ايه شفتي الصدف و ان شاء الله تستفادو منها و تنجح معاكم قوليلي ختي ديرو لبخور انتوما و ريحتو ماديرلكش الضيقة لخاطر توسوست

ما تتوسوسيش سامو..

كاين بزاف الي ما يحملوهش..

احنا ما نديروهش..


بصح ماما ما تحملش ريحته..

كيفك كي تشمو تعود رايحة تتخنق..

دمتي بود..