مخاوفي بعد قدوم الطفل الثالث

مسز عادل;11020033:
مرحبا ماما حسون من زمان ما سمعنا اخبارش

ولا ندري انش حامل!!!

خيو لا تسوين في روحش جدي خلاص الي صار صار حاولي تغيرين من نفسيتش قبل لا يجي البيبي تستقبلينه بهالنفسيه

مسكين فكري فيه انه موجود في بطنش ومتعلق في الحياة من خلالش وانتين رافضتنه !!!! فكري انه بريء وما يدرك شيء في هاذي الدنيا غير صوتش و ريحتش و الله لو هو قط مكرم ومكرم السامع بتحبينه لتعلقه فيش صح ولا لا ؟؟؟

هو شذنبه انتوا الي جبتوه للحياة شذنبه تفرحين بأخوانه و هو لا صدقيني بعدين كل ما بتشوفينه بيأنبش ضميرش و كل ما تشوفين وحده فرحانه بحملها بتقولين خساره ضيعت ديك الأيام و ضيعت لحظات السعاده الي كنت اقدر اعيشها

فكري في الموضوع من جهة ثانيه

هذا عطيه من رب العالمين و هو كاتب له يجي لهالدنيا و اختارش انتين علشان يجي من خلالش وبواسطتش للدنيا فهل ترفضين امر الله !!!!

تخيلي لو كانت وحده لها فضل كبير عليش و عطتش بنتها مثلاً امانه عندش و قمتين تضايقتين منها و زعلتين و رفضتين وجودها و هي تسمعش او تشوفش و انتين ما تدرين شنو بيكون موقفش منها بعدين ؟؟؟؟ اكيد بتتفشلين و بتتمنين انش ما سويتين جدي صح؟؟؟

فما بالش برب العالمين الي هو الي اوجدش في هذا الوجود و انعم عليش يعطيش امانه خصش انتين فيها و حرم الملايين غيرش منها و انتين متضايقه من هالأمانه ؟؟؟؟؟

الحين اولادش ما شاء الله كبار و الفرق بينهم كلهم زين و اذا خايفه على وقت الامتحانات او الدراسه ممكن تقعدين في بيت اهلش المده الي تكفيش و تحسين انش تقدرين تدرسين ولدش و هم يهتمون في الصغار

و بقول لش شي بعد

انتين تقولين لو كان بكيفش خططتين للعطله الصيفيه ، يعني كل وحده تخطط تحمل في نفس الوقت الي خططت فيه!!!!!! لا ياما ناس تحاول وتحاول و لا تحمل الا بعد شهور و اني وحده منهم من كم شهر احاول وللحين الله ما كتب

(وعسى ان تكرهوا شيئاً وهو خير لكم )

احنا كل جدي نفكر ان احنا نعرف مصلحتنا و الي يريحنا لا خيو الله عالم بصلاح الإنسان ويعلم الغيب و ساعات احنا نفكر هذا شي زين وخير لينا و بالعكس يكون شر لينا في المستقبل و احنا ما ندري

وساعات تمر علينا شدة و ضيقه وهي امتحان من رب العالمين يشوفنا نصبر على البلاء ولا نكفر فلا تكفرين وتجحدين نعمة ربش ، ساعات اشياء ظاهرها العذاب وباطنها الرحمه احنا بنظرنا القاصر نشوفها عذاب و نكرهها لكن الله يعلم الغيب و يعرف انها في مصلحتنا و بتقدم لينا اشياء زينه في المستقبل

اكيد شفتين مسلسل يوسف الصديق شفتين يوم يجيه الملاك في البئر شقاله ؟؟ قاله انته مثل البذره لازم تنرمى في باطن الأرض علشان تنبت و تظهر لسطح الأرض ، شوفي لو ما نرمى في البئر ما وصل للي وصل له و صار سيد على عروش مصر وهو في ذاك الوقت كان يصيح و خايف ما يدري شنو الله خاش له في المستقبل


وانتين نفس الشي ما تدرين شنو الله خاش لش في المستقبل من خير وصلاح من ورى هالولد

تصوري نفسش و الله رزقش اياه و خاش لش الخير من وراه في المستقبل و انتين تتذمرين من وجوده في احشائش شنو يكون موقف الله منش؟؟؟؟ تخيلي كنتين مسويه مفاجأه لأحد ومطفيه الليتات مثلاً وسيده من أول ما دخل قام يصارخ ليش مطفيتنهم خليتين اطيح و الا شي شنو بيكون موقفش ما بتضايقين و تقولين هذا و اني مسويه ليه مفاجأه يسوي جدي؟؟؟؟؟؟ عدل والا لا ؟؟؟؟


صلي على النبي وذكري ربش و هادي كلها وساوس الشيطان ولازم تعقدين العزم انش تحاربين وساوسه و تكونين اقوى منه و تهزمينه علشان ما يسلبش السعاده الي انتي عايشتنها بين اسرتش

وداومي على القرآن خصوصاً سورة البقره ، و الأدعيه خليها سلاحش

و اقرأي هذا الدعاء بعد كل صلاة

(اللهم سرحني عن الهموم و الغموم ووحشة الصدر ووسوسة الشيطان )


أتمنى إني ما ثقلت عليش بطول الكلام بس تفاعلت ويا موضوعش و أحب كل وحده انها تكون قويه في مواجهة أي ظرف يصيدها و تتكيف وياه و لا تخلي الشيطان يتغلب عليها و يطلعها من النعمه و الراحه الي هي فيها


و تقبلي مروري

بسمة أطفالي;11035405:

والحمد لله اكو الحلوات كبروا والصغيرة توها مكملة سنة

ادعوا من الله العلي العظيم ان يحفظهم ويهديهم ووفقهم في حياتهم

والله يقدرني على تربيتهم التربية الصالحة على نهج محمد وآآل محمد:013:

بس تعبت هدرت وااااااااااااااااجد:096:

ماما حسون;11031346:
مرحبا بنات


والف مليوووووووون شكر للي شاركوا بموضوعي

بصراحه كلامكم خفف عني واااااااااايد ما تتخيلون شقد انا ممنونة لكم خواتي ..
وكل الشكر للي سأل عني ، صار الويكند وانشغلنا شوي وما مداني ادخل وأرد :02:


وهو فعلا الفروق بين عيالي مو صغيرة وايد وانا أُعتبر احسن من غيري بوايد بس على قولتهم يا دوب كبروا شوي وبدوا يعتمدون على روحهم وابتديت اتنفس وارتاح وانصدمت بالحمل خخخخخ

الحمدلله على كل حال

وانا في الفترة اللي طافت حاولت قد ما اقدر - طبعا بمساعدة زوجي الغالي - ان اهيئ الوضع واسوي نظام في البيت قبل ما اولد ، فقمت ونقلت اولادي لغرفتهم بدل ما كانوا ينامون معانا في غرفتنا .. وبعدين اشتغلت على موضوع ولدي الصغير والحمام والحمدلله قدرنا نقطع الحفاظ وصار يروح الحمام ، وهذه هي اهم الانجازات اضافة الى اشياء ثانية مثل ان اخليهم يعتمدون على روحهم اكثر في الاكل واللبس وفي انهم يساعدوني شوي في اشغال البيت ويشيلون العابهم لما ينثرونهم وفي اشياء ثانية وحاولت اعلم ولدي الكبير على انه يعتمد على نفسه اكثر في كتابة الواجبات المدرسية .. كل هذا علشان اخفف على روحي بعض المشاق بعد الولادة
وعن النوم الحمدلله نومهم تقريبا منتظم يعني ولدي الكبير بما انه يقعد من الصبح للمدرسة والعصر ما ينام فما يصير الليل الا هو خلاص دايخ وبينام بدري ويظل الولد الصغير اللي اهم شي ان ما اخليه ينام العصر علشان الليل ينام بدري مع اخوه ويهدأ الوضع ..

هو انا من بين الصعوبات ان ظروفي تخليني لااااااااازم اعتمد على نفسي وبدون مساعدة من احد يعني انا ساكنة بعييد عن اهلي وما عندي احد من اهل زوجي ممكن يساعدني وزوجي مسكين دوامه طويييل فأكون انا معاهم بروحي طول اليوم الى المغرب يرجع زوجي من شغله تعبااااان وهو ما يقصر مسكين من النوع اللي يساعدني وحتى السهر ممكن يسهر مع البيبي في ليالي الاجازات اذا شافني تعبانه وايد ، ولو كانت عندي سيارة كان الموضوع ممكن يكون اسهل ع الاقل ممكن اذا احتجت مساعدة اروح بيت اهلي يساعدوني او شي لكني محبوسة في شقتي خخخخخخ
وحتى فترة النفاس انا اقصى مدة ممكن اقضيها عند اهلي هي اسبوعين اذا مو اقل وبعدين مضطرة ارجع للشقة واشيل المسؤولية لان ولدي مدرسته وايد بعيدة عن بيت اهلي ولا في مواصلات لهناك ولا عندي احد اخليه عنده ( ما احب اثقل على اهل زوجي واخلي عندهم ولدي يهتمون به علشان المدرسة لان كلهم متزوجين وكل وحدة مشغولة ببيتها وعيالها وبعضهم يشتغلون ) واساسا ولدي يموت على بيت اهلي يعني مستحيل يرضى ان انا واخوه والبيبي نقعد في بيت اهلي وهو لا ..
وبعد ما ارجع الشقة مخططة مع زوجي انه ياخذ اجازة اسبوعين ويصير معاي في الايام الاولى <<< هذه كلها عبارة عن مخططات لكن ما ندري وش الظروف وقتها !


الله يعيني ويعين الجميع على هالمسؤولية وربي يقدرنا عليها ..

الله يرزق المحرومين بالذرية الصالحة