الحمدلله الذى لا يحمد على مكروه سواه

السلام عليكم .......


حبيت افضفض فى لحظه ............... مش عارفه اسميها لحظه ايه بس اى حاجه انا مبقتش عارفه ....

بس الحمدلله

والله حياتى بقيت صعبه قوى قوى قوى ولا تطاق بس الحمدلله
عمرى ماكنت اتخيل انى همر بكل ده وانى هيجى عليا الوقت اللى الاقى نفسى فيه وحيده ولا حد حاسس بيا والانسانه الوحيده اللى كانت بتحس بيا ماتت ......!!!!


تصوروا بابا بقى بيعاملنى وحش ودايما شايفنى وحشه ويتكلم عنى بقسوه وينصر اى حد عنى واتغير قوى

لدرجه انى دايما اشوفه يتكلممع مرات اخويا ويضحك معاها ومعانا احنا لآ دايما يشتكى برغم انى والله العظيم مامقصره معاه خالص لا انا ولا اخواتى بس بقى غريب مبقاش بيخلينا نتناقش كده معاه كل حاجه لآ وكل مانيجى نتكلم يقول انا مش عايز مناقشه!! ولا كلام سمعتوا اللى انا قلته؟؟
يتنفذ!!
بقى مش بيحبنا نتكلم عن ماما الله يرحمها ولو جاب سيرتها دايما يفتكر اى حاجه كانت بتدايقه منها واحنا عارفين انه كان ظلمها فيها وكان فاهمها غلط ........

امى اللى حتى هو مش قادر يعيش من غيرها بس هقول ايه
كل الحنان راح والامان معاه والضحكه قبلهم ..........

الحمدلله

خطيبى ساعات احس انه بيحبنى لكن فى اقرب مشكله بينى وبينه احس العكس لدرجه انى بكيت لربى كتير وقولتله مش العوض يارب .......
حقى ضايع معاهم مش بيفرحونى وحماتى اتغيرت معايا وكل ماتكلمنى تطلب منى حاجات (بطريقه تلقيح الكلام او تحكى عن فلانه عملت كذا وجابت فى جهازها كذا وجابت لحماتها كذا ) مستغله انى مليش ام ترد او تفهمنى بس انا الحمدلله عارفه وبسأل وبعمل الاصول والله دايما معاهم لكن هم مش بيقدروا ولا بيحسسونى انهم فرحانين بيا .........

الاول كانوا فرحانين قوى ولو تفتكروا لما حكيت ليكم لكن ايه اللى اتغير ؟؟؟
علشان اوافق على كتب الكتاب وخلاص؟؟

دلوقتى الفرش بدأوا يشوفوه بشق الانفس والمشاكل ومش عايزين يشطبوا الشقه ليا زى اى عروسه ولما اتكلم مع خطيبى يزعقلى ويتهمنى انى مبيعجبنيش حاجه وانى كده كتير قوى عليا انه يدهنوا حتى الشقه .........

ومش عايزين يغيروا فى الشقه ودى كانوا قاعدين فيها اصلا .............

نصيبى الحمدلله
هشتكى ليه ؟ مهو شايف وعارف وكاتبلى كده وراضى ليا كده وانا راضيه بحكمه ..........

القسوه من كل ناحيه حتى اقرب الناس ليا مش بيسألوا عايزه اكمل حاجات الفرش وبابا بيقوللى كفايه عليهم كده مدام مش عايزين يعملوا اكتر ولا يكملوا حلو .........

طيب وانا ؟؟
ذنبى ايه؟؟
عايزه افرح وعايزه قلبى المكسور يفرح والله ده عقاب وانتقام

بقالى سنه فى عذاب خطيبى اللى كنت بحبه قوى سابنى وظلمنى هو واهله وعارفين ؟؟
خطيب واحده زى ماكان عايز (تصرف وتجيب متقولش لآ وحرام الفلوس دى تترمى فكده) بعد ماكان رافض يعرف حد بخطوبته خطب وعمل الخطوبه فى الميريديان ودلوقتى عرفت انه حجز الفرح فى سميراميس:( .......يعنى ظلم وظلموا والحياه معاه وردى وجميله وفرحانين ؟؟؟

طيب وانا ؟؟
بعد الظلم
والاحزن وكسره القلب
طلعت من فسخ الخطوبه لموت ماما (حياتى) لمشاكل مع بابا وتغييره معانا وتفكيره فى الجواز لدرجه انه مبقاش بيفكر فينا خااااااالص كل تفكيره فى الجواز ويوى ده وده يشوفوله عروسه طيب استنى لما نيجى قدامنا واحده مناسبه لكن الكل بيتكلم وسيرتنا على كل لسان ....
مقولناش لا لكن متجرحناش
احنا تحت رجليك بلاش تدوس عليا
مجروحين بلاش تزود الجرح
امنا راحت كن لينا انت الاب والام
منتظر مننا واحنا كمان منتظرين منك ؟؟
بارين بيك حاول تكون انت كمان بار بينا
هنتسأل عليك وهتتسأل علينا .............................

الحمدلله

ودخلت فى مشاكل مع اهل خطيبى وهو نفسه مش عارف يحببنى فيه برغم انى لفت نظره انى محتاجه احبه قوى وانى عايزاه يساعدنى لكن بحسه مش زى اى واحد كده يشوف الحلو فيا ؟؟
لا
بياخد باله من العيوب قبل المميزات لدرجه انى كتير بقوله طيب مختش من اللى انت عايزهم ليه؟؟
محتاجه بقى احس انه خطيبى بيحبنى وميقدرش يبعد عنى

يابنات انا بقيت معقده والله معقده
ومحتاره بينه وبين بابا
خطيبى متحرر والمجتمع بتاعه كله كده وهنا بابا حاطط تحكمات غريبه برغم انى كاتبه الكتاب
مينفعش البس ربع كم مثلا او بنتكور او الحاجات دى وبدأ يزهق منه لما يجيلى وبرضه ممنوع الخروج .........
وخطيبى مش كده عايزنه البسله حلو واخرج معاه زى اصحابه ..........
دى حاجه بسيطه من اللى بيحطونى فيها ..........
ومش عارفه ليه لما بخرج معاه مش بحس انه هو ده اللى كنت بتمناه ؟؟
اتغيروا ويمكن ده اللى مخلينى كده .......

انا لوحدى انا لو حوايا ظروف حلوه زى ايام ماما اكيد اكيد كنت هبقى احسن بكتير .......

كتير احلم بيها رجعت وتقوللى صعبتى عليا فجيت علشان اكون معاكى ........
بتجيلى تشيلنى على رجليها زى ماكانت بتعمل ونضحك .....
محتجالها ومحتاجه اللى يعوضنى عنها ومحتاجه اللى ينسينى المها وفراقها ..........وبدعيلها الله يرحمها زى ماكانت رحيمه ........

والله يابنات احداث كتييييييييييييييييييييره قوى فرقت معايا وغيرت نفسيتى ولا حد حاسس ولا حد واخد باله ومظلووووووووووووووومه قوى والله حاسه انه الكل كرهنى .......
ممكن اكون اتغيرت؟؟
طيب ايه المنتظر من واحده عانيت ؟؟
كل يوم ابكى وانا دموعى على خدى؟؟
طيب يرضى مين؟؟

الحمدلله

اللى ظلمونى عايشييييييييييييييييين ولا فارقه معاهم وحقى بيضيع وانا اللى بدفع التمن كأنى انا اللى ظلمت واتبليت وخنت

لا قلبى فرحان ولا انا فرحانه ..............
وبقيت عايزه امشى حالى لانى لا كده فرحانه فى بيت بابا ولا عند جوزى هحس بفرحه هنا مظلومه وجاى عليا وهنا جايين قوى عليا
لا هنا حد بيسمعنى ويبقى حنين عليا ويفكر يسعدنى ولا هناك حد بيفكر يسعدنى ولا يهتم بيا ........

كأن اليتيم ده المفروض كان يدفن نفسه قبل والديه ............... وكان الانسان اللى انظلم ده المفروض يفضل طول العمر كده ........

شوفت نماذج كتيره قوى الفتره الاخيره دى والله حتى رمضان مش بيصوموه وياسلام على السعاده والهنا ولا كأنهم بيغضبوا ربنا
واشوف حالى ولا بروح ولا اجى ومهمومه
الحمدلله انا عمرى مااتمنى انى اكون زيهم ويارب مااكون كده لكن تفتكروا الوقت اللى فيه فرج قرب؟؟؟

عايزه احكى بقى عن كرم ربنا معايا والكل ياخدنى عبره وحكمه من رب العالمين زى مادلوقتى اصحابى بيبكوا على حالى وظروفى نفسى يجوا يقولولى اهو ربنا عوضك عن كل اللى شوفتيه ..............
تفتكروا اللى كنت مخطوباله ده وهو بيرمى الفلوس رمى كده ليه الحال مقلوب هو اللى فرح وانا اللى حزنت تانى؟؟

بس لانه ربنا كاتبلى كده وانا راضيه يارب
والحمدلله

كلامى مش شكوى لكن فضفضه معاكم ويارتنى قدرت اطلع اللى جوايا والله قولت هكتب واكيد هطلع كله وارتاح وانام بقى ولو يوم من غير هم لكن لسه شويه برضه

ادعولى ربنا يكرمنى واللى عنده نماذج لحد كان زيى كده ميترددش يحكيها علشان اخد منا القوه والصبر .................... وادعولى ياخدلى حقى ويسعدنى

وعارفه انى ليا رب اسمه الكريم

يارب كرمك