Θ تجهيزات عرائس { ليبيا } لشهر رمضان 1430-2009 م " الجزء 3 " Θ

ح

حلمـ .,

مشرفة سابقة

21-08-2009 | 05:32 PM

يرجى الإطلاع على قوانين المنتدى :

منتديات عروس - الإعلانات في القسم : أركان العروس والجمال

الجزء السابق :

http://forums.3roos.com/t473227.html

*

بالتوفيق لجميع العرايس

الله يسهل لكم أموركم

ويوفقكم ويسخر لكم أزواجكم

ويرزقكم بالذرية الصالحة

والله يرزق باقي البنوتات

بأولاد الحلال اللي يسعدونهم

ع

عروس ليبيا

عروس فضية

21-08-2009 | 11:32 PM

مساء الخير عرايس ليبيا

الحمد لله على رجوع المنتدى وكل عام وانتن بخير بمناسبة الشهر الفضيل

عرايس يلا ادخولي وقولوا كيف يكون تجهيزكم في رمضان بتطلعوا للسوق النهار ولا بعد الفطور..؟كيف انرتبوا يومنا ونوفقوه على خاطر مانرهق بشرتنا من الشمس والتعب..؟

انا اعتقد اني بنرتاح بداية الشهر ونصفه الاخير بنتم التجهيز بس بعد الفطور..؟؟وانتم كيف بديروا.

وياعرايس عندي استفسار تاني اللي عندها طريقة ماتخلي البشرة تجف وتعطش اثناء النهار في الصيام تخبرني..؟؟

وكل عام وانتن بخير ورمضان كريم(f)

ا

اموره2062011

عروس مشرقة

22-08-2009 | 11:56 AM

اهلين عرايس ليبيا مبروك عليكم الشهر وعساكم من عواده

طبعا اني الايام الاخيرة اللي قبل رمضان على قد ماحاولت مافتحش معاي لينك العروس واليوم فتح الحمد لله

عرايس يلا ادخولي وقولوا كيف يكون تجهيزكم في رمضان بتطلعوا للسوق النهار ولا بعد الفطور..؟كيف انرتبوا يومنا ونوفقوه على خاطر مانرهق بشرتنا من الشمس والتعب..؟

والله عندك الحق عروس ليبيا هو الطلوع مش حيكون الا بعد الفطور وماتعتمديش على النص الاخير بس كان حصلتي فرصة اطلعتي حتى من اليوم ماتنسيش ان في النصف الاخير الناس كلها بتطلع وزحمة دبل فالو حصلتي فرصة او وقت للطلوع توا اغتنميها واطلعي مرات تحصلي حاجات مافيش بعدين عرفتي ومرات تو فرصة تخفيضات خير

ع

عروس ليبيا

عروس فضية

22-08-2009 | 10:42 PM

هلا امورة خطيبي كل عام وانتي بخير يا غاليه

المنتدى قبل رمضان كان مغلق للصيانه

وبالنسبة لاقتراحك صدقتي صح راحت عليا الفكرة خلاص بعون الله نطلع ونشوف المحلات يادوب الناس توا لاهيه خصوصا بنتم حاجات المطبخ وبناخد المكياج ان شاء الله انتمهم قبل النص الاخير ادعيلي ربي يوفقني وتحيتي ليك امورة ياحلوة

بس ماقلتيلي ماعندك قناع للوجه يقلل الجفاف للبشرة في شهر رمضان؟

ه

هنو الدلوعه

عروس رائعة

22-08-2009 | 11:40 PM

كيف حالكم يا بنات وكل سنه وأنتو طيبين والله ليكم وحشه ومبروك علينا الدويره الجديده وبالنسبه لتجهيزات العرس أهم حاجه ماترهقوش روحكم والله كله تساخير من عند ربي العالمين وبأذن الله نتشاورو ويا عروس ليبيا نصيحه ماتشريش المكياج الاقبل العرس بشويه هو والعطور وربي يهنيك وخيتي

ع

عروس ليبيا

عروس فضية

23-08-2009 | 06:39 AM

هنو الدلوعه;10155276:
عروس ليبيا نصيحه ماتشريش المكياج الاقبل العرس بشويه هو والعطور وربي يهنيك وخيتي

صباح الخير هنووو نورتي وكل عام وانتي بخير يا حلوووة

زعمة قولتك هكي يعني المكياج نخليه مع الحاجات الاخيرة في التجهيز هو والعطورات خلاص امالا بناخد بنصيحتك اختي تسلمي وربي يهنيك حتى انتي

لكن ماقلتوليش نبي قناع لوجهي يا حلوات انا بدا عليا الجفاف من توا:confused:

c

candy libya

عروس نشيطة

23-08-2009 | 10:36 AM

السلام عليكم
صباح الخير على بنات ليبيا الحلوات
كل سنة وانتم بألف خير وطيبين وان شاءالله العام الجاي مع رجالتكم اللهم آآآآآآمين
تعرفوا كانا مادرتوش تجمع الشهر هذا مش عارفة شن درت عابية علي ربي وبعدين عليكم
قاعدة نستنى في رقم عايدة الكوافيرة ولتوا مافيش وحدة فرحتني وقتلي جبتلك الرقم
بالله عليكم والله اللي اتجيبلي الرقم ندعيلها دعوة اتهبل .

c

candy libya

عروس نشيطة

23-08-2009 | 10:38 AM

بنات بالله اللي حددولها موعد عرسها ياريت تقوللنا عليه باش نفرحولها ونفيدوها أكثر بخصوص التجهيزات

ا

اموره2062011

عروس مشرقة

23-08-2009 | 12:42 PM

بس ماقلتيلي ماعندك قناع للوجه يقلل الجفاف للبشرة في شهر رمضان؟

تعرفي اني في الليل ندهن وجهي بزيت فيتامين e والصبح نغسل وجهي عادي ونطلع نمشي للعمل من غير حتى ماندير واقي والحمد لله ماعنديش جفاف لتوا جربي بالك يمشي معاك

ويابنات نبي منتجات البودي شوب وين نلقاها في طرابلس وقداش سعرها نبي المجموعة تامة يعني (الصابونة + جل الشاور+ سبراي + مزيل العرق امتع المسك+ الكريم الجسم ) فلو فيه في ليبيا ياريت اتقولولي وين

ه

هنو الدلوعه

عروس رائعة

23-08-2009 | 11:19 PM

كيف حالكم اليوم يابنات
وياعروسة ليبيا بالنسبه للمكياج والعطور صدقيني احسن شئ تشريهم قبل العرس عشان يبدو جدد وتمام وديري زي ماندير أني كل فتره ننزل للسوق ونشوف العطور الجديده وكل مره نجرب عطر على جسمي ونشوفه يتفاعل مع جسمي ولا لا يعني نجرب في روحي لأنه تعرفي العطور تتفاعل مع كل جسم شكل وبعد مانجرب العطر وثاني يوم نلقاه ثابت وحلو طول جري نسجل أسمه ونضيفه لي قائمة العطور الي بنشريهم وهكي مايجي وقت العرس الا وأنتي عارفه العطور الي بتشريهم وعلى فكره ماتكتريش هلبه عطور وحتى المكياج ماتكتريش هلبه ..
وبالنسبه لي الماسك سجلي عندك خودي لوز ني طبعا وأبشريه وخليه ناعم وزيدي عليه حليب باكو (معقم يعني ) مش حليب حكه ولابودره وخلطيهم كويس وأدهني وجهك بيهم وأسترخي ثلت ساعه وبعدين أغسلي بميه فاتره ونشفي وأدهنى بي مرطب وبعدها شوفي النتايج وادعيلي ..

ع

عروس ليبيا

عروس فضية

24-08-2009 | 01:13 AM

candy libya;10157516:
السلام عليكم

صباح الخير على بنات ليبيا الحلوات
كل سنة وانتم بألف خير وطيبين وان شاءالله العام الجاي مع رجالتكم اللهم آآآآآآمين
تعرفوا كانا مادرتوش تجمع الشهر هذا مش عارفة شن درت عابية علي ربي وبعدين عليكم
قاعدة نستنى في رقم عايدة الكوافيرة ولتوا مافيش وحدة فرحتني وقتلي جبتلك الرقم

بالله عليكم والله اللي اتجيبلي الرقم ندعيلها دعوة اتهبل .

كاندي هلاااااااااااا نورتي ياحلوة وكل سنه وانتي طيبه ان شاء الله البنات يفيدوك برقم عايده بس بنقولك اختي انا من كم يوم حضرة فرح عروسه من بنغازي مكياجها كان خيااااااالي فكرة نمشي نمكيج غادي وخلاص بس بجد تحشمت نسألها من اللي مكيجتها بس هي قريبتي زوجها رح نعرف ونقوللكم لانه بجد مكياج خياااال.

ع

عروس ليبيا

عروس فضية

24-08-2009 | 01:15 AM

كاندي انتي ادعيلينا يحددولنا بكري وبعون الله انتم اول من يعرف بموعد التحديد

ع

عروس ليبيا

عروس فضية

24-08-2009 | 01:17 AM

امورة خطيبي;10158004:

تعرفي اني في الليل ندهن وجهي بزيت فيتامين e والصبح نغسل وجهي عادي ونطلع نمشي للعمل من غير حتى ماندير واقي والحمد لله ماعنديش جفاف لتوا جربي بالك يمشي معاك

ويابنات نبي منتجات البودي شوب وين نلقاها في طرابلس وقداش سعرها نبي المجموعة تامة يعني (الصابونة + جل الشاور+ سبراي + مزيل العرق امتع المسك+ الكريم الجسم ) فلو فيه في ليبيا ياريت اتقولولي وين

امورة هلا ممكن نعرف من وين تاخدي فيه صيدليات او محلات عطور وهو يمشي مع البشرة الدهنية اولا ؟

ع

عروس ليبيا

عروس فضية

24-08-2009 | 01:41 AM

هنو الدلوعه;10159995:
كيف حالكم اليوم يابنات

وياعروسة ليبيا بالنسبه للمكياج والعطور صدقيني احسن شئ تشريهم قبل العرس عشان يبدو جدد وتمام وديري زي ماندير أني كل فتره ننزل للسوق ونشوف العطور الجديده وكل مره نجرب عطر على جسمي ونشوفه يتفاعل مع جسمي ولا لا يعني نجرب في روحي لأنه تعرفي العطور تتفاعل مع كل جسم شكل وبعد مانجرب العطر وثاني يوم نلقاه ثابت وحلو طول جري نسجل أسمه ونضيفه لي قائمة العطور الي بنشريهم وهكي مايجي وقت العرس الا وأنتي عارفه العطور الي بتشريهم وعلى فكره ماتكتريش هلبه عطور وحتى المكياج ماتكتريش هلبه ..

وبالنسبه لي الماسك سجلي عندك خودي لوز ني طبعا وأبشريه وخليه ناعم وزيدي عليه حليب باكو (معقم يعني ) مش حليب حكه ولابودره وخلطيهم كويس وأدهني وجهك بيهم وأسترخي ثلت ساعه وبعدين أغسلي بميه فاتره ونشفي وأدهنى بي مرطب وبعدها شوفي النتايج وادعيلي ..

هلا هنووو تبي الحق انا العطورات عندي مجموعه ثابته حاطه عليهم عيني بعون الله وصيت عليهم حتى الوصا وان شاء الله بنزلكم صورهم لما يوصلوني :o

وبالنسبة للقناع بارك الله فيك تسلمي ياغااااليه وربي يوفقك ويفرحك ان شاء الله قريباً.

وانا بنت خالي عطتني قناع جربته حسيته اليوم نعم بشرتي شوي الحمد لله

هو ماء ورد وقليل من النشا حطيت النشا على وجهي لمده 10 دقايق وبعدين غسلتها بماء ورد وخليته ربع ساعه وبعدين غلسته بماء باااارد والحمد لله اليوم ورد شوي وجهي

وبنجرب قناعك الليلة بعون الله تسلمي هنووووو

c

candy libya

عروس نشيطة

24-08-2009 | 10:57 AM

عروس ليبيا
منوووووووووووووووورة يا حلوة ، وراح ندعيلك باش ايحددولك عرسك ، وادعيلي ربي يسخرلي عرسي ويكون في موعده ، حق انسيت انقولك كل سنة وانت طيبة .

:

:•.♥lava•.♥

عروس جديدة

24-08-2009 | 11:41 PM

امورة خطيبي;10158004:

ويابنات نبي منتجات البودي شوب وين نلقاها في طرابلس وقداش سعرها نبي المجموعة تامة يعني (الصابونة + جل الشاور+ سبراي + مزيل العرق امتع المسك+ الكريم الجسم ) فلو فيه في ليبيا ياريت اتقولولي وين

اختي العروسة امورة خطيبي بالنسبة لمنتجات دا بودي شوب موجودات في محلات روان في عندك فرع في قرقارش وفي فرع في شارع النصر مقابل محلات الحاراتي للحلويات طبعا مش كل شيء عندهم تحصلي عندهم السيت لكن مرات مش من نفس النوع لانه عندهم قطع وماعندهمش مجموعة كاملة في باكو لانه يجيبوا فيهم علي حسابهم ونزيدك من الشعر بيت انه هما استغلالييين بدرجة كبيرة تخايلي الشور جل او الشامبو تلقيه ب50 عادي عندهم
المهم مشيطين النار فيهم اني خديت مجموعة كاملة صابونة وشور جل ومقشر جسم وليفة بما يعادل 50 دينار طبعا من برا...والله حرام عليهم المهم كان عندك حد برا وصيه يجيبيلك احسن

نسيت عرسي في 20 _10 ان شاء الله يعني توا بعد رمضان
وقاعدة ماخممتش في هلبة حاجات
وكل سنة وانتوا طيبين

ع

عروس ليبيا

عروس فضية

25-08-2009 | 12:09 AM

امورة خطيبي وكل عام وانتي بخير حتى انتي يا غاليه وشكرا على الدعاء

امورة شوفي قناع النشا والماء ورد يابنات خلالي وجهي في يومين بس مشاء اااااااااااااالله تبارك الرحمن حتى خواتي حسوا بتغيير.

ب

بنت طرابلس

عروس جديدة

25-08-2009 | 12:04 PM

السلام عليكم
كل سنة وانتم طيبين وبالصحة وطول العمر
المهم عندى قناع وجربته والصراحة مش عادى يخلى البشرة صاااافية ويوحد لون البشرة وييزيل ضربات الشمس منها والقناع هو
تسلقى بطاطا فى امية وبعدين تهرسيها وتخليها تبرد واضيفى عليها زبادى والا حليب انى جربتها مع الزبادى
وتستعملى الماسك على وجهك وتخليه من ربع الى تلت ساعة
وبعدين تغسلى وجهك بماء بارد
وبالنسبة لقناع النشا وماء الورد انى نستعمل فيه قبل المكياج فى المناسبات لان النشا يصكر المسام وما يخليش الوجه يعرق وينعم البشرة ويساعد على حط المكياج

c

candy libya

عروس نشيطة

25-08-2009 | 01:21 PM

عروس ليبيا;10165187:
امورة خطيبي وكل عام وانتي بخير حتى انتي يا غاليه وشكرا على الدعاء

امورة شوفي قناع النشا والماء ورد يابنات خلالي وجهي في يومين بس مشاء اااااااااااااالله تبارك الرحمن حتى خواتي حسوا بتغيير.

هو حق اني آمورة خطيبي:15: لكن النيك نيم امتعي اهني كاندي ليبيا مش آمورة خطيبي:o
هههههههه شكلك مآثر فيك الصيام بالحق ياعروس ليبيا ، وان شاءالله نجرب القناع مع اني نعرف انه ممتاز القناع هذا ومجرباته لكن اني مش من البنات اللي يشدوا الحاجة ويمشوا عليها مزاجية بعيد عنك ، وياريت تسأليلي على الكوافيرة اللي قلتي عليها.

ع

عروس ليبيا

عروس فضية

26-08-2009 | 05:04 AM

ههههههههههههههه كااااندي الحلوة سامحيني بجد الصيام مأثرة على الاخر

ربي يحميك ياغاليه وبالنسبة للقناع انا خلالي وجهي زي الطفلة هدا عليش شديت فيه هههههه

وان شاء الله نسألك على الكوافيرة لانه انا بروحي سحرتني مشاء الله كانالمكياج خيال ولتوا مزال نفكر فيه ومجنني