manyaa;8855848:
ممممممم... شوفي يا جميل .. (رأيي الشخصي طبعا)الوضع يمكن محير شوية ..بس طبقا للي انت بتقوليه .. أنا برجح كفة التاني... ليه بقى..
أولا بالنسبة للسن أنا مش قادرة أقوللك حاجة لان فيه ناس بتحب الفرق ده و في ناس مش بتفضله ..بس انا متهيألي مش مشكلة اوي لو انت و انت بتتكلمي معاه مش حاساه مثلا مستعيلك او كدا .. و كمان انا مش عارفة انت اصلا عندك كام سنة..بس سنه كدا مش كبير اوي..
طيب .. أولا نقطة التدين دي بتزيد للعريس التاني..(بس برده لازم تكونوا سألتوا عنه كويس و متأكدين انه بيراعي ربنا في شغله و تعاملاته مع الناس مش كل مستشار وللا محامي بيكون ضميره صاحي بيراعي ربنا)
ثانيا انت شفتي مامته و ارتاحتيلها اكتر..
ثالثا .. انا حاسة ان السبب الوحيد اللي مخليكي قلقانه هو انك مش عايزة تحرجي الأول و هو صعبان عليكي اصلا....و أنا بقوللك انت مش حتتجوزي شفقة على حد...و طالما ما وعدتيهوش بحاجة يبقى خلاص انت في السليم.. و كمان انت بتقولي انك حكيتيله انه في واحد تاني متقدم..يعني عارف .. و انت مش مخبية حاجة اهو..و ليكي حرية الاختياااار تماما .. و المفروض بصراحة حتى لو بيحبك .. مايحطيكيش انت في الحيرة دي بكلامه اللي مقطع قلبك ..و محسسك بالذنب.. و بالعكس يسيبك تختاري بكامل حريتك بدون تأثير عليكي.. و كمان هو يعرفك من امتى عشان يلحق يحبك الحب ده كله بالطريقة دي.. انا بقلق بصراحة من كلام الحب و التمسك ده من اولها كدا ..من الأخر حاسة انه بيحاول يقنعك و يغريكي عشان توافقي عليه ..
رابعا و أهم حاجة بقى عشان تطلعي من الحيرة دي.. اعدي كمان قاعدة مع العريس التاني ..و قبل ماتروحي و انت بتصلي و تدعي كدا ركزي اوي في الدعاء و ادعي ربنا ينورلك بصيرتك في القاعدة دي .. و ان لو الانسان ده نصيبك ربنا يشرح صدرك ليه في المقابلة دي .. و لو مش نصيبك انه يصرف نفسك عنه...و بعدين تاخدي رأي بابا و ماما و هو سؤال واحد .. كل واحد فيهم يقول مين العريس اللي مطمنينله اكتر و موافقين عليه.. و اللي ماما و بابا يوافقوا عليه يبقى هو ان شاءالله صاحب النصيب..(دا طبعا اذا طلعتي بعد تالت مقابلة بنفس الحيرة أو لقيتي نفسك مرتاحة للتاني و قابلة مشاركتك ليه بقيت حياتك)
هل انت متخيلة نفسك مع العريس التاني ده طول حياتك؟؟ افتحي مناقشات بينكم و اتكلموا كتير في كل حاجة تيجي على بالك و خليكي على طبيعتك تماما و اللي في بالك قوليه و ماتخافيش يستعيلك ..عشان اكبر منك .. لأ انت عايزة تشوفي و تعرفي اكبر قدر عنه .. شوفيه كريم وللا لأ بيعزم اكتر من مرة في المقابلة الواحدة وللا لأ بيسمعك لما بتتكلمي وللا بيحب يتكلم بس و كمما عندوش اهتمام باللي انت هتقوليه.. ايه المةاصفات أصلا اللي هو بيدور عليها في شريكة حياته..ايه رأيك في عمل المرأة بعد الجواز .. كل سرال ممكن يفتح باب نقاش اسألي فيه ..
و أخر حاجة عايزة أقولها .. ادي نفسك فرصة تفكري في كل واحد على حده.. يعني العريس الأول انت قعدتي معاه و تكلمتي معاه و كونتي فكرة عنه خلاص.. وقفي بقى كلامك معاه و امنعي الكلام بينكم تماما و قوليله اديني اسبوع افكر و أستخير و ارد عليك الرد النهائي..
و العريس التاني فكري فيه لوحده بعد المقابلة الاخيرة و برده قوليله حتردي عليه .. و اعدي كام يوم كدا فكري في كل واحد لوحده بدون تأثير من التاني عليكي..و بعد ما تتشاوري مع أهلك تاخدي القرار و تبلغيه لصاحب النصيب..و ادعي ربنا كتير ان يجعللك الخير فيه ...
و ربنا يشرح صدرك للي فيه الخير ليكي...معلش انا حاسة اني طولت عليكي بس لاني كنت في موقف مشابه و حاسة بنفس الحيرة ..مع شوية اختلافات..و بتمنى من ربنا نزول حيرتك دي..
لا طولتي ولا حاجة بجد مش عارفة اقولك ايه ربنا يجازيكي كل خير و الله كلامك بيريحني جدا و انا فعلا عملت زي مانتي قلتي و وقفت كلام مع الاول مع انه ادايق وشايف ان ده هروب بس برده هو قالي فكري و ليكي حرية الاختيار و انا عملت كده بعد مالاقيته كل شوية يغير كلامه ف موضوع الشقة الي عنده عشان في اتنين المفروض هو ليه واحده منهم المهم هو كل شويه كلامه يتغير و انا لاقيت ان كلامه معايا عامل لوود عليا و انا مضغوطة اصلا و علي فكرة انا اعرفة من 8 شهور تقريبا هو صاحب خطيب صاحبتي و كنا احيانا بنخرج كلنا مع بعض جروب و انا ماكنتش واخدة بالي انه معجب بيا و مقاليش غير من شهر تقريبا ..
و بالنسبة لسني انا عندي 25 سنة يعني الفرق 10 سنين تقريبا بيني و بين العريس التاني ومانكرش ان هو سنه مش باين عليه اوي و مش بيستعيلني ولا حاجة بس انا اللي يمكن مركزة مع موضوع السن ده اوي مش عارفة ليه..
و من ناحية انه كريم فهو كريم جدا ماعندوش مانع اني اشتغل بعد الجواز متفتح جدا برغم تدينه .. بابا و ماما طبعا موافقين جدا عليه لانهم شايفين انه مافيهوش عيب جامد يعني و طبعا رافضين التاني عشان الفروق اللي بينا اجتماعيا و ثقافيا و ماديا
بس مش عارفة ليه و انا بتكلم معاه اللي هو التاني مش عارفة ليه حاسه حاجة غريبة مش عارفة ايه هي بس ساعات احس اني مبسوطة وساعات احس انه غريب و مش صريح يعني هو لحد دلوقتي كلامنا كله عام ماتكلمش ف اي حاجة تخص الجواز و طبعا مش معقول انا اللي افتح الكلام ..انا المفروض هقعد معاه مرة كمان بس تفتكري لو ارتحت اتكل علي الله علي طول كده و لا ايه؟؟؟ انا كنت عاوزة استني شوية يعني شهر او اكتر عشان نعرف بعض اكتر و ماتسرعش..بجد محتارة جدا و بصلي استخارة كل يوم بس انا بصليها علي موضوع التاني بس ينفع؟؟؟؟؟؟؟؟؟
بجد جزاك الله كل خير و ربنا يكرمك يارب و ييسرلك امورك