العلاقة مع أخو الزوج ،، ماهي حدودها؟؟

علآقة الحرمه بأخو زوجهآا تكون بحدود
أوكي معليه سولفي معآه بس مب بروحكم لآا مثلآ اذا العيله كلها تيمعت معليه
بس مب تختلون بروحكم .. هني مآيجوز ! ~> هآ اذا كآن كبير .. بس اليهآل معليه
والسلآم لله مب لأي حد ثآني

وبعدين يقولج يودي العصآ من النص
يعني مب كلش كلش مآتعرفين من هو اخوو ريلج ولآ كلش كلش تقطين الميآنه معآه مثل اللي تضربه بظهره ولآشي

سبحآان الله مآتدرين شنو يصير شمآيصير وتحتآجون الاخو !
انتي بهالوقت شتسوين !!
اذا مآكنتي تعرفينه خير شر !

وعن الغدآ ولآ العشآ مع العيله كلهآا
أنآا أجوفهآا عآدي .. بالعكس هالأجوآاء حلوه والوآحد مآوده يفوتهآا

اني علاقتي فقط سلام عليكم

السلام عليكم
بالنسبة الي بس سلام فقط ،،،، وهيك لازم،،، الواحد لازم يتجنب اإختلاط بكل شي

موضووع جيد الله يوفقك انشالله وبالنسبه لي استحي موووت اذا ابو زوجي لشفته طاح قلبي وشلون هم
احس علاقتي فيهم زيرو يعني مابيني وبينهم الا السلام مع ذلك مايمنع اني اسعى ان علاقتي بهم تكون مبنيه على الاحترام بما اني زوجه اخوهم الكبير واكبر منهم

ممممممممم بالنسبه لنه عادي نقعد مع حمياني ومع ازواج خواتي بعد
نجتمع على سفره وحده
بس كل وحده عارفه حدودها واعتبرهم اخواني ويعتبروني اختهم

بس ما قط قعدت مع واحد منهم بروحي
لازم نكون مجتمعين كلنه

الحمو الموت

علاقتي رسمية جدا لاني استحي وووااايد

bent el ba7rain;8418730:
مادري حسيت شوي الرودو غريبة عن مجتمعنا البحريني احنا كللللللللللش عادي ويا اخوان ازواجنا يعني مو لدرجة المياعة والضرب والمرزح بس عادي نقعد معاهم ونسولف في التجمعات

انا عندي حمي واحد اصغر عمره 24 سنة بس انا اوكيك معاه وخاطب ونتجمع كلنا مثلا الجمعه غذا انا وزوجي وبنتي وخوات زوجي وازواجهم ونتغدى مع بعض في السفرة وساعات اذا المكان مايكفي اضطر اقعد جنبه وجنب زوجي بس هو بعيد شوي بس عادي كللش اذا يبي شغلة يتصل فيني او انا اتصل فيه وخطيبته بعد تتغدى معانا في البيت الجمعة كلنا عادي


واحس يختلف بعد بس مو لدرجة ان مانعرفهم يمكن احنا عادي عندنا بس واااجد ناس اعرفهم ملتزمين وعندهم مثلا مايقعدون يم حميانهم بس يسولفون ويسلمون عادي

والله صحيح كلامج اختي انا بعد نفس الشيء استغربت من شفت ردود بعض البنات اللي من البحرين ويقولون مانعرف شكله او مابينا غير السلام ! اللي اعرفه المجتمع البحريني مو جذي وعاداتهم وتقاليدهم تقريبأ مثلنا ماتوقعت اشوف ردود جذي الصراحه من المجتمع البحريني يمكن تكون فيه مجتمعات جذي بس بقله

واحنا عندنا عادي نقعد مع اخو الزوج ونتكلم معاه ونتغشمر بس ماتوصل للمس لا يعني بس مجرد كلام على قوله الاخت مو مياعه :D بس عادي نقعد على سفره وحده وناكل بس ماعندنا اننا نطلع بروحنا مع اخو الزوج

بيننا بس سلام واصلا انا اتغطى عنهم
الرسول عليه افضل الصلاه والسلام قال الحمو الموت

موضوع حلو الله يعطيج الف عافيه على المواضيع

بالنسبه لي

لا اوكيه الأكل مع بعض في الصاله لانه اهو اخوي الصغير بيي وبينه 9 سنوات ما شاء الله وهو يستحي واني بعد استحي

يعني كلش ما نتكلم مع بعض ابدا

بس اول مره اول ما دخلت سلمت عليه ويوم عرفت انه يستحي ما قط كلمته

بس مع السوالف مثلا ارد بس بشكل عام لانه بعد الوجبه نجتمع مع العائله

والحين فرد يدي اله اهو زوج حماتي

اول كان المفروض يصير الرجال بروحهم والنساء في الصاله

بس طبعا ما صار للحين

بس مثل الشي

وهاده بعد الحمد لله يعني يسلم بس هو يبدي بالسلامه واسلم عليه يعني شويه اشوه من حمايه إلي للحين يستحي

واعتقد الحين بعد صار شويه اشويه بحكم يمكن راح جامعه ويمكن بعيدين لين يخطب بعد يقل الحيه ههههه إن شاء الله

استغرب من البنات اللي يقولون حتى سلام بينهم مافي !!
انزين وين صلة الرحم؟؟ هذلين عموم عيالج
العيال يتربون على اللي يشوفونــه
عن نفسي الحمد لله علاقتي فيهم حلوه ,, ساكنه معاهم في بيت
وفيه منهم متزوجين وفي لأ ,, مو دائماً تصير جمعه على الأكل بس نتجمع عادي
اسولف ونمزح بحدود طبعاً , واذا احتجت لتوصيل وزوجي مو موجود استأذن منه واخلي واحد من أخوانه يوصلني <<< طبعاً نادراً لأني في الغالب آخذ السياره من عند زوجي وأطلع اذا بغيت اطلع

بس بالعموم علاقتي معاهم ما بقول أخواني لأن لازم في اختلاف ,, بس اني ساكنه معاهم في بيت ,, وعشرة عمر ,, عموم عيالي
وهذا في النهاية رأي , وكل وحده على اللي تعودتـه ونشأت عليه
والله لا يقربنــا من الحرام

نورتوا موضوعي بارائكم النيرة

يعطيج العافية يالغلا على الموضوع الحلو
بصراحة انا زوجي لة اخو واحد وصغير اصغر عني عمرة 13 سنة وانا بصراحة عادي اقابلة بس البس حجاب اغطي شعري بس يعني ونجلس عادي ولو ابىء شي اطلب منة حالة حال اخوي
وتسلمين مرة ثانية موضوع مشوق

أنآ عندي حميان اثنين واحد متزوجأكبر من زوجي ما أشوفه كلش

و الثآني أصغر من زوجي أشوفه وااايد بس ما أكلمه ... حتى انه أغلب طلعاتنا نكون أنا و زوجي و أخوه بس عمري ما كلمته و لا حتى سلمت عليه

و أنا أستغرب من زوجة حماي تسولف مع زوجي و أخوه الصغير و مطيحة الميانة وياهم و ساعات أشوفها تتغزل في أخو زوجي الصغير و تدلعه!!! مع انه ما يكلمني بالمرة لأنه يشوفني ما أكلمه إلا انه يتجاوب مع زوجة حماي

بس فعلاً شيء غريب

أني خطيبي أكبر واحد فيهم وعنده ثلاثة أخوان صغار أكبرهم ألحين في توجيهي عمره 17 سنة
ذيلاك عادي وياهم كلش لانهم صغار في ابتدائي وأشرح ليهم بعض الأحيان واطرشهم البرادة

أما الي في ثنوي أتكلم وياه شوي لانه من النوع الخجول .. بعض الأحيان يجي ليي اعلمه اشياء تخص المدرسة ولا اسوي ليه تقارير عاد مايقول فيس تو فيس يطرش خطيبي يقول ليي أنه يبي هالشغلة الفلانية ..

وبس اني مستانسة ان حمياني صغار بس مردهم بيكبرون هههه "

بالنسبه لي بس السلام بيننا واذا بغيت او احتجت شي وزوجي مو في اكلمهم