شنو صار بالنسبة اللي وظفوهم في تخصص الخدمة الاجتماعية في وزارة التربية

مشكورة اختي كتكوتة...الله يسمع منج يارب ..احنا علينا الدعاء والتوكل على الباري الذي لا يردنا ..اختي ام عبدالله نحنا الست من ضمن القائمة وموجودين عن الصندوق اننا مرشحين للتربية لكن التربية عرضت اسماء اكبر من العدد المطلوب ..وخبرش الميزانية حق بس 500 شخص ليش نحنا المستثنين ما تدرين ....على العموم انا اليوم راجعت الوزارة وخبرنا الوكيل هشام ان الكل في القائمة بيتوظف عن قريب على اساس الرواتب تنزل لمدة سنة للكل وان شاء الله راح نتوظف على الشهر الجديد ..خبركم ما عندهم يدفعوا ميزانية حقنا شهر واحنا ما كملناه ...يالله طمنوا حالكم في ما بقي من الشهر ...ولا تنسونا من الدعاء

تحياتي

بحر الوفاء

السلام عليكم....بنات الخدمه شخباركم ...ويش مسوين...بنات ما اوصيكم لازم نتواصل على طول وما نقطع....لأن الشي اللي قاعد يصير معانا مو طبيعي...حالنا حال المرة المعلقه...لا متزوجة ولا مطلقه...ويش هذوله ما عندهم احساس...والله حرام...مخلينا كل في توتر وقلق...الله لا يغفر ليهم ..ويضوقهم من الكاس اللي سقونا منه...الساكت عن حقه شيطان اخرس....واعتقد خلاص مصخوها معانا واجد...اذا صدق عندهم نيه في توظيفنا يخلونا نكمل الاجراءات من فحص وبصمات..وبعدين يخلونا نداوم الشهر الجاي...واتمنى ليكم التوفيق ...الله ينصرنا ويسدد مساعينا بالنجاح بحق فاطمه وابيها وبعلها وبنيها والسر المستودع فيها...لا تنسونا من صالح دعائكم.

اكيد اختي لازم نتواصل علشان نشوف شنو اخر الاخبار بس اني حدي خايفة لأن مو عارفين مصيرنه هل بنتوظف لو لا حتى اذا احد سألني ما اعرف شنو اجاوب عليه والله محتارة بس حبيت اسألش اختي بحر الوفاء لما رحتون حق الوزارة مالت التربية وسألتون الشيخ هشام متى قال ليكم بيتصلون فينه حق فحص وبصمات

هلا اختي كتكوتة...خبرني انه راح يكون بعد ما يكمل ديوان الخدمة اجراءاته مع بقية الوزارات ...يعني احتمال آخر وزارة بتكون التربية ..راح يوظفونهم على اساس انه يكملون بقية 500 عاطل في التربية ..خبركم مو صارت ارقام متكررة ينتظرونهم يختارون ..عشان يحددون بقية الشواغر...يعني حجج تحطها الوزارة لما تقرر تنزلنا ...ما تبي تدفع من عندها..اللله الموفق

السلام عليكم ....شخباركم...اكو اسبوع جديد بيقبل علينا...الله يجعله اسبوع خير علينا وعلى المؤمنين...واحنا ما زلنا ننتظر تكميل الاجراءات حق الوظيفة...وهالاسبوع الجديد اذا مر دون ما يحدث اي طارئ على قضيتنا ..اني يتهيأليي بنصاب بخيبة امل واحباط...وبتراكم الاحباطات علينا ..اني وحده عن نفسي اخاف اتصيدنا امراض..الانتظار المشحون بالقلق والتوتر شيئ مو سهل ....بس عاد من بيهتم لينا مرضنا لو متنا في هالديره...الشكوى الله....يقولون ان المشرف الاجتماعي في امريكا يعتبر منصبه عالي وراتبه كبير ويهتمون بيه بشكل كبير ..اكيد لأنه المفروض يساعد الطلبه على ان يحل مشاكلهم...فإذا كان هو نفسه عنده مشاكل ...ويش بيسوي للطلبه....لا تنسونا اخواتي من صالح دعائكم....وان شالله خير

وينكم يا بنات الخدمة ما يصير نسكت اكثر وانحط ايدنه على خدنه لين حضرتهم ما يتكرمون ويتصلون لازم نسوي شئ خلنه نتفق اذا ما اتصلوا فينه هالاسبوع حق فحص وبصمات نروح ليهم الاسبوع الجاي كلنه ونوقف على راسهم ونعرف ويش السالفة بالضبط هل بيوظفونه لو يقصون علينه لأن ما نبغي نحط على امل وبعدين ما فيه شئ يالله اي وحدة خدمة وتعينت ويه الاربعين اللي كتبوا اسمهم تدخل اهني وتقول لينه شنو نسوي نروح ليهم لو شنو نسوي ابغي حل ما يصير نسكت لأن اذا سكتنه صدقوني ترى هم بعد بيسكتون وبينسون السالفة

الله ينتقم من الظالمين....بالفعل بنات احنا ما لازم نسكت لمن ياكلون حقنا....خلنا نتحرك اكثر...النواب الوزارة الصحافه ...لازم الكل يتحرك على قضيتنا..حسبي الله عليها من وزارة....ما وراها الا البهدله.

اخر ااخبار

ما راح ينادونا الا بعد اسبوعين هذا خبر من شخص ثقه لان للحين الوزارة ما اعتمدت الميزانيه وانهم راح يسون ميزانيه جديدة





ما اقول الا حسبي الله ونعم الوكيل

خلاص لاعت جبدي ما ابغي اتوظف خلونه نفقد الامل في كل شئ ما صار عندي ذاك النشاط حق اشتغل خلاص عودت نفسي على القعدة لمتى حالنه جديه يعني قصوا علينه يبغونه بعد ننتظر اسبوعين يعني بخلصون الاجراءات عقب العيد واشلون يقولون نداوم الشهر الجاي يعني معناتها حتى الشهر الجاي ما بنداوم اذا هذي حالتنه

خواتي نحنا صبرنا واجد...وكنا فاقدين الامل في الوظيفة ..ولكن بقدرة القادر ..الله وفقنا على قد سهرنا وتعبنا في الدراسة ...انا اقول احنا اقوى من جذي وطبعا يد وحدة ..ولا تنسون حالنا افضل من ربعنا وصديقاتنا الي ما نزلت اسمائهم في التربية والتوظيف والله اني غلطانا ..ما دام اختي بنتي حبيبتي قالت ثقة بعد اسبوعين خلنا ننتظر ونطلب الصبر من الله ..اذا ما صار راح نرتب يوم ونروح كلنا بإذن الله التربية عشان يسوون لنا حل نهائي

نسألكم الدعاء

اي خلنه ننتظر بعد اسبوعين ونشوف وبعدين مثل ما قالت الاخت بحر الوفاء نروح ليهم بس اخواتي لو تحسبون بعد اسبوعين بتلاقون ان بصير اجازة العيد يعني شلون بيتصلون وهي اجازة العيد اني هذا اللي خايفة منه ولا تنسون العيد تقريبا خمسة ايام وبعدين يعني يدامون لكن شلون احنه مصيرنه لو اتصلوا فينه بعد العيد يعني بعد بنتأخر بس يالله بنصبر ونشوف واحنه نحمد الله ان حالنه افضل من غيرنه على الاقل طلع اسمنه

الحمد لله على كل حال ... نصبر هالاسبوعين .. وإذا ما صار شئ لازم نتحرك .

هذا ويهي اذا ما داومنا الكورس الياي قلبي حاسس انهم بينقعونا نصبر اسبوعين ونشوف

اي عفية هدئو نفسياتكم وارتاحو خواتي ... ترى عادي يشتغلون باقي ايام الاجازة نسيتوا انهم كانوا يتصلون فينا ايام الجمعة والسبت .... اعتبروا انهم قالوا لنا بعد شهر رمضان وارتاحو ...لازم نتعلم الحلم ..عشان نعرف نتعامل مع الطالبات ...ههه

يالله يصير خير بعدين ..موفقين

تحياتي

بنات بس حبيت اقول ليكم ان وحدة اتصلت ليي امس من البنات المقبولين ويانه وخبرتني ان هي سمعت من مصادر ان بعد اسبوعين يعني على نهاية الشهر بيتصلون فينه مثل ما قال الاخت هني في المنتدى لأن تقول ان ناس واجد يقولون هذا الحجي يعني يوم تقول الاخت من مصادر موثوقة بس ان شاء الله يطلع الكلام صحيح ويتصلون

السلام عليكم بنات الخدمة


اليوم اتصلت بجريدة الوسط حق الصحفية زينب وآنه اتواصل معاها من فترة لفترة .

وكلمتها ان للحين الوزارة متأخرة في الرد علينه عشان انكمل اجراءاتنه او حتى الرد علينه .

قالت لي اتعرفين البنات الست اللي قطوا اساميهم من القائمة قلت لها انهم ايدشون المنتدى بس ما عرفهم معرفة شخصية ..

قالت ياريت تتيمعون انتو كلكم اكانوا اللي قبلوهم او اللي تم حذف اسمائهم وتيون الجريدة

راح ناخذ آرائكم وشكواكم وبنسوي منتدى خاص في الجريدة يعني بنخصص لكم صفحة كاملة عن مشكلتكم ..


بصراحة انه رحبت بالفكرة .. لانها راح تطرح مشكلتنا وتخلي التربية تتحرك اكان بشكل رد على الجريدة وذكر اسباب التأخير او الاتصال بنا واكمال اجراءاتنا .

ها بنات شرايكم ... بتتواصلون مع الصحفية .. بصراحة شكلها وايد متعاونه وحبوبة .. اتمنى تتعاونون ..

وهاذي رقم الصحفية للي حاب يتواصل معاها 39979776 نبي نجمع اكبر عدد من الببنات عشان نروح جريدة الوسط .

اتمنى التعاون ..

مو مشكلة اي شئ انتون بتسوونه احنه معاكم
بس حبيت اسألكم اذا احد منكم راح صندوق العمل وسألهم ويش صار لأن الظاهر من صندوق العمل واذا احد منكم راح قبل يخبرنه شنو صاار

انا وحدة من البنات الست المحذوفة اسمائنا ...واعرف البقية ..واعرف بعد ثنتين من القائمة يعني يلي اعرفهم 8 وحدات..اقول ننتظر هالاسبوعين واذا ما صار حل راح نجتمع كلنا وعد ترى ..وانا هم ترى اتواصل مع الاخت زينب التاجر في الوسط وخبرتها بالقصة ..بعد لسبوعين راح نكون يد وحدة اذا ما حلت الوزارة القصة احنا بإذن الله نتحرك..نسألكم الدعاء

يعني فيه امل يتصلون فينه بعد اسبوعين تتوقعون صدق الحجي اللي سمعناه واللي قالته الاخت من مصادر موثوقة ارجوك اختي اللي قالش ان بعد اسبوعين اسأليه بعد خله يأكد لش الله يخليش واذا اكد لش على الاقل بنطمئن شوي لأن اني مو مطمنة بالمرة اخاف يبوقون البيزات ويقولون ما ليكم ميزانية
بس صدق لاعت جبدنه ساعات اقوم الوم حظي اقول شنو هالحظ كل اللي اخذوهم اكوا توظفوا اشمعنه الخدمة الاجتماعية خلونه نفرح وبعدين صدمونه ليش يسوون جدي يوم اللي ما يبغون يوظفون خدمة ليش يسوون لينه امتحان ويقولون بياخدون عجل اذا ما فيه ميزانية وين راحت البيزات اللي عطاها الملك الى صندوق العمل ابغي اعرف بس شكلهم كلش مو معترفين فينه ان اخدونه

بحر الوفاء;7233920:
انا وحدة من البنات الست المحذوفة اسمائنا ...واعرف البقية ..واعرف بعد ثنتين من القائمة يعني يلي اعرفهم 8 وحدات..اقول ننتظر هالاسبوعين واذا ما صار حل راح نجتمع كلنا وعد ترى ..وانا هم ترى اتواصل مع الاخت زينب التاجر في الوسط وخبرتها بالقصة ..بعد لسبوعين راح نكون يد وحدة اذا ما حلت الوزارة القصة احنا بإذن الله نتحرك..نسألكم الدعاء

وآنه وصديقتي ثنتين وصديقتي تعرف جم وحده بعد من القائمة ... بننتظر هالاسبوعين ... بس ياريت اللي يعرف احد من الخدمة يخبره ..