مســــــــــــــــيرة الحـــــــــــب

معاااااااااااااااااكي ياقلبي

كملي

طبعا لما نزلت كنت قلقانة أوى قلت يا ترى أيه اللى حصل وأيه المكان المقطوع اللى راحت فيه ده ... والحمد لله وصلت لها فى 30 دقيقة ولقيتها قاعدة جنب كشك سجاير وبتعيط ومش معاها لا شنطتها ولا حاجتها أتخضيت طبعا جدا وقلت لها أيه اللى حصل !!!!!!! وعرفت أنها وهى خارجة من الشغل فى الفندق على النيل وقفت تاكسى وشوية وهى سرحانة فى التاكسى لقيت السواق مشى فى طريق تانى غير طريق البيت , وسألته مشيت ليه بعيد ده مش طريق البيت ؟ فقال لها معلشى يا قطة أصل الدنيا زحمة من هناك وأنا بختصر الطريق من طريق تانى مختصر ،،،، ومشى بيها طبعا فى شوارع عمرها ما شافتها قبل كده وقلبها يا حرااام أنخلع من مكانه وكانت بترجف لحد ما لقيت السواق وقف فى شارع ضلمة والمنطقة كلها فيلات وأضاءة ضعيفة والشوارع فاضية و فتح مطواة فى وشها وقالها بتهديد هاتى كل فلوسك ومحفظتك وشنطتك ودهبك طبعا هى كانت بترجف ومش عارفة تتصرف أزاى وخافت على روحها قالت له طيب هديك كل حاجة بس نزلنى فى مكان عمران فيه ناس أو حاجة أعرف أروح بيتنا ههههههه ( البت دى هابلة ولا أيه ؟؟؟ ) وطبعا الراجل مش عبيط يعنى علشان يعمل كده , أخد منها كل حاجة وقالها ياللا أنزلى !!!!! قلت لها أحمدى ربنا أنها جت لحد كده وأنه أخد حاجات مادية بس أحمدى ربنا أنه ما تعداش عليكى أو لمسك أو عمل فيكى حاجة أو جرحك بالسكينة اللى معاه دى بس أحكى لى أزاى وصلتى للكشك ده والشارع عرفتيه أزاى وكلمتينى منين ؟؟؟؟؟؟؟؟

بصوا بأه جوزى جاى من الشغل دلوقتى بعد 5 دقايق بالظبط هقوم أجهز له العشاء بتاعه وأستقبله وبعد ما يتعشى بالهنا هدخل أكمل لكم الحكاية واذا معرفتش ما تزعلوش هكملها الصبح أن شاء الله أصلى بكره مش عندى شغل :wink: بااااااااااى دلوقتى

حكت لى ماهى أنها فضلت ماشية لوحدها فى الشوارع الضلمة وهى بتبكى لحد ما شافت من بعيد الكشك ده وراحت حكت لصاحبه الحكاية وخلاها تتصل بيا من تليفونه وقالها أستنى هنا جانبى ....... المهم أخدتها روحتها بيتها وطول الطريق طبعا بديها فى نصايح وبغلطها وقلنا الحمد لله أن ما حصلش حاجة أكتر من كده وهى بكت وقالت أنها بجد كرهت شغل المغنية ده ونفسها تتركه للأبد وتلتزم وتشتغل أى شغل تانى محترم وبصراحة حسيت فيها أنها ندمانة بس هى ما تعرفش تعمل أى حاجة تانية غير الغناء فأتفقت معاها أنى مستعدة أعلمها كل حاجة عن الكمبيوتر والكتابة عليه لحد ما تتقنها وهى اللغات عندها حلوة أوى وبعد كده نقدم لها فى شغل سكرتارية ....... فى الوقت ده بصراحة أنا كان بيتقدم لى عرسان كتير أوى ويمكن أنا كنت أكتر واحدة فى صاحباتى بيحصل ده معايا ومش علشان أنا مثلا جميلة وبس لأ والله هما كمان حلوين بس هى كانت مسألة حظ بيتهيألى , الموضوع ده كان بيضايق ماهى أوى ولما لاحظت كده قلت ما فيش داعى أحكى لها يمكن ده بيجرح مشاعرها أو بتفتكر أنى بميز نفسى عليها فبطلت أحكى عن أى حد يتقدم لى , لكن للأسف مامتى قالت لمامتها مرة عن عريس دبلوماسى ووسيم وكانت هتموت ليه أنا رافضاه وقالت لها خلى ماهى تكلمها فى الموضوع وتأثر عليها علشان توافق وأنا طبعا ما كنتش عرفتها حاجة !!!!

وسبحان الله .. شفت منها ثورة عنيفة جدا , أزاى أنا معرفهاش أن واحد متقدم لى فقلت لها مبررى أن لاحظت أنك بتضايقى من المواضيع دى وبعدين أنا خلاص الموضوع منتهى ورفضته ردت عليا وقالت مش مهم دلوقتى طبعا لازم ترفضيه مش لازم تتجوزى دلوقتى أحنا أتفقنا أنا وأنت مش هنتجوز الا مع بعض ولو لقينا حد نحبه المهم أنك بتخبى عليا ليه أنت خايفة أحسدك يعنى علشان أنت الوحيدة فينا اللى الرجالة بيجروا وراكى وأحنا ما فيش حد بيعبرنا ؟؟؟؟؟؟؟؟؟؟ وصعقت من ردها .. وأنسحبت مشيت وقلت لها مش هرد عليكى بس من جوايا كنت زعلانة منها أوى ورغم كده ألتمست لها العذر

وعلشان مش عايزة أطول عليكم أنا بعد كده بكام سنة قابلت جوزى وحبينا بعض وأتجوزنا .. وهو طبعا أتعرف على ماهى بصفتها صاحبتى الأنتيم ومن أول مرة قرر أنى لازم أبعد عنها نهائى وأقطع علاقتى بيها ........ هكمل معاكم باليل وأعرفكم عملت أيه

بـــــــــــــا نتظارك ياقلبي

أورفليم ....مرسيه يا جميلة أنك متابعة موضوعى والله حسيت بيكى أن الحمد لله فيه حد معبرنى هههههههههه ربنا يخليك ....هكملك الحكاية

جوزى صمم أنى ما أعزمش صاحبتى فى الفرح وكمان حاول يغير شوية حاجات فيا وأنا أحترمت ده فيه لأنه بصراحة التغيير ده أنا نفسى كنت عايزاه زى مثلا طريقة لبسى وأصحابى وعلاقة التضحية الفظيعة اللى كنت متبعاها معاهم وحاجات بسيطة كده بس مهمة .. بس أنا مقدرتش أقول لماهى أنى مش هعزمها وخالفت رأى جوزى وقولت لها الفرح فين وعزمتها ويوم الفرح كنت بدعى ربنا تيجى لأنى بحبها ومرتبطة بيها وبصراحة كونت عايزاها تكون معايا من الصبح زى كل البنات ....المفروض دى أنتيمتى بصراحة كنت مفتقداها ,وللأسف كان عندها شغل وخلصت شغلها وبدل ما تيجى تغنى فى فرحى فرح صاحبتها الوحيدة كانت بتغنى فى أوتيل تانى وجاتنى فرحى على الساعة 2 صباحا وخلاص كان ناقص ساعة وأمشى لأنى كنت مسافرة ماليزيا فى شهر العسل وشوفوا بأه لما جات قالت أيه !!!!

قلت لها أتأخرتى ليه كده؟ قالتلى بصراحة ما كنتش عايزة أجى وبعدين مالوش لازمة تسافروا ما تعملوا شهر العسل هنا وخلاص أو روحوا شرم الشيخ !!!!!!!! هو معقولة وااااااافق كده بسهولة تسافروا ماليزيا ؟؟؟؟ طيب دا أنت دايما حظك نااااااااااااار وكمان وقعتى على عريس أيه قمر فقلت لها ليه يا ماهى بتقولى كده هو أنا يعنى وحشة أو ما أستاهلش فقالت لأ طبعا أنت كمان زى القمر بس دايما البنت الجميلة بتتجوز واحد أقل منها أو أكبر منها لكن أنت أتجوزتى واحد وسيم ومبسوط ماديا وشاب وفوق ده كله بأه بتحبو بعض !!!!!!! فاندهشت وقلت فى نفسى الظاهر جوزى كان عنده حق :mad: فقلت لها كتر خيرك هى دى مبروووووووووووك !!!!!!!!

وجوزى شافها شاط وشدنى من أيدى وقالى ياللا علشان الطيارة وحاولت تكلمه ما رد عليها أبدا وبينى وبينكم أنا كنت حزينة أن صاحبتى اللى عشت معاها طول السنين دى يكون ده أحساسها ناحيتى بس برضه كنت بعذرها وأقول معلشى ظروفها بس علشان حاسة أنها وحيدة وكمان كانت مامتها أتوفت قبل الكلام ده بسنة فأنا راعيت ده وكنت بكذب أحساسى بموضوع الغيرة أو الحسد لحد ما رجعت من شهر العسل وما أتصلتش بيا بس أنا كان نفسى أطمن عليها وخصوصا أنى عرفت أن والدها كمان توفى ....... وكان لازم أعمل الواجب وأروح أعزيها ........

ياعمري انتي

انا والله كل شوي بدخل اشيك كتبتي حاجة ولا لا ههههههههههههههه

الله يسعدك

والله اتمنيت صديقة مثلك ياقمر

وبعدين؟؟

كملي حبيبتي ....متشوقة اعرف القصة للنهاية

أنا اضطريت أقوم بس لأن ده الميعاد اللى بجهز فيه الأكل لجوزى علشان بيرجع من شغله على الساعة 11 أو 12 باليل وطبعا كمان أستعد له :wink:

وان شاء الله أول ما تيجى فرصة بعد العشاء هدخل أكمل الحكاية يا توتة ....:888345:

روحت لماهى وعزيتها صعب عليا موووووووووووت والبت صعب عليا أوى ..بيتهم ده شاف ذكريات كتيرة لينا وأحنا أطفال وفى كل ركن كنت بفتكر مامتها وهى بتضحك معانا أو بتقولنا حاجة أو بتجرى ورانا أو بتوبخنا على حاجة غلط ,,,,,,,, ووالدها وهو بيعطينا محاضرات فى الذوق والأخلاق والصبر وأحنا ماسكين نفسنا من الضحك أدامه وشغالين نظرات لبعض بمنتهى الشقاوة .....زز بصراحة تعبت نفسيا أوى لما روحت البيت عندها

وهى يا قلبى تعبانة أوى وحاسة أنها وحيدة ولما أتكلمنا مع بعض .. حسيت أول مرة من سنين شخصيتها الحقيقية اللى بحبها طلعت .... وقالت لى سامحينى أنت صبرتى عليا كتير وأنا أذيتك كتير أوى فرديت بسرعة وأنا بأخد رأسها فى حضنى أنت عبيطة دا أنت أختى ومهما حصل منك مش ممكن أزعل كنت بتضايق صحيح وقتها لكن كنت بلتمسلك العذر دايما علشان بحبك :sad: أنا حزينة عليكى بس ده قدر ربنا ولازم نرضا بنصيبنا
فقالت لى على فكرة أنا كنت بغير منك وكمان بحسدك طول عمرى كنت بحسدك علشان دايما حاسة أنك أحسن منى وبدل ما أفرح لأنك أغلى انسانة عندى وتكون كويسة كنت بحسدك وبغير علشان كده سامحينى ..أنا عايزة ربنا يسامحنى ,,,, طبعا أنصدمت من كلامها وكانت بتقول كل ده وهى نايمة على صدرى ....... وفعلا أنا زعلت لكن ما كانش بأيدى أى حاجة غير أنى أسامحها ....... وقلت لها كده وقلت لها حاجة تانية ....... بخصوص جوزى لأنه كان مانعنى أتصل بيها أو أكلمها ... حكيت لها بكل صراحة وقلت لها أنا هحاول واحدة واحدة أقنعه وأعرفه أنك أتغيرتى وكمان أقوله على الظروف بس لو قصرت معاكى شوية فى الاتصال أو أشوفك ما تزعليش منى .... والحمد لله سيبتها وهى أحسن شوية .....

المرة الجاية هحكى لكم أزاى أنا لبست أيشارب وأبتديت ألبس حجاب وأغير من طريقة لبسى وأزاى هى أتأثرت بده وليه بطلت غناء وهى بتعمل أيه دلوقتى ......... مفاجأة :wink:

الله يسعدك ياحبيبتي بجد كلك ذوق ربنا يسعدك وبانتظارك

أنا فجأة كده وأنا بصلى روحت أدام المرايا وبصيت لوجهى وأنا لابسة الأسدال وسبحان الله رأيت رضا ونور فى وجهى والله بجد وقلت لنفسى طيب ما أنا قمر بالحجاب برضه وبالعكس حاسة براحة وأنا لابسة الاسدال .. ليه ما ألبس كده على طول وأبطل لبس الجينز والبنتاكورات والجيب المينى والحاجات الفارغة اللى ما بتستر وأول مرة فى حياتى أتكسف وأنا ببص لنفسى بالمرايا بجد والله وأنا لابسة الآسدال حاسة أنى متغطية ومستورة مش علشان هو طويل ومغطى جسمى .. لأ علشان المعنى هو اللى أقصده وحسيت أد أيه أنا عايشة عريانة بين الناس وأنكسفت من ربنا وفضلت أبكى بحرقة وقولت لازم ألبس حجاب ... ليه بصلى وأقرأ قرأن وأعمل خير كتير وربنا قذف فى قلبى رحمة كبيييييييييييرة أوى على كل مخلوقاته وفيا عواطف تكفى الدنيا وحاجات حلوة كتير الحمد لله .. ليه مش بكملها وليه بعطى الشيطان كل الفرص دى ؟ وأفتكرت الرؤية اللى شفت فيها الرسول عليه الصلاة والسلام أنا والله شفته مرتين .. وأنا ماشية بشعرى ولبسى ده وأنا كنت فرحانة أوى أنى حلمت بيه وقولت علشان أعمالى حلوة ومش بأذى حد وبحب الناس كلها ونسيت !!!!!!!!! نسيت أنى ناقصة فى عبادتى بربى وأنه أكيد الرسول الكريم جانى علشان ينبهنى ودعانى أمسك بجسده الشريف وأضع يدى على لحم ظهره الشريف ولكنى والله أستحييت منه أن ألمسه وأستكترت على نفسى فى الرؤية أن ألمس جسده الشريف وأكتفيت أنى مسكت من ظهرة بعبايته وهو صلى الله عليه وسلم أنقذنى وخدنى من مكان وحش بعيد وحطنى فى مكان جميل وأنقذنى يا اللــــــــــــــــــــــــــــــه والله أد أيه جميل وكريم ..... وبعد ده كله ما أتعظت وفضلت سنة على حالتى وجنونى وشيطانى ....... أعذرونى حبايبى بكملكم بعد شوية

معاكى ياقمر

وعندها ...لما وقفت كده أدام المرايا وكل ده جال فى خاطرى قررت ألبس ولو حتى أيشارب وألبس لبس بكم وبلوزات طويلة شوية عن منطقة الهانش لأنى فعلا لبسى كان مثير بشكل !!! ربنا يهدينى ويغفر لى جهلى وأسرافى فى أمرى ,, كنت شايفة جسمى حلو ومغرى أوى وكل الناس بتنبهر لما تشوفنى وبدل ما أستره وأغطيه ألبس اللى يظهره أكثر- أدعوا لى ربنا يغفر لى :cry::cry::cry:

المهم روحت لصاحبتى مرة تانية ولقيتنى لابسة أيشارب ولابسة جيب طويلة وأندهشت وقالت وااااااااااااااااااااو أيه الجمال ده حلو أوى ربنا يهديكى وشكلك جميل فيه وفضلنا نتكلم مع بعض شوية وبعدين قالت أنا كمان زهقت من مجال الغناء ده وقررت أبعد عنه وأدعى لى علشان قريب ألبس زيك حجاب وأكون مرتاحة وفعلا دعيت لها بحرارة وتركتها وأنا وهى قررنا ندور لها على شغل تانى محترم ,,, وبعد فترة كبيرة جالها شغل سكرتيرة فى شركة سياحة طبعا المرتب ما يجيش 1على 10 من الفلوس اللى كانت بتدخلها من الغناء لكن حلال وفيها بركة وهى ضحكت وقالت يادوب بنزين عربيتى وسبحان الله فى الفترة دى أنهالت عليها عروض فى الغناء وكانت مغرية جدا لكن خلاص الحمد لله هى قررت تسيبه والحمد لله أنا كنت جنبها بقويها .... وطبعا طول الفترة الكبيرة اللى فاتت دى هى كانت نفسها أوى ترتبط بشخص لأنها رومانسية أوى ونفسها تعيش قصة حب وتتجوز وأنا حاولت أجيب لها كذا عريس بس ربنا ما أراد لأن النصيب لسة ما جاش ... أنا صحيح وجودى فى حياتها قل كتير عن زمان بس لأنى ليا بيتى وأمور زوجى ومشغولة وكمان أنا عارفة أنى غلطانة أنى كنت بزورها وأكلمها دون أن أخبر زوجى بس أنا كانت نيتى خير ومش عارفة هل بعد اللى حصل ده أقول لزوجى ؟؟؟؟؟؟؟ بس خايفة هتحصل مشكلة كبيرة وهيقول ليه خبيتى عليا ,,,,, والرجالة ما ينسوا أبدا ولا يغفروا أبدا زينا
كنت عايزة أعرفه أنها أتغيرت وتركت الغناء نهائيا رغم أن أخوها أصبح مطرب مشهور ومعروف فى الوطن العربى كله وكان بيحاول يؤثر عليها ترجع تانى للغناء لكنها رفضت والحمد لله ...
أنتم أيه رأيكم أعرف جوزى بالموضوع ده حتى يسمح لى أشوف صاحبتى فى النور أدامه وأعزمها فى بيته ولا بلاش ؟؟؟؟ أنا حاسة لو قلت له وأعترفت له أنى كنت على صلة بيها هيكون فيه مشكلة كبيرة بينا

عاوزة الحق -------- رايى انك تقولى له انك عملتى عمل كبير يرضى ربنا وهيقعد لاولادكم ان شاء الله وانك كنتى منتظرة القوت المناسب عشان تحكى له لما تتاكدى انك نجحتى فى مهمتك اللى نويتيها لله وان شاء الله هيفرح بيكى كتير
بس وانتى بتكلميه حطى فى ذهنك انك بترضى ربنا فى زوجك وفى صديقتك وربنا هييسر الامور

يااااااااااا نوجة يا قمرة ازيك ؟؟؟

انا كويسة بس اموري متلخبطة الايام دي .... شغل كثيررررررررررر وبابة تعبان وحالة ما يعلم بيها الا ربنا ...
وحشتيني .... كلامك والله عسل ... وعندي كلام كثير بس بحاول ارتب نفسي وافكاري شوية لاني حاسة دماغي متلخبطة كثير وتعبانة ...

انا من رأيي انك تكلمي جوزك عن صاحبتك بهدوءءءءءءءءءءءءءءءءءءءء خاصة اذا قدرتي توصلي لة الفكرة والهدف الي انتي رجعتي تكلمي صاحبتك عشانة ... صح هيزعل شوية بس اكيد هينسى بسرعة طالما انتي هدفك جميل زيك ولازم يتأكد انها اتغيرت يعني اذكري لة شي حصل منها او هي عملتة ....

ربنا يووووووووووووووووووووفقك يارب ....

ليا عودة بعد شوية اخلص الشغل الي في ايدي وارجع لك

ثوانى;6597946:
عاوزة الحق -------- رايى انك تقولى له انك عملتى عمل كبير يرضى ربنا وهيقعد لاولادكم ان شاء الله وانك كنتى منتظرة القوت المناسب عشان تحكى له لما تتاكدى انك نجحتى فى مهمتك اللى نويتيها لله وان شاء الله هيفرح بيكى كتير
بس وانتى بتكلميه حطى فى ذهنك انك بترضى ربنا فى زوجك وفى صديقتك وربنا هييسر الامور

أشكرك لمرورك الكريم حبيبتى ونصيحتك الغالية وأن شاء الله هحاول وربنا يسعدك

أموووووووووووووووووونة ....... وحشتينى جداجدا والله

ربنا يشفى باباك يارب ويخليه ليكى ألف سلامة عليه وربنا يسهلك كل صعب ويهديلك الحال يارب أمين

المهم أنت خلى بالك من نفسك وأعملى كل حاجة براحة وبهدوء علشان أنتى ما تتعبيش فى الآخر وأن شاء الله كله خير , وكمان هاخد بنصيحتك أنت و ثوانى وهحاول أكلمه كده بهدوء وربنا يستر أصل أنا جوزى دماغه غريييييييييييييييبة !!!!!!!! والله وطبعه صعب بس الحمد لله على كل حال بستحمل علشان بموت فيه وأولا علشان خاطر ربنا ......... تعرفوا أنا حاسة أن لو كان فيه بيبى عندنا حياتنا هتختلف تماما وهيكون لها طعم أكتر ,, ولا يمكن أنا من كتر ما نفسى يكون عندى طفل يقولى مامى ..بيتهيألى كده ؟
أستغفر الله العظيم كله بيد الله وربنا قادر يرزقنى متى يشاء وأحمدك يارب على كل النعم اللى أنا فيها ألف حمد وشكر يا وهاب

سلام لاحلى نوجة

انا رجعت،،،، تصدقي اسلوبك في الكلام يشد ويخلي الواحد يبقى متابع معاكي

انا عندي شي مضايقني انة طبعي من النوع الي اسامح كثير واعدي اكثر واجيب مليون الف فرصة

بس المشكلة في داخلي هاجس انة افضل طريقة تخلي الانسان يحس بغلطة انك تعاملة زي ما يعاملك

يعني مثلا اختي الله يسامحها بينا مشاكل كثير وطبعها حاااااااااااااااااااااااااااااااااااااامي على كل شي تعصب ولازم كلامها هو اللي يمشي .... احيان تقهرني وتخليني اتعامل معاها بنفس الاسلوب واحيان اتعمد ازعلها او اجرحها عشان تحس وتنتبة لما يحصل منها شي ... كمان مع اعز صديقة عندي اعمل نفس الشي ما اقدر اسمية انتقام بس عندي قناعة جدا كبيرة انة تعاملي الشخص زي ما يعاملك عشان يحس احيان على مواقف بسيطة استخدم هذا الاسلوب مع ان الشخص ما يستاهل بس مو قادرة ابعد الطبع هذا.... بس انا قررت لازم والف لازم ابدأ احاول عشان ما اخسر الناس الي حولي هما يعامولوني بعفوية وانا اتعمد ارجع الموقف عشان يحسوا .... عنهم لا حسوا اخلي الامور تهدأ وبعدها اعاتب او اقول الي عندي بدون ما ارجع بنفس الاسلوب .... حاسة انة بعد فترة اذا استمريت على كذا راح يتولد عندي حب الانتقام .... يا رب يكفيني هذا الاحساس وهذا الطبع الشين ويهدينا جميعا الى ما يحب ويرضاة يارب ...

حبيبتى أموووووووونة .. جيتى شرفتى ونورتى

أنا معاكى أن أحيانا الناس أسلوبها فى التعامل معاكى ممكن يقهرك ويخليكى تخرجى عن شعورك وخصوصا بأه لما يكون حد قريب منك ....بس الشيطان لأنه عارف أنك أد أيه طيبة ومتسامحة مش عايزك تأخدى ثوابات لما تسامحيهم بالعكس ده عايز يحملك ويشيلك ذنوب أكتر يقوم يقولك هتفضلى متسامحة كده لأمتى وهم بيدوسوا عليكى !! وهم بيهينوا فيكى كل ما وجدوكى طيبة وغلبانة يركبوكى ويذلوا فيكى !!! ياللا ردى.. ياللا عامليهم بنفس الطريقة .. ياللا خدى حقك !!!! صح ؟ مش ده اللى بيحصل ؟؟؟؟؟؟؟؟ أنت بأه خليكى أذكى منه ولما أختك أو صحبتك تعمل حاجة تضايقك ومهما كان الكلاك جارح .. لو هى واقفة أدامك أتركى لها المكان وأنت بتقولى لها الله يسامحك وأمشى ... والله فى نفس اللحظة وحتى لو ما بينت هتحس هى بضميرها بيلسعها وتحس بغصة فى حلقها وكأنها هى اللى أهانت نفسها أزاى هى تهاجمك وأنت تدعى لها وتقولى الله يسامحك !!! وهتنكسف من نفسها ومرة على مرة مش هتعمل حاجة تضايقك تانى ,,,,,,,,,,, واذا كان الحوار فى التليفون أتركيها تقول كل شىء وأنت أسكتى لحد ما تخلص قولى لها ها خلصتى .. شكرا وكتر خيرك والله يسامحك وأنا مضطرة أقفل السكة السلام عليكم وخلاص وبرضه هتحس هى نفس الأشياء
وبعد كده لا تخاصميها أو تتجنبيها بالعكس كلميها عادى صحيح ما تدلقيش عليها يعنى صباح الخير أزيك سلام ولا تحكى ولا شىء بس وهى بتحس بغلطتها وبعدين أى مساعدة أعمليها أى مشاركة بادرى بيها والله بتخجل من نفسها مووووووووووووووووت وبتيجى تبوس راسك
وأنا عارفة أن فرحها قريب زى ما قلتى سابق ساعديها فى أشياءها وأعرضى عليها أفكار حلوة لفرحها وشوفى أيه ناقصها وهاتيه لها هدية الزواج ... وصدقينى يا لولو لما هتعملى كده مع أى حد بيضايقك ربنا هينزل على قلبك سكينة وهدوء جميل هتستغربى أزاى ما أخدتيش حقك وجواك هدوء كده وراحة كده .. لكن ساعتها ربنا هو اللى هياخد حقك وشوفى بأه أيه أعظم .. أنك تأخدى حقك بيدك وتأخدى معاه ذنب ولا أن ربنا يأخد حقك هو ويعطيك ثواب كظم الغيظ والتسامح ؟؟؟؟؟؟؟ بالتأكيد كلنا نحب نأخد الثواب ومعاه راحة البال أنك مش بتأذى حد ولو بلسانك ..الدنيا سهلة وجميلة بس الناس هى اللى مش عارفى تتعامل مع بعضها بيخلوها صعبة أوى
أنا متأكده أنك هتحاولى وتنجحى وبعدين ده مش طبع فيكى ده أحساس طبيعى الشيطان هو اللى بيهيأه لك وده موجود عند كل البشر .. والشاطر بس هو اللى يضحك على الشيطان ....... وأنت شاطرة :wink: ولا أيه ؟

ربنا يعطيكى كل خير يا حبيبتى ويسهلك أمورك ويشفى والدك ويسعدك ويثلج صدرك وييسر لك كل أمورك ويكفيك شر من يؤذيك ..... أأأأأأأأأأأمين