مالجه(عقد قراني) من شهر وافكر في الطلاق بسبب زوجي المجنون

السلام عليكم
خواتي عرايس المنتدى.. كيف حالكم وعساكم كلكم بخير..

ان شاء الله الاقي عندكم الصدور الوسيعه لمشكلتي..اناعلى فكرة موب عضوة جديده .. انا قديمة لكن دخلت بهذا الاسم واسمحولي حابة انه الموضوع يكون خاص ..لكن انا عضوة من سنوات ولي أسم اخر ادخل به المنتدى..
المهم..بدخل في الموضوع
انا ولله الحمد تم عقد قراني من حوالي شهر..وانا في اوائل الثلاثينات الان..خطيبي من جنسية عربية غير جنسيتي وانا اصلا خليجية..الحمدلله ورغم انه قد اسمع عبارات الاعتراض ليش تاخذين واحد موب من البلاد.. لكن كل شئ تم برضى والدي واهلي كلهم موافقين وما يهمهم غير انه مسلم عربي وهو أكبر مني بسنة يعني عمره شي وثلاثين.. المهم يابنات ..مااعرف شو اقولكم من الحرقه اللي في قلبي والالم..
خطيبي يشتغل في نفس البلد اللي انا اصلا منه..وشافني وخطبني وتم كل شئ..كان يشتغل في شركة ..لكن صاحب العمل كنسله بالتالي اصبح خطيبي مهدد بالخروج من الدولة او انه يجد كفيل اخر وللعلم صاحب العمل كنسل زوجي من غير اي وجه حق واكل عليه راتب شهر لكن احتسبناها عند الله..انا طبعااستحاله بشوف زوجي في هالوضع وما اساعده..وبما انه تم عقد القران جهزت كل اوراقي ورحت الجوازات وكفلته ووافقولي طبعا بما انه زوجي..طبعا كله ولا انه زوجي يطلع برى البلاد واكون انا في مكان وهو في مكان..المهم بصراحه يابنات من اول ما ملجنا وهو دوم يتخانق ومعصب علي..وانا بعد عصبيه ومااسكت..والادهى انه يشتم بالفاظ جدا نابيه وانا كل الي اسويه اني اعلي صوتي لكن ما في مرة شتمته بنفس الفاظه.. وهو عارف هالشي اني ما اطلع الفاظ قذرة من فمي..تحملت هالعيب فيه.. وبلعتها .. وقلت يمكن يابنت بسبب انه الحين مش ملاقي شغل هو عصبي عليج..وعلى فكرة انا قاعده ادورله شغل واسعى له واكلم ناس..وبما انه قعد من الشغل اساعده ماديا وعشان ما احرجه ارسله رسايل على الموبايل اسأله اذا محتاج اي شي يقولي في مسج ونطلع سوى نشتريه مع بعض وبالمرة نشوف بعض..وتكون قعده حلوة..يعني احاول اجيبها له بطريقه ما تكون فيها احراج له انا عارفه انه هو رجال وصعب على الرجال انه زوجته تصرف عليه.. لكن بالله عليكم منو بيساعده غيري خاصة في هالظروف.. انا زوجته واولى اني اساعده احسن ما يطلب من الغريب..انا ستر وغطى عليه.. لكن اخخخخخخخ للاسف هالكلام قلته له امس صرخ فيني وشتمني وودالي مسج قاالي الله لا يحوجني لج ولا لغيرج..ليش انا في شو غلطت ياربي.. هذا جزائي..؟؟ هذا جزاء المعروف..امه عرفت اني سويتله كفالة علي والله انها بكت وقالت انتي اصيله .. اراكض في الجوازات بين الرجال عشان بس اكفل زوجي وماحد ياخذه بعيد عني..لان امه اصلا مرة اعترفت لي انه ولدها لسانه طويل ولما يعصب يسب بالفاظ قذرة جدا لدرجة انها شكرتني اني وافقت على الزواج به..تخيلوا؟ وابوه الله يرحمه قالي خذيه عندج ما نريده هذا مجننا ومطلع عينا..
حاولت ادخل داخل زوجي وافهمه حسيته يابنات مهزوز شوي وماعنده ثقه بنفسه.. ويبكي بسرعه مثلا الاطفال.. يعني مرة شتمني فهددته باني بتركه.. قعد يتصل بامي ويقولها انا بجيكم البيت وابوس رجل بنتك قدامكم ولا انها تتركني..انا قلت السالفه موب مستاهله خلاص انا نسيت كل شي.. رغم انه كان شاتمني بالفاظ لو اهلي عرفوها والله يطلقوني منه.. لكن قلت خلاص زوجك وحبيبك..وتحمليه..قعدت معاه اكثر من قعده احاول المس دواخله وافهم شو اللي مخليه مهزوز وخايف دوم.. فقالي ايوة انا فعلا مهزوز وماعندي ثقه بنفسي .. اهلي ربوني بهالشكل وكانوا يفضلون اخوي الصغير علي وابوي دايما كان يقولي انت بحياتك ما بتكون رجل حقيقي..ويضربني قدام الناس وانا كبير..قلتله لو انت مش رجل انا ما كنت تزوجتك..انت مالي عيني ... حاولت حاولت بس ما اعرف شو الحل معاه..والاحظ انه كل ما نتخانق يقولي انا بهرب في اي مكان في البلاد وماحد بيعرف مكاني ولي رب يتولاني..ومابتسمعين عني اي خبر..استغربت كلامه وحسيت انه مش فارقه معاه انه في وحده على ذمته ومفروض يفكر فيها بعد..حتى انه قالي انا بسافر اقعد في بلادنا كم شهر اريح اعصابي دام انه مافي شغل .. انا كنت راح انجن.. قلت له وانا شو وضعي يوم تتركني كم شهر..ونحن تونا مالجين.. شو هالكلام.. مادري هل خطيبي مجنون هل عنده حاله.. او هل يمثل العبط علي او معذور لانه قاعد من غير شغل.؟؟؟ صدقا انا موب فاهمه شي..انا تايهه وموب عارفه كيف اراضيه.. وحاسه انه موب فاهم يعني شو كلمة زواج لانه دوم يهدد بانه يهرب.!وناسي انه في انسانه معاه الحين!
المشكله اني حابه اساعده.. لاني حاسه انه فعلا محتاج مساعده احسه طيب ومكسور من داخله.. احس انه فيه شرخ كبير بداخله لكن ما يريد يقولي شو هو وكانه بيقلل من رجولته لو شكالي..لانه كذا مرة يحط راسه على كتفي ويبكي مثل الاطفال وانا استغرب جدا..بكاء بنحيب.. خلاني اشك انه في شئ مضايقنه وموب عارف كيف يقولي عنه..
انا ما بقول انه كل لحظاتنا سوى نكد وخناق .. اكون ظالمة للريال.. هو له لحظات حلوة معاي.. يعني هو شاطر بالطبخ ويفرح موووووووووت اذا طبخ اكل وجابه البيت عندنا ويقول لامي هذا غدا او عشا زوجتي حبيبتي واذا انا طلعت اخذت الاكل منه اشوف السعاده بعيونه ..يعني احسه طفل اي شئ يسعده..وبعد احيانا يرضى بسرعه يعني اضحك عليه احيانا بكلمة او ابتسامه وينسى واذا كان معاند وما يرد على اتصالاتي اوديله مسج اني مريضه وما اقدر اتحرك..يتصل بسرعه وهو خايف..
لكن اللي مجنني الحين انه رافض المساعده مني.. خاصة وانه في ظروف صعبه ومحتاج حد يساعده.. واهله فقارى ما يقدرون يرسلون له فلوس.. والطبيعي اني زوجته بساعده.. لكنه معاند رغم انه ممكن ما يكون في جيبه ولا فلس لكن يعاند ..وياويلي ان فتحت فمي بسالفة الفلوس.. انتي تعايريني انتي تبهدليني لاني فقير وانتي خليجيه غنية..مع انه عمري ما قلت هالشئ..تعبت واحترت..لدرجة اني فكرت بالطلاق ونحن تونا من شهر بس مالجين.. ولما لمحت له بهالشي.. قالي بكل برود اللي يريحج انا بنفذه.. كأنه بايع.. ولما اشهد اهلي عليه يقول لا انا ما قلت..
احسه احيانا مجنون موب طبيعي واحيانا افكر اطلع اركض في الشارع مثل المجانين بسببه..خاطري اعرف كيف اراضيه.. لكن هو مسوي سد بيني وبينه.. انا اتعامل معاه بأريحيه بما انه زوجي يعني عشان اخليه يحس بالقرب مني ويرتاحلي.. اكلمه وامزح معاه واحسسه انه احلى رجل بعيني..اقول يمكن هالشي يرجعله ثقته.. لكن مافي فايده..اساءاته لي وااااااااااااايده لكني اتغاضى عنها لاني احبه وحابه اوقف جنبه..ولاني من النوع اللي ما يبيع بسهوله..شتايم والفاظ مش اوكي.. واذا مافي فايده يوديلي مسجات على الموبايل كلها استفزازات بس عشان ارد ويلاقي سبب يتخانق واذا ما رديت يقول انتي بايعتني وما تريدني.. ما اعرف شو الحل معاه؟؟ وان السالفه قلبت جد ولقى اني بهدده بالانفصال حقيقي يبكي ويقولي لا لا تتركيني انا مالي حد غيرج انتي الوحيده اللي احس انج فاهمتني... انا يا بنات الضغط عندي ارتفع وانا بعمري ما كان عندي ضغط..كل وقتي افكر فيه.. كيف اساعده في محنته كيف اخليه سعيد..ومن بعد ما ملجت وانا اراعي الله فيه واقول خلاص هذا زوجج ومسؤول منج..لازم تشاركيه همومه وتساعديه.. لكن هو ماحسسني مرة اني زوجته..انا قلت يمكن يا بنت هو يسوي كل هذا لفت نظر لج.. لانه حسب كلامه كان عنصر مهمل في بيت اهله وما كانوا يهتمون لوجوده او غيابه..فقلت يمكن كل هالحركات والتهديد بانه يختفي من حياتي هو نوع من لفت الانظار لي ويشوف اذا انا بدوره واخاف عليه او لأ؟ انا ماعندي مانع اخاف عليه وادوره لكن موب كل الوقت..الصراحه تعبت.. يعني كل شي بحدود..
لا مساعده متقبلها مني.. واي كلمة يعتبرها معايرة..المسجات ان ما رديت عليها يعني انا بايعتنه..
ونسيت اقلوكم شي يابنات.. انا لاحظته فيه.. الاحظ انه لما نتكلم او نتخانق على التلفون يكون عصبي جدا ويشتم ويصرخ ويقفل في وجهي وعادي ممكن يقولي ما اريدج وما يسمع مني مهما ترجيته..لكن لو الخناق كان وجها لوجه يعني شايفين بعض احسه يكون غير وحنون اكثر.. وحتى ممكن ما يقول ولا كلمة بس يطالعني بعيونه وانا اتم اصرخ فيه .. يعني على التلفون يكون شرير جدا جدا.. لكن اذا انا معاه وشايفين بعض ممكن يبكي او يترجاني.. او حتى يتم ساكت وممكن بكلمة يراضيني او يطبطب علي وينتهي الموضوع..حتى انه طلب مني انه يوم نتخانق ياريت نكون وجها لوجه موب بالتلفون..
انا يابنات لاخر لحظة باقيه عليه رغم كل اللي مسويه فيني..نفسي امد ايدي له واساعده.. حتى امي قالت لي يابنتي ساعديه هو زوجج حتى لو الحين ساعدتيه ووقفتيه على رجليه ولقيتيله شغل وهو بعدين مع الوقت مثلا طلع موب اصيل وتنكر لج.. اعتبري كل هذا عمل خير عند الله .. وارميه البحر..يعني حتى اهلي عاذرينه.. وامي تحبه جدا جدا وكل مانتخانق تقولي انتي الغلطانه وتوقف معاه وتقولي موب لانه غريب في البلاد تستقوين عليه هذا ريلج وتحمليه وختيارج.. مع اني والله ما اسويله شي..

الله يخليكم يابنات شو اسوي ويا هالريال المينون.. انا خلااااااااااااااااااص بجن او بقوم انتف شعري.. اذا انا توني مالجه وشي مسوي فيني عيل عقب الزواج شو بيسوي؟ ياريتني تميت بدون زواج...

يارب حكمتك....

واسفه على الاطالة..
:confused: