زوجة أخو زوجي التقليدية تغار مني !!

Um.Abdullah
مشكورة حبيبتي على اسداء النصيحة ...
بقول لك شي عنها المشكلة اهي مو باردة بعنى انها ما تعصب حالها .. المشكلة انها حتى لو تروح تزور ناس ما تعرفهم و اهل بنتها الصغيرة حتى لو تكسر او تعفس الدنيا أهي ما تهتم او تقوم تجلس بنتها في حضنها تتركها لحالها .. و ابد ما يهزك ريح .. يعني برودها مو في محلة ابدا
يعني مستحيل انا لو يكون عندي طفل بتركة يتعبث باغراض الناس و انا ما اوقفة عن حدة يعني مثل ما يقول المثل الي ما يستحي استحي منه .. اذا كانت هي عيونها قوية ولا تخجل لو اطفالها كسرو و خربو هذا شو معناتة !!
و لاحظت انها دايم تتكلم في بيت اهل زوجي عن زوجة اخوها يسألوها عن زوجة اخوها ويا ولدها الة ولدت فيه يشبه منو و حلو ولا لا .. تقول لهم انة كريه ما يشبه اخوها و دايم تتكلم عن زوجة اخوها تقول انها ما تحب تجلس معهم و دايم في بيت اهلها و في نفس الوقت تتكلم عن أخت زوجة أخوها لانة ساكنة في نفس المنطقة الة هي عايشة فيها من تسمع أحد يذكرها بالحديث تشوه صورتها علما بان هالبنت مجرد أخت زوجة أخوها يعني ما تعرفها لا من قرايبها ولا من اهلها تجلس تتكلم عنها تقول انة فلانة ما تعرف تتطبخ و مي مالت طباخ عشان تطلب من زوجها يسوي لها مطبخ في الشقة علما انة هالبنت جديدة على الزواج و الحين هي حامل و احسها دايم تحقد على البنت و تتكلم عليها بشي سلبي دايم حتى من كثر ما تتكلم عنها قعد زوجها (أخو زوجي) يقول عن البنت هذي انها متكبرة و شايفة حالها وهو ماعمرة كلمها عشان يعرف اخلاقها !!!
بصراحة من كثر ما اسمعها تتكلم عن قرايبها وعن حتى الاغراب بهذه الطريقة عرفت شلون نفسها خايسة .. و بذكر لكم موقف حصل لي ..
عادة يوم واحد بالاسبوع نجتمع في بيت اهل زوجي و هي ايضا تكون حاضرة ( زوجة اخو زوجي ) عاد انة شقتي يم بيت اهل زوجي .. جلست تغديت معاهم و بعدها استأذنت لانة عندي اشغال كثيرة بالشقة علي اني اخلصها لانة يوم ثاني وراي دوام بالجامعة و ما استطيع انة اراكمها خاصة اني جديدة على الزواج و تنظيم الوقت عندي مشوش .. المهم انا طلعت من يبيت عمي و اخبرتهم اني مشغولة ...
بعد ما خصت شغل دخلت الحمام اسبح الة تلفوني يرن (متصلة لي حماتي الصغيرة تقول لي أنا و زوجي اخوي بنجيكي الحين الشقة ) و انا كنت لسا ما كملت سباحة .. ياربي تخربطت شو اسوي ؟؟ قلت لها مسامحة لا تجون الحين انا اسبح ...و كان في نفس الوقت زوجي عنده بعض الشغلات في الشقة (قاعد يشتغل) قالت لي اوكي بنجيك بعد ربع ساعة ... قلت لها انا اذا كملت بجيكم .. بصراحة كنت ما احب انة يجون الشقة هم ولا غيرهم لانة مو مستعدةالى استقبال ضيوف و ثانيا زوجي عنده ( دريل ) يشتغل في الطوف يركب اشياء و مو وتها يجون ابدا و اصلا انا ما كان عندي وقت يوم ثاني عندي اختبار بس انا ما قلت لهم ...
المهم حاولت انة امشي بسرعة بيت عمي خطوتين جمب شقتي و حملت معاي صور زواجنا ( كانت تبي تجي الشقة تبارك لي بمناسبة الزواج) لما رحت تفاجأت بوجود اخو زوجي مع زوجتة .. كانت تقول لي احنا ودنا نجي شقتكم مو انتي تجين .. نبي نروح بس انتي ما تبينا نروح .. قلت لها معلش مسامحة مرة ثانية زوجي عنده شغلة بالشقة ... و الله العظيم ما اكذب عليكم ما سكتت قامت تعيد و تزيد كل شوية انا ابي اجي شقتش بس انتي ما تبين اجي كل شوية تقول ( عفست مزاجي 100 %) و حرجتني احراج كبير جمب بيت اهل زوجي و صرت اعتذر لها و هي تطالع صور زواجي و اني بعيوني الصيحة و هي تقول لي ابغي اجي شقتكم و انتي ما تبين ( اقول في قلبي خلصيني طالعي الصور كملي بروح شقتي ادرس لي كم درس ) قلت لها سامحيني والله عندي اشغال .. الة تقول هذا وانتة للحين ما عندش عيال اجل لو عندش وش بتسوي و قامت تضرب لي امثال باختها الة بالجامعة تدرس تخصص سهل باللغة العربية و انا تخصصي صعب و بالانجليزي اا اختي متزوجة و تدرس و ام لعيال الله يساعدها انتي بعدي ما عندك عيال و بعدها قامت تلبس عباءتها و اخبرت زوجها انها تبي تروح شقتها تشتغل عندها اشغال و اخذت روحي و مشيت سريع بعد ما طالعت الصور حتى كانت حاطة لي هدية بكيس س من كثر ما انا متخربطة نسيتها ..و لما مشيت نادوني و رجعت تقول لي الهدية !! و كان زوجها بعد جالس تقول له شوفها حتى هديتي ما تبيها بعد و كانت جادة في كلامها و تقول له قوم رجعين البيت بسوي كم شغلة ..عشان تبي ترجع بعد و تتعشا عن بيت هل زوجي ..بس انا ما اجلس لانة العشاء مو ضروري عندي و بيت عمي يعزموننا على الغداء فقط بس هي ترز وجها بالغذا و العشا ..(نشبة) و بعدين رديت عليها قلت لها انا ما ابي هديتكم ؟! بالعكس انا افرح لما تجيني هدية و استانس ابغي اعرف شنو داخل الهدية !! و مشكورة و يغنيك الله .. اخرتها طلعت هديتها خلاط كيك و عندي مثلة بعد بالضبط !! .. بعد كم يوم اخبرني زوجي انها حطت في خاطرها علي و هي كلمت اخت زوجي و قالت له ان انا ما ابيها تجي شقتي و هي زعلت .. اتصلت لها لما عرفت حالا استسمحت منها مرات ثانية و ثالثة ورابعة و قلت لا تعالي تعشي عندي و رفضت الدعوة قالت لي لاه انتي مشغولة و عندش امتحانات و انا فعلا عندي بس قلت ابغيها تسكت وما تفضحني ما خلت احد ما قالت له .. المهم بعد كم يوم عزمتها هي و زوجها و اهل زوجي كلهم في شقتيو الحمدلله عدت على خير .. مع انة اهل زوجي كانو مستغربين من العزيمة الة سويناها لانة كنا في بداية زواجنا و ميزانيتنا موش ولا بد و عمتي (ام زوجي ) تقول لا تسون الحين بعدكم زي الطيور بدون ريش ... بس الحمدلله افتكيت من كلامها و هدرتها

هذه مثال من الامثلة الة صادتني معاها بداية زواجي

ملاحظة: انا صار لي عايشة مع هالآدمية سنتين كتن معقود علي و الآن تزوجت ( يعني بالعربي انا عاشرتها و عارفتها زين ولاني جديدة عليها )

طنشيها من ودانك وادعيلها بالهداية

حبيبتي..صدق انج بعدج صغيره و يديده على الزواج

هالاشياء طبيعيه جدا جدا بين السلايف...وتستوي للكل تقريبا...ولا تزعل ولا شي...خليج في حالج و تصرفي على حسب شخصيتج و ما عليج من حد ثاني..المهم ريلج راضي عنج..
شوي شوي بتعرفينها احسن و بتستوون مثل الخوات ...ومافيه انسان مافيه عيووب..استحملي عيوبها و بتتعودين عليها صدقيني..واولا واخيرا انتي بعد زواجج صاروا هذيل اهلج فلازم تتأقلمين عللى هالاساس..

و ملاحظه بسيطه...يمكن صدق ما قدرتي تستقبلينهم في بيتج بس تعتبر الحركه مب حلوه انج قلتيلهم لا تيون انا بييكم...صدق كأنج ما تبينهم يدخلون بيتج خصوصا انهم يايين يبون يجوفون بيتج...المفروض تبتدين تعرفين تتصرفين في هالمواقف بطريقه ثانيه...يعني مثلا تقولين لهم الصدق ان البيت معتفس و ريلي يشتغل فيه..شو رايكم اتون باجر ..او تقررين وقت يناسبج..لانه اصلا مب حلوه منهم انهم يقولون فجأه يايينج زياره...

بمرور الوقت بتتعلمين ان شاء الله و بتعرفين ان هالاشياء تافهه جدا واصلا ما تخلي الواحد يحطها في باله

الله يوفقج و يسعدج

هلا اختى بقايا فجر



ما عليج منها دامها صاحبه مشاكل


انتى توج يديده داشه عليهم وخلي صورتج حلوه قد ما تقدرين جدام اهل ريلج


ولين حاولت تقهرج وتقط نغزات حاولي تتجنبينها ولا تردين عليها بسلوب حلوو تبينين لها العكس وانج عادي ومب مفتكره لو شنو تقول لانه هالاسلوب راح يقهرها



والله يهنيج بزواجج ويوفقج ويخليج انتى وريلج لبعض

بصراحة من كلامج وضحتي لي صورتها اكثر... فعلا في كثير من هالاشكال اللي ما تنطاق، وهذا مو من دافع الغيرة، هذا طبع متاصل فيهم ولله الحمد والشكر، والحمد لله انج احسن منهاا وانج تاخذينها على قد عقلها..
حبيبتي اسفهيها، وسوي اللي عليج، انتي عليج من زوجج وهو بيرسم صورة عنج من تعاملج وياه في البيت، اما الباقي مردهم بيعرفون من الصح ومن الخطأ انتي والا هي، بس انتي خلج ساكته عنها ولا تعطينها ويه، لان هالاشكال لو زقرتي عليهم خبروا العالم كله انج ما تستحين، وان سكتي عنهم بعد بيخبرون العالم وبيقولون انج سفهتيهم، فخليج عالثانية احسن وسفهيها صج ولا تهتمين، وخلج دوم احسن منها
اما ضحكتني سالفة الخلاط هههههههه اما متزوجة وتجيب لها خلاط! هذي هدية البيت مو الزواج!!

جوفي حبيبتي المثل يقول يخاطبني السفيه بكل قبحا واكره ان اكون له مجيبا
حقريها وعطيها بو لاباس مبين انها محتره منج ولا ماكان له داعي تنط بالنص وتتكلم بالنيابه عنج وانتي تعرفين عمرج فليش حاره عمرج وحارقه اعصابج خليها عنج وصيري انتي احسن منها الغلط يبين والصح يبين

عادي حبيبتي لا تعورين قلبج معاها

الغيرة تشعل قلبها وتخليها تتعمد تجرحك وتحرجك قدام اهل زوجك


ترى اغلب نسوان الحمي جذييييييه

عندي وعندج خير خخخخ

مرحبـــــا حبيبتي 00

اولا لاتضايقين خلقك 00

ماعليك لاتهتمين من حكيها 00 وخليك بدراستك

وابذكرك بشغله 000

((التغافل ثلث اعشار الذكاااااء )))
والحقران يقطع المصران يعني طنشــــــــــــي

بس حرصي على نفسك نصيحتي لك بما انك بنوته حلوووه كملي حلاك وعرفي لك كم طبخه كذا يعني كل شهر تعلمي اكله عشان اذا صرتي تروحين لاهل زوجك مايكون لها طريق عليك 00

وياقلبي مابيك تقولين عنها حتى لو هي قاهرتك (( ماوراها غير النجاب )) لا اذكريها بالخير مهما كان لأن ممكن الله ينتقمك بالحرمان

ماعليك فيها كأنها مو موجوده وصدقيني هي اللي بترجع على وجهها لك وتعتذر لك 00

والله يوفقك مع زوجك وينعم عليكم بحبه ياااااااااااارب

تقبلي مروري / حبيبة محبوبها

سبحــــــــــــــــــانك اللهم وبحمدك

حبيبتي انتي جديدة عليهم واكيد في البداية راحت تكون صعبة عليج وعليها
خصوصا انكم حموات يعني كل وحده تنافس الثانية بالزين وكل وحده تبي الجو لها وكل وحده تتدهر عند اهل زوجها
هذي الغيره في البداية بس ان شاء الله بعدين تكونون مثل العسل مع بعض
ترى وانتي ماقصرتي هنا فيها هههههههههههه تقولين عنها تقليدية وما اعرف ايش

كبرو عقولكم وفكرو كيف تبسطون رجالكم وتبرون اهلهم واتركم عنكم فسافس الامور ترى بتتعبون

اتمنى لج ولحماتج حياة سعيدة موفقة وتخلفون صبيان وصبايا حلوين

حبيبـــة محبوبها : ا لسلام عليكم بس حبيت اوضح شي بالعكس الله يعطيها ذرية و يعطين الذرية و يعطي كل الة حابين ينجبون ... وعلى فكرة انة ماجلة سالفة الحمل شوية كم شهر لانة ناوية اسافر بس هي كانت قبل كم شهر امام الجميع تقول الى ابو زوجي (عمي ودي أحمل بس ولدك مو راضي) وهي من النوع الة تحب اليهال الكتاكيت تحب تحممهم و غيرها من امورهم ...وكان زوجها يشتكي من اطفالة و عوار الراس و ربشتهم و مصاريفهم وكان يقول انا كفاية عندي هذول هالاثنين ومو قادر عليهم تبي تجيب ثالث الة يطلع لي قرن ثالث بعد و يقرع باقي شعر راسي و كثير ما يتكرر هذا الموقف امام الجميع و بالاخير تفاجانا بخبر الحمل .. فعشان كذا انا قلت عنها تحب الانجاب كثيرا و الله هذه خصلة ايجابية انها تنجب كثيرا لكن اهتماماتها اقل من ان تكون هامة نوعا ما خاصة يمكن لانها تزوجت بعد ال 25 و انا بعدي ياهل ولاحقة على الانجاب و الله بعد مب ناوية اطول حاكم هالايام من تتاخر ف الحمل تبقى سنوات بدون انجاب و انا خايفة من هدي النقطة
على طاري السفر صار لي موقف معاها بس اقولها لكم وقت ثاني

السلام عليكم خواتي
شكرا جزيلا على الردود
بس احب اخبركم ان زوجة اخو زوجي ما زالت على طؤيقتها المعتادة حتى ان اخت زوجي سمعت عنها ان متقدم لخطبتها رجل و انا فرحت لها و هي كبيرة بالعمر فانا لما رحت لها قبلتها و باركت لها و تمنيت لها ان يصير نصيب بالزواج ضحكت و قالت لي لسا ما صار شي ...بعدين تدخلت زوجة أخو زوجي و قالت مافي داعي تباركين لها لانة ما صار شي لسا مجرد بيتقدم لها !! انا انقهرت و الله شو حشرها ولا بس تبي تحرجني و تفشلني !! انا استغرب من هالاشكال ليش دايما تحب تحرجني و تقلل من اهميتي يم بيت اهل زوجي ..انا عارفة ان انا حساسة لكن ما فيني حركات التدخل و الحشرية لكن انا حقرتها ولا حتى طالعتها لما قالت جذي ...
اهدوني و علموني يا ناس وش احسن اسلوب لأتاعمل مع هذه المرأة هل اني احقرها و اتركها تقول الة تقولو او اني ارد عليها في فس الوقت و بنفس اللهجة الة هي تتعامل فيها ولا اقهر قلبي و اسكت عن حقي ؟؟؟؟

اذا انتي اتبعتي كل الطررق وماافيه نتيجه ,,,, عاامليها مثل ماتعااملك وخليكي قوويه فرد عليها ,,, صدقيني مرره مرتين وبعدين راح تحسب لك الف حسااب قبل ماتتكلم او ترد عليكي ,,,, بس اهم شي خليكي قوويه

والله ياعزيزتي اعتقد ان الاخوات ما قصرن وتطرقن لكل النقاط
ولكن انا اعتقد ان المثل القائل (ماري ولا تكون حسود) يعني
لو عجبك شي قلده بس لا تحسد صاحبه مثل كويس وسلفتك
لها الحق بانها اتقلد ولا اتفضلين انها تحسدك....وهده امور عاديه
وحسب ما قت انك مشغوله بدراستك يعني مو ناقصه وجع راس

هلا الغالية

انا من راي انج تحقرينها ولا تردين عليها
لان هذا النوع من الناس يحب المجادله وتضيع الوقت
وبينيلها انج انتي انسانه مو فاضية لمثل هذي السوالف
وان مستواج ما يسمحلج انج تتكلمين في توافه الامور
ولا تخطينها على بالج
وسلامتج

شوفي بصراحه انا اشوف انك انتي اللي تغارين مو هي
يعني لكل شي عندك الف مبرر وكلها ما تسوى تعورين راسك
يعني اذا هي تتكلم على اخت مادري من
انت قلتي عنها بارده وبلشه وما شغلتها الا تييب عيال وما تعرف تكشخ وتعقر وكله تحرجني وووووووو
بعدين يتي حق اخت ريلج الا كبيره ولا فرحانين لانها تاخرت بالزواج والا مادري شنو
وتردين تقولين انا باللي كله على دراستي بس وماعندي ووقت وكلام كثير
وفالاخير انتي اللي صايره يابسه معا اهل زوجك
وانا ما اشوف انهم صار شي منهم
يا اختي ارجع اقولك فكري زين
وخلي بالك فدراستك بس وزوجك
وعاملي الناس مثل ماتبينهم يعاملونك ولا تيلسين تعلقين على كل من كأنك منزهه عن كل عيب
واعذري صراحتي
بسانتي بتدمرين حياتك بنفسك بها الاسلوب

حبيبتي حاولي تكسبيها لصفك وتتوددي لها

ويمكن تكسبيها كاخت
بقول لك شي
خالتي كانت تحس سلفتها جدا متكبره
بس لما حاولت تقرب منها كسبتها في صفها والحين ماشاء الله سمن على عسل
ويمكن هي قصدها المزح بالكلام اللي قالته
والله يوفقك ان شاء الله ويسعدك

شوفي امكن هيا فيها صفات موحلوه بس ليش انتي جالسه تنقديها احمدي ربي انو انتي مو زيها قولي اللهم حسن خلقي كما حسنت خلقي

بس انا ملاحظه انك مره مقهوره منهاوليش هذا كلوانتي عروسه وعيشي حياتك احس من كلامك كأنك حاقده عليها

مدام هيا مطفشتك قد كذا خلاص ابعدي عنها

ليش تجيبي لنفسك عوار الراس ابعدي عن الشر وغنيلو

واذا كل ماضايقتك وقولتي لزوجك ترى حيطفش منك

وامكن هذي طبيعتها دفشه في الكلام والتصرفات يقول الرسول عليه الصلاة والسلام التمس لأخيك سبعين عذر

اسفه طولت عليكي واسفه لو زعلتك

عيون الفهد

مرموم;6055897:
هلا بك أختي

أختي ما صار لك 3 شهور معاهم...و كل هذه الأوصاف قلتيها ؟

هي حرّة أختي في حياتها...تجيب عيال ما تجيب عيال ( على فكرة أغلب اللي في سنها عندهم 3 عيال و يمكن أكتر...يعني عدد عيالها عادي ! )

و كون إنها باردة...طبعا لأنها لو عصبت بتضرب عيالها...أو بتحرق دمها و هي حامل...خلاص هي إتعودت تكون كوول...أفضل لها و للي حواليها...

حياتها مع زوجها هي حرة فيها...تطبخ له تطلع معه تتصرف بتقليدية تتصرف على الموضة...هذا شيء راجع لها...


أما لما تيجي عندك و تتدخل في شؤونك...من غير عصبية...يا إما تردي عليها بهدوء...يا إما تسكتي من غير مشاكل...و هي لحالها راح تبطل تتكلم ...

و ياما تصير بين السلايف هذه الأمور...بالذات في أول علاقتهم مع بعض...و لسه أمامكم مشوار طويل...و في يوم من الأيام لما تحملي و يصير عندك عيال أكيد راح تحتاجي لخبرتها...

ما تعملي حساسيات من أول زواجك...لأنه هذه حياة طويلة...و أقلمي نفسك على طباع الناس...

بالتوفيق أختي...

(y)

السلام علكيم

اختي طنشيها واذا قدرتي اتردين عليها برد شوي لطيف ردي

اما خليها محترة منج اهي ماعندها شغل شكلها غير اتشوف الناس

وبعدين برنامج شعليج انتي اصلا جذي بتخلي اهل زوجج ينتبهون لج اكثر فانتي عدلي علاقتج ابهم اكثر

وبيني لهم شكثر تحبينهم خليها تحتر اكثر

وانتي ماشاءالله عليج طموحة هذا انتي تدرسين ومتزوجة والله يوفقج والعيال لاحقة عليهم

ان حملتي الحين قلبج بيتعلق بالطفل ولابتركزين مع دراستج

انا اذا اختي ولدت قلبي يتعلق بالياهل واطنش شوي دراستي شلون لوكان ولدج

ولا عليج منها توج اصغيرة ولاحقة على الحمل

والله يرزقج ان شاءالله ويوفقج ويصخر لج

ويرزقنا كلنا ان شاءالله

من راقب الناس مات هما