تجمع حوامل الشهور الوسطى 7-8

فتوووووم
لا تحاتين ان شاءالله خير
الا اعرفه انه الا يفتح الرحم
هو المرامية و منقوع الزعتر
والا يحمي الطلق القرفة والزعفران

صبحكم الله بالخير والنور والسرور

اشحالكم خواتي عساكم بخير

بصراحة التجمع اهني نايم اشوي بالتجمع اللي قبل ما نلحق اني الصبح الا عشرين صفحة مكتوبة شو السالفة

واحس الجماعة اقل بوايد

يالله بيلحقون الخوات بعد ايام ان شاء الله

صباح الخير كروشات

شخباركم ؟؟

وحشتوني وايد

ادري اني صرت قاطعه

بس شسوي عندنا عرس هالاسبوع

يعني الليله ان شاء الله الحنه وباجر الجلوه والي بعده العرس

وكنت اشبك من الشغل وايد بس الشغل ضغط ومو قادره افج عمري الا بالزور

ان شاء الله انتوا بخير وصحه وعافيه وبيبياتكم بخير هذا اهم شي عندي

هلا والله ام سويرة اشحالج يا الغالية عساج بخير

والله يعينج على العرس ووقفته وعلى الدوام بعد

احنا الحمد لله الدوام وايد خفيف ومرتاحين

صباحكم ورد يا بنات
شلونكم حرف عنيد وام سويرة

صبحج الله بالخير يا الماسة

اشحالج وشو اخبار بنوتتنا الحلوة

هلا اختي الغالية حرف عنيد
انا الحمدلله بخير وبنوتي امس لاحظت عليها انها تتحرك واااايد وقت النوم
صرت اضحك على نفسي .. لاني قبل الزواج من كثر السهر اخذ منوم وارقد والحين متوهقه بهالبنوته مب عارفه شلون ارقدها

كنت ناوية اروح عند الدكتورة البارح بس يحليله بو الشباب كان بالدوام لين اخر الليل فما قدرنا انروح

وانا اقدر اروح بروحي بسيارتي بس احب انه هو اللي يوديني خاصة عند الدكتورة لان احس هالشي من واجباته

ما ادري كيف الظروف اليوم بيقدر يوديني ولا ابي اروح اشوف الدكتورة واشوف شو سالفة هالدوخة والانتفاخ اللي بريولي بين فترة وفترة

اتصدقين يا الماسة انا فديتها بنوتي وقت الارقاد يحلالها الحركة والترفيس صوب سرتي

فالبارحة بعد ما رد بو الشباب من الدوام كان تعبان وايد واحنا على الافراش يسالني انتي ما فيج نوم اقول له فيني بس بنوتك املعوزتني كل ما يبي يشوفها وهيه تتحرك اتعاند وما تتحرك

وبعدها شافني اضحك قال شو فيج اتخبلتي اقول له لا بنوتك تتحرك صوب سرتي واضحكني يقول تستاهلين خلها اتلعوزج وانا برقد بس انا اشطر منها عرفت دواها لما اتسوي فيني هالحركة انام على الجانب الثاني اشوفها يايه وراي تتحرك على الصوب الثاني اهم شي تبعد عن سرتي

ياحليلك يا حرف
إن شاء الله تروحين اليوم مع زوجك المستشفي تطمنين على البنوته
وبحاول اجرب الطريقة لما تتحرك بالليل ... بس انا ما احب اتحرك يمكن اضايقها لاني احس انها تتحرك لانها مب مرتاحه فتغير وضعيات تشوف وش يريحها خخخخخخ ...
تدرين كان ودي ولو مرة زوجي يجي معاي موعد فى المستشفي دايما مشغول او يقولي روحي بروحك
بس الحمدلله على كل حال...صارلنا 4 ايام منقطعين عن بعض انا فى بيت اختي ومادري هو وين

ما خبرتينا يا الماسة بديت اتجهزين للكتكوتة ولا بعدج

هو ايي معاي الموعد بس ما ينزل من السيارة يترياني تحت يستحي يدخل انا ادخل بروحي

بس لازم احسسه واعرفه بواجباته وهذا اهم شي عندي اعيالنا

تبين نصحيتي يا الماسة انصحج انج اتبادريني وتتصلين وتسالين وخفي من لهجة العتاب شو اتسوين لازم اتنازل علشان تستمر الحياة

لان كل ما طالت المدة وانتي بعيدة راح يزيد الجفا في الحياة وراح يشوف غيرج

بغيت اسالج انتي طلعتي من البيت بروحج بعد الهوشة ولا هو اللي طلعج

اول شي انا طبعا بروحي اشتغل واستني راتبي ينزل علشان اروح اجهز للبيبي والراتب عندي ينزل غير كل الناس 10/7 .. عشرة من كل شهر .. يعني باقيلي 9 ايام واروح السوق
بعدين ... انا ابي الطلاق وهذا لازم يصير يا اختي والله العظيم يهددني يضربني لين اسقط واصلا يقولي ياريتك ما حملتي ... بعدين هو إلي طردني من بيت امه..
وانا ما اقدر اتصل ولا ارجع ولا ابغي اشوفه وكل إلي حولي يقولنلي لاترجعين له حرام عليج هذا مب انسان طبعا إلا اختي ماتبيني اتطلق بس اختي سافرت قبل يومين وماتعرف السالفه لانها بتصالحني عليه بس ما تدري نبين جدامها تصالحنا بس عمره ماصفي قلبة من ناحيتي
والله يا اختي الغالية يقولي فى عيد زواجنا بجيبلك الثانية... والله اقعد اصيح طول الليل ولا يهمه ينام ولا كأني زوجته وحامل ببنته ..بعدين خلاص ما اقدر اتحمل هو مايشتغل ومحملني اقساط وديون انا مادري شلون بسدها وعمري ما اقدر اترك الشغل من وين بدفع الاقساط إلي فوق راسي .
انا سألت كثيييييير بموضوع الطلاق وانا حامل قالولي القاضي مابطلقج إلا لما تربين ..يعني ممكن يعطيني ورقه عدم اقتراب ولما اربي بيعطيني ورقه طلاقي ..بعدين طلقني قبل مرتين يعني الثالثه على لسانه بس يبي يعذبني شوي ... وانا بشوف وين بيوصلني
حسبي الله ونعم الوكيل

اذا والله جذي حالتج وياه لا الطلاق ارحم لج بس تبين شي افضل

صلي استخارة وشوفي ربج شو كاتب لج وربي ايسر لج امرج يا رب ويعوضج في بنوتج واهم شي لو صار الطلاق ما يعذبج بعده الطلاق ويهددج في بنوتج انه ياخذها والسوالف هذي

اهني الحرمة تتعب اتكون متعذب قبل وبعد والله يكون في عونج والله

بصراحة ما عنده دم ولا اي مروة

لا انا مسوية احتياطاتي بموضوع بنتي
مايقدر ياخذها مني وبعدين بتكون فى حضانتي ...تدرين اختي فى اشياء زوجي يسويها لو ابلغ عنها وربي تسفير وابعاد عن البلاد.. يعني بيكون خايف اشتكي عليه وانا خلاص يا حرف بايعته وماابيه خير شر
وبنته بيشوفها عن طريق المحكمة
بس ربي يصبرني لاني بيني وبين نفسي أحبه
ارجوج لاتقوليلي شلون انا نفسي مادري شلون احبه ..والله الحب غصب عني بس ماابينله هالشي لانها نقطة ضعفي.

تبين رايي اختي لا اتخلينه بحاله

يعني من حقج ترفعين عليه قضية علشان الديون اللي عليج وانه هو السبب بهالشي

ما تعرفين يمكن يحكمون عليه هو اللي يسدد ولا اتقولين من وين راح ايب

مثل ما هو ما قدر فيج خله هو اللي يتحمل كل بلاويه وبنات الناس مب لعبه في ايده

ما الومج يا الماسة الحرمة دومها وفية للريال

واذا حبت الريال حبته من كل قلبها مب مثل الرياييل قلوبهم دكاكين الكل يدخله

بس دوم ادعي لهم بالهداية وربي يحفظ لي بو الشباب ولا يتغير علي ان شاء الله

مرات اتضايق منه يعني يسوي شغلات بس لما اقرا هالاشياء اقول الحمد لله احسن من الف واحد

ودوم اشل اي مقارنة بس تعرفين مرات ودج بشغلات من الدلع يعني اتميزج عن غيرج بس يالله الحمد لله

انا يالسة اتصفح موقع امازون علشان اختار لبنوتي العسل

ذاك الشهر خذت لها جم شغله وبصراحة حلوين يعني تسوق من خلال النت

والحين يالسة احط اللسته اليديدة

اذا تبين تتسوقين بطرش لج الموقع وشوفي شو عندهم الشغلات حلوة واحلى شي انها ما اتحصلينها اهني

اسمحيلي اخت يحرف شغلتك وضيعت مواضيع التجمع بمشاكلي
بس مادري احس اني ماارتاح غير لما اكون مثل المراية جدامكم علشان كل وحده تعرف نفسية الثانية

ربي يحفض لج ريليج ولا يشوف غيرك
ربي يخليكم لبعض دوووم يارب وتيجي هالبنوته تنور حياتكم وتجددها
تدرين دايما ادخل مواقع تسوق بالنت بس المشكلة انا ماعندي حساب فى البنك يعني صعبة شوي
بس طرشيلي الموقع احب اتسوق ... بس اي تسوق من دون مااشتري شي اضحك على نفسي