هو ده الزواج؟؟؟؟

حبيبة الحب ... انت فين يا حبيبتى بعت لك رسالة على الخاص ورفض يستقبلها طمنينى عليكى

انتِ طمنينا عنك أختى

كيف الأحوال

الأخت شذى الأرواح .. شكرا على مشاركتك .. وكأنك قرأتى أفكارى هو مش بيصلى خالص وحاولت مرارا واتحايلت وبوست اديه ورجليه وبكيت كل ده ويقول حاضر ويكبر دماغه مع انه كان بيصلى قبل كده لكن ده من ضمن التغيرات اللى حصلت له بعد الجواز . عموما شكرا ليكى على النصيحة

الأخت مهلبية بالأرانب .. أنا مش بحب التليفزيون أصلا مش من هوايتى يعنى الفرجة عليه كل فين وفين لو اتفرجت على حاجة وبتكون فيلم أو مسلسل بسيط جدا وبعدين أنا بحاول فعلا أقرب من ربنا أكتر والحمد لله بصلى قيام ليل وبسبح كتير وربنا يتقبل منى وشكرا ليكى على النصيحة وربنا يسعدك

أختى تنثر الكون عطرا ..
شكرا على سؤالك حبيبتى .. فيه أحداث كتيرة حصلت عايزة أرغى وأقولها لكم بس هو فى الحقيقة جوزى قريب منى هنا فى البيت ومش عارفة احكى دلوقتى بس هحاول احكيلكم صباحا ان شاء الله لما أروح شغلى لأنى بجد محتاجة أعرفكم اللى حصل علشان تفيدونى برأيكم وشكرا تانى حبيبتى وربنا يسعدك ويهنيكى

انتظارك ياقلبى

ومازلت أوصيكِ بإصرار على قراءة سورة البقرة

نزولا عند قول رسولنا الكريم صلى الله عليه وسلم : "اقرؤوا البقرة فإنَّ أخذها بركة وتركها حسرة ولا يستطيعها البطلة" يعني السحرة

و بفضل الله تأثيرها عجيب على حياة الإنسان والله يا أختى

أصبري عليه يمكن عنده ظروف فى الشغل

وبعدين أنتى بعدج بداية الزواج لازم أول سنة تكون صعبة بعدين بتتغير الحياة


وادعى الله أن يهدية وكثري وانتى ساجدة

حكايتك بجد يا نوجه شغلتني اوي
خضتيني وخصوصا ان فرحي بعد شهرين إن شاء الله و انا وخطيبي راسمين حياه وردية لبعد الجواز... بس بعد حكايتك دي.... ربنا يستر:ss::ss::ss::ss:
المهم انا بجد اي مشكلة بتقابلني بافضل استغفر بنية ان المشكلة تتحل و باكتر من قول لا إله إلا أنت سبحانك إني كنت من الظالمين
جربي يا حبيبتي مش هتخسري حاجة وربنا معاكي

صراحه انتى ماشاء الله عليكى وياريت كلنا نكون زيك بس اصبرى عليه اتقلى عليه شويه بس مش قوى عشان ممكن يمل وربنا يهديه لك

ازيكم يا أحبابى .. وحشتونى
أنا طبعا عندى شغف أحكى لكم ايه اللى حصل وأخبار حكايتى بس قبل ما أحكى لكم عايزة أقول كام معلومة كده عن جوزى علشان لما تفكروا معايا تكونوا عارفين
جوزى وسيم شوية وهو واخد باله أوى من الموضوع ده ثانيا هو من يوم ما حصل التغيير فى حياتنا وهو بطل يصلى خالص رغم الحاحى عليه ومحاولاتى ومحاولة والده ( بيضحك عليه ويقوله انه محافظ على الصلاة ) وبوست ايده ورجله علشان يصلى ويقولى حاااضر ومش بيصلى ( أما والدته فطلبت منى أبطل زن وقالت لى أنا ولادى مش بيحبوا حد يزن عليهم سيبيه براحته ) فبدأت فعلا أبطل زن فى الموضوع ده بس بقيت أتعمد أصلى فى المكان اللى هو موجود فيه يمكن يتكسف ويقوم يصلى لكن هيههههههات .

أنا مش بحب أشكر فى نفسى بس أنا كمان شكلى حلو الحمد لله جميلة وجسمى حلو جدا وشكلى استايل والحمدلله وقبل ما نتجوز كان بيعمل المستحيل علشان يلفت نظرى , أنا بقولكم كده علشان تعرفوا الموقف كله عامل ازاى .. بعد الجواز ومن بداية جوزى ما اتغير معايا أنا لبست ايشارب وغيرت طريقة لبسى والحمد لله برضه شيك واستايل وربنا يهدينى
نروح بأه للخطة اللى أنا مشيت عليها الفترة اللى فاتت وشوفوا نتيجتها ايه !!!!:21_176:

بداية أنا قللت من رومانسيتى معاه لكن واحدة واحدة وبدلت لانجيرهاتى ولبسى الساخن بقمصان نوم بيت رقيقة وبنوتاتى وبيجامات تحفة وبرضه حافظت على اهتمامى بشكلى جوا البيت وبره البيت مع ميكب خفيف ودلع بحدود وشقاوة وخفة دم زى ما أنا معاه فى البيت بس قليل شوى عن الأول
رد فعله : ولا هو هنا !!!ولا خد باله أو يمكن واخد باله ومطنش :mad2: بيدخل من الشغل هاى يا حبيبتى ويلطع البوسة بتاعة الدخول على خدى بمنتهى البرود وعادى

فى الأكل زى ما أنا بعمل أكلات ساعات جديدة وساعات لأ وساعات بستهبل وأقوله نطلب أوردر من المطعم وقللت من الديكورات والسلطات ووجع القلب اللى كنت بعمله بحب بس برضه بعمل كل حاجة باهتمام مش مقصرة .
رد فعله : عادى لو الأكل عاجبه برضه ببرود يقول تسلم اديكى وأقوله بالهنا والشفا ولو من المطعم يقولى وماله ما فيش مشاكل لكن مش باين عليه انه متضايق أو حاسس ان فيه تغيير برضه عادى .

أصحابى كان منعنى عنهم كلهم من يوم جوازنا رجعت علاقتى بيهم واحدة واحدة وابتدا تليفون البيت يرن فى الأول قالى مين بعد كده عادى ولا مهتم, قولت له هخرج مع أصحابى ووافق ببرود ومن غير مناقشة وخرجت مع أصحابى طبعا من غير ما يأثر ده على بيتى لأنه بيروح شغله 11 صباحا وبيرجع الساعة واحدة بعد نص الليل
رد فعله : عادى جدا ولا بيتصل يشوفنى فين وبيتعمد ما يسألش فى اليوم ده عليا خالص ويقولى بس رنى عليا لما توصلى البيت علشان أطمن انك فى البيت

بس أقولكم حاجة أنا كنت بكون مبسوطة زمان وانا مع أصحابى دلوقتى مش بكون مبسوطة طول الوقت وأنا معاهم بفكر فيه وأقول يا ترى بيعمل ايه وليه مش بيتصل ومطنشنى ولا هو هنا ( أنا بخرج معاهم بس علشان أثبت له أنى متغيرة مش علشان أنا عايزة كده أنا لو عليا عايزة أفضل فى البيت أخدمه وأعبد ربنا وأكون سعيدة معاه وبس )

مكالماتى قلت له خالص طول اليوم لدرجة أيام كتيرة مش بتصل خالص بيه لغاية ما يرجع البيت رغم طول اليوم بيقضيه فى الشغل وأنا شغلى بيخلص الساعة 4 بعد الظهر
رد فعله : بحس أنه سعيد لعدم اتصالى أو سماع صوتى وهو كمان ابتدى ما يتصلش الا مرة واحدة طول اليوم وساعات لأ

يوم أجازته يوم السبت من كل أسبوع وبيقضيه لحد الساعة 3 بعد الظهر نايم وبعدين يصحى ياخد شاور ويلعب على الكمبيوتر شوية وبعدين نتغدى ويروح جرى على التليفزيون يبحاق فيه لحد الساعة 9 مساءا يخترع لى مشوار عايز أحلق دقنى أو أصحابى كلمونى فى الشغل محتاجين فايل مش لاقيينه أو أى اختراع علشان ينزل لوحده وده طبعا بيتكرر كل أسبوع
رد فعلى : فى الأول كنت بقوله ما تيجى نخرج نتمشى شوية كان بيقول تعبان ومرهق ولو زنيت أوى وقولت له ده اليوم الوحيد اللى بتاخده أجازة يقولى طيب وعارفين بيخرجنى فين ؟؟؟؟؟؟؟

بيودينى عند مامته وبرضه يسيبنى وينزل الساعة 9 أو 10 :mad2:
علشان كده بطلت أقوله ننزل بسيبه يعمل اللى هو عاوزه مش بسأله عن حاجة خالص

بيقفل تليفونه دايما فى البيت وعامل عليه باسوورد وأنا بطلت أبص حتى على تليفوناته ولا بشوف موبايلاته شكلها ايه

والموضوع يا أحبائى زى ما هو ييجى من الشغل عادى ويقعد على الكنبة ويعد العشا يبحلق فى التليفزيون وأنا على الكنبة التانية :SOFA:وساكتة وأخاول أعمل روحى بتفرج بس طبعا بكون بتحرق وبخاف ريحة شياطى تطلع هههههه , وبضطر أقوم أشغل روحى فى أى حاجة فى البيت أو النت وبعد شوية يقولى تصبح على خير يا بيبى وطبعا يلطع البوسة على خدى بتاعة النوم والحمد لله دى لسة ما اتغيرتش !!!!

والله يا اخواتى أنا بصحيه من النوم بكل دلع وحنية ورقة وبنده عليها بأحلى كلمات وأطبطب وأدلك جسمى بايدى وأقول لنفسى وانا بعمل معاه كده : نفسى فى يوم أنت اللى تصحينى من النوم بالحنية دى والدلع ده نفسى تحسس عليا وتطبطب كده وأنا أتدلع عليك وأرفض أصحى علشان تطول معايا فى الحنية وأحس بيك زى زمان وأفوق على صوته وهو بيقولى ودلكى رجليا كمان وأدلك رغم تعبى وأروح أجهز الفطار وننزل مع بعض الشغل أنا بوصله شغله الأول وبعدين أكمل أنا لشغلى

أنا يا جماعة حاسة ان فيه حد فى حياته بس هى مين مش عارفة بس هى ممكن تعمله ايه اكتر من اللى أنا بعمله ولا هتحبه أدى طيب أنا جربت كل حاجة ومش باين عليه أو أخد باله من التغيير ده أنا ساعات بحس أنه مش شايفنى خالص بيكون معايا بجسمه بس والله بعمل معاه كل ما تتخيلوه من دلع واثارة وشقاوة وبحب لكن تخيلوا ولا هو هنا :cry: والله بدخل على المرايا وأبص على نفسى وأكلمها ده أنا لو مع راجل تانى وشافنى كده هيتجنن عليا ولو بعمل الحركات دى مع راجل تانى أكيد هيتأثر مش هيكون فى منتهى البرود كده معايا .. أنا أصلا ست مثيرة وجسمى حلو وكمان مش مملة عايز ايه تانى ؟ انا اسفة انى بتكلم معاكم كده بس أنا بفضفض معاكم لأنى برتاح أوى وانا بكلمكم ومش بتكسف منكم .. أنا خايفة أفقد الثقة فى نفسى أنا كنت كل ما أمشى فى مكان الناس كلها تبص عليا لأنى شكلى وجمالى ملفت لكن هو بأفعاله حطم معنوياتى وخسف بكل ده الأرض أنا خايفة أكرهه



أنا متجهة لربنا أوى والحمد لله بصلى أكتر من الأول وبستغفر كتير وبحاول أقرأ سورة البقرة زى ما نصحتونى وربنا يقوينى وسامحونى أنى طولت عليكم بس كنت عايزاكم تشاركونى اللى أنا فيه وربنا يسعدكم ويحفظكم جميعا

حبيبتى : تنثر الكون عطرا
بحاول أقرأ سورة البقرة بس بصراحة فى الأول بنام فيها بفظاعة وبتعب جدا وجسمى كله بيوجعنى وبكون للأسف وربى يسامحنى مش طليقة أكملها لكن بغصب على نفسى وأكمل ولما بخلصها برتاح شوية بس لما أجى أكرر الموضوع تانى وأحاول أقرأها مش عارفة :cry: نفسى لأواظب عليها أى سور تانية فى القرأن بقرأها غادى الا دى بتتعبنى أوى .. أعمل ايه ؟؟؟؟؟؟؟؟؟

أنا الجمد لله بصلى قيام ليل بس أنا خاليا عندى البريود

سامحونى على غلطاتى فى الكتابة علشان كنت ببكى وأنا بكتب ومش شايفة الحروف

أختى الوردة الحمراء
أشكرك على مشاركتك ونصيحتك
أختى وحبيبتى مها
أولا ألف مبروووووووووك لجوازك وأنا أسفة لو كنت خضيتك بس ما تخافيش كلها شكة دبوس ههههههههههههه
ان شاء الله جوزك يكون كويس جدا معاكى وانت لسة فى الأول واديكى بتستفيدى مننا , أنا لما اتجوزت دخلت بقلب جامد وما كانش حد جنبى ينصحنى فى أى حاجة لأن مامتى عاملة كده زى الملايكة ( ربنا يخايهالى يارب ) ما لهاش غير المصحف وذكر ربنا وزاهدة فى الدنيا والناس ومش بتتدخل فى حياة أى حد حتى احنا
فتفائلى خير ومش كل الستات زيى ولا كل الرجالة زى جوزى خاااااااااااااالص هههههههه

أختى just_maha
مرسيه لذوقك ومرسيه على الدعوة وربنا يسعدك

نوجا ابقي طمنينا علي اخبارك يا حبيبتي وان شاء الله اليي جاي هايكون احسن
ماتنسيش لا إله إلا أنت سبحانك إني كنت من الظالمين طول ما انتي قاعدة

بصى يانوجا هو انتى ليه متقعديش معاه وتساليه عن سبب تغيره المفاجى وليه معاملته اتغيرت معاكى وتحاولوا تتناقشوا مع بعض انا معتقديش ان فى حد فى حياته ده لسه مجوز مبقلويش شهر يعنى مش معقول بدا يمل منك وكدا حاولى تتكلمى معاه قوليله لو حاجة مضيقاك نحاول نحلها وابقى طمنينا عليكى

حبيبتى مها ... مرسيه أنا الحمد لله كويسة وبصراحة فكرت فى حاجات كتيرة هبتدى أنفذها وهكبر دماغى وأوريه شخصية جديدة لسة ما شفهاش فيا وأشوف ايه النتيجة .. وخلينا على اتصال

اختى الحبيبة ياسمين ... على فكرة أنا عملت اللى قلتيه ده بالظبط كذا مرة وبمنتهى الرقة والحنية لدرجة انى فى مرة من المرات قلت له فيه ايه ناقص فيا ما عملتوش وانت تحب تشوفه فيا ايه اللى بتحبه وانا ما قدرتش أعرفه عرفهونى علشان أخد بالى ودى كانت أخر مرة يوم شم النسيم بعد خناقة بينا بسبب اهماله ليا فى خروجنا واحراجى أدام أصحابنا عارفة كان رده أيه يا توتة قالى بالحرف الواحد أنت مش مقصرة معايا خااااااااالص يا بيبى وزى الفل وما فيش حاجة أو مشكلة بينا أصلا احنا كويسين أوى بس أنت اللى مش عايزة تعيشى سعيدة مستكترة السعادة على نفسك مش عارف ليه ؟ههههههههههههه أيه رأيك فى رده ؟ والنبى مش حاجة تقهر !!!
عموما أنا همشى كده على خطة جديدة معله وربنا يسهل أصل أنا وراه والزمن طووووووووويل هههههههههه

غريب رده قوى يانوجا بس هو يقصد انكوا كويسين وانتى اللى حسه بتغير ربنا يهدهولك وايه خطتك الجديدة

يبدو والله أعلم أنها عين وصابتكم

ويمكن انتِ من النوع اللى بيتكلم عن سعادته الزوجية كتير أمام الناس ودا أكبر غلط

وشفتِ النتيجة بنفسك

و يمكن اللى بيحصل لك أثناء قراءة سورة البقرة معاكِ هو أعراض العين والحسد

لازم تقومى وتواصلى قرائتها ففيها العلاج بإذن الله

وجدت حالة تشبه حالتك بعد البحث

ماذا يعني التثاؤب والضيق أثناء قراءة سورة البقرة فقط ؟؟؟

--------------------------------------------------------------------------------

السلام عليكم ورحمة الله
شيخنا الفاضل أبو البراء مامعنى أن يشعر الانسان بالتثاؤب والميل الى النوم والضيق وأنه مخنوق ويشعر باحساسه فى البكاء أثناء قراءة سورة البقرة فقط ؟ أما باقى القرآن فيقرأه بدون أى من الاعراض السابقة ؟؟
أرجو الافادة

الجواب

بارك الله فيكم أخيتي الفاضلة ( الجنة الخضراء ) ، وغلبة الظن أن المعاناة بسبب الإصابة بداء العين أو الحسد ، أما حصول ذلك أثناء الرقية بصورة البقرة فأمر مستغرب ، أرجو أخيتي الفاضلة مراجعة الحالة والتأكد من ذلك ، وبالعموم فإني أقدم لكم البرنامج العلاجي التالي :

منقول من منتدى الرقية الشرعية



وقد قدم لها برنامجا علاجيا اذا احببتِ ارسله لكِ او أضعه فى المنتدى ليستفيد الجميع


حفظكِ الله من كل شر وصرف عنك كيد شياطين الجن والإنس

يا اختى ارجوكى واظبى على الاذكار وقراءة سورة البقرة انتى بتقولى انك بتتعبى لما بتقرائيها وبيكون فى وجع فى جسمك انا شاكة انه فى سحر معمول ليكى او لجوزك فياريت تواظبى على قرائه سورة البقرة علشان تبطل مفعول السحر وربنا يسخر لك زوجك اللهم امين

أختى رقية ... شكرا على مرورك وعلى النصيحة

أختى الحبيبة : تنثر الكون عطرا
أشكرك شكرا جزيلا على اهتمامك وردك عليا وأنا فعلا كنت بتكلم كتير أول جوازنا على السعادة اللى أنا فيها وكتير من صاحباتى كانوا بيحسدونى بس لما لقيت كده بطلت أتكلم خالص وأنا ما كانش قصدى كان باين عليا السعادة وكل اللى يشوفنى يسألنى ايه الجمال اللى أنتو فيه ده مع بعض بس والله العظيم ما كانش قصدى أقول أنا من كتر سعادتى كنت بفتكر ان اللى حواليا هيكونوا سعداء كمان ... المهم أنى بحاول أقرا سورة البقرة وهحاول أغصب نفسى وأعودها أنى أقرأها كل يوم ويارب أقدر بس باقى القرأن بقرأه عادى مش بيحصلى حاجة

مرسيه جدا ليكى وياريت فعلا تبعتى البرنامج العلاجى اللى عندك مش علشانى أنا وبس علشان كل البنات تستفيد وربنا يجزيك خير يارب ويكرمك

أختى ياسمين ... هقولك يا ستى الخطة
أنا كان عندى مشروع مخططة له قبل الجواز ونفسى أوى أعمله , وأنا دايما كنت بلاحظ قبل مانتجوز أنه بيكون ملهوف عليا وبيهتم بيا لما أكون busy أوى فى شغلى وكان الموضوع نام بسبب انشغالى فى الجواز وبيه وساعات كان هو بيلمح انى بتاعة كلام وبس ومش بعمل حاجة علشان كده قررت :
أولا هحب نفسى شوية وأتلهى عنه وهدلع نفسى وأعمل كل الحاجات اللى تبسطنى بعد ما لغيت حياتى علشانه وعلشان أرضيه بس طبعا فى مراعاة أنى متجوزة وبيتى وجوزى لهم حقوق عليا .
ثانيا برتب دلوقتى لاقامة مشروعى والتجهيز له
ثالثا ههتم بنفسى أكتر قى البيت وبره البيت
رابعا لغيت لبس لأى لانجيرى أو قميص نوم فى البيت
وطبعا قبل كل دول هزود من عبادتى مع ربنا وأزود فى الصوم وصلاة قيام الليل وربنا يقدرنى هعمل برنامج أقرأ سورة البقرة كل يوم لمدة 40 يوم .. وادعى لى بأه
وخلينا على اتصال علشان أزعجكم بأخبااااااااارى ههههههه

اخبارك يا نوجا؟؟؟؟
يارب تكوني كويسه