قصة ولادتي بطفله من متلازمة داون (الطفل المنغولي)

وينج يالغاليه

أم هدوية الغالية .. أدري حبيبتي إنج قوية وبنفس الوقت حساسه جدا.. وما شاء الله عندج زوج يكون في عونج دوم .. وادري على المواقف إلي تمر عليج ساعات الوحدة ما تتحملها .. وخاصة إذا شيء يمس عيالها حتى ولو بالكلام .. والله مجربه .. أول مولود لي كان فديته غير طبيعي .. كان في راسه ماي سبحان الله ما تكون له المخ .. يعني لو عاش ماراح يفكر مثلنا .. والأطباء قالوا لي ماراح أمسكه وأشيله لأنه كله بيكون في العناية .. وبيعيش ل سنة عملية وما بيعيش أكثر من 8سنين تقريبا.. توكلت على الله وكان في بطني أحس بحركاته تقل وخاصه الأشهر الأخيرة .. في البداية من الشهر الرابع عرفنا إنه ولد فرحنا بس يافرحة ما تمت كانت المفاجأة إنه بيكون غير طبيعي.. بكيت وبكيت وسفت إنه ما فيه فايده .. وتوكلت على الله وحاولت أجهضه بس الدين ما سمح لنا وإقترحوا لنا بعض الأطباء أني أسافر مصر لعملية الإجهاض رفضنا .. وتوكلنا على الله وخاصة لما حلمت النبي صلى الله عليه وسلم أقوله على قصتي رد علي خلي إيمانج بالله قوي وإلي الله كاتبه بيصير .. المهم وسويت قيصرية في التاسع لأني رفضت أنه تطلع روحه في بطني قبل لا أشوفه .. واخترت نصفي وما أدري كيف يتني الشجاعة يمكن لأني كنت أبى أشوفه حيييييييييييل .. بعد الولادة على طول طلبت أشوفه وجابولي عصفوري وآآآآآآآآآآآآه كنت أناديه وما يرد علي وما سمعت صرخته روحه كانت على وشك ترووووح .. ودته النيرس لأبوه لحد ما وصلت فيه آخر الممر روحححححه طلعت فديته وما كنت أدري .. وأثناء الخياطة حسيت والله العالم بالشيء إلي حسيته .... حسيت رووووووووووحي تطلع ونبض قلبي يخف وهبوط .. وقلتلهم للأطباء والممرضات قالوااا لي كل شيء طبيعي .. عيل شووووووووو كان ذاك الإحساس ؟؟؟؟؟؟
وعند العملية الثانية بولدي حامد ما حسيت بالشيء نفسه.... من ساعاتها عرفت إنه شعوووور الأم عند فقدان وليدها.......آآآآآه الله لا يعوده..
وبعد أيام وصلني كلام إنه ناس قراب مني قالوا على شو تبكي هاي كذابه ومن هالكلام .. لأنهم ما يحسون فينا .. ومرة عصبت ما أذكر على من بس لأنهم قالوا ولدي متخلف عقلي .. عصبت وقلت كلمت غير طبيعي أفضل..
سامحيني الغالية طولت عليج بس حبيت أقولج محد يحس بالمعاناة إلا إذا جربها .. ومحد يحس بلي فينا إلا إلي خالقنا والنعم بالله.. لا تشيلين هم .. من الناس تراهم دوووم يتكلمون بسالفة ومن غير سالفة .. بس إذا حسيتي تبين تبكين إبكي وإكتبي أكثر أحاسيسج .. ترتاحين
وننتظرج الغالية
بوسيلي هدوية الغالية ...

ماقولـ الا ... ماشاء الله عليجـ

وخلجـ على اجتهادجـ ويا هدويهـ واصبريـ...

وماعليجـ منـ كلامـ ايـ شخصـ ثانيـ .. الله يحفظها لكمـ وان شاء الله تفرحونـ فيها ..^_^..

والله انتي ام رائعة
الله يحفظ لكي بنتك وابوها
لكن عندي استفسار منك لو سمحتي
ماذا تقصدين ان صديقتكي عرفت بنتك من خطوط يدها بانها من متلازمة داون

والله حبيبتي حب الحياه ومشكوره على الاهداء وفرحتيني وايد وحسيت بشعور ما اقدر اوصفه:o:o:o

الغاليه حروف القلب كلامج وايد اثر فيني وخليتي دمعتي تنزل وكل كلمه قلتيها صح والحمد لله ان ربي عوضج

مشكوره الغاليه snowdropومرورج اسعدني

الغاليه ملاك الرحمان الخطوط الي فايد متلازمة داون غير عن الانسان الطبيعي عندهم خط بالعرض كانه قاسم الايد قسمين سبحان الله ويكون واضح والحمد لله على كل شي

نكمل
قبل لا اخبر اي حد فكرت وايد لان ريلي كان رافض وقالي خليها للايام وبعد الاربعين وبالاخص بعد سالفة ربيعتي قلت بخبر اهلي لا يوصلهم الخبر يوصلهم مني ولا من غيري وبعد اترددت لاني ما حصلت تشجيع من ريلي يقولي صدقيني بيعاملونها معامله ثانيه وانا ما ابا هالشي فشاورت المركز فالموضوع قلت يمكن عندهم حل فقالولي لازم تقولولهم اخرتها بيعرفون فبديت اسال الامهات الموجودات كيف وصلن الخبر حق اهلهم وما كنت ابا استعيل فالموضوع عسب ما اندم فاكثرهم قالولي بعد السنه خبرناهم لكن لفتت انتباهي وحده اولا فتعاملها ويا ولادها وبعدين اسلوبها فالكلام وقالتلي انها بعد ما كمل ولدها 8 شهور خبرت اهلها وقالتلي يمعتهم كلهم على العشا وقلتلهم بطريقه حلوه والصراحه ولدها مش مبين عليه وذكي واستفدت من كلامها وقلت انا بعد برتب اموري وبشوف كيف ابدا فقلت ببدا باختي القريبه مني وايد وبشوف رددت فعلها وعزمتها وبديت اقوللها ما تلاحظين شي على هدويه يلست اطالعني وقالتلي ما احب فيج هالوسواس قولي شو عندج والصراحه الواحد فهالموقف ما يعرف شو يقول حتى لو مرتب كلام المهم قلتلها بطريقه حلوه بس ما عرفت شو بالضبط متلازمه داون اوالمنغولي لانها ما مر عليها وقالتلي الي انا اعرفه ان بنتج ما فيها شي وانتي لا تخبرين حد ما بيفهمون شو هذا المهم راحت وبعد يومين اتصلت فيني وهي اتصيح اتقول حد متوفي عندها تمت اتقولي اصبري وهذي نعمه من رب العالمين وانا اقوللها شو الموضوع قالتلي انا الحين عرفت الي فهدويه تقول رحت المستشفى وحصلت حرمه عندها ولد عيونه مسحوبه على فوف قلتلها ابوه ياباني وتمت تضحك وبدت تفهمني قالتلي بس هدويه ما تشبهم وكانت منصدمه واختي اكبر مني وكانت حامل عمرها 34 سنه وقالتلي في احتمال انا اييب فبديت اطمنها والحمد لله يابت طبيعي وكنت كل ما اصيج اتكلم وياها وقلتلها انا ابا اخبر اهلي فما شجعتني واتكلمت ويا ريلي مره ثانيه وقالي اهلج كيفيج اما اهلي لا اهلي ما بيفهمون ابدا وصليت الاستخاره والحمدلله رحت بيت اهلي وقلتلهم باسلوب حلو وفهمتهم شو يعني متلازمة داون وحاولت اني ما اصيح ويالله هم الي بدو صياح وفهمتهم انهم نسب والحمد لله هدويه ما فيها وايد والكل اتفهم وامي وابويه وايد حسيت انهم متفهمين الموضوع وشجعوني وايد ويحبونها موت والكل يعاملها معامله عاديه وحتى خواتي وحريم خواني ويشتاقولها وايد وانا يوم خبرت اهلي واحد من خواني ما كان موجود و محد خبره حتى حرمته مب راعيه توصيل كلام وبعد ما كملت هدويه السنه انا كنت فبيت اهلي وهدويه تلعب ويا العيال وهو شافها المهم رحنا البيت وبعد فتره رحت ازور اهلي وانا طالعه انا وريلي وهدويه يانا ولده وقف عند الدريشه اتوقعوا شو قالي والمصيبه ريلي موجود خالوه نحن ما بنتزوج بنتج يوم نكبر قلتله ولا انا بركض وراك يا مسود الويه يالله روح هنيه ريلي استغرب وقالي نادي ولد اخوج قلتله شو تباه هذا ياهل قالي بس ناديه ويوم يا وانا ايدي على قلبي لاني بروحي استغربت هو ليش قال هالكلام بس ما بغيت اساله وريلي موجود قاله حبيبي ليش ما بتتزوج بنتي قاله ابوي يقول انها خبله وما تفهم شي وما بتدخل المدرسه مش ريلي الي عصب انا حسيت انا روحي ببتطلع شعور ما اقدر اوصفه تميت اصيح واتنافض وكل الي فالبيت طلع برع من كثر ما اصيح وريلي يهدي فيني وانا مش قادره منهاره ( انا الحين اكتب ودموعي على خدي كل ما اذكر هالكلام )
ما اتوقعت اخويه يقول هالكلام وجدام عياله وامي اتهدي فيني وتقولي اخوج ما يعرف يرمس قلتلها لا دافعين عنه المفروض ما يتكلم عن بنتي بهطريقه وجدام عياله العيال ما يفهمون شو الي فبنتي والحين بيعاملونها نفس الخبله والصراحه ريلي وايد كان معصب ولو اخويه كان موجود فذيج الحظه ما ادري شو بيصير لان ريلي يموت فهدويه وهذي اول عياله وقلت لامي ليش ما فهمتوه ان بنتي مب خبله قالت ياني وقالي انا شفت ايد هدويه وعرفت لاني شايف حد منهم وقتله بنت اختك مب شراتهم هدويه تفهم وانا اتهاديت وياه على هالكلام وما بغيت اخبرج لا اضايقج وتميت اسبوع اصيح لان اخويه مب واحد غريب
وبعدها بفتره اتصل واعتذر بس بعد شو بعد ما اتكلم جدام عياله
بكمل بعدين وشجعوني حاسه بضيجه اسمحولي

شي طبيعي بتحسين بضيجة كل ما تتذكرين ... عاادي ياما تعرضنا لمثل هذي المواقف

أحيانا الغريب يكون أحسن من الاهل ... بس حبيبتي لازم تقوين عمرج عشان هدوووية

مو انتي سندها ،، طنشيهم و الله بياخذ بحقج منهم .....


كملي القصة لاننا متشوقين نعرف شو صار ... و لا تخلين شي يأثر عليج


و أحلى بووووسه لهدوووية الله يحفظها ... ما عليج من حد

ما تقصرين الغاليه طير السلام وكلج ذوق

السلام عليكم و رحمة الله تعالى و بركاته،

حبيبتي أخوج لو فكر إن هدوية هذي رحمة من رب العالمين .. لأن هي ما تسببت على روحها بهالشي و لا إنتي أو زوجك لكم يد في حالتها .. هذا قضاء من رب العالمين و كل إنسان طول ما هو عايش معرض إنه يواجه إبتلاءات مختلفة بما يشاء الله بس عاد في ناس يعترضون على حكمة الله في أي إبتلاء يصيبهم و هؤلاء بإعتراضهم ما بيغيرون حكم رب العالمين لأن ما قدره الله تعالى من إبتلاء سيبقى إلى أن يشاء الله و لكن في نفس الوقت بيواجهون غضب من الله تعالى و إثم على إعتراضهم و رفضهم لأمر قدره الله تعالى عليهم .. و ناس مثلج ما شاء الله عليج عطاهم ربي أمر شافو جوانبه الحلوة و حاولو ينمونها و يشكرون الله تعالى عليها و يتعايشون مع ما قدره الله تعالى لهم من ظروف بأفضل صورة ممكنة .. في حالتهم و إللي إنتي منهم قضاء الله تعالى أيضاً باقي إلى أن يشاء الله (ما تدرين ربي وحده القادر على المعجزات) لكن تتميزون عن الفئة الأولى إنكم كسبتوا الأجر من الله سبحانه و تعالى على صبركم و قبولكم لما أعطاكم و حبكم له ... من جذي أنا أقول عن هدوية إنها رحمة من الله سبحانه .. و لا تخافين عليها رزقها بتاخذه بإذن الله و إن شاء الله كل رزقها يكون خير و يسر و سعادة يا رب .. كفاية شوفي شلون رب العالمين رزقها بأم محبة و حنونة و عاقلة و مؤمنة و متفهمة عرفت كيف تتعامل معاها ..

و بالنسبة للمعجزات ... فأبداً مو بعيدة .. إن شاء الله يا رب تبلغين فيها و تشوفينها و هي كبيرة ما تفرق بشي عن أقرانها و لا بالعكس إلا يا رب تتفوق عليهم .. و من ألحين هالأمر مبين إنه راح يصير بإذن الله .. إنتي بنفسج تشوفينها شلون ما شاء الله ذكية و نموها طبيعي ...

حافظي على هالجوهرة الغالية و لا تهتمين للعميان إللي قلوبهم ما تعرف تشوف إلا السواد .. لكن هالجوهرة الغالية هدوية مع الأيام بإذن الله راح يزيد بريقها بشكل يغصبهم إن يشوفونها و ساعتها راح يتندمون على أي كلمة و أي فكرة غلط حملوها في قلوبهم ...

لا تهتمين و واصلي و خبرينا عنها .. مثل ما تشوفين كلنا حبيناها و نحب نسمع أخبارها

الغالية شي ناس إسلوبهم في الكلام مب حلو بس ما يقصدون شي ويكون قلبهم طيب

يمكن أخوج من هالنوع ولو إني أشوف أنه غلط وايد لما رمس جذي عن بنت إخته وخصوصا قدام الصغار

الله يخليلج بنتج ويرزقنا ببنوته أعلمها شرات ما اتعلمين صغيرتج

سلامي عليج يالمثالية ولا تخلين أي حد يقلل عزيمتج

*
انا مع كلام خواتي اللي قبلي لا تخلين حد يضعفج والكلام اللي يجي من ورا ظهرج طنشي له اخوج ماحس بمعاناتج لو هو كان في مكانج كان بيعرف لاتضيقين صدرج محد يستاهل يالغليه والله محد يستاهل

ماشاء الله....تبارك الله....
جد انتي فخر لكل ام بصراحه عجزت اكتب او افكر حتى شنو بكتب......
خلج دوم على ما انتي عليه,,,والل يوفقج بحياتج يارب..ويخليلج القمر...ويرزقج لها اخوان وخوات....

ماعليج من كلام الناس لانهم جد يكونون عديمين احساااااااااااااس.....

بصراحه انه صادني موقف مع دكتوره الله لايوفقها....
كنت اتابع مع بنتي في عياده الاطفال تابع لمستشفى عندنا كبير ومشهور...وللاسف دكتورة بنتي سافرت وحولوني على دكتورة ثانيه ان ما اعرفها...قالولي عنها انها (,,,,,)بس انه ماتوقعت اللي بيجيني...
دخلت خذت الممرضه كالعاده وزن بنتي وطولها وكل شي...ويات الدكتورة ...وشافت بنتي...وتمت تسالني..انتي من عندج في العايله فيه(متلازمة داون))((كانت تقولها بلانجليزي))وانه مايه على بالي انا تقصد هذي الشي..
وقمت اتكلم واقولها ابوها عنده اكزيما بس وهي تقولي لالا مو اكزيما بنتج منغوليه........
انه هني حسيت روحي بيغمى علي....شلون بنتي منغوليه..؟؟؟؟قالت اي باين عليها من عيونها...ومن مادري شنو خرابيط كانت تقول والله ماذكر اي كلمه من اللي قالته....
الممرضه قالت لها دكتوره هذي مو داون** انه اعرف اهلها عيونهم وسيعه وهي عليهم وشعرها ناعم على اهلها وتمت تشرح لها....وانه ساكته ماقدر اتكلم.......
قالتلي باخذلج موعد مع اخصائي اعصاب وهو بيشوف بنتج لانه متخصص بهاالحالات...
رحت البيت الله يعلم شلون سقت السياره وشلون وصلت البيت...
يوم دخل ريلي البيت..جفته وعيني انترست دموووووووووووووع...لحقته غرفة النوم...لميته وانه اصيح...خاف قال اشفيج ..قلت له السالفه...قال لي زين الحمدلله...وانه منصدمه شلون تقولي زين..الايقول ماتدرين انهم نعمه...
المهم الاهل كلهم درو عن الموضوع وكانو بصراحه مو مصدقين.....لانها طبيعيه
رحنا الموعد بعد يومين ومشت معانا الدكتوره لين دكتور الاعصاب...وسالته عن حال شهد ....طالع يدها وطالعها قال لا البنت طبيعيه مافيها شي...وسال منو اللي كتب انها منغوليه وليش ووووو.......
انه هني كان بيغمى علي....موعارفه شاسوي....المهم تاكدت من استشاري الاعصاب ان بنتي طبيعيه...
مشينا مع الدكتوره لين غرفتها..الا تقول...مادري اشفيني انه...بس مكتوب في ملف البنت انها جذيي سمحولي خوفتكم...
رحت لدكتورتها وكانت مشغوله....قلت للمرضه ابي ادخل لو انتظر لاخر الدوام.....
المهم دخلتني عليها,,,,,,الا اقول لها بنتي تشوفينها منغوليه.....؟؟؟؟؟؟ظ الاتقول انه ماذكر كل الحالات...
قلت لها من شكلها والا من اي شي تحكمين عليها انها منغوليه.....زقالت لا
قلت لها كيف في الملف حضرتج كاتبه شي وفوق هذي كنت محتفظه فيه كسر يعني بالملف....
تهاوشت معاها وحلفت اني ما اودي بنتي لاي كان بعدها .......

ادري طولت عليج اختي بس والله قصتج ردت لي ذكرياتي.....

ماشاء الله عليها وعليج
ربي يحفظها ويخليها لج
ويبعد عنها الحساد ،،
وتصير من الناجحات

بوسيها نيابة عن كل اللي في المنتدى ،،

الغاليه ام سلمان الحلو ما ادري شو اقولج كل الكلام الي كتبتيه اعرفه لكن منج كان غير ما شالله عليج اسلوب اكثر من رائع عجبني كلامج فوق ما تتصورين كأني اسمعه لاول مره وهذا يرجع لاسلوبج فالكتابه وطريقة تفكيرج كلمة الشكر ما تكفي عيوني لج يا ام سلمان وانا وايد معجبه فيج ويمكن يكون كلامج عادي عند كثير من الناس بس انا شدني بطريقه فضيعه وكأني اول مره اسمعه ولو الكل يفكر بهطريقه كان كل انسان يعاني من اي موضوع مرتاح
والمشكله مش فاخوي بس ويمكن اخوي بعدها فهم انه غلطان بس وايد ناس ما يفهمون ان هذا ابتلاء من رب العالمين ولو تفهمينهم ما يبون يفهمون الا الي يبونه ويعتقدون انج انتي السبب فهشي ما يدرون انه هديه من رب العالمين والحمدلله على كل شي

اسعدني مرور جميع الاخوات ومستحيل في يوم انسى وقفتكم ويايه والله يسعد الجميع انشالله

وتريوني بكمل وابا اشوقكم

ريلي خبر اهله ولا لا ؟؟؟؟؟؟؟؟؟؟؟؟؟

حبيبتي الله يخلي لج بنتج وما عليج من كلام الناس

ولان الله يحبج ابتلاج ويبي يشوف مدى صبرج

الله يحفظها لج يارب

حبيبتي همس الحراير طولتي الغيبه ومشكوره على المرور

أهلين اختي أم هدى

ايوه اقصد ثالث متوسط يعني درست 6 سنوات ابتدائي بعدين ثلاث سنوات متوسط والحين هي مؤهله انها تروح للثانوي بس ماعندنا ثانويه تربيه خاصه
وتمووت على شي اسمه مدرسه وحاسه انه عالمها وصديقاتها تسميهم خواتي.

واكثر شي يشغل وقتها الرسم تحب ترسم وتلون وماشاء الله لوحاتها حلوه لدرجة انها فازت بجائزه وتكريمها كان في الامارات

ماشاء الله عليج والله انج ام مثااالية

توني بس متابعة موضوعج

الله يخليها لج ويحفظهاااا ياارب

بقولكم شي ضايقني اليوم
اتصلت اخذ موعد لهدويه عند الدكتور لاطمان على تطوراتها والنمو المهم كلمت الممرضه وقالتلي ان نسب الداون والامراض الوراثيه زادت عن اول فسالتها شو السبب قالت ما ادري وقالتلي ياريت كل الامهات مثلك يرضون بلي كاتبلهم رب العالمين قالت جتنا اليوم ام ومن يت كله اتصيح فقلت بهون عليها توها مربيه وجايبه داون فقلتلها هذي هديه من رب العالمين اتصورو شو ردت عليها قالتلها مستحيل الله ما يرضى انه يعطيني مثل هالهديه(استغفر الله) قالتلها الممرضه استغفري ربج انتي انسانه مؤمنه برب العالمين ردت عليها قالتلها لا انا مش مؤمنه برب العالمين والله ان شعر جسمي وقف وطلبت من الممرضه تسالها اذا ما تبا طفلتها انا اباها واتصلت بريلي وقلتله اذا وافقو باخذ البنت وبربيها عند هدويه قالي انا موافق وكله اجر عند رب العالمين
انا وايد حزينه شو من قلب على هالام الي رافضه هالبنت وانا شفت وايد من هالنوعيه
وفي وحده يابت طفل معاق بس مش داون وطلبت الطلاق من ريلها وما بغت الولد وخلته عند ريلها يدته تربيه واهلها بعد ما بغو الولد والحين اتزوجت واحد ثاني واليده كبيره فالسن يعني حتى لو بغت تهتم ما عندها القدره وانا الحين احاول اساعدهم فتعليم الولد فالمركز والولد حلو ما شالله عليه وعمره خمس سنوات بس ما يمشي ولا يقعد ولا يتكلم الله يشفيه عرضت على اليده المساعده وقمت وحطيته فحضني اتصدقون صاحت وقالتلي اتصدقين محد يشله ولا حد يلاعبه وانتي اول وحده تعرض علي المساعده وانا قلتلها انتو وايد اتاخرتو ليش ما وديتوه مركز قالتلي انا حرمه كبيره وما اعرف ولا حد نصحني وين اروح انتي الوحيده الي شافت الولد واهتمت فيه وانشالله بتحصلين الاجر
وانتو يا اخواتي بوقفتكم ويايه انشالله بتحصلون الاجر