قولي لي شو هوايـــــاتج وابداااعج .. أقول لج شو البزنس اللي يناسبج .. الجزء الثـــاني

هلا أختي انا عمري 19 سنة

بس عندي هواية الطبخ من يوووم انا صغيرة وفيه طبخات وايد تضبظ وياي ويقولون لي حلو طباخج

والحين عندي مبلغ 1000 دينار بحريني

وتقريبا مدخولي الشهري 300 دينار بحريني


شنو في رايج البزنس الي يناسبني واذا عندج لي فكرة بزنس حلوووو خبريني بليييييييييز

بسم الله وبه نستعين

عيـــــــــدكم مبارك وعساكم من العايدين الفايزين يا رب

أبدأ بعذبة الروح اللي راسلتني قبل اكثر من 3 اشهر بالخاص .. وكانت رسالتها التالي

###########################################
السلام عليكم

شحالج الغالية

ان شاء الله انج بخير و سهالة

بتخبرج عن الموضوع الي كاتبتنه عن البزنس و الهوايات

شفت انه الموضوع كاتبتنه من سنه تقريبا

بعدج عندج استعداد ولا خلاص ؟

و اذا عندج استعداد بقولج عني

الميزانية = من 40 ألف إلى 70 ألف + المقدرة على جلب الايدي العاملة اذا كان البزنس في حاجة لأيدي عاملة

الفكرة = شي له علاقة بالحريم (( بس ما اريد صالون ولا خياط ))! لاني اريد اكون متواجده في المحل و ماخذه حريتي

مؤهلاتي = عندي شهادة في البزنس و مشتغلة محاسبة و محصلة ايرادات.

مميزاتي = احب الاشغال اليدوية بس ابدا ما عندي افكار .. يعني اقدر اطبق فكرة شايفتنها .... ((اقرب تطبيق _ صندوق للمجلات القديمة غلفته بقصدير و سويت حركة بورق الجرايد و لصقته ع القصدير و حطيت بعض الكرستالات الملونه))

اتمنى انج تقدرين تساعديني

الله يعطيج العافية

######################################

السموحة عالتأخير ... ممكن تسوين مشروع صغير لكن يحتاج ترخيص من وزارة الصحة وبعض الاجراءات الخاصة
فكرتة انج تسوين سندويجات وسلطات تتوزع على المكاتب الحكومية والموظفين بعملهم ..


تييبيلج كم من فلبينية او جنسية ثانية مثلا عدد 5 راتب كل ودة فيهن 700 درهم مثلا = 3500 درهم راتبهن الشهري

ويكون عندج مطبخ فية كامل العدة ويبدأن العمل من الفجر الساعه 4 ونص مثلا

ينوعن بالخبز (صمون وتوست وخبز البرغر)

مثلا ب ألف درهم كبداية (سوي سندويجات جبن وزعتر ودجاج ومرتديلا) بس انتبهي لازم تكون الساندويجات لذيذة وخلطتها حلووووة.

تبيعين السندويجة على 3 دراهم او 5 دراهم
مثلا وزعتي باليوم 100 سندويجة بمعدل 3 دراهم لكل وحدة = 300 درهم ايراد اليوم الواحد
300 * 22 يوم (ايام العمل بالشهر) = 6600 درهم بالشهر.

بتقولين الربح قليل يمكن الفين درهم .. ادري لكن انتي كبداية وزعتي 100 سندويجة

ركزي بالتوزيع على الاماكن العمل اللي فيها وايد موظفين وما عندهم مطاعم بأماكن العمل او عندهم مطاعم والمدراء عادي يسمحون لهم انهم اييبون اكل من برع.

وزعي عالمدارس الراهيه اللي عادي عندهم البنات يشترون .. اشتري ثلاجات وحطيها بأماكن الجامعات والتقنية وداخلها السندويجات بعد ما تكون مغلفة بشكل جيد... الطالبة تيي وتحط مثلا 3 دراهم وتختار السندويجة وتطلعلها وسلامتج.

الموضوع يباله دراسة من ناحية الاماكن وحصرها .. سعر المواد بالسوق بالسوق وغيره

وحاولي تسوين عقود مع بعض المدارس واليديدة منها

مكسبج انج توزعين 500 سندويجة باليوم
تخيلي 500 * 3 دراهم (سعر السندويجة) = 1500 درهم باليوم * 22 (عدد ايام الدراسة والعمل بالشهر ) = 33 ألف درهم



خلي هدفج النظافة بالاكل و الطعم اللذيذ

طير البحرين

ممكن تكتبيلي المهارات اللي تعرفين تسوينها بالكمبيوتر والانترنت انتي وخطيبج

يعني مثلا تصميم موقع عمل فلاشات او كتابة برامج او شوة بالضبط مهارتج فية ؟

لان ببالي كذا فكرة ولكني مشتته شوي واريد اعطيج اللي يناسبج

بانتظار ردج

حديث الروح

اذا تبين شغل ما تكونين ملتزمة فية فمعناه شي واحد يا انج تدخلين شراكة مع احد وتكونين بشكل فرعي يعمد عليج بالشغل يعني خروجج او دخلوج فية ما بأثر على صاحبة المشروووع.

أو تشتغلين شغل لحالج ويكون على الانترنت يعني ما فية موظفين ومحل وايجار وماي وكهرباء ودوشة راس

لو يينا نشوف ساحة النت المجال واسع لكن مع ميزانية وقدرها صفر ... فدايمن مثل ما قلت سابقا الشغل بالبرامج والاشياء المعنوية انسب شيء

فشو راااايج تكتبين قصائد او اشعار للمناسبات الخاصة وهذا يعتمد على الكلمات وروعة التناسق بينهم .

ما شاء الله في بنات فعلا بالامارات البزنس مالهن يكتبن قصائد والبنت اذا عجبتها تدفعلها سعرها . لزواج او خطوبة او غيره.

هلا أختي والله شوقتيني للبزنس
وموضوعك روعه قليله فيه جعله الله في ميزان حسناتك ,
انا احب الاشياء هذي حتى امي تقول ان مخي تجاري بس مافي تشجيع
من احد وماشاء الله مواهبي وايد بس مااعرف اطور نفسي
اولا: دخلت دوره تجميل وفكرت افتح صالون لاكن مااحد شجعني وماعندي ميزانيه اكيد بتقولين ابدي من البيت باقولك خسرت لان اللي عندنا معروف بالبيت بلاش وبالمحل بفلوس
ثانيا:اكتب شعر وخواطر وقصص خيال وكثير تعجبهم بس مااعرف استفيد من هالفكره
ثالثا:انا حاليا ادرس كمبيوتر واحبه وايد
وعندي فكره من فتره تجول براسي اني اكون مصوره واسوي البومات
لانه وحده قالتلي انا اجيبلك الصور و انتي اتفنني ودخلي خلفيات وسويلي البوم ومن هالاشياء
وحيكون الشغل بالبيت احسن
انتي اشرايك ؟
س مااعرف مره بهاالمجال وياليت تساعديني
او تعطييني فكره لمشروع لاني محتاجه مره
وتكون ميزانيته بسيطه جدا
بانتظارك يالغلا لاتتأخري علي لاني مررره متحمسه,

معالي الوزيرة<< عاجبها اسمها لما كتبته

انا اريد اركز على نقطة (غرفتي أسوي فيها حركات غريبه).

اربطيها بموضوع حضانات الأطفال الخاصة مثلا أو كوفي شوب

امممم بما انج ميزانيتج صفر ... اريدج تسوين شغله وحدة

سوي ديكووور غريب وحلووو لغرفتج وصوريها من كل زاوية .. وحاولي تدخلين بوساطات عن طريق الاهل او الصديقات او حتى تعرضينهم على بنات النت

وانج مستعدة تمسكين ديكور حضانة اطفال ... لانها تحتاج رسومات وحركات غريبة والوان داخلة عرض وطول وتطلع بشكل متناسق.

او كوفي شوب انتي خبرج ان هالاماكن فية منهم يحبون يكون ستايل الكوفي مالهم غريب وملفت للنظر . ويكون سعرج اقل من مصممين الديكور طبعاااا.

شو رايج تركزين بهالمجال وصدقيني اذا مسكتي مكان واحد وانجزتية بشكل رائع بييج بعدها اكثر من عرض والناس اصحاب هالاماكن بقبلون على شغلج .

وما فية مانع انج تطورين مهنتج وابدأي بغرفتج وما عندي مانع انج ترسليلي الصور اعطيج ملاحظات او اقتراحات.

والله يوفقج

متفألة

عزيزتي ما فهمت معنى كلمة دبش ؟ ممكن شرح :)

واذا السالفة فيها صديقاتج ويشاركونج طيب ... شو مواهبهن وابداعاتهن او هواياتهن ..؟ وكم اعماركم ؟

عشان ممكن نحط شي متناسق بينكم بعمل واحد !! وتكون الفكرة اقوى


بانتظار ردج

جناحي

هلا بأهل البحرين ... فكرتج واضحة قدام عيونج !!

وميزانيتها معقوولة ..

سوي توزيعات الشوكليت للولادة وصممي البطاقات .. وممكن تكون توزيعات لعرس للميلاد لحفلة ولغيرة .

بس ركزي اكثر شي على توزيعات الولادة والاعراس لانها دايمن مطلوبة

سوي 5 نماذج ونزليها المنتدى مع الاسعار ومواصفاتها .

بس خلي ديزاناتج حلووووة وفيهن فكرة غريبة وحلوة ... اتذكر مرة بنت قطرية او اماراتية تسوي توزيعات من زماان بالمنتدى ... لكن توزيعاتها غريييييييبة واشكال حلوة تشتري الشوكليت مثلا من باتشي او غيرة واهيه ترتب بنفسها بالصينية او توزعهن توزيعات كيووووت وغيره وكان عليها طلب كبير.

ابدأي وتوكلي على الله ... حتى لو مجرد سنابل للعرض فقط ما بتتأثر ميزانيتج.

B.1
بعرضلج فكرتين

الأولى انج تبدأين العمل بالنت .. تاخذين الصور من الزباين بالمنتدى مثلا صور اطفالهم وتسوين على رتوش وتعديل بالفوتو شوب وغيره وتسعرين الصورة الوحدة ب 10 دراهم وتبعثينها لهم مرة ثانية بالايميل وممكن كل صورة تسوين لها 3 ديزاينات بحيث الزبونة تختارين اي وحدة عجبتها .. لانهم بكونون دفعولج خلاص مسبقا

مميزاتها هالفكرة انج تشتغلين من النت مثل ما طلبتي .. ولكن سيئاتها ان دخلها قليل وانتي محتاجة 500 الف ضروري !!

الفكرة الثانية وانا ارشحها لج
شغلح بكون برع مثلا
تكونين مصورة بكاميرتج الفوتوغرافية لعرس او خطوبة او غيره
تصورين العروس عالكوشة ووقت الوقفة مع المعرس وهم مع بعض
وتسوين رتووش وتعديل لكل الصور وبالفوتو شوب وتسوين بنفسج البوم العرس لهم

وسعر الألبوم مثل ما اهوة معروف مب اقل عن 7 الاف يوصل 20 الف حسب فحامة الالبوم .. والشغل اللي فية

وممكن تغطين بعض حفلات ليلة الحنا وغيره

الميزة بهالفكرة ان فية دخل عائد بكون لج بالالاف ... ولكن بتضطرين تطلعين للناس على اساس انج مصورة

بتستغربين ما قلتلج اشتغلي بالديكور .. ممكن تبدين فية بعد لكن اغلب الفلوس اللي بتاخذينها من بعد ما تخلصين التصميم للبيت مثلا بتروح على الصبغ واللوحات والاثريات وغيره يعني ما كسبتي شرات الالبومات.

انتظر ردج بهالفكرتين وانا حاضرة لاي استفسار الغالية

جزاك الله كل خير
عمري 25 سنة عندي دبلوم ادارة شركات, أحب صناعة مواد تجميل طبيعية مثل الكريمات و الشامبوهات.... و أريد أن أقوم بتجارة عبر النت, ميزانيتي 2000 درهم مغربي في الشهر, أنا كتير طموحة لكن لا أعرف ما المشروع الدي يناسبني و كيف أبدأ فيه

اولا حابه اشكرك على هالموضوع المتميز جدا..انا متخرجه من قسم ديكور بس للاسف اهلي مايبوني اشتغل بشركات ومكاتب هندسيه لانها مختلطه..فكرت اني اصمم كوش افراح لاني احس اني ببدع فيها بس اجلتها شوي لان ماعندي ميزانيه كافيه..بعدين فكرت اني اصمم طرح بالكريستال وبالخرز لان عندي افكار وايد بالنسبه لهالشغله ..شي ثاني انا احب الاعمال اليدويه واحب احط مكياج وهالشي انا اتقنه بشهادة الجميع بس للاسف اهلي مارضو اشتغل بكوافيره يعني باختصار انا احب الفنون بانواعها والحمدلله احس اني لو مسكت شي معين ببدع فيه خصوصا هالفتره تستحوذ علي فكرة التجاره ونفسي ابتدي بس مالقيت تشجيع واحس اني مشوشه مو عارفه ابدأ

هلا أختي مشكوره على الموضوع الرائع والله يعطيك العافيه

أنا متخرجه من ثانوي وأخذت دبلوم رياض أطفال والى الآن ماجاتني الوظيفه

الزبده موهبتي أموت أفنن بالخط

يعني أخط بيدي <<<<<<<< أجل برجولك خخخخخخخخخخخخخخخ

ودي أشغل نفسي بشئ

يعطيج العافيه حبيبتي على الموضوع المفيد
وانشاء نستفيد منه كلنا ونحدد اهدافنا البزنسيه خخخخخخخخخ
راح اقولج عن نفسي مادرسي احس ان هواياتي متناقضه
بس انتي احكمي وانه راضيه بحكمج
عندي عدة هوايات واولها هي مثل كل البنات لني احب وضع المكياج والحمد الله وهذ اعتبرها موهبه لني عرفتها بدون اي دورات ولا شي بس من راسي وطبعا ما احب احط اي كلام لازم الشي اللي اسويه يكون خارج عن المألوف مو بس في المكياج في كل شي في حياتي ود\ايما لمى احط الميكأب الكل يسألني وين سويتيه وعند من رحتي طبعا ما احط الا لنفسي وبعض الاقارب ما اقدر اشتغل في هذى الشي لنه زوجي ما يرضى
والهوايه الثانيه احب العطوراتت مووووووووووووووووووووت واحب الروايح الحلوه ودايما اخترع مخلطات وعطورات ودخون بس مو كل مره تصيب واحيان تضرب التوب وابيعها باسعار مرتفعه والاقي عليها اقبال بس ما اتوقف عند هذا الشي دايما اخترع حتى الصوابين حاولت اسويها بس ما نجحت وبعد هذي الشي ما يوقفني عن هوايتي اللي احبها موووووووت وهي اختراع المخلطات واخسر فلوس وايده عليها حتى لو خسرت ما يهمني
والثالثه وهذي الللي احس فيها فرق كبير عن الثنتين اللي فوق وهي اني هالايام طايحه في تجارة الاسهم وما اقدر اطلع منها صاير فيني ادمان عليها واي فلوس عندي احطها في الاسهم وحتى لو خسرت وكثير ما اخسر بس احس اني بنجح في يوم وحاولت اني التحق بدورات في تعلم الاسهم عشان اعرف اللعبه على اصولها بس ما لقيت للاسف بس تعلمت كثييير من متابعة التحلليلات في النت والمنتديات وعلى التلفزيون بس بعد احسه ما يكفي واحب الارقااام يعني احب امسك الاله الحاسبه واقعد احسب في الخساير والارباح وحتى لو ما لقيت شي احسبه اطلع من مخي ارقام وسوالف اقععد احسب وبس
وانشاء الله ما زطولت عليج ومللتج
اتمنى انج تنصحيني للاحسن وماتنسيني
تقبلي فائق شكري واحترامي
اختج
ام محمد

السلام عليكم ورحمه الله وبركاته
الله يبارك في عمرك ويحققلك كل اللي تتمنينه يارب
اكلمك عن نفسي عمري 25وانا خريجه هندسه وانتظر مولود بعد كم شهر بأذن الله لا استطيع ان اعمل بشهادتي لي هوايه الرسم لكن بصوره بسيطه وكذلك احب الاعمال اليدويه لكن خبرتي فيها شبه معدومه وايضا لاحظت اني احب نوعا ما التدريس في المدارس لكني اتمنى ان اعمل من البيت لكن مشكلتي اني لا املك ميزانيه فمصروفي الشهري لا يتعدى 300 درهم وهو فقط يكفي متطلباتي الحياتيه اتمنى ان يكون لي دخل مستقل واتمنى انك تساعديني

السلام عليكم
صراحة موضوع راقي و يستحق التميز
فديتج الغالية تسلمين واللهـ :flower:

/
،
قبل لا اجاوب على اسئلتك في موضوعك السابق
اخبرك انه نحن 8 اشخاص ومراهقات عمرنا يبدأ 16-18 و من 10-12
^^ و طالبات اغلبنا في المدرسة الثانوية ووحدة منا على وشك التخرج!
و وحدة بالاعدادي والثانية بالابتدائي
وبما انه عدنا عطلتين(ربيع وصيف)
واغلبها ملل وفراغ
قلنا نستغل الوقت بشي يربحنا وفي النهاية نستفيد من هوايتنا ومواهبنا!!

فـ المشروع الأول
انا واختي -- تصميم استايلات حق منتدى او موقع شخصي!

المشروع الثاني
اعمال يدوية ، وخياطة !
نعرضها للبيع !

ولكن بعد ما شفت مقترحاتش
اتمنى صج انج تعطينا افكار واقتراحات و من هالسوالف

راح اعرض مواهبنا كلنا!


/
،

أنا =")

شو مواهبج؟

الكتابة بمختلف انواعها قصص وخواطر !! ومسرحيات !
الرسم ، من يوم كنت انا صغيرة وانا ارسم اظنها هواية اكثر من موهبة!
لاني مو متمرسة فيها وما اعرف ارسم الا بنات =") ..! هذي عادة في عايلتي
كل خالاتي يرسمون بنات وفنانين في رسم البنات لكن الاشياء الباقية لا!

هواياتج؟

احب التصوير لكن مب فنانة فيه!

احب اسوي اعمال يدوية
شرات البومات ، اكسسوارات ، بطاقات ، عرايس ، كاسات حق عرس
اشيا بالـشموع !! ، مذكرات ، حتى كنت احب الخياطة في صغري لكني تركتها لسنين
واحين ما اعرف شي فيها!
امي تعرف تسوي اساور بالصوف وقلت بالعطلة بتعلم اشلون اسوي اساور وشنط بالصوف!

هم بشوه
صح هلي يقولون عني انه لي مستقبل بالطبخ
خصوصاً اني احب اطبخ و احب ابدع واخرف في هالاشياء

كم ميزانيتج ؟

صـِفر كح

بس يعني هلي يعطوني راتب شهري متواضيع
يلبي احتياجاتي الخاصة واعتقد اني اقدر استفيد منه فـ المشروع!


/
،

اختي
مواهبها:
الرسم: فنانة بمعنى الكلمة
الكِتابة : راائعة بالكتابة مميزة
تصميم الجرافيكس:مبدعة و محترفة!

،

هواياتها :
القراءة..
اعمال يدوية
اختي فنانة في الديكور.. !
تقدر تخترع لج موديلات ثياب ما خطرت ولا طرت فبالش!!
مميزة حفظها الله من كل عين!

،
مميزاتها:
اختي انسانة طموحة ومتفائلة
ذوقها جداً راقي ! في الاكسسورات والثياب!
و الشي الي يعجبني فيها لا اصرت تسوي شي
تسويه ومحد يقدر يعيقها !
فيلسوفة وحكيمة
عندها افكار مميزة وخطيرة !!!

،

الميزانية:صفر
بس زي ما قلت نحن نحصل راتب شهري متواضع
يكفي سد حاجاتنا ونقدر نستفيد منه فـ المشروع


/
،

اختي الي ما ولدتها امي =):

هواياتها ومواهبها:
كتابة القصص والخواطر باللغة الانجليزية
رسامة وفنانة!
الطبخ
اعمال يدوية


مميزاتها:
متفائلة وطموحة
وعندها افكار
تحب تستغل وقتها بعمل اشيا كثيرة
مرحة جداً و تعاملها زين
خلوقة و حبوبة
وجريئة !

/
،


اختها الصغيرة :
هواياتها ومواهبها : اعمال يدوية ، الطبخ (طبخات بسيطة)

مميزاتها:
صغننة و بريئة لكنها تحب تسوي اعمال يدوية..!
حفظها ربي


/
،
بنات خالتي:
الكبيرة:
الخِياطة
الرسم
اعمال يدوية

ما اعرف بشنو تتميز
عدا طبيتها واخلاقها وروحها المرحلة وتفاؤلها
وبنفس الوقت جديتها ! و طموحها بس


اختها الصغيرة:
هوايتها ومواهبها:
الـ كتابة
اعمال يدوية


مميزاتها:
--------------- كح ما اعرف


/
،

و ربيعتي
ما اعرف هواياتها
بالاحرى ما سنحت لها الفرصة تكتشف هواياتها
لكنها تتمنى تتعلم شلون تسوي اعمال يدوية وراح اساعدها
وودها انها تساعدنا بالمشروع
ملاحظة :( اهي مريضة ، وما تقدر تمشي ، و بسرعة تتعب)
فشنو العمل الي تحسيه مناسب وما يكلف حقها =")



/

،


والميزانية كلها صفر كح!
و بغينا مشروع
يناسبنا كلنا مرة وحدة بحيث نتشارك في عمله سوااااااااا


لج احلى جورية :flower:

ودي مع وردي :
لوست

مرحبـآ اختي

انا في ثـآلث علمي آخر سنه بالمدرسه .. ما عندي دخل

هواياتي ..

الاعمال اليدويه وسبق بعتها مثل الميداليات .. والاساور .. وفواصل كتب .. نوتات .. ولعب هدايا بالكولاج

رشحتني المدرسه لـ اكون معلمة للاعمال اليدويه .. بس للحين ما اكتمل الموضوع


ارسم رسوم كرتونيه وقصص ابطالها خروف وبعير

قصتهـآ عن ( خرفوف وبعرور ) وتحصل لهم مواقف اشبه ما تكون قصة اطفال في بساطتها


همممم بعد عندي خبرهـ في التصميم .. و اتعلم تصميم المواقع

احب اشترك بالنشاطات المدرسيه كثير واعشق الافكار الغير تقليديه او الغير مستهلكه

السلام عليكم :shiny:

شلونج أختي ؟ .. عساج بخير .!
عجبني موضوعج وايد و حبيت اعرض عليج هواياتي و تقولين لي شالي يناسبني!

هواياتي :
- الكِتابة
- قراءة القصص
- شويه اعمال يدوية

مميزاتي :
- قليلة صبر لكني طموحة ومتفائلة!
- كثيرة التأمل بالحياة ! !

ميزانيتي :
- صفر

،

كل الشكر مرفق بالامتنان :
سهدُ ليل...

كتبت هالمشاركة بواسطة متفألة

السلام عليكم ورحمة الله وبركاته أمابعد: انا أقصد دبش العروس أفكار للكوش وكمان أعمل دفاتر للمعلمات، انا وصديقاتي 3 أعمارنا 29 سنه

مرحبا فيج ..

أعماركم حلوة لبزنس جريء .. اللي اهوة تنظيم ديكور للكوشة وطاولات الفرح او العزايم .

لكن بتحتاجون ميزانية شوي اكثر من 600 ريال ..... تقريبا 1000ريال من كل وحدة فيكم بكون اوكي

تييبون طاولة وكرسي نفس اللي بالافراح ... وتشترون قطع اقمشة على قد اللي بتحتاجونة ومخمل وغيره

والاكسسوارات اللي بتحتاجونها على الطاولة واللي بتزينون فيها ظهر الكرسي ..

حاولي تسوون 4 اشكال كل شكل لون وقصة وستايل ... مثلا (الاول هادي بلون الخوخي، الثاني ازرق بحر وتزينون الطاولة بصدف البحر او ما شابة انتو وافكاركم، الثالث اللون الاحمر مع الذهبي ، أخضر ربيعي مع اللون الوردي للورود). وهكذا

كل تصميم لطاولة تصورونها تصوير حلو بروفشنال . ولا تنسون الشموع فبعض الديزاينات .

تقريبا كل طاولة مع 4 كراسي تزيينها راح تكلفكم تقريبا 300 ريال لكن مع باقي الطاولات يمكن بس بتكلفكم 400 ريال لان السعر الاول يتضمن شراء الطاوية مع ال 4 كراسي .. وال 400 الثانية فقط بتشترون الاقمشة والديكورات.

تخيلوا بالفرح فوق ال 30 طاولة وكل وحدة تحطون سعرها 100 ريال على اساس كل شخص 25 ريال
والفرح فية 30 طاولة يعني 120 كرسي او معزوم = 25 * 120 = 3000 ريال من غير سعر الكوشة ويمكن المعازيم بالفرح اكثر من جية .

بالنسبة للكوشة بتكلفكم من ناحية الكرسي ولازم تشترون او تحضرون اكثر من نموذج ... حاولي توفرين مبلغ بين 5 الاف ل 10 الاف عشان على الاقل تسوين 3 نماذج لكوش وتعرضينهم لبنات المنتدى.

تقدرين تبدأين حاليا للطاولات والكراسي اذا عجزتي عن توفير مبلغ الكوش.

وابدأي بعملية البحث بالنت عن صور الطاولات والكراسي بتلاقين اشياء فظيعه وايد وحلوة .

وما شاء الله عندنا بالاماارت بنات بدوأ من البيت بتصميم الكوش لليلة الحناء والاعاس وفعلا ذوووق

يعني لا تنسون الابداع والذوووق الحلو والتناسق بالالوان .................... والله الموفق

ازهاار حبيبتي ... اذا ما عندج علاقات وايد مع الناس .. ابدا لا تبدين بالتجارة اللي اهيه من البيت .

هالنوع من التجارة ننصحة للبنات اللي عندهم علاقات واااسعه ومعارفهم وايد ويسوون دايمن عزايم ويلتمون مع الحريم وشاطرين بموهبة الاقناع وعندهم قوة في الكلام واختيار المفردات.


3000 ريال تقدرين بهالمبلغ تبدين تجاره لكن اتمنى تكون عندج مواهب او ميول ثانية ... اذا لا.

انصحج انج لما تشترين البضاعه تعطينها لوحدة امينة ونشييية جدا واجتماعية وعادي تطلع وتروح عزايم وتعرض بضااعتج للبنات ... وتعطينها نسبة ربح . اغلب الحريم يسوون جية للي ما عندها وقت وتريد تشتثمر فلوسها

وشوي وشوي لقيتي نفسج كونتي راس مال اكبر واكبر وبعدها ترومين تغيرين نشاطج لشي ثااني.

شو رااااااااااااايج ! واذا عندج مواهب زيادة او ابداعات خبريني

حكاية غرام

حبيبتي انتي بنفسج بينتي شو البزنس اللي ترومين تدخلينة وتمارسينة ...

الطبخ بس ما اباك تمارسين الطبخ بجميع انواعه .... اباج تركزين بس على 4 او 5 اصنااف اللي تكون best
عندج بشهادة الجميع

ويكون الحجز مسبقا وحددي ان التوصيل على حساب الزبونة ... واعرضيها بالمنتديات وان شاء الله بتلاقين اقبال

لاني اعرف ان البنات اللي اكلهم متميز ما شاء الله كل يوم تقريبا يطرشن طلبيات وترومين تخلين حد يسوي وياج اذا زادت الطلبات او اذ اضطريتي تاخذين اجازة او دراسة .

وطبعا مع الصور الحلوة اللي تشهي واسعار جيدة .. وجمعي اراء البنات واقتبسيها عشان يطمنن البنات .

والله يعطيج العافية وانتي بهالعمر :)