من حقي يوم في الاسبوع إجـــــــــــازة من اطفالي !!

angel eyes;4800364:
ويني عن هالموضوع خخخخخخ

بصراحه شديده انا من البدايه حاولت ما ادفن نفسي مع الامومه..حاولت من صغره اخليه اجتماعي يحب اهلي و يحب اهل ريلي عشان اذا بغيت اتركه ما يتعب..والحمدلله ان امي و اهلي واهل زوجي يموتون فيه و بالعكس يستانسون اني اوديه لهم على الرغم من انه كان صياح..بس طلعاتي تكون محدوده و للضرورات...هذا غير ان الخدامه تكون معاه يعني التغيير و الاكل والركيض وراه عليها...امي و ام زوجي بس يراقبون..يعني يشوفون شو بياكل ..شو يسوي...يعني احاول بقدر الامكان ما يتعبون وياه...لكن اذا تركته اكثر من مره في الاسبوع احس بالذنب واتحمل شطانته و دلعه بصدر رحب خخخخخ

بالنسبه للوقت اللي لي ..في البيت اقضيه في النت لكن يكون حوالي حمودي او راقد...وطلعات الوناسه نادره جدا مع زوجي يمكن مره في الشهر للسينما و نرجع و اخليه مع امي...وطلعاتي مع صديقاتي بعد ناااااادره جدا...لكن طلعاتي للصالونات مهمه كل شهر ادلع نفسي لازم..والحمدلله سافرت كم مره مع زوجي بروحنا و خليناه عند امي..لمده ايام..صح اتوله عليييه ..بس موول ما احاتيه الحمدلله لاني ادري انه مع امي ..اللي احس انها احن عليه مني..وهو يموووووووووووت فيها...هذا غير اني ادري انه مستااننس في بيتهم لانه يلعب مع ولد اختي اللي قريب من سنه والكل هناك يلعبه و يطلعه...فماشاء الله في بيت اهلي ما احاتيه بالمره..

لكن الحين فجرت قنبله من الدلع خخخخ

اشتركت في مركز عندنا لمده سنه...تدفعين و تستعملين الجيم و المسبح و المساجات و الصالون و الفيشلات و الليزر و غيره من الخدمات و الدلع....يعني بدلع نفسي عالاخر...احس النفسيه بعد تتغير ...هذا ما يمنع اني اودي حمودي المركز وياي من فتره للثانيه :)

بصراحه الواحد اذا اتريا عياله يكبرون عشان يستانس و يدلع عمره بيكون ضيع اجمل سنين عمره و شبابه...فالواحد يحاول يوازن...اكيد مب على حساب عيالنا بس اذا كان فيه اللي يساعدنا من فتره للثانيه ليش نقول لا

عليج بالعافية اختي ام محمد :shiny:

صح .. لازم الواحد يهتم بنفسه ويدلع حاله .. هذا اذا كان طبعا محصل احد يساعده (w)

انا للاسف ما عندي احد يساعدني :schmoll:

ريلي خواته كلهم معرسين وانا استحي منهم ومن ريايلهم ان افلت عيالي عليهم واطلع حق سينما او مطعم او اي مكان .. وام ريلي وحده كبيرة بالسن ولا تقدر عليهم ، والخدم زوجي ما يحب اي خدامه انها تلمس اليهال مو بعد تأكله او تلبسه او هالسالف ،، وامي الصراحه من النوع اللي ما لها خلق يهال .. لانها يابتنا كلنا ورا بعض وللحين عندها خواتي الصغار " وحده 8 سنوات والصغيرة 5 سنوات " يعني ما زالت تربي يهال ههههههههههههههههههه
وزين منها تستحمل عيالي وقت الجامعه فمستحيل اني اخلي عليها عيالي واطلع ادلع نفسي :( يمكن ما راح تقولي لا تيبين عيالج لكن انا استحي على ويهي لانها تعبانه ولانها من زماااان كل تقول انا ما لي خلق لليهال واشوفها كيف هي عصبية مع خواتي الصغار واحيانا تضربهم لما تعصب " لكن ما تعصب ولا تضرب عيالي " ودوم تقول متى يكبرون وارتاح ,, اقوم انا واخلي عليها عيالي يتعبونها ..
اضافة الى انها من النوع اللي تحب تطلع وايد وبالذات الليل مستحيل تقعد ليلة في البيت على طول تطلع مع صديقاتها او تروح اعراس وعزايم وتخلي خواتي في البيت ..



وعن خواتي " طبعا انا الكبيرة " وفي الثنتين اصغر مني وحده متزوجة والثانية مخطوبة وكل وحده لها حياتها .. زوج ودراسه ومشاغلهم مني مناك ..

تصدقين ساعات اقعد احسبها هههههههههههههههههههههههه اقول انا الحين عمري 24 سنة وبعد سنتين بيكون عمري 26 وعيالي اعمارهم الكبير قريب ال6 سنوات والصغير 3 سنوات .. اهم شي في هالفترة ما يكون عندي يهال غيرهم خخخخخخخ ووقتها بحاول اخليهم واطلع واستانس وادلع عمري :wavetowel2:

جمانه،، انا اقرا عنوان موضوعج من كم يوم بس ما ابا ادخله علشان ما اصيح :tears:

ليشش تقلبين علينا المواجع،،، اولا قلبي خايس ما يطاوعني اطلع واخلي بنتي عن حد تعرفين ليش بس علشان ما يتضايقون منها هي ما تسوي شئ بس احس في ناس ما يتحملون عيال غيرهم فما ابا احط عمري في هالموقف،، امي بعيده عني وما عندي خوات كبار

ثانيا،، لو اترتبت الامور وطلعت ما بكون مرتاحه لانه قلبي الخايس بيتم يحاتي بنتي وبلف لفه سريعه وبرد،، لا تقولين حاولي لاني حاولت وفشلت انا اعرف عمري،، مره كنت ابا اتحنى وفي خاطري اتحنى حنى عروووس اتخيلي اخر شئ كيف طلع حنايه؟؟!!! بس حنيتي اصابعي ورجعت البيت :tears:

ثالثا،، نظرا لانه ما عندي خوات ما اقدر اطلع الا ويا امي واذا طلعت وياها محد بيجابل بنتي واختي الصغيره فبينتهي بنا المطاف ناخذهم ويانا يعني لا وقت مستقطع ولا مقطع :tears:

ليش يا جمانه ليش ليش ليش؟!!! كنت متناسيه الموضوع :durr:

بس الحمدلله هم ماليين علينا الدنيا صح او لا
الحمدلله ناس ما عندهم ويتمنونهم

الا بسألكم وينها جمانة عن الموضوع

أكبر قلب;4814805:
الا بسألكم وينها جمانة عن الموضوع

ماذا عنكم اخواتي؟ هل تحرصون بين الفينة والاخرى على الابتعاد عن اطفالكم لفترة معينة؟

الظروف تحكم من هالناحية يعني بحكم البعد عن الاهل صعب الحصول على هذه النقطة الا نادرا جدا جدا
ماهي الهوايات او الامور التي تستهويكم وتقومون بها في هذا ال break?
لو حصل لي هذا الامر اول شيء اود الاستحمام في بركة سباحة :)
اتمنى ازور القبة العلمية بسايتك مرة 2 واحظر اسماك القرش واجمل الاماكن في العالم


وعند من تتركون اطفالكم؟ وكيف تصفون مشاعركم وحالكم عند عودتكم اليهم؟

لو حصل بشتاق لبنوتي وااااايد لاني لما كنت رايحة المدينة عطيتها جدتها وهي بسيارة وانا بسيارة 2
وبعد كم ساعه اشتقت لها موت
هل الزوج ومن يقوم برعاية الاطفال حال غيابك مقتنعون بهذه الفكرة؟

بيكوون الزوج قنوع اذا كانت الفترة قصيرة يعني ساعة او 2 وطبعا لما تحصل مرة بالشهر

ام ان الام مسؤليتها ابنها ولا بد لها من اخذه الى كل مكان تذهب اليه؟؟؟؟؟

هذا اللي يحصل الحين

يعطيك العافية اختي موضوع بصراحة حلو وجديد

تسلم يمناك

هلا اختي جمون مشكورة على هي الموضوع المميز.... ونبدأ
هل تحرصون بين الفينة والاخرى على الابتعاد عن اطفالكم لفترة معينة؟
بما اني ام جديدة صارت لي كم مرة اطلع واخليهم عند امي لانه ابوي مايرضى اطلع ابهم ثنتينهم.. بس يصير خاطري اني اطلع ويه ابو الشباب بروحنا لكن هو ماجل الطلعات لين البنات يكبرون...
ماهي الهوايات او الامور التي تستهويكم وتقومون بها في هذا ال break?
الطبخ هي هواياتي والتصبغ والتلبس ومشاهدة التلفزيون اشاهد التلفزيون بينما اني ارضعهم وهي بعد نادرا
وعند من تتركون اطفالكم؟ وكيف تصفون مشاعركم وحالكم عند عودتكم اليهم؟
عند امي .. اتركهم لانه هي تعرف لهم وطول النهار بعد يكونون عندها ... اذا انا في الدوام .. مشاعري في البداية كانت عادية لكن الحين اشتاق لهم عدل

هل الزوج ومن يقوم برعاية الاطفال حال غيابك مقتنعون بهذه الفكرة؟
غالبا يكونون مقتنعين وهم الي يقترحون الفكرة انا دايما ابي اخذهم وياي في طلعاتي المحدودة بس اهم يقولون خليهم..

ام ان الام مسؤليتها ابنها ولا بد لها من اخذه الى كل مكان تذهب اليه؟؟؟؟؟
لا الطفل ملزوم بعد من جانب الاب لانه وجود الطفل دايما عند امه يتعلم الدلاعة وبعد يتفلسف على امه ويصير عنود ومايهمه احد وكله في حضن امه سواء بنت ولا صبي بس لما تكون المسؤلية مقسمة على الاثنين يصبح الطفل يوازن عوواطفه تجاه الاثنين يعني اطفالنا مقتنعين انه غياب الاب الكثير هو لسبب واحد العمل والام متواجده معاه طول النهار فهو بيحب امه اكثر بس بنفس الوقت يفتقد الى ابوه ومجرد مايشوفه راح يلصق فيه ويبي يطلع معاه لانه الاب من البداية ماعوده انه يقعد وياه في البيت فالياهل يفكر الاب حق المشاور والمشاخط في السياير