:clap: السلام عليكم و رحمة الله وب ركاته..
انا عجبنى قوى الموضوع بتاعكم و خصوصا ان انا حكاية تعرفى على خطيبى كل ما حد يسمعها ميصدقهاش بس هى كانت صدفة و حكاية جميلة ... ربنا يخلينا لبعض يا رب و يفضل حبنا يكبر اكتر و اكتر يوم من بعد يوم...
انا اسمى هدى و عندى 22 سنة
و خطيبى و حبيبى اسمه خالد و عنده 27 سنة
واحنا حكايتنا مع بعض طويلة قوى عمرها 4 سنين النهاردة ... فعشان كدة هعملها على أجزاء لزوم التشويق يعنى ... زى الافلاااام..
ها مستعيدن تسمعوا الحكاية ؟؟؟
فين التشجيع و الهتااااف ياللا يا بناتيت ياالا:clap:
الحلقة الاولى
من اربع سنين و انا فى اولى جامعة . كنت واحدة داحاااحة مفيش فى دماغها الا الجامعة و المذاكرة و بس... و كنت بكلم كل الولاد اللى فى الجامعة على انهم اخواتى لان اانا اخواتى كلهم صبيان .. و هم كمان كانوا كلهم بيعاملونى كأمى أختهم (ليهم حق طبعا لانى كان شكلى عااار) كنت ولد زيهم فى كل حاجة لبسى و شكلى و تصرفاااتى .. و كمان كنت جدعة قوى معاهم..
المهم جيه فى يومم صاحبتى كلمتنى و قالتلى كلمينى على النت على ال ICQ انا نقلت الرقم غلط و ده طبعا طبعا (لحسن حظى) لان الرقم الغلط ده كان رقم خالد خطيبى... المهم انا دخلت لقيت حد مختلف غير صاحبتى اللى انا كنت داخلة اكلمها .. هزقته و قلتله انت ايه اللى خلاك تدخل عليا و جبت رقمى منين .. عشان ميفتكرش انى انا بعاكسه ... هو كان حاطط صورته هو بصراحة كان أمووور قوى ...
يتبع:shy:
انا جيلكم عشان اكملكم الحلقة التانية من حكايتى انا و خطيبى و حبيبى خالد...
انا لما شفت الصورة و شفت انه وسيم جدا ... بصراحة خفت اضعف و اكلمه و قفلت على طول لانى مكنتش بكلم شباب على النت..
و قفلت و نسيت الموضوع و بعد حوالى خمس شهور و انا نازلة من على سلم الكلية شفته هو طالع واول ما شفته لقيت نفسى بنطق بصوت عالى بقول معقووول .. هو التفت قوى و قاللى هو حضرتك تعرفينى ... انا قلتله ايوة انا قابلتك مرة صدفة غلط على النت .. هو انت هنا فى الكلية دى ؟؟ قاللى لا انا بعمل دراسات عليا و ليا قريب هنا من الدرجة الاولى رئيس الجامعة ..
طبعا انبهرت بيه اكتر لانه وسيم و من عيلة و كان شيك قوى و قريبه يبقى رئيس الكلية اللى الكل يتمنى بس انه يعرف اسمه مش يعرف حد قريبه...
مكنتش وقتها يخطر ببالى انه الدكتور ده هيدخل بيتى و يحضر خطوبتى انا و خالد ...
يتبع:shy:
معرفش ايه جرالى من اول مرة شفته فيها حسيت انى هيكون ليا معاه حكاية كبيرة قوى .. بس رجعت تانى فوقت و قلت شاب وسيم زى ده غنى و ابن ناس هيبصلى على ايه ؟؟؟ صحيح انا كمان اهلى ناس مبسوطين بس فى نفس الوقت كان شكلى عار كنت عيلى فى اولى كلية و كل هدومى كوتشيات و حالتى كانت تصعب على الكافر.. هههههههه
المهم بقيت اعرف امتى محاضراته و اعمل انى شفته صدفة و افضل اخلق اى موضوعات ... و هو بصراحة الوالد كان >وق و شهم و مكنش بيحرج الاخت الغلبانة المتيمة اللى هى انا...
يوم بعد يوم بقينا نقعد مع بعض اكتر و بقينا نشوف بعض لمدة اطول و بقنا نتفق ... بس كل ده كان فى اطار الصداقة و عدى على الموضوع ده اربع شهور .. بشوفه و بقابله فى الكلية و بنتكلم بالساعات بس فى اطار الصدتقة و منتهى الاحترام ...
لحد اليوم الفاصل فى حياتى و اللى اعتقد انى مفرحتش و لا هفرح قد الفرح اللى حسيته فى اليوم ده و هو يوم الاربعاء 25-2-2004
يتبع:shy:
يوم الاربعاء 25-4-2004
اليوم ده يوم فاصل فى حياتى .. كنت قاعدة فى معمل الكمبيوتر فى الجامعة بذاكر و فجأة لقيت موبايلى بيرن و ظاهر عليه رقم خالد ... رديت قاللى انتى فين ؟؟؟ ده كان قبل ميعاد محاضرته ب 3 ساعات ... قلتله انا فى المعمل قاللى طب تنزلى نقعد مع بعض شوية .. قلتله ثوانى و هكون عندك ... سبت الدنيا كلها و جريت عليه ... كنت خلاص على وشك انى اقوله انى بحبه ... و لكن طبعا المفروض هو اللى يقول .. بس انا كنت خلاص واضح عليا قوى ..
هو كان بيتصرف معايا بكل احترام كنت هموت واعرف بيحبنى و لا لا..؟؟
المهم نزلت و قعدنا مع بعض و اتكلمنا ال 3 ساعات عدوا 3 دقايق ...
و سبته لان ميعاد محاضرته كان هيبدأ .. و روحت و انا بدعى ربنا انى مقولتلوش انى بحبه و محبتش و لا هحب حد تانى غيره ...
روحت الساعة 6 مساء ... ماما كانت مسافرة لان جدى كان متوفى لسه بقاله شهر و هى قاعدة عند جدتى ..
المهم غيرت هدومى و صليت و اكلت و دخلت السرير و مسكت الموبايل كانت الساعة 7
جالى قرار جنونى انى اكلم خالد و اقوله انى بحبه .. و فعلا اتخذت القرار و استجمعت شجاعتى و ...............................
يتبع:shy:
لسه هدوس اتصال و اكلم خالد و اقوله بحبك ... لقيته بيتصل بيا ... غريييبة ده المفروض انه لسه فى المحاضرة ...
قلت اكيد فى حاجة حصلت .. رديت وانا كل حاجة فيا بتترعش من الخوف و قلت الوووو
لقيته بيقوللى انا مقدرتش اكمل المحاضرة
- انا: خير انت تعبان؟؟
- هو: لا بس كان فى حاجة عايز اقولهالك و مش قادر استنى ز
- أنا: خير قوول فى حاجة حصلت فى الكلية؟
- هو: لا خالص بصى بصراحة فى الدين بيقوللك دور على ذات الدين ... و انا عرفت بنااات اشكال والوان و عملت حاجات كتير صح و غلط ..بس معاكى انتى لقيت حاجة غريبة بتشدنى ليكى هى ايه؟؟ مش عارف؟؟ بس انا مشدودلك قوى ... و بصراحة انا عايز آخد ميعاد من والدك عشان اتقدملك و اخطبك ...
- أنا: ايه... ايه...... انت بتقول ايه؟؟؟ أخيرا يا اخى
- هو: قاللى انا كنت متاكد انك بتبادلنى نفس الشعور بس كنت مستنى أتاكد من مفسى لانى مش عايز اظلم بنوتة طاهرة و بريئة زيك معايا..
- أنا: اظلمنى يا اخى انا موافقة ...
- هو: طيب خدى وقت فكرى قبل ما تقوللى لبابا ..
- أنا : وقت ايه؟؟؟ ده انت اتأخرت عليا قوى ... انا موافقة طبعا شوف الوقت اللى يناسب اهلك و تشرفونا
- هو: انا اكيد ربنا بيحبنى .. ربنا يباركلى فيكى يا رب..سلام عليكم
- أنا: و عليكم السلام و رحمة الله و بركاته
.....:shy: يتبع
قفلت معاااه و انا حاسة ان مفيش حد سعيد فى الدنيا الا انا ... كنت هطيييييير من السعادة و ماما مكنتش موجودة كانت مسافرة عند جدتى ... جريت على بابا و قلتله لقيت بابا بيقوللى طيب اهدى و خليكى راكزة كدة ... و بعدين انتى مش شايفة انك لسه صغيرة على مواضيع الحب و الجواز و الخطوبة دى ؟؟
انا طبعا تنحت و قلتله هو انا هقوم اتجوز على طووول ؟؟؟ دى يادوب هتبقى خطوبة و بعد كدة الوضع هيتغير ان شاء الله ...
كلمت ماما و حكيتلها و كلمت كل اصحابى قلتلهم (اكبر غلطة فى حيييياتى) .. هتعرفوا ليه بعد كدة..
المهم اتفقنا ان خالد واهله ييجوا يوم 15 ابريل 2004 بعد امتحانات الميد تيرم بتاعتى و بتاعته فى الكلية و من 25 فبراير الى 15 ابريل ... عشت مع خالد احلى ايام فى حياتى ...
كان طيب معايا و كان هو شايف فيا هدى الانثى اللى محدش حاول يشوفها و بدأ يخلينى ابين الانثى اللى جوايا ... خلانى انسااااااااانة تانية خالص من حبه ليا .. لانه حب صادق من غير اى اغراااض ..
وجيه اليوم الموعود (الخميس 15 ابريل 2004) أسوأ يوم فى حياااتى طبعا كنتم متوقعين العكس هقولكم ليه هو كان الاسوأ؟؟...............
......... يتبع:shy:
:sad:
البيت طبعا كان مقلوب من الصبح و كل واحد بيشوف هيلبس ايه و مااما بتشوف البت لازم يكون مفيهوش ولا ذرة تراااب .. كأن شخصية مهمة هتزورنا فى البيت..
انا صحيت من النوم فى اليوم ده عادى و نزلت رحت الكلية حضرت كل محاضراتى و طبعا قلت لأمة لا اله الا الله ان خالد جى يخطبنى... و على النق و الحسد اللى اخدتهم... انتى؟؟؟؟؟؟؟؟؟؟
وقعتى واقفة...
الواد قمر..
وكلام بايخ مالوش لازمة
وانا كنت عبيطة و فرحانة من نظرات الغيظ اللى فى عينهم .. و فرحانة انى انا الللى فزت بيه و بحبه و بقلبه..
المهم روحت نمت و صحيت اخدت شاور و لبست الفستان و الجزمة و محطيتش مكياج خاااالص ... قلت اخليهم يشوفونى على طبيعتى و هو ابنهم عارفنى بمكياج و من غير .. و انا اصلا مش بحب الماكياج ..
المهم رن جرس الباب الساعة 7 بالضبط
انا من ورا الباب براقب الوضع...
خالد ووالده ووالدته ... ومام و بابا و بابا راح نادانى بعد شوية اطلع اسلم ..
والد خالد كان عسكرى و نظراته كانت حادة قوى .. و انا من زمان عارفة ان شخصيته قوية قوى ..
والدته ست طيبة و متدينة قوى وامووورة قوى
المهم قعدوا من الساعة 7 الى الساعة 10 من غير ما والده ما ينطق ولا كلمة .. و مشيوا من غير ما يتقدموا ...
ومع قفلة الباب بابا قاللى الناس دول مش راجعين تانى ... و انتى تقطعى علاقتك بالولد ده عشان انا مش موافق .. و ده اخر كلام عندى و معنديش كلام تانى اقوله..:sad:
....... يتبع:shy:
تانى يوم صاحية و انا مش عارفة لو خالد كلمنى هقوله ايه؟؟ و قلت اشوف عنده الاول الدنيا شكلها ايه؟؟
لقيته بيكلمنى و هو مبسوط و بيقوللى ماما و بابا مبسوطين منك ..
؟؟؟؟؟؟؟؟؟؟؟؟؟؟؟؟؟
قلتله امال متكلموش ليه؟؟؟
قاللى دى كانت قعدت تعارف يا هدى...
قلتله بس انت مفهمتنيش كدة و بابا عامل مشكلة و لازم ابوك يجى يتقدم رسمى لان بابا عامل مشاكل جامدة ..
قاللى حاضر يا حبيبتى انا اصلى عمرى ما خطبت قبل كدة و معرفش فى الحالات اللى زى دى ايه اللى المفروض يت و ايه اللى مفروض يتعمل (نصيحة: اتفوا على كل حاجة من الاول متسيبوش كل حاجة لظروفها زى ما انا عملت)
عدى اسبوع من غير ما حد يتقدم و خالد بيكلمنى كل يوم و يقوللى حاضر هنيجى نتقدم و نبقى احلى عرسان و الكلام اللى بيتقال فى الحالات دى ..
واتارى ان خالد فى الناحية التانية كان بيواجه ظروف صعبة قى و هى ان الحقيقة ان ابوه (ولا فخر رفضنى) وان خلال الاسبوع ده كان خالد بيحاول يقنعه والراجل كان رافضنى و كأنى راقصة كانت هتدخل العيلة ..
و جت لحظة مصارحة خالد ليا بالحقيقة بعد فشل محاولاته مع والده و ده كان يوم الاربعاء 22 ابريل 2004
............يتبع:shy:
كنت متفقة اقابل خالد فى الجامعة وجيه فعلا فى الميعاد ... لما شفته قلبى اتقبض ...
حزين و دقنه طويلة ... و الدموع مالية عنيه ..
قلتله مالك؟؟
قاللى مفيش سلامتك...
مطولناش مكنش قادر يتكلم و شوية و قاللى انا تعبان و استأذن و مشى...
انا كنت حاسة ان فى حاجة و مش عارفة هى ايه...
كنا متفقين نتقابل بليل على النت فضل لحد 1 بليل مدخلش و مبعتليش حتى رسالة على الموبايل زى ما كان بيعمل لو مش هيقدر يدخل .. و فجأة لقيت رسالة بتقوولى
ابويا و امى بيموتونى بالبطئ
انا قريت المسج انهرت و عرفت ان كل اللى بينى و بين خالد انتهى ... لانى مش هتجوزه غصب عن اهله ...
واتحولت من لحظة الانهيار لجبروت و كرامة عمرى ماشفتهم فيا ...
كلمته قلتله ... عادى ده شئ متوقع... عشان ابوك عايز واحدة ممثلة تمثل عليه و تتمكيج و تعيش فى الدور و تعمل نفسها مكسوفة .. و انا اتعاملت معاهم بطبيعتى قال عليا جريئة (ده كان سبب اعتراض ابوه عليا) قال انى مكنتش مهتمة بالقدر الكافى مكنتش حاطة مكياج معناها انى مش مقدرة المناسبة ... و كمان انا جريئة عشان بقول انى بدرس فى محو الامية و دار رعاية الايتام فى وقت فراغى فاكيد علاقتى هتكون بالسباكين و اخلاقى مش كويسة..
المهم انا قلتله انا مش هكلمك و لا اعرفك من وراهم و لا رفعت صوتك على ابوك او امك او اتحدتهم بسببى فده مش معناه انك بتحبنى (لان اللى مالوش خير فى اهله مالوش خير فى اى حد.. و لو بتحبنى تثبتلى انك راجل و تدخل حالا لابوك وتقولله انك نسيتنى و ان هو صح .. و تبوس ايده و تتعامل عادى ..
و ربنا يوفقك .. بس ماتبقاش بعد كدة تضحك على بنات الناس طالما انت مش قد قرار اختيارك.. ربنا يوفقك .. و قفلت التليفون و انا فكرة انى طويت قصة خالد للابد...
الغريبة انى دخلت نمت و نمت نووووم عميق كمان .. يمكن عشان حسيت انى رضيت ربنا لما خليت خالد يرضى اهله .. و يمكن عشان كدة ربنا رضانى و جمعنى مع خالد من جديد ...
......... يتبع:shy: )
صحيت تانى يوم و انا مش متخيلة ازاى خالد مش فى حياتى ... دخلت غسلت وشى و اتوضيت و صليت و دخلت على ماما و بابا و قلتلهم اعتبروا موضوع خالد منتهى انا و خالد نهينا كل حاجة ..
ماما قالتلى ليه .؟؟ قلتلها محصلش نصيب.. اهلهم عندهم اعتراضات عليا ...
قالتلى هم كانوا يطولوا و الكلام ده قلتلها خلاص نمحصلش نصيب ...
بابا قاللى كدة من غير الرااجل ما يتصل يعت>ر و لا خالد كأن البيت اللى دخلوه ده و لا حاجة .. قلتله معلش و اعتبر كل شئ منتهى و انهم مجوش من اصله ..
عدى عليا خمس شهور قاطعة علاقتى بخالد ... شفته خلالها مرتين بالصدفة فى الجامعة .. كان باائس و حزين منهم مرة ... كنت قاسية عليه فيها قوى ... رحت لحد عنده و قلتله انت ماللك؟؟ مطول دقنك و مكتئب ليه ..؟؟؟
انسى يا راجل الدبيحة اللى انتوا دبحتوها كويسة و عايشة حياتها .. اللى قتلها هيحس بيها... انت لو اخر راجل على ضهر الارض مش هكون معاك .. عارف ليه ؟؟ عشان انت متستاهلش اصلا انى اكون معاك..
و مشيت و سبته و انا عارفة انى بالكلام ده بجرحه و بموته .. بس انا بصراحة صعب عليا لما شفته تعبان من بعدى و قررت اخليه يكرهنى و يشوف انى مستاهلش التعب ده ..
بس هو مكرهنيش لانه عارف انى اضعف منه و انى بموووت اكتر منه...
فضلت بعيدة عنه بصلى كل يوم قضاء حاجة و ادعى و اقول يا رب يا مقلب القلوب قلب قلوبهم و اجمعنى انا و خالد ... مكنش عندى امل بس كنت متاكدة انى ربنا هيجمعنى بيه برغم كل حاجة .. لانى كنت بدعى الله و انا واثقة فى الاجابة ,... و مكنتش مستعجلة الاجابة ...
لحد يوم 11 سبتمبر 2004 .. يوم عيد ميلادى ........
.........:shy:
يوم 11 سبتمبر كان بقالى حوالى 6 شهولا معرفش حاجة عن خالد بس ولا مرة فقدت الامل انه ليا و انى له .. و كنت مستمرة على دعاااائى ...
دخلت الكلية لقيت خالد فى وشى اول ما شافنى انفجلا فى البكاء و قاللى سامحينى انا مش قادر اعيش من غيرك .. احنا مع بعض ممكن نعمل اى حاجة .. لكن انا مش هقدر لوحدى اعيش و لا اعمل اى حاجة ... انا حياتى اتدمرت من غيرك..
انا كنت ساكتة .. بعد ما خلص هو كلامه قلتله انا بحبك .. و هحارب معاك عشان نكون لبعض .. و ربنا معانا ان شاء الله ... و بدأنا قصة كفاحنا مع بعض من يوم 11 سبتمبر 2004..
....... يتبع:shy:
ابتديت من يوم 11 سبتمبر 2004 .. انا وخالد خطة محكمة عشان نكون مع بعض .. و قررنا ان مصيرنا احنا اللى نحدده مش اهلنا .. و ان احنا اكتر اتنين عارفين ان احنا بنحب بعض و مش هنكون سعدا الا مع بعض .. لان احنا جربنا نبعد و معرفناش و مقدرناش .. و بدأت الخطة ..
الخطة كانت كالآتى...
1- الدعااااء فى كل اوقات الاجابة و احنا موقنون بالاجابة و مش مستعجلين عليها ..
2- ارضاء اهلنا فى كل حاجة .. لان رضاهم من رضا ربنا و لما ربنا هيرضى عننا هيحققلنا كل اللى احنا عايزينه ..
ملحوظة: اهلنا فى الوقت ده كانوا فاكرين ان كل حاجة انتهت بيننا و ان احنا خلاص نسينا ..
دخلت انا الماجيستير .. و تفوقت و خالد انتقل شغل احسن و اثبت فيه نفسه و بقى معروووف جدا فى شغله بالتزامه و تفوقه ..
كان هدفنا ان احنا لما نيجى نفتح جبهة الحرب من تانى اهلنا يعرفوا ان احنا كنا مع بعض طول الفترة دى و ده خلانا احسن و ان احنا مأثرناش معاهم و لا فى شغلنا بالعكس وجودنا مع بعض قوااانا ..
انا فى الفترة دى كنت بحفر فى الصخر عشان ارضى اهلى و خالد كمان ..
عشان يحسوا ان احنا كبار و قد مسؤولية الاختيار اللى احنا اخترناه و ان احنا نكون مع بعض ..
ذ
استمرت الخطة من 11 سبتمبر 2004 الى 11- يوليو 2006
عارفة انكوا هتقولوا ليه الفترة طويلة كدة ؟؟
بس كان فى خلال الوقت ده خالد بيتنقل من شغل لشغل و كان لازم يثبت نفسه .. و كمان والده جاله مرض و كان لازم نطمن عليه قبل ما نفتح الموضوع عشان ميتقلش ان احنا بنستغل فرصة ضعفه فى المرض ..
كنا عايزين كل حاجة صح .. و ربنا الحمد لله هيأ الظروف ..
وجيه اليوم اللى انا و خالد كنا بنجهزله من سنييين و هو يوم مفاتحة والده من تانى .. و كنا مستعدين للحرب .. لانننا كنا عارفين انها هتكون حرب شرسة .. و جيه اليوم
11 يوليو 2006
...... يتبع:shy:
كنت فى الوقت ده ابتديت احس انى المفروض نبدا بقى نتكلم و نفتح الموضوع احنا خلاص مش ناقصنا اى حاجة ...
يبقى خالد ليه مش بيفتح الموضوع؟؟؟ هو خلاص مابقاش عايزنى ؟؟؟ انا ممكن استحمل اى حاجة فى حياتى الا انه هو بنفسه يبقى مش متمسك بيا؟؟؟؟؟
و الشيطان و الصحاب و الفكر كل ده بيلعب بيا ...
بس كنت دايما افتكر ربنا و اقول انا عمر ربنا ما هيخذلنى و هو اكيييد مدخرللى الخير كله بس لسه الاوان ماجاش...
و فى يوم 11-6-2006
كانت الشرارة الاولى :
اخو خالد الكبير : راجل محترم و حنييين قوى .. بدعيله فى كل صلاة انه ربنا يكرمه و يديله قد نيته... حب يعمل حاجة لاخوه و يفتح الموضوع مع والده .. كان ممكن يقول انا مالى ؟؟؟ اخسر والدى ليه بسبب حكاية ماليش دعوة بيها؟؟
المهم هو استنى فى يوم و فاتح والده .. طبعا الاب جاتله صدمة .... من ان احنا لسه على علاقة مع بعض .. و طبعا نزل شتيمة فيا و فى خالد و فى اخوه و ان احنا بنخدعه و كلام كله انا كنت عاملة حسابى فى اكتر منه ...
و قال له على جثتى الجوازة دى مش لازم تتم..
كلم اخو خالد خالد و قال له انا عملت اللى عليا و بابا رافض تماما حتى الخطوبة ... و معلش و ربنا رايدذ كدة .. و لما تروح توقع رد فعل قاااسى من بابا ... واوعى تعللى صوتك عليه .. هو برضه ابوك ..
روح خالد و نفسيته محطمة .. لان كدة يبقى مش هينفع نستنى كمان 3 سنين .. دخل البيت و هو متوقع والده على الباب عشان يسمعه الكلمتين اللى احنا مستنينهم ..
لكن اللى حصل ........
........ يتبع:shy:
ان اولده لما شافه ابتسم فى وشه .. و تعامل معاه بلطف زايد عن العادة .... خالد طبعا متكلمش من الصدمة .. و قال هو اكيد مستنى انى اتغدى و بعدين ينكد عليا ... قد ايه انت حنييين يا بابا ؟؟؟ حتى فى غضبك ... و استنى خالد لبعد الغدا .. و برضه والده متكلمش و لا كأن شيئا لم يكن ..
بس هنا خالد قال لنفسه بابا هيسكت و هيعتبر نفسه مسمعش حاجة و هيعمل بالمقولة اللى بتقول (عتاب الندل اجتنابه) و هيعاملنى كندل و يجتنبنى ..
و فى الوقت ده كنت انا وخالد حالتنا النفسية زى الزفت لان احنا منتظرين حاجة و احنا مش عارفين ايه هى...
اصعب شئ انك تستنى وانت مش عارف انت مستنى ايه؟؟؟
عدوا 3 ايام و احنا مش عارفين نعمل ايه و لا نتصرف ازاى؟؟؟
مش بنعمل اى حاجة غير ان احنا بندعى ربنا و بنصوم انه يفك كربنا و يزيح الغمة ....
بعد 3 ايام .. خالد راجع من الشغل لقى والده بيقوله انا اخوك كلمنى فى موضوعك انت و البنت اللى بتحبها .. و انا موافق .. انا كنت ال 3 ايام اللى فاتوا بعمل استخارة .. و طالما انت شايف انها البنى آدمة اللى هتسعدك و تكون ام صالحة لاولادك و تصونك فى مالك و بيتك و عرضك .. انا موافق...
بكى خالد من الفرحة و باس ايد والده .. و جرى يكلمنى .. و احنا مش مصدقين ان الامور مشيت كدة من غير اى مشاكل ..
و بدأت الحرب فى الجبهة التانية ..
ابويا و امى..
يتبع.....:shy:
كان أسهل حاجة فى الموضوع بابا .. لما فتحته فى الموضوع قاللى انتى حرة عمرى ما هقولك اتجوزى ده و لا ماتتجوزيش ده ...
و ساب ليا القرار
اما ماما ... عملت الموضوع موضوع راى عام ... و قالتلى لو اتجوزتى الولد ده انا هسيب البيت ... و هددتنى و كانت فى يوم هتضربنى ... قلت لها انا مش هغضبك و اتجوزه من غير موافقتك ... بس انا اسفة مش هقدر اكون لحد تانى غيره .. لانى محبيتش غيره .. و محدش يستاهل اصلا انى اقوله حبيبى غيره لانه هو اللى علمنى الحب و علمنى انى اقولها ... خلانى اقرب من ربنا .. و عملنى كل حاجة ... انا لو كنت كويسة دلوقتى فمنه هو بعد فضل ربنا عليا ... مش هقدر اكون لغيره و انا اسفة ...
ماما طبعا اتصدمت من جرأتى ... و بعد ضغط من بابا ... وافقت ماما على مضض..
وتم تحديد الميعاد .. و كنت فاكرة انى لو شفتهم تانى هيغمى عليا من الخوف...
سبحان الله العكس حصل ... ربنا فى اليوم ده نزل عليا سكينة غريبة و خلانى هادية جدا .. ووفقنى فى اختيار فستان رقيق جدا ... خالد و مامته و باباه كانوا يهتجننوا عليه ... و عملت ماكياج بسيط ... و نفذت تعليمات خالد بالحرف..
اول ما والده شافنى .. قاللى مش انتى ؟؟؟؟ انتى اتغيرتى تماما و مامته قاالت نفس التعليق ..
كانوا منبهرين بيا ... و كأن ربنا بيقوللى دى هدية صبرك .. لانى يا جماعة بجد صبرت كتير و عانيت كتير و انا بعيدة عن خالد ... و قعدوا و ضحكنا و سهرنا و حددنا ميعاد الشبكة ...
و جالى شبكة اغلى من اللى انا كنت احلم بيها ... (مع العلم ان والدى متفقش مع اهل خالد على اى حاجة خالص) .. لكن هم ناس كانوا طايرين بيا .. و ربنا استجاب لدعااائى و بدل كرههم ليا محبة اضعاف مضاعفة ..
و برغم انه حصل كذا ظرف و اتغلت الخطوبة كذا مرة .. الا ان الخطوبة اتعملت فى ميعادها ... و نمت لاول مرة فى حياتى و دبلة خالد فى صباعى و انا بكتب بداية حياة اتمنى من ربنا انها تكون كويسة و جمميلة و حلوة ..
ان شاء الله فرحنا فى اغسطس اللى جى ...
عقبال كل بنت لما تفرح الفرحة اللى ربنا نزلها فى قلبى لما بقيت مع الراجل الوحيد اللى شفت انه ستاهل انى اكون معاه و اللى حبنى و حبيته بجد من كل قلبى ..
:clap: :clap: :clap: :clap: :clap: :clap: :clap: :clap: :clap: :clap: :clap: :clap: :clap: :clap: :clap:
