غلطة عروسة...للمتزوجات

موضوع حلووووووووووو

يعطيك العافية

مشكورين عالموضوع الحلو
وانا لسه ماحددت زواجي

انا معاج...ثم معاج يادوووودة...

انا الكل كان يقول...قبل لا اتزوج..

ان عرسي راح يكون لا صار ولا استوى...

وصدق لاصار ولا استوى شي من اللي في بالي...

استفدت كتير من غلطاتكم ان شاء الله اقلكم غلطاتى لما اتجوز بس ادعولللللى

موضوع حلو... منكم نستفيد....!! للمستقبل يعني ..............!!!!:shy:

المهملا تكثرون من الاشياء اللي بتشترونها ومثل ما قالت الاخت معليش ادفعو اكثر بس اخذو شي راقي

انا كثرت وايد من الصنادل وانتوا بكرامه والقمصان خذتهم وكانوا عاديين كلللللللللللللللللللللش وماخذت غير

بدلتين كشخه بسسسسسسسسسسسسس وتوهقت لان بعد العرس قطيت كل الصنادل لانهم وايد تمللت منهم اولا وبعدين

ما شريت شي راقي لو اني ماخذه نص عدد الصنادل بسعر شوي اغلى بس شي راقي ويتهم عندي جان احسن

ونفس الشي القمصان قطيتهم كلهم وشريت اشيا جديدة لانهم كانوا اقل من العادي

واكبر غلطه بحياتي ولحد اليوم متحسفه عليها اني ما شريت غير 4 بدلات حق السفر و4 شيلات

وتوهقت ريلي كشخ اكثر مني وصج صج تفشلت من قلب حتى هو مالبس شي من اللي عنده وكان يكرر نفسي

وتقريبا نص الشنطه رجعها مره ثانيه بدون ما يلبسها عشان ما يحرجني :(

والغلطه الثانيه اني كنت انام بالمكياج فويهي صج صج تدمر وتوهقت صرت مات اقدر اقعد من دون مكياج

لاني ويهي كله حبوب فشله ولما رجعت الدوحه تميت اتعالج لمده شهرين تقريبا لين ما رجع ويهي طبيعي

وطبعا نسيت اخذ كير فري وكوتكس وهقه يعني هههههههههههههههههههه


موفقين خواتي الله لايقطكم بهالمواقف

مشكورين ع الموضوع الرائع

بصراحة استفدت من تجاربكم وان شاء الله اطبقها

طبعا أنا مش متزوجه

بس لما أتزوج راح أستفيد من خبرتكم وايد في تجهيزي

لكن تدرون يعني أنا أشتغل وما أعتقد إني راح أستخدم مهري كله على التجهيز

لأن عندي ما شاء الله من الملابس والجلابيات الفخمة والجواتي يمكن 30 جوتي وصندل ونعال الله يعز القاري
والعطورات اللي عندي بعد وايده الفرنسية والعربية والبخورات
وعندي أطقم إكسسوارات ألوان وأشكال
وثلاث علب متروسة مكياج وشدوهات وحمر والذي منه
حتى إكسسوارات للشعر والريش والتوكات عندي منها مجر (درور) متروس
هذا غير الملابس الداخلية الحريرية

يعني مهري ما راح أصرفه كله، وفكرتي إني أشتري لي كم جلابية فخمة وأسوي لي هندي للمبارك و3 عبايات وكم بدلة للسفر وفستان حفلة حريري ناعم، وفستان العرس طبعا والتجهيز
وقمصان النوم 5 بس وإذا إحتجت أكثر رحت السوق خب هو ما بيطير.

وأخليلي فلوس كفاية للسفر عشان أشتري بقاية الاغراض من هناك

ومهم يا بنات تجهزون كل شي تبون تسوونه في العرس يعني الفستان من وين، الشعر والمكياج والحنة والأناشيد والأكل والصالة اللي بيصير فيها العرس وكل شي حتى التوزيعات من وين وباقة العروس وأغنية الزفة، كله تجهزينها في فايل خاص (فكرة من المنتدى) عشان ما تنسين شي وبالأسعار بعد، لأن وايد عرايس ما يعرفون إن التخطيط سر النجاح.

وبالمبارك للي بيعرسون

نصايح مفيدة جداً الله يسهل عليكم

موضوع ممتاز
الله يوفقكم و ييسر لكم

والله الموضوع وايد حلو ومنكم نستفيد

انا مب متزوجه للحين ولا مخطوبه بس يوم بيي النصيب انشاءالله نستفيد من تجارب غيرنا

انا عندي اخت متزوجه من 4 سنوات وشوي مهرها كان 150 الف وهي اللي اشترت الطقم يعني خصصت 50 الف حق الذهب
والفستان كان جاهز وهو هديه من الوالده يعني ما دفعت اختي شي
واكثر شي اللي شفتها خذت الملابس صدق خسرت وااايد على الملابس وماشفتها لبستهم ابد لا فساتين ولا بدل لان حملت وجسمها تغير وكنت احس انها ما بتشتري ملابس بعد العرس ابد!!
اللي استفادت منهم صدق الذهب واطقم العبايات
ومع هذا تم لها كم الف في حسابها ,,

انا اللي اشوفه ان اي وحده بتعرس لازم قبل كل شي تخطط وتقسم المبلغ على الشي اللي تحتاجه ,,لان اكيد بعد الزواج بتروحين الاسواق وبتنزل موديلات غير وبتتسوقين وقبل كل شي لازم تحط في بالها ان ممكن تحمل بعد اشهر قليله من زواجها وهالجسم بيتغير ..

والله يوفق الجميع يارب

[grade="00008B FF6347 008000 4B0082"]مرحبا بنات

انا بصراحة شو سويت خذت ملابس شوي بس كثرت من المخاوير والجلابيب طبعا منوعة شي ثقيل و غالي وشي خفيف و بسيط ......وطبعا كلفوني 10000 + مغربية + وهندية واحدة ........

وطبعا من سوق العرايس (سوق عكاظ) ما قصرت خذت الين ما تعبت طبعا كل كندورة (جلابية ) ومعاها شيلة للبيت (طرحة او شمد) يعني اللي كانن ملونات اقصد فيها رسم او ورد كنت اخذ او اطبق شيلة سادة فيها خرز او فصوص المهم سادة تناسبها والعكس صحيح
ليش الجلابيات لانها ماراح يتغير موديلها وايد وعندنا (في الامارات نوع من الفخامة التراثية ) وحتى لو تغير حجم جسمي ممكن البسهم عادي بالعكس بتمون مخصرة وقتها بس (انا تغير بس كان عادي بعد ما ضاقن .؟

كثرت من قمصان النوم قد ما قدرت لان اهلي كانوا مصرين على هذا ...بس كانوا على حق .. اشتريت 30 قميص نوم تقريبا بكل الانواع والاسعار والموديلات وحتى الالوان لان كانت عندي مشكلة هو يحب الوان معينة تكون قصيرة والوان اخرى يفظلها طويلة بس الحمدالله حليت المساله:clap: وكل يوم كنت البس لون موديل وشكل يعني طول شهر العسل ما كررت ولا قميص نوم واستانس مني وايد لانه هو مثلي يحب التجديد..... وخبلته من الخاطر ................وطبعا الملابس الداخلية اذا كثرت منها عادي ما تضر بس مب كلها لازم تكون ماركات تكسر الظهر عادي .............

اما الفساتيين طبعا ما كثرت منها بس 5 ولا بعد وصيت الخياط انه يخلي فيها مجال للتوسيع اذا ضاقت مثلا :shy: ممكن تقولون زطية بس يعني احمل او امتن وانا مالبسته كنت بنجلط..........ما علينا والبدل خذت 2 بنطلون اسود +1 بني +بيج +3 جنز +كذا تنورة من مصانع عجمان طبعا ولبقت عليهم بوديهات وقمصان وطبعا كنت اجهز نفسي شوي شوي من اول وخذت شيفونا ت من عند البتنانية اللي في( سوق نايف) هذا اللي المتر بخمس دراهم وخيطتهم وطلعو جنان بعد ما كثرت بعد 5 + 4 جاهز....
طبعا انا ما احب الشنط وايد بس حاولت انوع خذت 6 ونوعتهم يعني سبورت + رسمي +سهرة
وطبعا نعل (شباشب) +صنادل +جوتي (جزمة) وحدة وبس لاني احب النعول المفتوحة تقريبا كل الالوان والموديلات حتى سطاحية (من غير كعب +كعب بسيط ) طبعا نفعوني يوم كنت حامل بس الله ماكتب الحمل يستمر في الثلاث مرات له الحكمة في ذ للك الله كريم ورحيم ( الحمدالله على كل حال ):shy: ادعو لي خواتي

وطبعا انا اعشق العطور والكريمات المعطرة شي منها انا سويتها وخلطتها وشي انا اشتريته وطبعا زهبة (جهاز) الاماراتية ما تكتمل الابدهن العود والمخمرية الفخمة والعود الجيد والدخون (المعمول).......وطبعا هذه الاشياء الاشياء الاخيرة امي خذتها لي هدية من عندها ........وطبعا انا عندي شي منها وماكلفتني كثير خصوصا انا ما انتظرت مهري كنت اجهز كل شي او بالاحرى الاشياء اللي بحتاجها الواحد كثير وما تتغير موضوتها .........بسرعة كنت اسارع واشتريها وساعات كنت استخدمها واخذ واحتفظ باللي احلى منها ان وجد.......

المكياج طبعا من ماك لانه يناسب بشرتي مش كله بس ( البودرة + الفوديشن ) طبعا خذت ثلاثة من البودرة المظغوط بدرجات مختلفة غامج .. نفس لون البشرة ...افتح من لون البشرة ... والفونديشن طبعا نفس لون البشرة وخذت واحد ثاني يصفي لون البشرة ويفتحها ....يعطيها نظارة وهو غالبا من غير لون وطبعا كذا روج من ماركات متتعدة حتى قو م 3 دراهم بعد خذت واقلام تحديد من ننيا رجي لانها سوفت وايد وما ركات عديدة حتى من الرخاص بعد لانه يحب هالاشياء وانا موت على الارواج واقلام التحديد فكثرت بس مثل ما قلت لكم اول كلها شوي شوي مب هجوم خذتهم ....( و من مصروفي بعد)
واحمر الخدود خذت علبه كبيرة من ماركة سعودية معروفة عندنا في الامارات اسمها معروف + مبروك بصراحة ولا احلى منها فيها تقريبا 12 لون لميع + عادي وحتى اي شدو نفس الشي بس خذت علبتين علشان كل الالوان ولا كلها ما كلفتني 100 درهم .....

نجي للذهب طبعا حدث ولا حرج انا اموت بالذهب وطبعا استويت ام الدويس ما خليت طقم :dd: نوعت خذت الاحمر والابيض وطبعا يدو (جدتي ) اصرت يكون عندي ذهب اول بس خذت مرتعشة وكانت هدية منها ومرية ام هلال + خواتم اول الشاهد+ المرامي +فتخ حق الريل خواتم تلبس في الرجل) + بيون للشعر (بنس للشعر من الذهب) + كواشي (حلق ). طبعا كله ذهب اماراتي قديم جدا
وانا خذت ذهب سوادني او( موديل) لانه عيبني وخذت طقم كله ليرات وشو بعد...هية وخذت اسويرة حرير مخلوطة بالذهب +نحت صورتي على سبيكة وطبعا في الاطقم نوعت خذت بحريني لانه معروف ثقيل ولا يعلى عليه ....وسعودي بعد + طقم اومجموعة هندي يعني لبقت حيول + خواتم +طقم خفيف هندي وطبعا مانسيت الخواتم والاسوار والحيول والقلوب (التعاليق) بس طبعا انا كنت اخذ الوان متعارف عليها في الذهب الموجوهرات طبعا الاحمر والفيروزي ....وطبعا انتى وذقج عزيزتي انا احب البس كل شي على نفس لو ن لبسي. وبعدبخبركم ما خليت الاكسسوارات في حالها..(r) يعني ما خذت اي شي لا بالعكس اللي ما اخذته ذهب حاولت اخذه اكسسوار ....وطبعا مب اي اكلام لا بس كان فضة مذهبه او فضة بحجار كريمة وطبعا في ناس وايد ما فرقوا بينها وبين الذهب..... وخذت 4 ساعات وحدة فخمة يعني غالية شوي +3 عاديين باسعار معقولة يعني1500-2000 وطبعا وطبعا خذت لونيين الذهبي والفضي .............خذت بعد من العادي(نوعت) يعني سواشتج وغيرها وسيور (جلد + شريط + حراكات غريبة ) والله حلو بس ترى فلوسسه حلوة بعد حتى لو كان ب200 او 300 او حت ا150 درهم بس طبعا مثل ما ذكرت من اول يعني كل ما اشوف شي اشتري وبس كنت اخلي احلى شي للعرس...:shy: (r) وطبعا الذهب كلفني 75000 بس وطبعا حصلت هدايا كثير واطقم بعد ..............وطبعا كنت اشتري بعد من اول الاشياء البسيطة كانت من مصروفي ......

و ترى مهري تم منه 23000 يعني ما لعبت في فلوسي ومهري كان 80000 .. 20000 مهر و 60000 زهبتيه ؟......وبس اللي فادني اني كنت اتشرى شوي شوي علشان ومن مصروفي + وراتبي بعد طبعا انا فترة الخطوبة طولت شوي عندي يعني ما انتظرت اهو يدفع لي + اني ما اهتميت بالماركات الا للاشياء اللي مهمة مثلا.......لان ذوقج اختي اهم شي ...... في الموضو ع يعني مب بالغلى ولا بالرخص...


انشالله قدرت اقدم شي تستفيدون منه خواتي.....:gum: [/grade]

نستفيد من أخطائكـــــــمـ

هلا خواتي :salam:

انا راح اغير شوي الموضوع لانه اصلا ما يخص الزهبة وبس هوه بشكل عام اخطاء العرس

المهم اخبركم عاد عن اخطاء تضحك حصلت لنا بملجة اخوي:ok:

اول شي قبل الملجة حددنا مع اهل العروس انه العطور عليهم والحلويات علينا، وسرنا جبنا صواني الحلويات في نفس اليوم وطرشناهن مع دريولنا وقلناله وصلهم صالة الفندق لانه هناك اهل العروس وقلنا له نصهم حق الرياييل والنص حق الحريم

المهم لما وصلنا تفأجانا ان كل الصواني عند الحريم <<<<<< الله يهديكم يا اهل العروس :sad:

المهم قلنا ما عليه تراهم مرتبشين

و بعد شوي سرت انا واختي نطلع طقم الذهب والدبلة عشان نحطة في العربة اللي مزينينها عشان نقدم فيها الذهب، بس الكارثة اللي صارت انه وحدة من الحلق انكسرت (دفاشه بنات) من الصوب اللي يدخلونه في الاذن يعني انفصل والله ما عرفنا شنسوي :qaq:

الا نزجر على ولد خالي يالا روح اشريلنا سوبر جلو او اوهو ويحليه سار بس المشكله انه الذهب ما يتلزق
بس الحمدلله خبرنا البنت ورضت بالحال:sad: :sad: :sad:

وقبل ما يدخل اخوي كان كل ثانيه يتصل فيني يسئل وين البس الديلة ، كيف البسها كيف ادخل وين اسير وين اجلس شو اسوي
والله كان من التوتر يسئل عن ابسط الاشياء:angry:


المهم لما دخل اخوي دخل معه ابوي وابو العروس وكان اخوي مستحيل حييييييييييييييييييييييل ومن الحيا سحب اخوي الاصغر عنه (15 سنه!!!!) وعااد هذاك لوووح ما يستحي دخل على طو ل حتى ان الكل استغرب لان البنت ما كانت عاملة حسابها ومتغطيه!!!!:gum:

ويوم دخل اخوي راعي الديجية غببببيييي سكر الاغنية لحد ما وصل اخوي على نص الاقاعة بعدين شغلة على اغنية (والله ما اذكرها ) بس اذكر انها ملها خص في الحفلة

:confused: :confused: المهم لما سار صوب البنت وقرأ عليها ووقف هوه والرياييل عشان التصوير ،،،، مفاجأة>>>> جاء ولد اخو البنت الصغير ودز البرتشن (كان جنب الاستيج حق الدي جيه) طااااااح البرتشن على الكوشه وطااااحت كل الورود اللي على جنب واللي ورا الكرسي >>>>>> هاااااااااااااهههههه :) :confused: :confused:

عاااد اهنيه تعالو دورو اخوي ميت من الربكة،،،،،،،،:sad: ،،،،،،،،

لا واليهال صايرين وكالة انباء بين الرجال والحريم >> سارو عند اخوي وباعلى صوتهم قالو: سير عند مرتك هيه تترياك هناك ، وكل شوي ينقلون شي للرياييل بالتفاصيل الممله (شربها... اكلها... لبسها ....)



المهم هاااي المواقف اللي صارت لنا بملجة اخوي

تعرفو ليش لانا ما خططنا عدل للحفلة :shy: :shy:

الحين عاد راح نحاول نتدارا عنها في العرس ان شاء الله ،،،،:clap: :clap:

هاايات تقبلوني ضيفه خفيفه انا جديد وحبيت اشااارككم
انا بعدني خخخ
المهم مثل ما قااالوا الاخوات اعتدال في الانفاااق مهم جدا

[blink]كل الشكر ع النصايح[/blink]

مرحبا
انا زواجي كان قبل سنتين جهازي منوع فيه الغالي مررره وفيه المتوسط وفيه الرخيص واشياء كثيره كانت هدايا (g)

وبقى معي مبلغ بعد الزواج لاكن ندمت على اشيا اختصرت فيها مثل الكوشه كانت بسيطه تمنيت لو كانت افخم:qaq:

وبعدين اقنعوني اخواتي بأن الشكل كان مقبول واي شي كنتي تنظرين له بدقه الناس ماتركز مره عليه والناس تنسى اهم شي مافيه حركه تفشل:o

مرحبا اختي عروس القوز
يعطيك العافيه على الموضوع
بس حابه اسأل ايش يعني مخاوير
والله يرزقك بذريه الصالحه