رابطة امهات ديسمبر... حيااااااااااااااااكن هوووون !!

سلام عليكم..

هاليومين عندنا خربطة في الاجازة فما عارفة ادش عدل.. وبيني وبينكم مستانسة حدي ان ريلي قاعد معاي املله والوع جبده من الهرار ههههههههههه

بكرة اذا راح الدوام بنرد قعدتنا الاولية ان شاء الله .. ولا يهمج يا ام فروحه بنترس لج الصفحات مال الركن كلها عشان تقعدين تقرين فيها براحتج..

اححح فاتتني سوالف وايد بسبة الحرنة اللي حرنتها عليكم ههههههههههه

عن نفسي خذيت مراضع ماركة بيجون.. من مذركير.. ونفسها كنت آخذها لحسون من الصيدلية.. عجبوني وما عليهم كلام.. خذيت النوعين زجاج وبلاستك.. وبصراحة مافي على الزجاج.. مادري.. لأني كنت اعطي حسون خلط طبيعي وصناعي في البداية بسبب الدوام في الكلية.. فالبلاستك صارت فيه رايحة مب حلوة.. بينما الزجاج ولا تغير :clap:

وعلى فكرة بنات وايد جربوا انواع مختلفة من الماركات ويقولون كلها نفس الشيء !!! ههههههه اهم شيء تاخذينها من مكان مضمون مثل الصيدلية او محل متخصص بالاطفال مثل مذركير ويكون الاسم معروف نسبياً .. ومشي الحال..
وبالنسبة للماي.. فانا عطيته المرضعة الى عمر 9 شهور وبعدها علمته على الكاس العادي.. فما صار مجال انه يكسرها لي.. اقصد مرضعة الماي.. بس اذا بتاخذين مرضعة بلاستك للماي ترا كلش عادي.. لأن الحليب الصناعي هو سبب الريحة.. وبعد اللي ما بترضع صناعي وبتكتفي بالطبيعي بعد انصحها تاخذ مرضعة ثانية بجانب مرضعة الماي.. لأنها راح تحتاجها حق العصير لما تبدي تعطي البيبي اكل غير الحليب,,

نم نم .. بعد شنو.. ايه.. تذكرت.. بالنسبة للي يشتغلون.. انصحكم من قلللب تخلطون بين الطبيعي والصناعي.. حتى اللي مو موظفة وتواجه صعوبة في الرضاعة من صدرها ( ان شاء ما نواجه لأن الترطيب اللي نسويه الحين كااااااااافي يلين الحلمة ويجهزها للرضاعة ) بعد انصحها ما تترك الطبيعي مول.. لأن الصناعي ما منه فايدة... واللي يرضعون الصناعي بس بدون الطبيعي يمرضون بنسبة 3 مرات اكثر من اللي يرضعون طبيعي او مخلوط.. وانا شايفة بعائلتنا..

وبعدين في شغلة ابيكم تحطونها ببالكم وهي الرضاعة بالليل... ترا اسهل شيء للرضاعة بالليل هي الطبيعية.. ولا تقولين فيه صينية او مدري شنو نحط فيها المراضيع المعقمين حق الليل... انتي بنفسج احكمي.. تقعدين وفي عيونج النوووم واصل حده.. بتحطين الماي وبعدين كفشتين الحليب وهات يا خض.. والبيبي يلعي من الزين يالله تجهز رضعته.. او انج بكل سهولة تطلعين صدرج وتعطينه اياه.. تراه وايد اسهل... :)


وبعد شنو؟ بروح اقرأ وبعدين برجع ارد عليكم... فيني حرة ابي اكتب وااااايد ..:)

دلوله الكويت هلا ومرحبا فيج معانا بالرابطة.. وان شاء الله راح نضيفج معانا في اللست الجديد بس ينزل.. سولفي معانا عاد هاااا مو تقطعين..

ميراج الله يردج بالسلامة وان شا ءالله الدكتور ما يمانع في ردتج الكويت.. وترمضين وتعيدين وسط الاهل وانتي مستانسة بالنونو الجديد :)


بالنسبة لحجم الحلمات اخذوا سمول.. احسن عشان تضمنون ان البيبي ما يشرق.. واذا حسيتوا ان الطفل يواجه صعوبة في الشرب منها.. وسعي الفتحة بابرة نظيفة .. :)

يا بنات هالايام احس صحتي تعبانة .. مع اني ذابحة عمري بشرب الماي لكن شفايفي دوم متشققة عدل.. وراسي فيه دورة خفيفة.. غير الابوال اللي زايدة عدددل وعيوني اليسار مادري شفيها.. نفس الشوائب فيها اذاا اطالع التلفزيون او الكمبيوتر او مكان فيه ااضاءة قوية.. امس اخبر اختي وهي عندها خبرة سابقة لأنها كله يصيدها سكري الحمل.. خرعتني تقول احتمال كبير معاج السكري... بروح عندها اليوم لأن عندها جهاز فحص السكر والنتيجة فورية.. وبشوف :( ادعولي بنات ما يكون فيني السكر...

ها اختي كندة ما تتذكرين من حمالج الاولي شنو اعراض سكري الحمل؟


شقوره الحمدلله انج فكيتي عن القهوة.. المنبهات عموماً مب زينة.. والله يهداهم البنات ما قصروا هههههههههههههه خرعوج من الزين عشان ما تقعدين تتدلعين مرة ثانية <<<< ويقولون عني دفشة عيل هم شنو يصيرون؟ :D

امس كانت عندنا خطوبة بنت خالي ولبست مريلة طويلة مالت حوامل كانت شاريتها لي مرت اخوي من الكويت ( احم احم ) عاد لما لبستها وتحتها البدي وصل البدي الى نص البطن بس ههههههههه وصار من السر الى تحت ما عليه شيء والبنطلون رغم انه سترج لكن ما قدرت ارفعه فوق ماقدر على الرعصة .. وعاد الوهقة ان المريلة شوي مخرمة وطول الحفلة وانا حاطة يدي على دبتي اخاف تبين البلاوي هههههههه
بس تبون الصج ما توقعت ان دبتي راح تكون بهالحلاوة في اللبس هههههههههههه وطبعاً المعوذات ما فلت من لساني.. الله يرزق كل محروم بدون تفاصيل.. :)

بنات البحرين انا احتريت من ام فروحه ورفيجتها :p يبون يسوون برامج في الكويت .. ها شرايكم بنات.. نتجمع ادناة يوم قبل رمضان ونتغدى جميع في مجمع او مطعم ويكون نشوف بعضنا وندردش شوي؟ اذا موافقين تراني جادة وبرتب لكم ان شاء الله :)

اختي دموع الدوحة.. :)

هلا فيج وعلى عيني وراسي.. ماني ناطور اهني اقول لذي دش ولذاك روح.. اذا حابة تدشين معانا اكييييييد ومليون اكيد ما عندي مانع.. بس رابطة يناير استبسلت فيها عاشقة علاء عشان تحييها بس الظاهر مافي تجاوب زين.. حياج الله الغالية معانا وونسينا بسوالفج.. :)

السلام عليكم.................

شخباركم ؟؟ عساكم طيبين.............




:flower: دموع الدوحه........... هلا وغلا حبيبتي لا تحطين في خاطرج ولا تزعلين

خلاص مدام قلتي لنا تراج منا وفينا بس عطينا موعد ولادتج :)


:flower: مشكووووره اختي نووووووور والله يعطيج العافيه....


:flower: اشوف الكل بيسوي تجمع في هالرابطه بنات الكويت وبنات البحرين......

وينكم يا بنات (((قطر)))........!!!!!!!!!

شلونج اختي جمانه نورت الرابطه.......

مادري اختي كنده بس اذا مرتفع اكيد بيبين حتى لو بدون صيام لأني احس روحي وايد تعبانة :(

هذي حوبتنا مع الحلاوة والكاكوات .. خلاااااص ما باكل :(

بروح اكمل غذانا وبرد ارجع بعدين.. تأخرت اليوم في النوم.. اشوفكم العصر ان شاء الله..

هلا وغلا امهات

وينكم اليوم تمللت وانا انتظركم ما عندي حد اسولف معاه

ليتك معي العفو الغاليه ما طلبتي شيء

جمانه وينج يالحلوه ليش مختفيه حبيبتي

قطر غيرل ..ام فروحه .. القيوانيه ... بنت البحرين ... شقوره....وينكم اليوم كل هذا نوم

جمانه ...... حبيبتي سوي التحليل اذا طلع طبيعي معليش اتكدي من نتيجه السكر بعد الجيلكوز الي سويته قبل كذا ... واذا طلع مرتفع راجعي الدكتوره خليها تسوي الازم

(وتفالو بالخير تجدوه) انشاء الله مافيك سكر بس تعب حمل ودلع

طمنينا اليوم

هلا اختي نووووووور....

تدرين كانج نفسي...... ادخل المنتدى واطلع اذا ما شفت حد


اي والله قطر جيرل و القيوانيه وشقوره اليوم مفقودين يمكن عشان الاجازه......

وام فروووحه وقتها في الليل؟؟؟


اختي نوووور شرايج بتجمعات بنات الخيج:dd: :dd:

احلى شيء هو هذا التجمع :bigsmile:

على الاقل تلاقين حد تهذرين معاه لين قعدتي من نومج(r)

جمانه ان شاءالله ما عليج شر ولاتحاتين حبيبتي

هلا امهات

ابي اعرف اشلون اخلي الشريط كتوقيع

السلام عليكم بنات

ياحلوو سوالفكم والله وسموح لي اذا مشاركاتي متقطعه

المهم انشالله سلامي يوصل الى كل من في الرابطه بدون ذكر اسماء علشان لاانسى احد

ماشالله الواحد مايقدر يلحق عليكم كل بين يومين الصفحات تزيد

البارح بنات رحت سيتي بلازا اتقضى للبيبي ورحت محل الطفل بعد اخذت 10 بيجامات 3 منهم طقم مع قبعاتهم وجواربهم ومريلاتهم والمهاد تبعهم

واخذت 3 مهادات وملحف صووف واحد قطن ناعم
واخذت فوطه وحده واخذت 13تبانه (يعنى الملابس الداخليه) 3 كم طويل و4 نص كم و6 من غير كم
وامممممممممم ايووه واخذت بعد 4 مريلات و6 قبعات 3 منهم طقم مع جوارب

وبعد 7 جوارب اشكال مختلفه بس الالوان على حسب البيجامات منسقين

وباقي لي اشياء كثيره بس اتصدقون يابنات البارح جاتني حاله غريبه فجاءه ظهري قعد يعورني ماقدرت استحمل بسبت هالساعتين الي طلعتهم للسوق معى انى مامشيت كثير والسوق جنبنى يعنى يادوب 5 دقايق بالسياره ويمكن اقل بعد
والله اني من الالم جلست ابكي مسكين زوجي خاف يبغى يوديني المستشفى بس انا قلت لا مايحتاج حتى جسمي جلس يعورني كان احد ضاربني

والله جالسه احاتي اقول كيف بروح السوق مره ثانيه اذا بيصير لي كل مره كذا وانا باقي لي اشياء كثيره مااشتريتها يدوب هذي اول طلعه اطلعها للبيبي
الله يعين بس
طيب بنات الي عندهم خبره في ملابس البيبي ايش هى الاشياء الي تنصحوني اكثر منها وايش المقسات الي اخذها؟

اخت نور انشالله البنات يعلمونك

سووري على الهذره الزايده

(w) ماتشوفين شر يالغاليه البرازيليه ..... لازم هالتعب لان ثقل البيبي على الظهر
ويتهنى البيبي باغراضه... وحاولي في يوم الطلعه للتشري كوني دايما منبطحه قبل لاتطلعين

ولاتقطعين او التغلين....:)



(w) اختي نوووووور عن الشريط.... الظاهر في منتدى عروس العضوات مايصير يحطون توقيع

بس المشرفات :(

مع ان قبل تجديد الموقع كان عادي الكل يحط اللي يبيه

ابشرج اختي ليتك معي حتى المشرفات محرومات هئ هئ هئ ..

بس المراقبات مسموح لهم..

الله يفرجها.. مع ان المنتدى جذي صاير اسرع بوايد.. تخيلي لو فتحوا التواقيع للكل.. اللي حاطة صورة واللي حاطة عشر.. واللي حاطة فلاش ( وكله بوزنه ) واللي بتحط اغنية تشتغل دايركت مع الصفحة... وووو شنو بتلحقين وراهم ..

بس صج افتقد انا شريط الحمل.. كان تابعنا اول بأول..
وهم انا كمشرفة كنت استفيد من التوقيع اخلي فيه دعايات لمواضيعي اللي احطها بركني.. :)

يالله هذي ضريبة الموقع الناجح..


[line]

اختي البرازيلية ما عليج شر اختي... تحملي بحالج اكثر...

ويوم اللي بتتسوقين للبيبي تأكدي ما تسوين اي مجهود ثاني في نفس اليوم لا قبل ولا بعد التسوق..
وبعدين اللي يكسر الظهر مو المشي.. انما الوقفة وانتي تتنقين الاغراض وجذي...

على البيبي بالعافية ان شاء الله..

مرحبا بنات...شخباركم يا حلوات.؟؟

انا اليوم كان عندي تحليل السكر وسرت اسوي بس النتيجه بعدها وان شاء الله خير لاني صدق طايحه بالحلويات والكيك...

وبعدين رحت ماركس سبنسر اشتري اغراض النظافه (حلوة هاي اغرا النظافه لووووووووووول) يعني شاور جل وديودرانت وكريمات... وبعدين زوجي مر سبلاش ياخذ له ملابس رياضه ولقيت لي بديات حلوة وخذيت لي ثلاث ( بعا حق عقب الولاده) وعشان جذي مادخلت الصبح ...

يا الله انتوا شو اخر اخباركم؟؟ وقولولي شو جهزوتي حق العيد والا لاء...؟؟؟

هلا اختي القيوانيه ......

ان شاء الله يبشرونج يارب.... بس خففي الحلويات لان في السابع وطالع
تزيدين في الوزن اكثر من الشهور الاولى

والله يسلمج عشان بعد الولاده ماتعقدين من نفسج....

امس رحت خطوبة صديقتي شفت كذا وحده من البنات ما كانهم احملو مشاء الله بطنهم في ظهرهم

الله يعطينا ما عطاهم

واذا عن العيد ماخذت شي ولا فصلت وعن نفسي انا مب ضامنه عمري يمكن اخذ ولين يوم العيد
مايدخل علي:dd: :dd:

وانتي اختي سويتي شي للعيد؟؟؟

هلا وغلا ليتك معي...

اييه والله خايفه من زياده الوزن بس ما اقدر اقاوم الحلويات.. يا الله ان شاء الله بخفف...

وبالنسبه للعيد... الوالده الله يطول بعمرها جابت لي جلابيه واايد حلوة ووفخمه هيه عباره عن قطعتين ان شاء الله بلبسها اول يوم... واشتريت لي بدله واايد حلوة بعد وفصلت لي مخاوير خفاف وبس...

هلا بامهات ديسمبر

اخيرا صدتكم جننتوني كل يوم لكم وقت

ليتك معي والله حطمتيني على التوقيع
.............................................................................................................................................

القيوانيه ان شاءالله تطلع تحاليلج كلها زينه وما عليج شر بأذن الله

..........................................................................................................................................

وبالنسبه حق العيد انا عندي كم بلوزة حملحلوين يناسبون العيد بس باقي لي تنانير

بشوف ان شاءالله في الخبر او البحرين وفصلت جلابيه ناعمه ان شاءالله تكون قدي في العيد

وبشوف لي في البحرين او الخبر لبسه تكون شيفون وناعمه لاول يوم العيد ان شاءالله

اجيب لج معاي ليتك معي ؟؟؟؟ عطيني مقاسج بس وانا حاضره لج؟؟؟؟

يا هلا وغلا بنوور والله...

شحالج الغلا؟؟

ان شاء الله اتكوون نتايج التحاليل اوكيه...