أيتها العاملات و إللي جالسين في البيت بعد ... تعالو عندي سؤال

بالنسبة لي انا قبل ما اتزوج كنت اشتغل وفنشت عشان الشغل، ولما تزوجت تمللت من القعدة في البيت ودورت على شغل ، لأن الله ما رزقني للحين بعيال ... الحين اشتغل وزوجي يعطيني كل شهر .. بس فلوسك غير .... وايد أحلى وايد... اشتري وادلع روحي مع ان دوامي الي 5 ونص. بس من بقه شي خله شي .........
ولما الله يرزقني بعيال يمكن اقعد في البيت

الموضوع الي طرحتيه يا اخت ريم 81 جميل ورائع جدا وانا دوم بفكر فيه انا متزوجة وبشتغل عندي طفل عمره 3 سنوات وحاليا حامل بالشهر السابع ... وللآن ما قررت هل أكمل عملي بعد الولادة ولا لأ ؟؟؟ مشكلتي انه انا طبيعتي الصراحة ما بحب العمل بل بالعكس طبيعتي بيتوتية ... بحب الجلوس في البيت بس المشكلة انه في حال جلست في المنزل رايحة اتنازل عن كتييييييييير شغلات كنت اعملها وانا بشتغل فشكرا على طرحك الموضوع لأنه دايما بفكر فيه

طيب انتي شو رايك ؟؟؟ انتي مع عمل المرآة ولا لأ ؟؟

يعطيك العافيه أختي على هذا الموضوع الرائع ..
بالنسبه لي أنا متزوجه وراتب زوجي ممتاز لكن الوظيفه تثبت ذات المرأه وكيانها
أنا طالبه وأرجع البيت الساعه 4.00 دايخه وماعندي خادمه بحكم أني في الخارج وماعندهم خدم زينا يعني ارجع واشوف طلبات البيت وادلع زوجي واشوف دراستي وا شاء الله إذا تخرجت بتوظف ولا وش فائدة الشهاده ؟؟؟؟عشان أحس بذاتي وإستقلالي ماديا صحيح زوجي مايقصر علي في أي شي لكن حلو أن الإنسان يتوظف ويختلط بالناس.....وأهم شيء تنظيم الوقت........

ههههههههه بنات توني ارجع اشوف الموضوع ما اعرف شو جابه على بالي

انا بعد هالموضوع بشهرين اشتغلت سنه وشوي و بعدين الحمد لله جبت بنتي و قعدت في البيت و رجعنا لنفس الدائرة اشتغل او لا ؟


هههه

اذا كان الشغل ليس لحاجة اساسية فلا داعي والله الراحة وتربية الاولاد اهم بنسبة للمتزوجة

انا عن نفسي افضل قعدة البيت .. مدري راحة لي .. ومايسوى اتعب نفسي واهمل عيالي وزوجي على كم الف .. اكيد زوجي ماراح يقصر عني ..

موفقة إن شاء الله

انا موظفة ولما اخذ اجازة سنوية احس بالراحة وفي نفس الوقت احس بالملل لاني في الدوام تتعرفي علي ناس وتشوفي مجتمع غير عن اسرتك في فترة الصباح زوجي يكون في العمل وانا كذالك لا يوجد اطفال سوف احاتيهم ولما الله يكتب ويوجد اطفال اكيد هم اهم من الوظيفة اذا شفت هذا الشي لا يناسبهم سوف اترك الوظيفة من ناحيت زوجي انا في فترة المساء اكون جنبة
الوظيفة هذا الزمن تساعد المراءة من غدر الرجل لانة ليس كل شي في الدنيا هو الريال لانة احيانا الريال هو الذي يحرق اعصاب المراءة مهما عطتة من حب وحنان ليس امين علي حياتها الوظيفة تساعد المراءة ولو شافت المراءة بانة الوظيفة تبعدها عن زوجها اكيد هي تلقاين سوف تتركها وتتفرغ للزوج بس اذا مافية شي يعيق عمل المراءة احسن شي تشتغل تثبت وجودها في المجتمع وتخدم وطنها وتعطي دولتها لانة نحن ناخذ من دولتنا كثير فلاذم ايضا نعطي دولتنا ونثبت وجودنا في الحياة ومثل ما تعرفون مصاريف المراءة كثيرة وكل شي الحين غالي بصراحة اشجع المراءة العاملة وايضا المراءة العاملة تساعد اسرتها علي ظروف الحياة

السلام عليكم ورحمه الله وبركاته

يـــــــــــــــــــــــــا الله .. والله انتو شلون تفكرون .. انا بقولكم شغله وحده ... الي محتاجه تساعد زوجها بالحياه الماديه هي الوحيـــــــــــــــــــــده المعذوره انها تشتغل ...

لكن انا من الرافضين وبشده ان الحرمه تشتغل دام زوجها موفر لها كل سبل الراحه .. مافي شي اسمه كيان مادري شنو عنه تتكلمون . ان درستو فهو لعيالكم عشان تفيدوهم وتواكبون معاهم ركب التطور ,, والعلم ..

وانت تبون لكم كيان .. خليكم على طول تقرون كتب ومطلعين على اخر الاخبار من النت والتلفزوين .. عشان ما تدفنون نفسكم بالبيت ... نعمه البنت بالبيت .. هو توفير سبل الراحه لزوجها وبيتها وعيالها ... يالله محد يعرف هالقيمه .. نعمه الجلوس بالبيت تمكنك من حفظ القرأن ودراسته والتفهم فيه ... نعمه الجلوس بالبيت تعطيك الفرصه لكي تهتمي بنفسك .. وبشكلك وبجمالك ..

بدل ما ترجعين من الدوام مالج خلق شي واول شي تبين تسوينه هو تاكلين وترتاحين .. ونادرا الي تقدر تسوي كل شي في ووقت واحد .. الاسلام كرم الحرمه بجلوسها في بيتها ,, معززه مكرمه .. الغرب خربو افكار كثيره .. ومنها عمل المرأه . تستطيع المرأه المشاركه وشغل وقتها بامور كثيره وهي جالسه بالبيت ..

اليوم شفت وحده .. وانا رايحه المستشفى اخذ ورقه للرضاعه عشان اطلع من العمل ساعه اقضيها مع بنتي في مقابل الي قاعده بالبيت تربي عيالها طول الوقت ...

سألتني الحرمه تشتغلين .. والله ويهها سمح وجميل ونورررررر مب طبيعي ولا ذره مكياج فيه .. خدودها ورديه من الله .. وويها صافي وبياض حلو ماشفت مثله ,,, ماشاءا الله تبارك الله ولابسه العبايه على الراس .. وكانت متغطيه .. حسدتها والله اني حسدتها .. تقول انا لو بفلوس الدنيا كلها ما أعوض وقتي مع عيالي في مقابل الشغل مهما كان هالشغل اهو .. شوفو القناعه شوفو الرضا بالرزق ... استحيت على نفسي والله اني استحيت على نفسي ..... وقرار اتخذته بيني وبين نفسي .. لو الله كتب لي الحمل الثاني .. راح اجلس بالبيت ... وبحط لي جدول وميزانيه .. وانظم كل شي .. وانا ادري نص الي نصرفه على كماليات .. مالها داعي ابدا ..

تحياتي وسامحوني على الاطاله..

ام جنى

كريم كراميل;2230921:
شوفي حبيبتي ... الكلام يختلف من شخص لشخص ... مثلاً انا من يوم اتخرجت من الجامعة ... اتوظفت ... واللى الحين ... شغلي مرهق ... الدوام طويل ... لكن العائد المادي ممتاز ... قبل الزواج ما كان في اي مشكلة ... اصلاً ما عندي مسئولية ... ... بس بعد الزواج الوضع اختلللللللللللللف مرة ... مثلاً اذا جيت من الدوام تعبانة ما اقدر انام على طول عندي برااااااااااامج كتير لازم اعملها في البيت ... وزوجي طبعاً لازم اكون حلوة ودلوعة واعدلو المزاج :o:o ودا بستلزم مقدمات كثيرة عناية بجسمي وشعري ووجهي ... وعطور وتجميل و...و... وانا تعباااااااااااااانة موت ... شوفي الحالة اللى بكون فيها ...
وصلت لقناعة اني اذا جبت اطفال ما ينفع اشتغل .. وبالنسبة للفلوس في ستين داهية ... صحيح اني حالياً اجيب كل اللي في نفسي من راتبي ... واعمل تعديلات في البيت على مزاجي ... لكن ايه الفايدة اذا لم استطع ان اهتم بزوجي الاهتمام الكافي ... وبالنسبة لاوقات الفراغ الكتيرة بالمنزل ... يمكنني ان اخلق برامج لنفسي ان شاء الله
انا الان موزعة بين زوجي ونفسي وعملي وهنالك تقصير فماذا سيحدث عند وجود الاطفال كطرف رابع :think::think::think::think:
صديقتي في العمل قدمت استقالتها فجاءة وبدون مقدمات لما سألتها حكتلي وهي متأثرة كتير انها كان تستعد للخروج وابنها الصغير يلعب امامها دون ان يبالى بها ... أو حتى يطلب منها ان تأخذه معها ...
لكن عندما احس أن ام صديقتي -هي ساكنة مع اهلها في البيت وامها تدير بالها على الاطفال - تستعد للخروج .. صار يبكي ويصر على أم صديقتي أن تأخذه معها ... صديقتي تأثرت بعدم ارتباط طفلها بها وتعوده على غيابها وخافت ان تفقد ارتباطها بأطفالها وأن تفوتها سنواتهم الاولى ... أول ضحكة لطفلها وأول خطوة له على الارض , ... واول كلمة ينطقها

ياريمووو من وين طلعتي هالموضوع ... شفتو اللي فوق كان ردي قبل سنتين ... والحين عندي بنت ما شاء الله عليها عمرها سنة ... ولا زلت اشتغل ... بس تعبانة والله العظيم تعبانة ... وحاسة باني مظلومة .... وظالمة زوجي وبنتي بالاخص ...بس لو كان في امكانية اني استقيل قبل الحمل والولادة الحين صار مستحيل !!!! المعيشة صارت غالية نار ... والبنت عندها احتياجات كتيرة ... وودنا نبني بيت ونستقر .... صعب اتخلى عن ريلي خصوصاً ان مرتبي ممتاز ... بس يومنا اللي تتنفذ فيه خططنا ... راح اقول للشغل وداعاً وبدون ذرة ندم
وصحيح كلام نور والله لما اشوف الحريم قاعدين ببيوتهم كاشخين ومهتمين بعيالهم وازواجهم ... وعندهم اوقات فراغ وهوايات كمان ... احسدهم استغفر الله العظيم ... دوامي طووووووووووويل ... ارجع منه مهدودة بس ماعندي وقت ارتاح وزمني محسوب بالثانية ... ومتوزع بين الكل ... ال24 ساعة صارت ما تكفيني... وبرضه انام وضميري مو مرتاح ... الله يعين

طولتها ادري ... بس من حررررررتي ...سامحوني

اذا حالتج الماديه ميسره وكل شئ تمام ،،،

يلسي في البيت احسن لج //

ترى البيت بروحه يباله نشى من الصبح ،، وطبخ ومسؤليه ،،

كيف بتحاولين اتوفين لبيتج و زوجج // زوجج يرد البيت ويلقاج في البيت احسن عن انه يرد وما يلقااج .....

اما انج اذا محتاجه ،، اشتغلي بس لو تختارين مكان مايكون فيه عندهم دوام طويل ،،

عادي انتي تعرفين نحن عندنا الدوامات طويله // من 8 لين 3 او 4 العصرر ،،

فكرررررررري زييين في كل شئ حبوبه ،،

مع اني مب متزوجه بس ما افكر اني اشتغل ،، و حتى بعد الزواج .....

شكرا اختي على طرح الموضوع ...

لو بيدي ولو الظروف المادية كانت زينه .... ابدا ما كنت بفكر بالشغل وبجابل عيالي وبيتي وبربيهم صح ان شاء الله بس يوم الظروف ما تسمح والحياه يوم عن يوم تكون اغلى عن قبل فترة الوحده بتشتغل وبتوفر لعيالها ولبيتها طبعا بمشاركه الزوج لي ما الامور تتيسر وخلاص ... بس هل الزمن يا اختي الايد الوحده ما تصفق

انا من رايي اذا حالتكم الماديه زينه

اقعدي في بيتج وجابلي ريلج وعيالج ترى وايد احسن

بصراحه مااافي احلئ من الرقاد

بس فنفس الوقت البيت ملللللل من دون يهال

انا لامتزوجة ولا اشتغل

بس اذا المرة متزوجة وماعندها عياال تشتغل اكيد افضل من القعدة بالبيت والملل

بس اذا فيه اولااد افضل تقعد بالبيت وتراعي عيالها احسن من الخدم وبلاويهم
والعيال مسيرهم بيكبروون وممكن تشتغل بعد مايكبرون
بالنسبة للمصاريف والله مصاريف الحريم ما تخلص لو الراتب مليوون بتقوول هل من مزيد المهم القناعة والرضاا

وبتروح الدوام فلانة شرت وفلانة سوت

بعدين عن تجربة قعدة البيت تخلي الواحد متصالح مع نفسه وقنوع وتحسين برااحة مو طبيعية

اذا الوحده ماعندها اولاد والحاله الماديه ضعيفه انا من رايي انها تستغل الفرصه وتشتغل منها مكسب مادي ومنها تضييع وقت وتسلية ليش احرم نفسي من العمل وطبعا بدون تقصير مع الواجبات من زوج وبيت

آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه يا بنات .. أم جنى و كرييييييييييييم كراميل ... يعني سبحان الله اهدافي مثل اهدافكم وراي من رايكم .. يعني لو جلست احكي لكم عن معاناتي والله صفحات ما بتكفني ..
انا اتخرجت من الجامعة واتزوجت .. وبعده بسبب الملل وغير ان احوال زوجي المادية وغير اني حامل ... قررت اني انزل ادور عمل .. وبعدها ب4 شهور ولدت ... وكرهت العمل ليوم الدين وتمنيت اني اجلس في البيت وانعم بالراحة واتستت واقوم على كيفي وانوووووووووم على كيفي ... غير هذا كله ابني اللي يقطع قلبي .. الصدق نفسي اجلس معاه في البيت واربيه يعني من يوم كان عمره شهرين تركته ونزلت عمل .. وتمسكه شغاله لان امي كمان تشتغل ...
والحمد لله زوجي بعدها حصل على عمل كويس براتب ممتاز .. صحيح يكفينا بس ما نقدر نوفر منه وخصوصا بعد الدنيا ما صارت ناااااااااااااااااااار .. يعني انا نفسي كمان نبني بيت ولاني تعبت من بيوت الايجار ...
غير هذا كله اوفر لابني واخوانه اللي جايين حياة كريمة ..
بس شغل وبيت وزوج وعيال وبعد هذا كله نفسك لا تنسيها .. مستحيييييييييييييييييييييييييييل !!!!
يعني الانسان مهما كان ماهو آلة .. وطبعا ما في شي بيكون كامل لانه صاحب بالين كذاب فما بالك صاحب 5 ... لاحظت ان الشي اللي بيكون فيه التقصير دايما هو .......... انــــــــــــا ...............
يعني ارجع من العمل اكل ابني اغير له .. في حد مات ولي في خطوبة لا في امي ولا في اي اجتماعيات اللي انا ما صرت ابدا فاضية لها ابدا ..ننام شوي نقوم اشوف البيت و أصلي .. اعمل لي كيكة او اي شي زوجي يحب الكيك كثير .. وبعدها وسام يريدني العب معاه وابو وسام يريد يتكلم معي ... بعدها العشا وبعدها ارفع العشا .. وبعدها وسام يريد ينام وبعدها ابو وسام يريد (............) وعلشان ابوسام يريد (..........) ام وسام لازم تشوف نفسها شوي وخلاص نمت الساعة 1 ص وقمت اليوم الثاني للعمل ...
دووووووووووامة سخيفة وممله .. وكل يوم افكر خلاص استقيل .. بس ضروري على الاقل اشتري ارض ابدا في بالبناء وبعدها ممكن خلاص اخلي العمل الى غير رجعة ..

انا متخرجه من اداره محاسبه ومتزوجه وعندي 3اولاد ولا افكر ابدا بالوظيفهوقاعده افكر احط يوم برنامج زيارات الصباح ويوم اروح لنادي رياضي ويوم للشوبنج وايام سفر وايام نووووووووووووووووووووووووووم الله فليش العمل ووجع القلب
مع انه اكيد هو استقرار مادي وراحه نفسيه للمراه بان تعيش استقلاليتها

انا لا متزوجه ولا مشتغله بس من الى سمعته من وحده قريبتى كانت تشتغل لمده 9 سنوات وقعدت بالبيت لانها زهقت وحبت تتفرغ لاولادها بس حكتلى كلمه انه مكان الزوجه بيتها ويضل الشغل بهدله لزوجه وبالطبع رح يكون فيه تقصير تجاه بيتها وزوجها او شغلها وهى بعد جسمها ما عاد يتحمل الشغل وقدره المراه مو مثل الرجل انها تتحمل كل هالاعباء فوق طاقتها وبعد نيجى لراتب حكتلى انه راتبها وهى زوجها ما فرق بعد ما جلست بالبيت المصروف واحد وحتى حست انه اصبح فيه بركه اكثر بالمال انه الانسان يرضى بالقليل ويعيش مستور وربنا بطرح البركه في الى موجود مدام زوجها مكفيها في اكلهم وشربهم ....وانا اشوف هذا الصح المراه بالهزمن للاسف اصبح مطلوب منها تكون زوجه وام وفوقها تساعده بالمعيشه وهى مو مطلوب منها بالهشيء شرعا وياريت يعجب الرجال المهم الرضى وراحه البال بالنهايه حتى لو بالقليل ....

تسلمى اختى على طرحك النقاش

تحياتى
صمود

لازم الوحده تشتغل بهالزمن
سواء حالتها الماديه سيئه او ممتازه

عيل ليش احنا ندرس ونتعب عشان
نعلق الشهاده بالبيت ونقعد ؟؟؟!!!

لي متى نوم و كسل ؟؟

الوظيفه تعطيج ثقه بالنفس وتطور شخصيتج
وتوسع علاقاتج بالناس وخبراتج بالحياة

ومن ناحية ثانيه محد يحاسبج عاللي تشترينه
راتبج لج تشترين فيه اللي تبين عكس لمن احد
يعطيج مصروفج يمكن ما تقدرين تشترين
اشياء غاليه خاطرج فيها

وانا ضد الاعتماد الكامل على الزوج من ناحية الفلوس
ابداً ... ابداً ... ابداً مهما كانت ثقتج فيه

كل شخص له شخصيته وكيانه المادي
ما لازم احد يعتمد على احد يصرف عليه

اعرف ازواج وايد كانوا يصرفون على بيتهم وزوجاتهم
بعد ما تمر السنين او تسوء حالته الماديه بسرعه
يبخل عليها ...

ليش عاد اخلي احد يذلني
او اطلب من احد فلوس ؟؟

اشتغل بفلوسي وكرامتي واايد احسن



ومشكووره حبيبتي

ممكلة الفتاة سواء متزوجه او لا بيتها
وما اايد البنت تشتغل نهائيا
الشغل مرمطه واهانه وتجريد من الانوثه للمراه وتصير حالها حال الرجل مافي فرق؟
الشغل والتعب والكد للرجل
والمرأه المفروض تعتني بنفسها ونفسيتها واذا متزوجه بيتها واولادها بعد.
تحياتي