دخول الزوج مع زوجته اثناء الولادة

الموضوع عجبني أنا بعد...

من وجهة نظري إن الزوج المفروض إنه يدخل مع زوجته في وقت الولاده عشان يحس فيها... ويحس في الألام إللي تجي لها...

مش يقعد برى وبعد كم شهر من ولادتها ما يحس بالإلم ويقول أبغى بعد بيبي ثاني...

ونفس إللي قالته وحده من الخوات إنه إذا هي مختاره إسم وهو مختار إسم أكيد إذا شاف هذي اللحظات بيغير رأيه وبيقول لها إختاري إنتي الإسم أنا تنازلت...

بالنسبه لي أنا تكلمت مع زوجي في هذا الموضوع "لسه ما عندي عيال" قلت له إني أبغاه يكون معاي مش معناها إنه يقعد يطالعني وأنا أولد لا بس يوقف عند راسي يمسك إيدي.. يحس بالألم إللي أنا أحس فيه...

بس هو مو راضي يخااااااااااااف من هذي اللحظات بس أنا سوف أصر على رأيي وأبغاه معاي لحظة الولاده...

سمعت عن وحده طلقها زوجها لما شافها تولد...

ووحده من صاحباتي والله قلب زوجها مش بس قوي لا ماشاء الله عليه قاعد يصورها وهي تولد بعد...

هذا اول حمل لي..... و ان شاء الله اول ولادة


فافضل زوجي ما يشوووفني ...


لاني استحي منه ...

ممكن اللي تريد يدخل زوجها ان يدخل بس أفظل يكون من وراى الستار أحس مو حلوه يجلس الزوج يطلع على كل صغيرة وكبيرة اتصير لزوجته ويشوف البلاوي اللي اللي تطلع منها.
الوحده لازم اتراوي زوجها أحلى ما عندها وهذا أحنا الحريم صبورات والله عاطنا على قد نيتنا.

يعني أنتن مثلا كل شهر يوم يجي وقت إزالة الشعر يوم تجلسي تنتفي الشعر الغير مرغوب فيه هل هذا يصير قدام زوجك ولا كله يصير من ورا الكواليس وبعد ما تخلصي بس يشوف النظافة والنعومه منك كانك هذي خلقة رب العالمين طبيعي فنفس الشي أفظل ان الوحده تستحمل لحد ما يطلع الطفل الجميل واتراويه زوجها.

بس ممكن الأم تتدخل . انا هذي وجهة نظري ما احب زوجي يشوف مني غير كل شي حلو وطيب.

انا حامل في نصف الشهر الرابع والحمد لله, لما يجي موعد ولادتي الله أعلم اني ما رح أسمح لحدا يدخل معي خصوصا جوزي لأني زي ما قالوا البنات بلاش يشوف الاشياء المقرفة اللي بتصير, مع انه هدي اول ولادة ان شاء الله.
بس ممكن انه الزوج يقعد بره عالباب عشان يسمع العذاب اللي بيشوفوه النسوان :) بس بدون ما يشوف طبعا

موضوع سبق النقاش فيه اكثر من مرة وآراء البنات اختلفت فيه

بس عندي ملاحظة بسيطة
اللي تقول الولادة قرف وزوجها يمكن يكرهها او يقرف ليش تحمل وتولد

مااعتقد وقوف الزوج مع زوجته في هالموقف شي يجيب القرف وكل اللي عليه انه يساندها ويويقف عند راسها
شنو بيشوف !!!
هي اصلا ما تشوف

الا اذا المستشفى يكون فيه قرف هذا شي ثاني

هذا رأيي

وانا ع نهاية الشهر الثالث وان شاء الله وقت الولاده مابا زوجي يكون وياي اولا استحي ثانيا بصراحه مابعرف كيف بتكون ردة فعلة ونفسيته بس اكيد اباه يكون وياي طول الوقت وفساعه الجد لا

كنت اتمنى امي تكون وياي بس هلي فدبي وانا فبوظبي بس بعد ماباها تكون ويايه اكيد بتتعب

الله ويايه :)

وخير لين هذاك اليوم محد يعرف شو الله كاتبلنا

وتسلمين الغاليه ع الموضوع ...:)

احس انه شي مقرف ويلوع بالجبد

انا ان شاء الله بخليه معاي وطبيعي بيحس بالالم الي انا فيه وبمعاناتي وحزت الجد خله يوقف برع يقرالي سورة مريم عشان الله يسهل لي الولادة

بس ابي امي تكون معاي للآخر

RoOoOmy_M:
[CENTER]
مااعتقد وقوف الزوج مع زوجته في هالموقف شي يجيب القرف وكل اللي عليه انه يساندها ويويقف عند راسها
شنو بيشوف !!!
هي اصلا ما تشوف

أنا مع الأخت رومي، المفروض الزوج يكون واقف عند راس زوجته يساندها ويهون عليها،، شو اللي يوقفه في مكان يشوف فيه الرحم المفتوح وغيره!!!!!!!!! ، هذي شغلة ومكان اللي تولد (الدكتورة أو النيرس)

مشكورين خوااتي ع الردود الطيبه ..
و أنا عن نفسي ما أعتقد زوجي يرضى-بعدني ما فاتحته بالموضوع- يدخل معاي يعني يا أمه ويا أمي أو جدتي بدخلوا معاي عندنا بس وحده تدخل مع اللي بتولد...
و أنا استحي وااايد بس اتخيل إني بزفر تيني الضحكة أحس إني بضحك من داخلي و بصيح بعد من الخاطر أقصد من الفشله و الألم..
الله يعينا و يسهل علينا...

فعلا في رجال بيقرفو من زوجاتهم لما يشوفو الدم الكثير والمشيمة وغيره ...
وهذا شئ طبيعي وان ما شافو الرحم مفتوح ....
احنا الحريم لما شفنا المشيمة والخياطة الي حملو وولدو خافو كيف الرجال ؟...
بعدين انا ايش ضمني اني ما يروح جنب الدكتورة ويشوف بدافع الخوف علي ....
افضل ما احد يدخل معايا لا امي ولا زوجي لاني استحي اولا وثانيا ما احب احد يشوفني وانا أتألم
ممكن يكون معايا لين وقت خلاص ماراح اولد وقتها يطلع من الغرفة ......
وعلى فكرة في مستشفيات في السعودية بعضها تمنع دخول الزوج وبعضها تسمح

بس عندي تعليق على خواتي اللي يقولون ان الزوج ممكن ينقرف !!! ليش طيب !!!
هذا شي رباااااني وممكن الزوج يحب زوجته أكثر ويرق قلبه لها أكثر ويحسن معاملته لها أكثر بعد ما يشوفها بهالوضع ..
وين عيل اللي يقولون عايشين على الحلوه والمرّه هذي هي المرّه يعني أمر ّ من لحظة الولادة على المرأه ماظن فيه ..
..
السؤال الحين هل الزوج يقبل ؟؟ هل الزوج قادر على تحمل الموقف ؟؟ والا في نص الطلق بيقبظ الباب ؟؟

صج والله في رجال مايتحملو الوضع ولا يقبلون انهم يدخلون
أنا مثلا مابي ريلي يدخل معاي عشان أنا ماحب ريلي يشوفني وانا تعبانة ذاك التعب اللي قبل الولادة بلحظات،،لكن هذا مايمنع يكون جنبي وأنا أطلق
بس من يقولون ولادة..............لا ..... ابي اكون انا والدكاترة وبس
وانا ريلي فديته حنون وما اعتقد انه يتحمل الوضع ،،، لأنه دايما يقول لي ماحب أشوفك تتألمين عشان كذا هو نفسه مايبي يدخل،،يقول ما أعتقد قلبي يتحمل أشوفك بهالحال
لأنه مرة بولادة أخته شاف اخته وهي بالطلق وظل يفكر فيها وحاله انقلب يقول عوّرت قلبي شلون كانت تعبانة
ويقول لي انتي بالذات ما اتحمل اشوفك تعبانة،،عشان كذا اتفقنا يكون معاي بالطلق بس،،والرجّال كان مع زوجته بغرفة الولادة ولا كان برا لحظة الولادة ،اكيد بيحس في زوجته وبيزيد حبه لها لأنه بيشوف وبيسمع شقد اهي تعاني

انا من اللي يشجعون هالفكرة... مو شرط يشوف الولادة...

المهم يوقف حنبي.. ويمسك ايدي.. ويقويني على الالم...

يوقف عند راسي بس..ومايطل هناك.......

[align=justify]مراحب بنات
انا اتفق مع معظم الاخوات بس ما اتصور نفسي اخلي زوجي معاي وقت الولاده مو مشكله عندي يكون معاي لما اطلق بس وقت الولاده لا مو بس انا رافضه لان انا مقدر اصلا يمكن هذا طبع فيني بوقت المي مقدر اكلم زوجي لان اجوفه ابكي حتى بس من اسبوعين صادتني افلونزا حاده والتهاب حاد وجفت حالته اشلون خايف وحالته حاله ويقول لي مقدر اجوفج جذي وانا من يكلمني كلمتين دموعي تنزل خخخخخ ..فشلون بخليه يدخل معاي كان ما اعرف اولد يضيع الوقت انا معاه صياح لا يبه افضل لي خل يكون برى ويدعي لي ويقرى قرآن الله يقومني انا والبيبي بسلامه والحب والمعزه موجوده سوى دخل او ما دخل اهوه عارف شكثر الام تعاني بحملها ودوم يحفزني ويقول ي ربي يساعدج فديته والله والله لا يغير علينا وعليكم

والله مدري احترت بينكم
ناس يقولون نحس بالراحه وازواجنا معنا
وناس تقول لايمكن يطلق زوجته لانه يتقرف
بس اعتقد لو حملت بخليها للظروف
اللي بيدخل يدخل
ويمكن لاني انا بمدينه غير عن اهلي
فاعتقد اني بكون من التاسع عندهم
وزوجي راح يكون بعيد عني,,,,,,,
مسكينــــــه صح؟؟؟؟

انا اقترحت عليه الموضوع...

ووافق.. المفروض ان كلمته وحدة...

اخاف يجي اليوم المنشود.. ويغير رايه...

ومثل ما قالت احدى الاخوات... انا وهو مش متفقين على الاسم ليلحين...(اذا كنت حامل بولد)

يمكن اذا شافني .. يحن قلبه.. ويخليني اسميه..

وينسى فكرة اني احمل قريب....

ادعولي..مشاكل حملي هالمرة وايد..لدرجة اني اخذت شهر اجازة من الشغل...

انا قريب نهاية الرابع...

انا شخصيا ابيه يدخل معاي وبقووووووووه بعد

ابيه يمسك يدي ويمسح على راسي ويخفف عني

المره اللي راحت دخل معاي لاني كنت في الشهر الخامس والبيبي كان متوفي وانا خايفه فدخلت معاي امي وهو


امي ماتحملت وطلعت وهي تبجي تقول بغيتي تموتين وهو بعد قام يبجي


هالمره ان شاء الله اكمل شهوري ويدخل معاي ويطلع وهو يضحك وفرحان بسلامتي وسلامة البيبي

ما رأيكم بدخول الزوج مع زوجته أثناء الولادة ؟
وخاصة اذا كانت بكرا يعني هذا أول مولود

انا من المعارضين للفكره هذي

وهل سبق وان جربتوا ها الشئ انه يدخل الزوج معاكم

لا ما جربت

وهل تفضلون الأم ام الزوج أم أم الزوج ولماذا ؟؟؟

انا افضل امي الصرحه

لكن وقت ولادتي دخلت معي خالتي اخت امي وام زوجي

واذا كان الزوج يرغب بذلك حقا ..
ليشششششش ؟؟؟

انا على ماقالي زوجي اخفف عندك وامسك ايدك يعني

مشكورين خوااتي ع الرد..

انا يبت بنتي البجر وماحبيت حد يدخل معاي حتى لو امي..

ممم ماابغي حد يشوفني في هاالحال وها الوضعيه والله فضيحه...

ومااحبذ انه الريال يدش ويا مرته لانه بتلوع جبده.