اريـد حـلاً ( يرضـي الله ) قبـل ان ( يرضيـني )

السلام عليكم ورحمة الله وبركاته

كيف حالكم اخواتي ؟ :)

بعد متابعه هذا المنتدى لفتره ليست بقصيره قررت اني اشارك معاكم لما شفته من حب في الله بينكم وتعاونكم مع بعضكم البعض ، ونصح بعضكم البعض ، ولذلك قررت اني اشارككم في مشكلتي لعلي اجد لها حل ( يرضي الله ) ومن ثم ( يرضيني ) ، وانا متأكده انكم راح تنصحوني مثل ما تنصحون خواتكم :)

اخواتي ... يمكن تكون مشكلتي ماره عليكم من قبل ، فهي ليس جديده ، وان شاء الله اجد حلها عندكم

دعوني اختصر قصتي بكلمتين ... وهي ( حب من طرف واحد )

انا موظفه في احدى الجهات الحكوميه في الدوله ، ومضى على بداية عملي اقل من سنه ، عمري 23 سنه ، اكملت دراستي الجامعيه والحمد لله ، على قدر عالي من الجمال ... والحمد لله جمدا كثيرا على انه عطاني من الجمال لين ارضاني ، ( خالي ) يعمل معي في نفس المكان ولكن في اداره اخرى ... وهو مدير احدى ادارت هذه الجهه الحكوميه ، وبالرغم من انه يعمل في اداره ثانيه وفي طابق ثاني غير الطابق اللي انا اشتغل فيه ، ولكني ازوره بصفه شبه يوميه ، اروح اقعد عنده ربع ساعه او اقل اسولف معاه واطلع وارجع لمكتبي

قصتي هي اني حبيت موظف معانا في الشغل ، وللاسف اني ماني قادره اوصل له هذا الحب ، ولا اني قادره اعترف بهذا الحب لاي احد ، ولا اني قادره اني اعترف بهذا الحب له هو شخصيا - فهذا امر شبه مستحيل بالنسبه لي - ، فمازلت كاتمه هذه القصه في قلبي وما قلتها لاي مخلوق على وجه الارض ... غيركم انتو الحين :)

انا بطبعي هادئه ، لا اجيد الاحتكاك السريع بالناس وخصوصا مع الرجاجيل في مكان عملي ، لدرجة اني في بداية شغلي ماكنت اعرف احد في مكان عملي الجديد سوى خالي ، وبعدها تعرفت على زميله لي في نفس الاداره ، تعمل قبلي في هذا المكان ، وهي في اواخر العشرينات ، متزوجه ولديها اطفال ، ولكن ماهي معاي في نفس القسم يعني مو قاعدين في نفس الغرفه ، ولكن مع بعض في نفس الطابق ، والحمد لله انها انسانه طيبه وحبوبه وماعمرها غلطت علي او ضايقتني بشي ، وتقدرون تقولون اني تصادقت وياها واصبحت من صديقاتي المقربات ، ومع مرور الوقت صارت تعرفني على اللي معاي في الشغل ، تعرفني على البنات وجها لوجه ، وتعرفني على الرجاجيل من بعيد لبعيد ، يعني تقولي هذا فلان يشتغل كذا ... وهاذي فلان الفلاني تشتغل كذا ... ، يعني التعارف لا يكون شخصيا او وجها لوجه بيني وبين الرجاجيل


المهم ... وهنا بدأت قصتي ... في يوم من الايام شفت ( واحد من الموظفين ) معانا في نفس الجهه الحكوميه اللي انا اشتغل فيها ، وجذبني بصراحه ... بالرغم انه ما فيه اي شي يميزه عن غيره ، شكله عادي جدا ، ومن ناحية الجمال بصراحه والحق يقال هو شكله ماهوب حلو بالمره ، وملامح وجهه تدل على انه اكبر من سنه الحقيقي ... وبعدها عرفت انه مدير قسم عندنا وانه غير متزوج ... ( وانه شايل فكرة الزواج من باله ) ... :(

المهم ... منذ شهر او شهرين فقط ، اصبح بيني وبين هذا الرجل تواصل عبر الهاتف ( في العمل ) فقط ، بسبب حكم عملي اللي يتطلب مني ان تكون هناك اتصالات بمختلف الادارات ، وطبعا المكالمات مافيها شي خارج النص او كلام حب او علاقه مشبوهه او ما شابه ذلك من العلاقات اللي البنت العفيفه ما ترضى ان تكونها مع اي شاب ... وانما فقط مكالمات في حدود الشغل ، فمثلا يسألني عن الورقه الفلانيه او الورقه الفلانيه بتاريخ كذا ، وطبعا في بداية المكالمه فيها سلام عادي ، مثل ( شلونج ؟ وش اخبارج ؟ وشلون الشغل ؟ وهكذا ....)

في مره من المرات اتصل يسأل عن ورقه من المفروض انها مرت على قسمنا ، وفي بداية المكالمه سألني : انتي يا شبية القمر اي وحده ؟ وين قاعده ؟ ما اعرفج !

بالرغم من انه يمر على ادارتنا ، يعني يمر تقريبا في الاسبوع مره او في الاسبوعين مره ، ولكن استحي اني اكلمه او اسلم عليه ، بس هو لما يمر يسلم على صديقتي اللي قلت لكم عنها في البدايه ، فهي تجمعها بينه علاقه محترمه و طبيه

المهم ... انا رديت عليه وقلت له : اني في المكان الفلاني ، مع فلانه الفلاني ، وسويت نفسي اني ما اعرفه ... وقلت له اني انا بعد ما اعرفك ...
وقالي .. انا اللي كذا وكذا ... انا اللي جيت ذاك اليوم وسألت فلانه الفلاني عن كذا ...

وللعلم فقط : هذا الشخص تجمع بينه وبين ( خالي ) علاقه طبيه ايضا ، فهو يحترم خالي كثيرا

المهم ... من اسبوعين تقريبا او 3 اسابيع تلاقينا في مكان العمل ، وكالعاده انا استحيت اكلمه ، بس هالمره هو اللي بدأ بالكلام وقال لي : انتي شبية القمر ؟ صح ؟ ... قلت له : اي ... وقالي : اخيرا شفتج :) شلونج ؟ شخبارج ؟ .... الخ من هذا الكلام الرسمي

وبعدها شفته مره وحده وانا نازله بعد نهاية الدوام ... وابتسم لي وسلم علي ومشى وانا كملت طريقي للسياره

والشهاده لله انه محترم وطيب والكل يمدح فيه

المشكله ... اني اطمح الى ان يكون هذا الرجل زوجا لي في الدنيا والاخره ، وان يجمع الله بيننا بالحلال ، وما ابي اني اسوي علاقه مشبوهه معاه مثل ما سووا غيري ومن ثم خسروا كل شي ( السمعه و الكرامه .... واحيانا يخسرون الشرف )

فبماذا تنصحوني !
هل تنصحوني اني اخلي وسيط يتدخل بيننا ، لعل وعسى اني اصل الى مبتغاي ؟
او انا اكلمه بنفسي والمح له ؟ - بالرغم اني عارفه اني من الصعب ان أتجرأ واقوله شي -
ولا عندكم حل ثاني ؟

مادري ... ارجو انكم تنصحوني
وكلي ثقه انكم ما راح تبخلون علي بالنصيحه ، وراح تنصحوني كما لو كنت اختكم بالضبظ