مصطلحاتي اللغوية.. كل أم تقول لنا كلمات أبنها الغريبة

فديتهم هالبزاارين وش حلاتهم...
الله يحفظ كل طفل لاامه ويرزق كل وحده ماعندها بالذريه الصالحه...
انا بنتي عليها مصطلحااات غير شكل محد يقولها غيرها براويكم وانتو الحكم...
تقوووول ميها............ بعني مويه
وهيها........... يعني تبي تسبح
تحكي اردو بنتي لو عندي شغاله هنديه كان قلت لقطت منها كلمااات...
بيبي............ يعني حبيبي
زمزه....... يعني جزمه كرمكم الله
شقاااب............ يعني شباااك
امن.......... يعني قمر
تاتا........... يعني المصاصه او البزازه
ميمي........ يعني الرضاااعه
الحرووف رايحه وطي عندها هههههههههااي..
هذا الي متذكرته الحين انشالله اذا تذكرت شي قلته لكم...
بس الحين بدت تتعدل عندها الالفاااظ بس تعجبني عجومية الاطفاااااااال...
وعلى فكره بعد درااسة علميه مطووله وابحااث عده اكتشفووو ان البنت افصح من الولد بكثير فالي ولدها مابعد فصح زين لاتخاااف يسوي روووحه ثقيل ورزين من صغره...

bj3a الله يحفظ لك الأمور ، بس يكبر كم شهر بعد بتشوفينه يقول كلمات أحلى وأحلى،، بخصوص Close-open ولدي ماتعلمها بالمرة بس أحنا كنا نسوي له... الله يحفظه لك

جمانة.. الحمدلله عجبكم الموضوع، بتشوفين ولدك بعد شهر او شهرين بينطق بأسماء الأشخاص الي بالبيت، ولدي أنطلق بس من هالشهر... الله يخليه لك.

Noura81 لا تحاتين أن ولدك بعده مانطق عدل، العادة الأولاد يتأخرون بالنطق وهذا شي عادي، بعدين لسانهم أظول منهم الله يحفظهم.

نور هالكون،، ماشاء الله كلماتها حلوة، ترى الياهال إذا سمعوا الشغالات يلقطون كلماتهم.. آنه شغالتي أندونيسية وشغالة أمي بعد تصدقين لقط منهم كم كلمة...

الله يخلي لكم عيالكم وتشوفون اخوانهم واخواتهم ان شاء الله

تصدقين رانيا اختي الصغيرة كانت عليها سوالف بس مو ذاكرة لأنها الحين في ثاني ابتدائي ما شاء الله

بس تذكرت انها للحين تسمي المعكرونة >>>>>>>>>>> كنونة

واذا اشتهت اي باستا تقول ابي كنونة

خلاص تعودت واحنا تعودنا معاها بس !!

يازين كلامهم وحكاويهم



الله يحفظهم ويخليهم لكم يااااااااااااااارب

رومي ماشاء الله على أختك الصغيرة ، تتدلع بعدها عليكم بكلامها..

عزف منفرد.. الله يرزقك الذرية الصالحة، وبخصوص الكلام آنه بعد ماكلم ولدي مكسر آخاف أنه يفتكر أن كلامه هو الصح وبعدين يستمر عليه,,,

الماسة،، أشكرك على المرور..

السلام عليكم و رحمة الله و بركاته

ما شاء الله عنكم و عن عيالكم...الله يحفظهم لكم...و يرزق الجميع من فضله العظيم يا رب...

عن مريومة حبيبتي...ما شاء الله...من و هي صغيرة...كنت كل شيء جديد أشاور عليه و أقول له ( إيه ده ؟ ) بمعنى ما هذا ؟

و الحين كل شيء تشوفه...طول اليوم...إيه ده؟...إيه ده؟...بس تحبي و تمسك شيء جديد تلاقيها تقول إيه ده ؟...

بس تشوف شيء غريب عليها...تقول إيه ده ؟

و تقول ماما....و تقول ممّه ( بمعنى عايزة تاكل )...و تقول بابا..

و تصير تطلع أصوات سيمفونيات عجيبة لما تكون مبسوطة و فرحانة...

و سيمفونيات أعجب و أعجب لما تكون زعلانة أو مش طايقانا

الله يحفظها يا رب من كل شر :)

color=993399]]هلا والله انا بنتي سنتين اول كلمة ماما وبابا والى اخره والكلمة الي نطقتها عدل ايعورني يالله شو هال اليهال ما تنطق الي باصعب كلمة ما لقتلها كلمة اسهل والله حاله والحين يالسه تتفرعن عليه امسويه نفسها شيخة البنات ولا بعد اسير عند ابوها اتقوله قوم ماما تح يعني سير اظرب ماما والله حاله وياها الظاهر حب البابا طفح والسيارة عندها نن والاسكريم اكريم والعصير عثيل وافتحي اتاح ويوم اتمل مني اتقولي بابا مايه يعني بابا ماوصل والله حاله [/color][/color]

مرموم، الله يحفظ لكم مريومة الحلوة، ماشاء الله عليها،، بتشوفيها لما تكمل السنة تهبل بالكلام أكثر..

mewo الله يخلي لك البنوتة الحلوة، بس شكلها حبيبة أبوها تدافع عنه وأنت بس للحاجة، نفس حالاتي...

يا حلاتهم اليهال يوم يتكلمو

ولدي ومصطلحاته

ممح = لحم
أمبوه = ماي
واو واوأو ليب = حليب
ببح = يتسبح
باح = خلاص خلص
كيم = أسكريم
تبتب = بطاطس
كرونه = مكرونه
بابا = ما با أو ما أريد
أليه = خليه
جشه = جفشه ملعقة
زون = تلفزيون

وايد مصطلحات عندي بالهبل

أم أنوار، ماشاء على ولدك الله يحفظه لكم، كلماتهم تهبل، لا وكلمة ولدج حق بطاطس تبتب يابها من وادي ثاني...

عندنا محل وجبات سريعة اسمه جسميز، كل مانطوف عليه لازم يصارخ (مم) يعني أكل او الكلمة الثانية (الب) يعني يبلعب، لأنه دوم ناخذه يلعب هناك، ونأكله بس من كم أسبوع من عندهم chicken nuggets مادري بعد إذا توه صغير على أكلهم او لا...

السلام عليكم ورحمة الله وبركاته

تصدقون اول ماقريت موضوعكم كنت بالدوام :shy: وذكرتوني باولادي :idea: البكري كان يسمي الصندوق (صنقود ) :think: والابره (اربه ) :bigsmile: واللون الاصفر (افصر ) (r)، اما الثاني فيسمي البرتقاله (دقاله ) :sad: والفيمتو (ميتو ) :think: والجاكيت ( جاتيك ) :eek2: وسلامتكم حبيباتي . :clap::clap::clap::clap::clap::clap:

ياهلا ببنت الديرة ، ماشاء الله على ولدك يقدم حرف قبل حرف في كلماته، والصغير كلماته تجنن، الله يحفظهم لك...

هههههههههههههههههههههههههههههههه
ولدي البارحه قال كلمه لين اليوم اتذكرها واضحك
كنا يالسين عالعشا فانا قلت لاخوه تبا سندويش فهو رد عمره سنتين قال ابا ((سمبديج))
مت عليه من الضحك لا قال ((اما ابا سمبديج))
يعني((انا ابا سندويج))

ياحبيبي ولدج ماشاء الله عليه قال السندوش بطريقة حلوة،،، أحنا البارحة كنا طالعين مع أمي على بيت جدي، المهم مرينا في الطلعة نشتري سندويشات ولما وقفنا نطلب كان يقول (جب) أحنا ماعرفنا شنو يقول حتى أخوي يقول شنو ولدج يسبنا، رد كرر الكلمة وقال (مم جب، مم جب) المسكين كان يبي ياكل جبس (بطاطا مقلية) وكان يوعان المسكين كل الجبس....

تعرفوا يابنات اولادي كلهم في المدارس 2 في المدرسه و2 في الروضه ,موضوعكم ذكرني فيهم وهم صغار شو كانوا يحكوا ,اصغر ولد عندي جديد دخل الروضه وبيحكي عن شنطه الروضه (فوتتي) كثير كلمات عمّ ّبحاول اذّكر الكلمات

أخت بالله الله يحفظ لك أولادك إن شاء الله، بس إذا خاطرك تسمعين من كلمات الصغار جيبي الخامس (أمزح معك)

ولدي عمرة 7 شهور يوم بطنه يمشيه يقووول ماما قخخخخخخخخخخخخ

ويوم فيه رقاد يقووول اوو اوو اوو

bj3a ماشاء الله دام ولدك يقول اخ يعني لايعة جبده وبجذي سهل تعلميه على القيصرية قبل السنةـ لأن الي معاي بالشغل يقولون يعلمون عيالهم من 9 شهور، محد الا آنه هالولد معذبني مع الحمام مايرضى يقعد على المرحاض تكرمون...

رانيا البحرينية ...

حبيبتي يقولها عقب ما يخلص

وبعدين هو يوم تكرمين يبوول ما يقدر يقووول

يالله ان شاء الله عيالنا بيكبرووون وبيقولون ولا روحهم بيسيرووون من دون ما يقولون

هههههه تذكرت موضوعج الحلو اختي رانيا، بمناسبة ان ولدي انطلق مرة وحدة في تأليف الكلمات الخاصة فيه...

كنكون <<< سبيس تون عاد هههه وش جاب لجاب

أباس <<< عباس ! مدري اسم هندي البرادة ولا وين !!

اتي<<< اختي يقصد خالته لأني اسميها اختي

تودو <<< الجوتي ، ( يحبه بشكل ما يوصف ! )

ابابيم << عمه ابراهيم

أبا << احمد

امبوه<< ماي

أأه << الاكل

ليت ، ينطقها عدل هههههه ما شاء الله عليه

ديد << سيارة وساعات يشيل الياء خير شر، تصير دد بس ! ههههههه

اتاح << مفتاح وخصوصاً السيارة

كوّة << كورة

آآح << اكثر من شيء، السكين، المكواة، مروحة الشفط... كلهم آآح!

الله << المشط ! استغفر الله العظيم...

مستانسة حدي لأنه بدأ يتكلم ، وخاطري اعلمه كلللل شيء مرة وحدة