إللي موعد ولادتها في شهر أبريل (وإذا قبلة, مو مشكلة), تتفضل للإفادة

بنات وينكن ^^

طمنونا عليكن .. !!

أنا عندي مشكلة في تناول الحبوب فولكيرون

تناولت حبتين مع بعض عن طريق السهو ..............مرتين لمدة 3 أيام يعني الجرعة 4 كبسولات و هي الدكتورة قالت لي كبسولة واحدة مرتين في اليوم.....
و قرأت بعدين الوصفة الطبية اللي في العلبة مكتوب : ( يجب عدم تناول جرعتين في آن واحد )!:pain:

و اني متوجسة و خايفة على البيبي وااااااااااااااااااااايد و ما ادري شو اسوي:cry:

و ما اشوف احد في المنتدى متخصص و يقدر يرد علي !

ما ادري شو اسوي؟؟؟؟؟ نفسيتي تعبانة !:sad:

بروح العيادة يوم الأحد ان شاء الله بس ابغي اهدأ شوية ... و احد يطمني ؟؟؟

السلام عليكم أخواتي....

شلونكم؟؟ مشتاقتلكم...... أنا آسفة صارلي زمان ما جاية.... دخلت كورس خياطة و تعب اهواية و أختي إجت زيارة من أمريكا بعد 8 سنين فراق.... وبابا صارله مو شايفها 11 سنة.... فكنا مشتاقيلها اهواية... و كنت مشغولنا ب بيت الأهل و المشكلة الإنترنت مفصول عدهم.... فسامحوني.... أما البيبي ف حاليا أحس بحركات جدا خفيفة....

أما عن إنو حساب الأسابيع غير الأشهر, والله ما أدري, الله الأعلم... بس إنتي إذا اضربين 4 في 9 يطلع 36, بس إذا نص ال 9 أشهر , 4 أشهر ونص, ونص الأسابيع 20... فإنتي من اتكونين 20 اسبوع يعني 4 أشهر ونص.... أعتقد....

وإنشاء الله كلكم بخير و سلامة يا أحلى عرايس.....

هلا ميس .. الحمد لله على سلامتج ^^ وينج صارلج فتره مختفيه ^^

بس زين طمنتينا عليج ..

وبالنسبه لطريقة العد ما ادري انتي طريقتج غير ..

المفروض اول ما تخصلين الاربع الاسابيع الاولى تكوني خلصتي الشهر الاول وعقب لما تكونين شهر ويوم تعتبرين في الشهر الثاني وصار لج فيه يوم ولما تكونين في الشهر الثاني واسبوعين يعني انتي في الثالث وباجي لج اسبوعين وبتدخلين الرابع وهكذا ان شاء الله فهمتي الطريقه لانه طريقة حساب الحمل تختلف عن طريقة الحساب العاديه ^^ .. <<< هذي الطريقه الصحيحه للعد لانه حتى اختي مرموم لما حسبتلي بنفس الطريقه حتى الدكتوره تحسب بنفس الطريقه ..

يعني انا الحين باجي لي اسبوعين وبدخل السادس ^^

شخباركم اخواتي ...:bigsmile: مشتاقة لكم مووووووووووووت..

اخت miss honey من زماااااااااااااان ما طليتي علينا ، نسال عنك و عن احوالك.. و الحمد لله على سلامة اختك.

بالنسبة اختي غلا المشاعر ... تأخرت في الكتابة عن موعدي للعيادة لأني كنت مخربطة في الحبوب و خايفة على الولد ،
و أنا توكلت على الله أنا ما بلعت الحبوب لمدة طويلة .... و بسرعة رجعت لوصفة الدكتورة ( و انا فوضت امري الى الله )

رحت العيادة الأحد الماضي ، و كنت مشتاقة حتى ادخل على الدكتورة... رحت اليها قالت لي : شخبارك ؟ ان شاء الله كل شي تمام... قلت ليها اني بخير بس يجيني ألم فضييييييييييع لما اقوم و اقعد على الأرض ( لين اقوم و انا جالسة على كرسي يكون اهون علي) ، لكن لين اقوم من على الأرض يجيني ألم أسفل البطن و يقتلني من الألم و ما أقدر أمشي منه و لا أني اوقف مستقيمة و امشي شوي شوي و ظهري منحني....
قالت لي الدكتورة : انك في هالمرحلة يتوسع الرحم و يرتفع و تحسين بتقلصات و ألام.... و أني تزيد عليي لين أتحرك بسرعة أو أقوم بسرعة ...:eek2:

على العموم، انا خف عن الألم هالأيام ، لأني بدأت انتبه لنفسي و هذا أول حمل الي و ما عندي خبرة !:shy: بدأت أمشي بتأني و قومتي و قعدتي على هون...

هالمرة ما أخذت لي تصوير للبيبي ، بس سمعت دقات قلبه , كان البيبي جهة اليسار على جنب ، أما الحين فهي في الوسط ... دمعت عيني لما سمعت دقات قلبة ( كيف لين شفت البيبي بعدين ما ادري شنو بسوي ؟؟)(r)

يالله نشوفكم في احداث جديدة ...
أتمنى تتواصلون معانا في الموضوع... حبيتكم و حبيت سوالفكم :flower::D

هلا المحمديه ..

الحمد لله على سلامتج وسلامة النونو .. ^^ وزين انج تطمنتي عليه .. << انا سويت نفس سالفتج لما كنت في الرابع وخذت الحبه مرتين في اليوم مع انه المفروض مره .. بس الحمد لله ربج ستر ^^

اما عن اخباري لا جديد .. باااجر بسير المستشفى عسب افتح ملف واسوي تحاليل .. عقبها على طوول بسير العياده لانه الدكتوره تريد تشووف نتيجة التحاليل والله يستر لانه انا قبل الحمل كان عندي فقر دم =(

اممممممم اما عن حالي ويا الحمال .. ما ادري شقوووول لكم من عرفت انه المشيمه نازله وريلي حارمني من كل شي كله بس يريدني طايحه على السرير ومانع عني الحلويات << خايف من سكري الحمل لووووووووول

حتى في الجماع .. ما يطيع يكمل لانه يكون خااايف .. الصراحه كاسر خاطري ادري انه يريد بس بروووحه حااارم نفسه لانه خاااايف ع البيبي !!

وهذي اخباري حليلي وباااجر من اي من المستشفى والعياده بي اخبركم على احداث اليوم ..

اختي المحمديه ما عرفتي شو جنس البيبي ؟

لا للحين اختي الغالية .........غلا المشاعر ، ما عرفت جنس المولود؟!!

ان شاء الله موعدي بكون 5/12 و بعرف ان شاء الله

خاطري اشتري ثياب المولود بسرعة ...!!

على خير ان شاء الله ..

انا مع انه صارلي شهر اعرف انه فيني بنووته بس ريلي ما يطيع يطلعني السوووق =(

بس ان شاء الله .. هالشهر بسير دبي وبوظبي اخذ اغراض للبنوته لانه يقولون بن بطوطه فيه محلات اطفال رهيبه وخصه للبنوتات ..

وبالنسبه لزيارتي للمستشفى << طبعا كانت اول سيره لي للمستشفى .. فهلكوني من مكان لمكان .. وبالاخير قالت لي الدكتوره انه الوضع طبيعي وانه موقع المشيمه عاااادي لا نازله ولا شي .. << الصراحه محتاره اخذ على كلام منو ؟!!!؟

امممم وسارت الامور على خير ما يرام .. وباااااجر ان شاء الله بسير القي نظره على اغراض البيبي لانه ريلي صار له فتره يحووط محلات الاطفال ويخبرني عسب يقهرني لوووووووول ..

وبس هذي اخباري حتى الساعه الاخيره ^^

امممممممم فيه بنات وااايد غابن عنا .. مثل الغاليه ام ريماس من زمان ما سمعت شي عنها .. ان شاء الله تكووون بخير ..

وبعد ميس مختفيه وما تبين عسى المانع خير بس ..

لا تبطووون علينا نتريا اخباركم .. وشدووو حيلكن نريد معرس حق شهوووده لوووووووووووول ^^

سلام عزيزاتي الحوامل.. كيف حالكم ان شاء الله بخير
مشكوره عيني غلا المشاعر عن سؤالك عني وسلامتك ان شاء الله ترتفع مشيمتك او انها تكون قد ارتفعت اهم شي الراحه
أنا الحمد لله بخير والحمل ماشي معاي تمام.. ونبضات الطفل بخير ولله الحمد وموعدي للألترا ساوند بيكون في 15 ديسمبر

ومبروك للأخت روينا على البنوته ان شاء الله تولد بالسلامه بس حبيت أسألك عن أبره التيتانوس حق شنو؟؟؟

والأخت شذي الزهور أقولها الله يقومك بالسلامه ولاتشيلين هم.. ربي يرزق الواحد على قد طاقته... وربي يقومك بالسلامه .. والمره الجايه خذي احتياطاتك

الأخت miss honey الحمد لله على سلامه أختك وقرت عينك... أستانسي مع اختك وردينا بالأخبار الحلوه..

المهم لمن تروحون تشتروون أغراض للبيبي لاتكثرون ولا تخربطون واجد.. دائما خذي الوالده او اختك صاحبه الأطفال معاكي عشان تقولك شنو تحتاجين وشنو أفضل نوعيه.. ولا تنسون تشترون لنفسكم ملابس النفاس الى بتلبسيها بالمستشفى ولمن يجيك زوار.. شغلات حلوه وخفيفه وخاصه للي يترضع

ان شاء الله بسوي لسته بالحاجات الى تحتاجها الأم في المستشفى.... أنتظروني

سلالالالالالالالالالالالالالام ياحلوين

يحليلكم يا حوامل الخامس :cool2:

السلام عليكم.... شلونكم بنات؟؟ مشكورات على سؤالكم عني... أنا مشتاقتلكم....

وضعي مع الحمل مستقر... أنتظر يوم 28/11 ... عندي موعد الألتراساوند... إنشاء الله أعرف جنس البيبي... أنا اشتريت مجموعة ملابس داخلية للبيبي... بس ناقصني اهواية تجهيزات... إنشاء الله عن قريب أنتقل شقة جديدة وأرتب غرفة البيبي على راحتي...

وإنشاء الله كلكم اتقومون بالسلامة....

اشكرج حبيبتي remaas و فعلا الله يرزق الانسان على قد طاقته والله يساعدني انشاءالله
بالنسبه للتجهيزات كله عندي حاضر
لأنه ابني ما لبسهم كثير يعني كلهم تقريبا جدد
و الله يسهل عليكم و علينه

سلاااااااااااااااام يا حوامل الخامس...

شخباركم ان شاء الله طيبين و بصحة و عافية!

اختي غلا المشاعر ،

لا تمشين كثير و تنسين روحك ، احنا بعدنا في بداية الأشهر و لازم نرتاح، و اخذي اختي الغالية اغراض البيبي شوي شوي.. و تحملي بالبنوتة الحلوة و اكلي زين ....خخخخخخ و اشربي حليييييييييب. و لا تنسين بعدين تحطين صورتها ، مباشرة بيجونك الخطاطيب!؟

ريماس،

وينك اختي ما بينتي من زمان ، إن شاء الله الأوضاع كلها تمام؟

miss honey،

هلا بيك اختي لا تبطين علينا و تنشغلي مثل غلا المشاعر بشراء الأغراض و تنسونا...ههههههه

عندي سؤال لكم أخواتي و ضروري تجاوبوني ::
أنا دخلت الخامس من كم يوم ، و أشوف بطني صغير و زاد حجمه في أسفل البطن و صغيرون بعده!!
أنا كان قياس المنطقة قبل الحمل تقريبا 72سم و الآن قياس بطني 86سم ، زاد عن السابق 15سم فهل هذا طبيعي ؟ أم لا يزال صغير مقارنة بأني في بداية الخامس و أكملت الأسبوع 19 من الحمل....
أرجو من بنات الشهر الخامس يطمنوني!!

سلام عليكم ياحوامل الخامس .. كيف حالكم ان شاء الله كلكم بخير وعافيه
أنا الحمد لله الحمل معي ماشي تمام والبطن في الشهر الخامس ماتكون بارزه واجد... يعني تكون صغيرونه بس تدخلين السادس والسابع بتصير البطن أكبر.. لاتخافون لاحقين على كبر البطن...

أنا عملت شوي بحث في المنتدى عن شغلات الحمل وأن شاء الله الكل يستفاد منها
1

2

وهذي بعض الأدعيه والآيات للحامل
3

4

5

وهذا ملابس للبنوتات والأولاد


وأنا حابه أحط شوي صور لملابس الطفل أحتياجاته بس عطوني فرصه لين ما أفضى لآنو عندي بنت مجننتني وماتعطيني فرصه.. وبعدين انتوا لسه بدري عليها.. أنا اقول أفضل وقت للتجهيز للطفل الشهر السابع عشان نكرس جهدنا على الحاجات وبنفس الوقت نتحرك أكثر... والله يوفق الجميع

السلام عليكم ورحمة الله وبركاته
ممكن انضم معكم انا بيكون موعد ولادتي ان شاء الله 3 ابريل 2006 الله يتمم بخير وهذا طفلي الثاني طفلتي الاولى سارونا عمرها الان ثلاث سنوات ونصف الحمدلله ماحسيت بوحم شديد مثل اول مرة يمكن لاني اول مرة كنت بغربة ولحالي نقص وزني في الشهور الاولى 10 كيلو بس الحمدلله جت بنوتي كبيرة بس المشكلة هالمرة جتني فلونزا شديدة ورحت للدكتور العام وعطاني مضاد اموكسيل احسن نوع للحوامل بس مانفع وجتني كحة شديدة وكتمة ورحت للدكتور النساء مو دكتورتي وعطتني بخار ومضاد شديد وبخاخ للحساسية والحمدلله خفيت تدريجيا لكن اول ماخلص المضاد رجعت الفلونزا من جديد صبرت على الكحة لاني خفت من كثرة الادوية لكنها زادت رحت الاسبوع الماضي لدكتورتي وطمنتني على البيبي وقالت لازم احولك على دكتور الصدر ورحت لاستشاري كان يعطيني بخاخ للصدر وللانف وقال تستمرين عليه الى الولادة لانها حساسية في الصدر وانا الى الان اكح بقوة واحس جنوبي تعورني واسفل بطني خصوصا مكان العملية الاولى هذا كل شيء دعواتكم لي واسفة طولت عليكم وعلى فكرة خواتي ترى دائما الوحدة في الحمل الاول مايطلع لها بطن الا في الشهر الاخير فهذا عادي لاتخافون وادعوا دائما الله يسهل لكم وللجميع بولادة سهلة وذرية سليمة معافاة صالحة باذن الله .
على فكرة ابغى احط شريط الحمل كيف؟؟؟؟:o

أهلا و سهلا بك أختي عروس القرن,

و مرحبا بك و بكل الأخوات و ينضمون معانا ، و إن شاء الله تفيدينا و نفيدك! و نقوم بالسلامة كلنا و بولادة طبيعية!

الله يساعدك على هالأدوية ، في فترة الحمل يكون من الأفضل عدم تناول الأدوية ، بس لأن حالتك خاصة،

الله يفرج عنك و توقفي عنها ...

شريط الحمل : لازم تفتحين الموقع http://go.3roos.com/MBXiJ673PZY

، خلي تاريخ ولادتك و اختاري اللي تبيه!

هلا بيج عروس القرن والله يعينك على الأدويه انا حالتى من حالتك.. أدويه للربو وبخاخات وحاله... وتزيد حاله خصوصا بالحمل... بس الحمد لله مافي مشاكل على البيبي... الله يعينا
وبالنسبه لشريط البيبي روحي للموقع الى اعطتك اياه المحمديه ومن هناك تحطين التاريخ المتوقع للولاده.. وتختارين شكل الشريط وكل شي.. وعقب تضغطين على creat Ticker وبيطلع لك الشكل النهائي للشريط تعملين كوبي للبوكس UBB code or BBCcode وألصقيه في التوقيع تبعك وأحفظي التغيرات... أن شاء الله يكون شرحي وافي وكافي.... بالتوفيق

اول شي مرحبا بج عرووس القرن .. نورتي صفحة حوامل الخامس ^^

الله يكون في عوونج عروس القرن ..

انا كنت مثلج وعطووني ادويه بس خذتها يومين ووقفت عنها لاني خفت ع البيبي .. بس الكحه للحين عندي ولما اكح اسفل البطن يعورني =(

اممممممم بالنسبه لاخباري الحاليه ما شي بس بديت اشتري اغراض للبنوته ^^ وايد مستانسه بس اتعب بسرعه وريلي الحين منعني من الطلعه اوونه في الاسبووع مره وحده =( بيوديني السوق =( << هالرياييل معاناه ..

اممممممم وبالنسبه للبيبي حالتها مستقره وهاديه جداً اول ما دخلت الخامس كنت وااايد احس بحركتها الحين لااااا .. << خوووفي تكون هاديه في بطني ومن تطلع تكووووون شيطووونه وتلعوزني لوووووووووول

امممممممم وهذي اخباري .. وعندي موعدين .. واحد في العياده تاريخ 28 \11 والثاني في المستشفى تاريخ 19\12

يلا يا بنات ما خبرتوونا عرفتو جنس البيبي ولا بعدكن ^^ << تدور معرس لبنتها لوووووووول

أنا لسه ماعرفت جنس المولود.. متشوقه اروح للعياده عشان يقولون لي وأبتدي أجهز الملابس وكل شي.. أنا الوالده من الحين تسألنتى شنو بتجيبين معاج وشنو بنحط وهالكلام... والحمد لله كل الشغلات الأساسيه متوفره بس باقي ملابس على الخفيف.... وموعدي للألترا ساوند 15\11 يعني لسه مطوووووول

بالنسبه للكحه دام انو عند الحامل كحه يفضل أنها تاخذ الدواء أحس لك وللطفل الطبيب مستحيل يعطون الحامل دواء بيضر بصحتها.. وللي فيها كحه وصعوبه بالتنفس أقولها خذي الدواء احسن لا يصير في الوحده نقص أوكسجين ويتأذي الطفل.. لآنو صارت معي بحملي الأول وتنومت بالمستشفى اسبوع تحت المراقبه ومع البخار والراحه صرت أحسن.... وبما انو الطبيب اعطاكم الدواء يفضل الوحده تستمر عليه لين ماتخف حالتها أفضل من أنها تتعب نفسها والطفل.. هاذي نصيحتي لآني مجربه والله يعينكم

السلام عليكم ورحمه الله وبركاته

كيف حالكم خواتي الحوامل؟
الله يسلم كل حامل ويسلم البيبي اللي في بطنها ويكون لها غرة عين .. آمين

انا وحده منكم يعني حامل في الشهر الخامس والدكتوره عطتني موعد ولاده في 7-4-2006
الله يتمم على خير وأشوفه وهوه في أحسن حال .. بس ما عرفت لين أحين بنت ولا ولد
مع العلم انه عندي ولد (الله يخليه لي ) خليفه وعمره سنه


أسمحولي على الاطاله