ارجوكم..هل ا تزوج باخرى؟؟

ماشاءالله كل الاراء موجودة و مختلفة..

أخوي بصراحة مهما البنات اقترحوا .. بالنهاية مابيصير الا اللي في بالك..
أكيد معاك حق.. و الله حلل لك 4 مو 2 بس.. بس اذا انت واثق انك بتعدل بينهم توكل.. ماحد يقدر يردك..

بس أكبر غلط انك تقول خلي زوجتك تعرف من غيرك.. يعني يكفي المصيبة بالنسبة لها.. تزيدها عليها ليش.. أكيد بتزعل و يمكن تصير مشكلة بينكم لا سمح الله.. بس انا متأكدة انها بالنهاية بترضى باللي يرضيك..

ونقطة ثانية.. ممكن تقول فضول.. بس ماقلت من متى و هي ماتقدر تحمل.. لانه لازم تكون صبور و عندك امل بالله وفي نفس الوقت لازم تاخذ بالاسباب و تشوف اكثر من دكتور.. بصراحة شي غريب لما يقولولك الأطباء السبب غير معروف.. هذا دافع لانكم تسألون و تعرفون وين المشكلة.. وان شاءالله ربي يوفقكم ويخليلكم بناتكم الحلوات و يستر عليهن و يرزقكم الولد الصالح اللي يرضيكم..


واتمنى ما اكون ثقلت عليكم وادعي ربي يرزق الكل الذرية الصالحة..

السلام عليكم ورحمه الله وبركاته
اخي الكريم احب اقول لك قبل مافكرت بالزواج لانجاب ولد فكرت ببناتك
ولا فكرت في زوجتك وطبعا رايي من راي البنات انك تصارح زوجتك بالكلمه
الطيبه ترا الكلمه لها اثر في القلب وطبعا حتى لو وافقت فنصيحه انك تقربهم من بعض من البدايه علشان يكون اخوهم او اختهم اقرباء من اخوانهم الباقين
* شوف انا عندي خال عنده 6 بنات وولد واحد وطبعا الولد ترتيبه الثاني
وبصراحه زوجه خالي دوم تقول اذا تبغا ولد ثاني اتزوج هذه نقطه النقطه
الثانيه الولد نفسه دوم يقول لامه انا ابغا اخ انا تمللت من خواتي لان مايلعبون وياي ولا لبسهم وشكلهم غير عني ابغا احد يكون مثلي الحين الولد عمره 12 سنه تقريبااا
****
اخي الفاضل صح كلامك المرأه السعوديه مقيده غير عن نساء الخليج
مثلا في السياقه والخ الخ ( مع احترااااااامي )
فالنفرض مثلا انك وصلت لسن ماتقدر تسوق او او او وبناتك ماعنهم سيارات وانت لازم تروح المستشفى ( بعيد الشر ) شنو راح يكون رد
بناتك في وقت او موقف صعب ؟؟؟
****
نقطه ثانيه البنات بصرراحه مكانهم سوق ومنتزهات وصالونات وزيارات
لاصديقاتهم وبصراحه محتاجين لارجل او اخ يسندهم يشوف متطلباتهم
* وعن نفسي انا عندي اخ اكبر مني واخت اصغر مني .... قبل لا يتزوج اخوي كل مكان اطلبه على طول يودينى لكن بعد الزواج اترجاه يودينى بيت صديقتي ولاول مره ودوم تلومنى ولا يرضااااا وبصراحه اتمنى ان يكون لى اخواااااان *
****
وبالنهايه اقول لك القرار بيدك وربي يسعدك ويخليك لابناتك وامهم
ولازم الانسان يحاول يغير من القدر .... وانت اكثر واحد بينا حاس بالمشكله
ومتأثر
العذر والسموحه اخي الكريم على الاطاله او القصوووور

اخي الكريم...

اريد فقط ان الفت انتباهك لشئ...الم تفكر ان الله قد منع زوجتك من الانجاب لغرض الاختبار!!؟؟ يعني ليراك هل ستكون صابرا شاكرا على قسمته او ستعترض و تبحث عن ما يلبي رغباتك الانسانيه دون التفكير بتلك التي تحملت ولاده و تربيه 4 اطفال..!!

و ما ادراك ان الزوجه الثانيه ستنجب لك الذكور!!؟؟ و ربما لا تنجب اصلا...

و اخواتي اللاتي يستخففن بالمشاعر...كيف ستشعرين اذا اراد زوجك في يوم من الايام ان يستغني عن خدماتك !!

و السموحه

اشكر جميع الاخوات على مرورهم واللي لفت نظري الاخت اللي تقول اننا نرضى لاخواننا الشئ هذا بس مانرضاه لازواجنا.

يااخواتي لاتضنون اني سئ او انها نزوة انا زعلت على والدي لانه نصحني بالزواج(وقلت له وش انت شايف على فلانة؟) وزعلت على اخواتي بعد اللي قالوا لي لازم تتزوج (وقلت لهم الله يبلاكم بزوجة ثانية) يعني انا ما ارضى على زوجتي ولا اقبل احد يتدخل,,,واحيانا تجي خالتي او عمتي وتقوم تمدح عندي فلانة وعلانة (وانا عارف قصدهم ايش) بس برضه اطنش.
بس المسالة الان مسالة مستقبل بنات ضعيفات ليس لهن حول ولا قوة واذا صار لي شئ لاسمح الله(ماراح ينفعهم عم ولا خال ولا جد واذا نفعوهم سنة او سنتين راح يملوا ويتركوهم مع ام عجوز لاحول لها ولا قوة).

ارجوكم لا تنظروا للموضوع من زاوية ضيقة وهي نظرة المراة للمراة.
حتى في مسائل التربية والاخلاق( انا اعرف بنات ماشين على حل شعرهم وشقيقهم ابن امهم وابوهم يعرف الشئ هذا ولا حرك ساكن بينما اخوهم من ابوهم لما عرف بالشئ هذا مشاهم على عجين مايلخبطونه وكل الناس تشكر فيه اللي عقلهم ).

السلام عليكم ورحمة الله وبركاته:
اخي الفاضل لا ارى اي داعي للاستعجال وكما قالو بعض الاعضاء كل واحد يجي للدنيا ونصيبة مكتوب.

اذا تزوجت من امارة اخرى فلا ضمان من انها ستنجب لك الولد لان بالاساس المراة لا دخل لها اذا كان الجنين بنت ام ذكر.
وان كانت زوجتك قد توقفت عن الانجاب ولم تصل لسن الياس فلا تخف فان الله يرزق من يشاء.
اقول لك ذلك عن تجربة شخصية فلقد روق والدي ب4 بنات ولم يرزق بالولد. لكن الله اراد ان يكون له الولد ورزق به وكان له من العمر 45 والحمد لله الوالد عايش لحد الحين واخواني صارو رجال فلا تخف وخلي امرك بيد الله.
لا تظن ان الزواج باخرى هو حل للمشكلة بالعكس سيكون في ذمتك امراءة اخرى تتحمل مسؤوليتها.

اخي الكريم

راح تستغرب من رايي بس انا معاك في الزواج مع احترامي طبعا لزوجتك بس انا اعتقد ان البنات حتى لو تربوا تربيه طيبه محتاجين لاخ ولو كان من اب فقط
بالذات عندكم بالسعودية وضع البنت غير بصراحه فأنا معاك في اللي تفكر فيه
انا شخصيا اعرف عايله كان عندها ولد واحد وبنت وشاءالقدر ان الولد مات وللاسف عمر ابوه وامه مايسمح لانجاب اطفال والحين الام والاب متحسفين على انهم ماجابوا اولاد والام تحسفت اكثر لانها ماسمحت لزوجها بالزواج والحين الاب تزوج بس وش الفايده مثل مايقولون عيال الشياب ايتام

نصيحه اخت لاخوها مع اني بنت واقدر شعور زوجتك انصحك تتوكل وبعدين هذا من حقكك وزوجتك راح تقدر موقفك اذا كانت تفكر صح وتعرف ربها عدل
بس لازم تعدل بينهم وماتحسسها انك تفضل الجديدة عليها

وهذا رايي وانا احترم الراي الاخر

ولك التحية

شموخ البحرين
تعجبني واقعيتك ومعرفتك لواقع (المراة السعودية) افضل من السعوديات انفسهن ........
وانا اقولها بالفم المليان المراة السعودية لاشئ بدون الرجل ولا تستطيع ان تخطو خطوة واحدة بدون رجل ولن يقبلها المجتمع بدون رجل شئنا ام ابينا.

السلام عليكم ورحمة الله وبركاته
أخي بكل واقعية اقول لك الله يسر لك الزوجة الصالحة اللي تقدرك وتقدر زوجتك من خلال كلامك واضح انك تود زوجتك واقول للبنات مافي داعي للتعصب ولنكن أكثر واقعية والله يوفقك وانصحك بالعدل.

شكرا مرة ثانية للجميع وخاصة للي تكلموا بموضوعية بعيد عن التعصب للجنس,,,
وشكر خاص للنفس البريئة .




وشكرا للموقع والقائمين عليه

بعض الاخوات يقولون (وش دراك انه اذا جاك ولد بينفعك وينفع اخواته؟)
انا تذكرت واحد عقيم كانوا الناس يقولون له وش تبي بالولد ماوراهم الا الهم والغم وعيال ذا الوقت دشير وفيهم ومافيهم تدرون وش كان يرد عليهم,,,,كان يقول( ابي ولد حتى لو ادري انه اذا كبر بيذبحني بيده)

السلام عليكم mmohdd

لو سمحت ممكن كلمه بسيطه ....إنته تعرف الله عز وجل شو قال في كتابه العزيز...إنه يرزق من يشاء إناث و يرزق من يشاء ذكور,,,وأنا أباك تفكر في زوجتك...قبل كل شي...هل إنته بتخسرها بعد الزواج أو بتكسبها,...لأنه نحنه الحريم ...ما نحب حد يشاركنا في أزواجنا و الازواج نفس الشي ما يحبون حد يشاركهم في زوجاتهم....


و الله ثم والله ..إنه إذا يابت ..أنثى ولا ذكر مب من المرأه ...منك إنته ...يعني إنته اللي عندك القدره في تحديد نوع الجنس ..مب الزوجه و هذا شي علمي و الكل يعرفه؟؟؟...وسألت وايد دكاتره و الكل قال نفس الشي...


أنا أقولك ...فاتح زوجك بالموضوع ...و قوللها يا حبيبتي ...أنا أبا أتزوج...لأنه كذا ...و قوللها كل شي......و إنته حاول مره ثانيه و ثالثه إنها تحمل ...و يمكن الله يكتبلك الولد....


بس فكر..إنه محد بيدوملك سوى زوجتك...و المراه إن إنجرحت كرامتها ..خلاص لا تفكر إنها ترد مثل الاول...و أنا أعرف وضع بناتك...وأعرف السعوديه كيف....لكن...بناتك بكره بيعرسن ..فهمت ..و إنته و زوجتك بتمون بروحك.؟..

وكيفك...بس أنا قلت اللي عندي ...

والحمدالله على كل حال

نسيت اقولك على شغله اخوي .. وهي وايد مهمه ..

اسمح لي اذكرك بأن جنس المولود اللي يحدده هو الذكر ( أي الأب ) وهذا حسب ما ورد في القرآن الكريم ..

وماله داعي تتزوج وحده ثانيه لانه الله كاتب لك يكون لك بنات وماتدري يمكن الياي يكون ذكر ..

صدقني اخوي لاتظلمها ولا تظلم بناتك بزوجة ابو يمكن ماتكون حنونه عليهم ..

وفي النهايه كل شي بكتبة الله ..

آسفه اخوي لاتظن ان رايي هذا فيه تعصب ..

لاني اصلا عندي مثال من اسرتي .. خالتي ريلها خذا عليها وحده وسبحان الله يابت له 4 بنات وخالتي يابت له ولد من بعد هذا ..

شفت شلون ان المرأه مالها اي دخل بتحديد جنس المولود .. وانا كان جوابي من منطلق الدين فاذا رجعنا للقرآن بنلقى قوله تعالى ( ماني ذاكره الايه بس بما معناه وجعلنا منه الذكر والانثى ) .. وانشالله اذا لقيت الايه راح اكتبها لك عشان تتأكد من صحة كلامي ..

هذا ردي من الناحية الدينيه .. اما من الناحيه الاجتماعيه فانت حسب ظروفك وكل بيئه تختلف عن الثانيه ..

واعذرني على طول الرد ..
وتقبل تحياتي .. اختك في الله المشتاقه لله

شكرا لك اختي المشتاقة لله

بس من ناحية انه انا اللي احدد جنس المولود فهذا خطا!!!!!!!!
وخطا كبير جدا كبر روس حريمنا علينا!!!


الله هو اللي يحدد مو انا ولا زوجتي!!!!!!!

وبعدين فيه حديث عن الرسول يقول( تباركوا بالنصي،،،،،الخ) والمقصود تباركوا بالنساء يعني وحدة فيها بركة ووحدة مافيها!!!

والاولاد من بركات المراة
ولا تحطون جنس المولود على الزوج هذه كذبة كبيرة

بعيد عن الموضوع الأصلي عندي اعتراض == ليس صحيح يا اخ ان

المجتمع السعودي ذكوري بحت اليوم البنت دراست وطلعت تشتغل

ومتعلمه ومثقفه يمكن نظرتك انت كذا

اما الموضوع الأصلي == فالبنات ستر من النار اذا احسنت تربيتهم


ومافيه منهم اي عيب اما بنسبه لكلامك ( بس لما تتزوج يكون زوجها كل شئ في الوجود وتنسى اهلها وابوها وامها الا من(البكاء والعويل اذا صار لهم شئ) يعني مابيدها اي شئ الا تبكي وتتحسر )

شكلك تسك على المراه وتخليها تتبرأمن اهلها يوم تزوجتك او انكم

تزوجون البنت عشان تفتكون منها ولا تسئلون عنها


الله يعين التسوان الى تحت آيدكم


ارضى بما قسم الله لك ويمكن مجرد امتحان من الله لك والله غني

عن العالمين او قول للمسكينه زوجتك انك بتتزوج مو تخليها اخر من يعلم


ملاحظه : انا لدي اربع بنات وقبيليه يعني (بدويه )وانا وزوجي نشوفهم بدنيا واحنا الأثنين راضين ولنا خمس سنوات موقفين عن الخلفه


ارجو انك ماتزعل من كلامي

السلام عليكم ورحمة الله وبركاته


أخي الكريم : موحد

لدي نصيحة خاصة لك من واقع تجارب .

أخواتي الكريمات العروسات

عندي نصائح لكن فياليت تقرؤن كلامي جيداً


بسم الله الرحمن الرحيم

وبه أستعين ..

الحمد لله رب العالمين , والصلاة والسلام على أشرف الأنبياء والمرسلين ..

عند قرأتي للردود رأيت سرعة البعض في الرد دون تفهم وأستيعاب

المشكلة جيداً ويبدو أن ذلك نتيجة للغيرة التي فطرن عليها النساء

ورأيت أيضاً بعض الأخطاء كقول واحدة منكن : ( وشاء القدر) فنسبت

المشيئة التي هي من فعل الله للقدر , فالقدر والمشيئة كلها من فعل

الله , وقالت أخرى : ( وحاول أن تغير القدر ) وأعتقد أن هناك وسيلة

واحدة لتغيير القدر وهى وسيلة ( الدعاء ) فكثرة الدعاء تغير القدر ويوجد

دليل نبوي على هذا لايحضرني الآن .

ورأيت أخرى كتبت آية وقالت : ( فيما معناها ) والآيات أختي الكريمة لاتقال

بالمعنى بعكس الأحاديث النبوية يصح أن تقولي الحديث بمعناه .

ورأيت أخطاء في لفظ الكلمة ككلمة : ( إن شاء الله ) فالاغلبية تكتبها

إنشاء وهذا خطأ لأن المعنى يختلف فيصبح كإنشاء مبنى أو عمارة .


############



أخي الكريم : موحد

* يحق لك أن تتزوج بأخرى ولكن لايحق لك عدم العدل وأنت بالتأكيد

تعرف هذا , ولكني كتبتُ الكلام مذكرة فقط .

* من باب حُسن العشرة والمعاملة الكريمة يُستحسن أن تخبر زوجتك

برغبتك في الزواج بأخرى ولاتقل في نفسك أخاف

أجر ح مشاعرها ..فمشاعرها ستجرح بك أو بغيرك آجلاً أو عاجلاً, ولو حدث

وعرفت من غيرك أو بعد أن يتم الزواج فستفقد أنت حبهم وتقديرهم لك

كما ذكرت الأخت الكريمة ( أم إيمان ) .

* حاول أن تجمع بينهم بالمعروف وتشعرهم بالمودة الواحدة

وعدم التفريق حتى في أدني التفاصيل .


* أعرف كثير ممن تزوجوا بأخريات لينجبن الاولاد فتنجب زوجاتهن الأول

الاولاد , وهناك من صبر على الواحدة فأنجب أولاداً بعد البنات .


* حاول أن تصارح زوجتك بفكرة الزواج من أخرى من أجل إنجاب الولد

وأنها يجب أن تساعدك وتذهب معك لكي تتعالج وتنجب من جديد

وإن لم توافقك فأنت فعلت الذي عليك من طيب معاشرة ونصح .





هذا والله أعلم , و أسأل الله التوفيق لنا ولكم .

هاكم الحديث :


كما في قوله : ( إن العبد ليحرم الرزق بالذنب يصيبه وإن البر يزيد

العمر ولا يرد القدر إلا الدعاء )

: mmohdd


بس من ناحية انه انا اللي احدد جنس المولود فهذا خطا!!!!!!!!
وخطا كبير جدا كبر روس حريمنا علينا!!!


الله هو اللي يحدد مو انا ولا زوجتي!!!!!!!

سلام عليكم..

تعليقي على كلامك هذا..

المقصود أخي الكريم بتحديدك أنت للجنس..

ان الرجل عنده نوعين من الحيوانات المنوية.. حيوان يحمل (Y)و حيوان يحمل (X) أما المرأة فعندها (X) فقط ..
و عشان يصير الحمل بذكر لازم يلتقي حيوان منوي من جنس(Y) مع البويضة اللي تحمل (X) عشان يصير المولود ذكر(YX) ..
أما اذا التقى حيوان منوي من نوع (X)مع البويضة الي تحمل (X)فالناتج انه الجنين بنت و هي (XX)..

هذا معلومات فقط عشان تعرف شلون الرجل هواللي بامكانه يحدد جنس المولود..


هذا أولاً أما ثانياً..

أنت محق في كونك تملك الحق في أن تتزوج بثانية و ثالثة.. و رابعة.. و لكن تتزوج و أنت ما تزال قريب من زوجتك الأولى و حتى لا تكون بزواجك الثاني قد حطمت زواجك الأول.. اكسب زوجتك حتى يكون زواجك الثانية بركة و خير و يرزق الله بالذكر ان شاء الله.. شاور زوجتك و اقترب منها اكثر .. و احصل على رضاها و و فقكم الله لمراضيه.. :up:

بصراحة انا قرأت الموضوع وكنت ناوية اني ما اشارك
لكن وجدت نفسي اكتب

بالنسبة لموضوع الزواج من اخرى فهو محسوم بالشرع ومحدد بشروط العدل
".. فإن خفتم الا تعدلوا ولن تعدلوا فواحدة او ما ملكت ايمانكم .. "

اما اخي الكريم فإن السبب في شدة الردود هو عنوان الموضوع
ارجوكم .. هل اتزوج بأخرى ؟؟

فماذا تتوقع من نساء لهن نفس شعور زوجتك وكل واحدة تضع نفسها مكان الزوجة وتجيب وإن كانت غير متزوجة فتجيب من خلال تجارب شاهدتها سواء من قريب تتعاطف معه ( زوج) او قريبة تتعاطف معها مرت بتجربة مريرة

عموما اتمنى ان يكون كلامي خفيفا عليك
- اخي مسألة الزواج عائد لك فلا نستطيع ان نقول لك تزوج او لا تتزوج والدليل موقفك من اهله كل ما هنالك اننا نقدم لك افكار قد تساعدك بقراراك
- في الحقيقة موضوع انجاب الإناث بيد الله فهو من يهب الذكور من يشاء ويهب الإناث لمن يشاء او يزاوجهم ذكورا واناثا بمشيئته واحيانا يجعل من يشاء عقيما لحكمة لا يعلمها الا مدبر هذا الكون
- اخي الكريم اهم شئ ان تتحلى بسعة الصبر والراحة والرضى لأن الله احن عليك من حنية الأم على وليدها فكن واثق انه سيرزقك الأفضل ولن يتركك لكبر في غرقة متواضعة بمنزل زوج ابنتك او حتى منزل ابنك لكن اطرق بابه والح عليه بالدعاء
- اخي لم تخبرنا كم من الزمن انقضى عن ولادة آخر بنت عندك ( حفظهم الله جميعا ) بكل الأحوال انا متأكدة من حسن تقديرك
- بقي ان اخبرك بشئ انه احيانا تكون الحالة النفسية من توتر وخوف وقلق هي السبب وراء تأخر الإنجاب ... واستطيع ان استشف من خلال كلامك انه قد يكون لكلام العائلة من اخوة واخوات وعمات وخالات تأثير على نفسية زوجتك وأكيد هي تحبك وتحارب للحفاظ عليك حتى الرمق الأخير وهذا ما يجعلها في قلق وخوف وربما يكون سبب لتأخر الحمل
- الحمد لله قد رزقت ب 4 اطفال وهذه بادرة طيبة
- اذن فكر في مشكلتك ( واكيد لا نستنكر عليك الشعور الذي تحس به والضغوط الموضوعه عليك ) لكن نحتاج للتفكير بتعقل وحكمة بحيث لايظلم اي منكم بالموضوع لا انت ولا زوجتك والذي يتضح من ردودك ان انسان كريم لأن ما اكرمهم الا كريم وما اهانهن الا لئيم
- أجل فكرة الزواج قليلا او ضعها جانبا مبدئيا وابدأ بالطرق الأسهل
-الآن نعود لمشكلتك لدى زوجتك مشكلة تعوقها من الإنجاب صح ؟؟
لما لا تجلس معها وتريحا وتخبرها مثلا انك تحبها وانك متمسك بها وحاول ان تجعلها تتجاهل ولا تلقي بال لما يقال فأنت بذلك تزيل عائق
-الآن لنسعى للتداوي ومراجعة الأطباء عسى ان يكون على ايديهم الشفاء
في هذه الحالة ممكن ان تلجأ للتدخل الطبي من طرق الفرز وغير ذلك
- لعل الله امتحنك بذلك لتستشعر ان المرأة كذلك بحاجة لزوج يعينها على بر والديها فبر والديك واعن زوجتك على بر والديها فلعل دعاء يصادف وقت اجابة
-الآن بعد انقضاء فترة من الزمن قد يكون رزقك الله الولد الذي تقر عينك فيه وقد يكون لا ( لا قدر الله ) في هذه الحالة تستطيع اعادة النظر بطرق جديدة لحل مشكلتك وقد يكون الزواج احدها عندها تصارح زوجتك وهي ستلتمس لك العذر لأنك استنفذت السبل معها وكما يقال آخر العلاج الكي
- ولا تنسى كم ليلة قدر وكم يوم عرفة وكم فرصة متاحة لك للدعاء والتضرع لله ليمن عليك بكرمه
المهم هو اننا لا ننكر عليك احساسك ولا حقك بالإبن الذكر لكن لا داعي للتسرع فأنت لا زلت صغير واظن زوجتك كذلك ولازال امامكم متسع من الوقت تستطيعون المحاولة فيها وبنفس الوقت تربون بناتكم وتأسس صح ولو قررت مثلا الزواج بعد 5 سنوات لن تشعر زوجتك بالقهر ولا بناتك بأنهن مرفوضات وتأكد انك ستكون لا زلت صغيرا وقادر على الإنجاب
فتوكل على الله في كل امرك
فتخيل لو انك تزوجت سرا عن زوجتك وسمعت الخبر وانكسر قلبها ودعت عليك الا ترزق الذكر ابدا وصادف وقت اجابة هل ستمنع القدر وقتها ؟؟؟؟
طبعا اتمنى لك ان توفق مع زوجتك وترزق بالذرية الصالحة من الذكور
من زوجتك
وعندها اذا اردت الزواج بأخرى نلتقي في موضوع آخر وتكون بوضع نفسي أحسن
وفقك الله

آسفة على الإطالة

اذا تزوجت وحده ثانية يمكن تجيب لك الولد ؟؟؟ يمكن الله يرزقك منها بعشر بنات والله مايرزقك الوالد كلشي الله كاتبه لابن ادم زوجتك ماتستاهل وخلك معاها ورب بناتك تربية صالحة ولك الاجر وانشالله تدخل الجنة عن طريق تربيتك لهم