أدعوا لي بالصبر ....

والله رغم اني مارديت عليك من اول بس كل يوم انتظر ردودك وفرحت جدا برجعتك لزوجك وانشاءالله تكوني متهنيه علىطول :clap:

يا عزيزتي انا من فتره اتابع موضوعط الله يفرج همك وحبيت اعلق على هالرد(انا اعرف انه يحبنى) وهاذا اهم احساس بالنسبه لك (الحين هو رجع البيت ينام معانا )وهاذي بداية الطريق (واعتقد شايل فكرة الطلاق عن باله ، لأن وعدنى ان يدفع الأجار وهذا الشي وايد مهم بالنسبة لي)وهاذي الخطوه الثانيه (، وقال لي بالأمس أن راح يسافر للعمل الفلبين قال لي تعالي معاي مع البنت )ان كنتي واثقه من طيب نيته توكلي على الله وروحي يمكن تبدا المياه ترجع لمجاريها وبالذات راح تبعدون بس بشرط تكون عندك قدره على التصرف في وقت حصل شيئ اهم من هذا كله ضبط النفس ، (وانا يوم الجمعة قبل مجيئة البيت ذهبنا لمطعم وقدمت لـه شروطى مقابل سكوتى عن سهراته أنه يتصل يسأل عنى وما يهدد بالطلاق ويضحك معي ويعطينى حقوقي الشرعية دائماً وان يسفرنى ويطلعنى مرتين بالإسبوع بس بشرط ان ما يفعل اي معصية تسيىء لي وتجرح مشاعري انا وضحت له قلت له باعطيك الثقة فحافظ عليها ، وهددته اذا تأكدت ان يعمل شي يسىء لي راح أتركه من غير كلام ، وهو بعد ما قرأ الورقة وافق على شروطي وقال انا بعد لي شرو مثلا اني اضحك معاه وما افعل المشاكل واترك الغيرة والشك )هذا تصرف حكيم جداً(، من يوم الجمعة الحمدالله رجع البيت نام معانا ، بالأمس تغدى معانا وبعدها بالليل أتصل وسأل عني ، وانا كنت جالسة اقرأ القرآن دخل علي الغرفة الساعة 12 بالليل وسلم علي بصراحة ما كنت متوقعة ان راح يجي البيت ، قال لي انا تركت البيت اسبوع كأن شهر تارك البيت ، واحس فيه افتقد الأمان والطمأنيه اللي كان يعيشها معي ، لأني كنت ابرز له كل شي ، ونفس ما قلتى انشاءالله بالدعاء بالدعاء والله انا واثقة الله سبحانه وتعالى بيبشرني بهدايته .. اهم شي حبيبتى انه ما يضربنى وهو بلسانه يقول اصدقائي وسهرتي وطلعاتي ما راح يدومون مثل ما انت وابنتى تدومون لي)وكل هذا الي صار تطور للأفضل ( فهو اعتقد حس وندم لأن تركنا وطلع برع البيت بس هو مغرور .. ما يريد يبين لي ان تنازل وانا واثقة ان زوجي يحبنى وبصراحة هو حنون وغيور علي) ولانك انتي عارفه طبعه فانتي الوحيده الي عارفه شو افضل طريقه للتعامل معه وطبعا اكثر الرجال ما يتغيرون فجاه واني زي ما قلتي غروره هو الي ما بخليه يعترف باخطائه بس ندمه بيكون دافع داخلي في نفسه للتغيير(وانا قلت حق زوجي يطلقنى على أساس اليوم ، بس هو تراجع وما يبي يخسرني يقول انتى اكبر خسارة بحياتي...) هذا دليل انه يحبك وانك فعلا شي مهم بحياته بس اهم شي انك تدعين الله يوميا وفي كل وقت وحققي كل شروط الدعاء المستجاب لان الله قريب مجيب وهاذا الي انتي فيه ابتلاء وما بعد الضيق الا الفرج يا اختي ( الحمدالله انا مبدية كل ليلة اقرأ سورة الواقعة والبقرة والدخان والملك وأي سورة اقدر عليها) وهاذا الشي راح يحسن نفسيتك ويعينك على الصبر ( وصدقونى ثقتى بالله كبيرة ان الله ما يردنى خائبة.. راح يرجع زوجي لحضنى ولبيته وانشاءالله واثقة ان راح يترك اصدقاء السوء والسهر ، واطلب له دائماً ان الله يسخره لي ويدخل سخيمه بقلبه علي) الثقه بالله يا اختي هي اساس النجاح في حياتنا وانا بعد عندي ثقه انك راح تخرجين من هالزوبعه منتصره باذن الله
الله يصلح لك زوجك ويخليلك بنتك بس بعد سالفة انك تاخذي حذرك من سالفة الامراض حقك يا اختي لان الانسان ما يعلم الغيب بس هذا مو شك وقايه ومهما كانت نهاية الامر فكوني على ثقه ان الله يختار لعباده الخير ولاكن الانسان جهول ومستعجل
امنياتي لك بالتوفيق

اللهم آمين ياحبيبتي ..

حبيبتي فعلا انت جوهرة ثمينه ونادرة الوجود .. وفعلا كما قل زوجك بأنك أكبر خسارة في حياتي .. لا أملك إلا بأن أرفع يدي لله واطلب من الله الكريم رب العرش العظيم .. بأن يتقبل دعائي ..

اللهم وفقها يارب وسخره لها ولإبنتها .. اللهم آمين

اللهم حنن قلب زوجها عليها وعلى بنتها يارب .. اللهم آمين

اللهم أبعد اصدقاء السوء أولاد وبنات الحرام عن زوجها وقرب منه ابناء الحلال اللهم آمين يارب

اللهم انزل الموده والسكينة بينهم .. اللهم أنزل الحب والامان بينهم ..

اللهم لا تفرق بينهم .. اللهم لاتباعد بينهم ..

اللهم اهدي زوجها إليها ..
اللهم إهدي زوجها إليها ..
اللهم إهدي زوجها إليها ..
اللهم إهدي زوجها إليها ..

اللهم وفق بينها وبين زوجها واجمع بينهما على خير..
ا
للهم اجعلها قرة عين لزوجها واجعله قرة عين لها وأسعدهما مع بعض واجمع بينهما على خير..

اللهم اجعلها لزوجها كما يحب واجعله لها كما تحب واجعلهما لك كما تحب وارزقهماا الذرية الصالحة كما يحبون وكما تحب..

اللهم اهدها واهدي زوجها واجعلهما من أهل بيت صالحين..

اللهم اقر عينها بهداية زوجها وصلاحه وتقواه..

اللهم اقر عينها بالذرية الصالحة التي تدخل السعادة إلى قلوبهم وارزقهم برها..

اللهم إني أسألك باسمك الحبيب الكافي أن تكفيها كل أمورها مع زوجها مما يشوش خاطري ويسهر ناظري..

اللهم آلف بين قلبها وقلبه كما الفت بين قلوب عبادك..

اللهم سخره لها كما سخرت البحر لموسى..

والحمد الله والصلاة على نبينا محمد صلى الله عليه وسلم..

حبيبتي .. اعذريني لتقصيري .. وأتمنى من الله ان يستجيب لدعائي لأكون قد ساهم في مساعدتك ولو بشيئ بسيط

اللهم آمين


,,,,,,,,,,,,,,,,,,,,,,,شكرا اخ فادي ع الاطراء :o اخجلتم تواضعنا ,,,,,,

الحمدلله على هالاخبار الزينه والله ماتتوقعين اني على اعصابي طول هالمده وانا ادعيلك في صلاتي

يا اختي جزاك الله خير على وقفتك مع زوجك حبيبك و ابو بنتك الللي هي وابوها جنتك ونارك


حبيبة قلبي انت والله مثما قالوا الخوات جوهره لاتقدر بثمن وزوجك عارف هالشي والحمدلله بس شوي كبر على شوي غرور على شوي غباء وحماقات

خلوه يكون كذا بس ولا يهمك تراه ملكك انتي وبس


الحين مادام وعدك يتغير عيل ثقي فيه وخليه يعرف هالشي
وانتي بعد اوعدي نفسك تتغيري لاني بصراحه ولاتزعلين مني حسيت انه متضايق من بعض الاشياء اللي تسوينها

مثلا
الغيره /الشك /التجسس عليه / تتصلين فيه كل ساعه/ تطلبين منه يتغير/ تطلبين منه يبتعد عن اصدقاءه / اعيد واكرر مد البووووووووز

حياتي انتي قلتي انه عطاكي شروطه وانا حسيت ان هاي الشروط كانت مكتوبه على ورقه لو هالكلام صحيح شوسويتي بالورقه ؟
ابغيكي لو فعلا في ورقه لو ان مافي ورقه عيل اكتبي الشروط على ورقه

وعلقيها على باب كبتك من الداخل عشان كلما جيتي تغيرين ملابسك تتذكرين شروطه و تعرفين اللي يحبه واللي مايحبه فيك

اهم شي طنشي انا ما اقول طنشيه في البيت لا طنشيه لما هو بره البيت لاتتصلين كل شويه فيه خليك ثقيله خليه هو اللي يركض وراك و كلما جلس مع ربعه يحس بضيق و يحن لك انتي

حاولي تشوفين شو اهتماماته وهواياته بدون اساله مباشره وفاجئيه انك تحبين هالشي

مثلا انا قريت عن وحده عرفت ان زوجها يحب الحمام اللي نربيه في البيت راحت اشترت كتب و دورت ف الانترنت عن اي شي يخص الحمام و بدات تحب الحمام عشان خاطر زوجها و هالشي خلا علاقتهم تتقوى بدون ما يحس

مو احنا لما نتعرف على بنت مثلنا شو يجذبنا لها اسلوب كلامها هدوءها و مرحها و هواياتها و احيانا نتبادل الهوايات يعد


انا من رايي بعد اذن الكل طبعا ان زوجك حاس بملل في حياته ترا الحياة الزوجيه مو بس الفراش هناك اشياء كثيره ثانيه

مثلا

1- تبادل العبادات (الرجل حتى لو فاجر يحب الزوجه العابده ) خليه يشوفك تصلين شجعيه يصلي معاك القيام ويكون هو الامام والله مافي احلى من هاللحظه اللي يحس فعلا ان زوجته تتبعه تنافسوا على منوا يقوم ويقوم الثاني لصلات الفجر


2- تعلمي فن الاعتذار خليكي انتي دايما الاحسن لاني لو حتى ماقال يحس انك احسن منه لما اعتذرتي و لا تغاظيتي عن هفواته ولا اقولك سوي نفسك اصلا مادريتي انه غلط مثلا انا لما كنت اتصل بخطيبي وانا عارفه انه يتكلم ف الخط الثاني واكيدمع بنت كنت استهبل ولاكاني عرفت ان عنده خط ثاني عشان ما اسويمشاكل وما اقهر نفسي ولا اخليه يتعلق فيها لاني لما يتكلم عنها بالسوء يكرهني و يحن لها

3- تهادوا تحابوا سبحان الله كيف اللله حط حكمه في الهدايا يالله وقتها احين انك تهدينه هديه يشوفها طول الوقت علشان يتذكرك والمناسبه رجوعكم لبعض

شورايك لو شي ينحط في المكتب و شي ثاني يكون معاه على طول حتى وهو مع اصداقاءه
وشي يكون معاه في سفره

4- عمرك في حياتك لاتقولين له انا سويت وانا ضحيت وانا كم وكم وكم
ولاتتفكرين مجرد تفكير انك تقولين له انا في حياتي ماشفت معاك يوم حلو لان هالكلام يحبط عملك كلللللللللله عند الله تخيلي عند الله الرحيم الغفور مابالك عند زوجك

5- عمرك لاتقارنين بينه وبين غيره ولا حالك وحال غيرك لانك بهالطريقه تكرهينه بنفسك و في الشخص اللي تتكلمين عنه

6-لما تكلمينه دايما خلي صوتك واطي و ناعم و عمرك لاتسمعينه صوتك الي بالي بالك

7-لما يكون متضايق و معصب حتى لو كان جارج لاتعقدين الموضوع و تدققين على كلمه يقولها لك بالعكس اسكتي و اسمعيه للاخر ولما يخلص روحي سويله عصير بارد و خليه يشربه و بعدين لما يكون خلاص ها كلميه بصوت ناعم وحنون عن المشكله

8-لاتثقلين عليه بالطلبات لانك بتضرينه على حساب سعادتك و هو من النوع اللي يحسب هالشي ضدك حتى لو ماتكلم

9- حاسبي على كلامك معاه بالذات لما تكونين معصبه لانه الريال ماينسى و يحسب عليك بالكلام عكس اللي يبيه منك

10- لاتخلينه يغار عليك لان الغيره المفتعله تتحول الى شك والغيره الطبيعيه هي اللي تبني الحب ولاتفتعلين مواقف سخيفه عشان تحسسينه انك مرغوبه من قبل غيره لان هالشي اكبر غلط

11- لاتطلعين اسراره ولاتحطينه في مو قف انه يوم من الايام يسمع كلمه هو قالك اياه ولا شي سويتوه مع بعض من بره البيت حتى لو كانت امممه
لاتكونين من النساء اللي لازم زوجها يحلفها ماتخبرحد قبلا يقولها شي بالعكس خلي قلبك قبر لسرك
وخااااااااااصه المشاكل والاشايء الحميمه ترا ماتنقال

12- عمرك لاتمدحين حد قدامه صديقتك اختك ممثله لااااا والف لا ابدا لاتخلين وحده تحلو بعينه ولا تمدحينه قدام حد عشان مايلهفون ولاتنحسدون

13-الكلمه الطيبه صدقه عيل تصدقي كل شوي عليه شو المانه

14- داايما كوني انيقه و نظيفه و راقيه قدامه ولا من وراه خليه يتفاجا انك راقيه حتى في طريقة نومك حتى وانتي تغسلين الملابس وانتي تخمين البيت الرجل يحب البنت الراقيه

15- لومدحلك بنت ولا وحده لاتسكتينه ولاتغزينه بعيونك اسمعيه للاخر شوفي شو الشي اللي ركن عليه لانه لما يتكلم بتكتشفين الاشياء اللي يحبها في المراه مثلا خطيبي من النوع اللي دايما لما يتكلم عن وحده يقول كانت لابسه خواتم الماس كبيره
اها يعني يحب الخواتم الكبيره وتركيزه الكبير يكون على اليد يعني لازم اكون اا بعد من النوع اللي البس خواتم كبيره و اركز فب العنايه باليدين


16- حديثه مع اصدقاءه دايما اسمعي اللي يقوله عاد مو تتجسسين عليه لا خليكي قول ولاحظي من كلامه مع ربعه شو يحب شو ممايحب لان في ناس مكنوناتهم تطلع مع الاصدقاء

اه تعبت اعرف اني وايد طولت بس والله من خوفي عليك وحبي الزايد لك

بصراحه ناويه احط هالنصايح في موضوع جديد احس يمكن يكون مفيد:shy:



يالله طمنينا
وانشاء الله كليوم خبر جديد

شوفتي يا أخت نودو تجاوب الأعضاء معاكي؟؟


فعلا هاذول جدا حبابين ومهتمين بالكل ومشاركين بأحساسهم و خبراتهم.

واتمنى لك كل السعاده والله يحفظك لزوجك وبنتك آمين..

ترى بعدنا منتظرين النهايه السعيده منك, واكيد الله سبحانه ماراح يضيع صبرك طول مانتي على نياتك وقصدك تحمي بيتك وزوجك "انتي فعلا جوهره نادره لاتعوض"

مهما كان الوحده فينا لازم تصبر وتتنازل بعض الأحيان وخصوصا اذا كان بينكم أطفال , ترى الشتات صعب وخصوصا لي انا و تجربه انفصال الوالد عن الوالده بعد 25 سنه زواج !!!


واتمنى للكل الثبات والصبر,,
صباحي.

http://www.3roos.com/forums/showthread.php?s=&threadid=112947

دراعة ، الكئيبة ، بشائر الخير ، مرموم ، 3sooolah :shy: :shy:أشكركم على الكلام الرائع DarkAngel والبنات اللي ما ذكرت اسمائهم روبا 3faby
واللي نسيتهم ماشاءالله ماشاءالله ما توقعت اني مهمة عندكم وانكم تهتمون بشئونى ، الله لا يغير علينا والله لا يفرقنا عن بعض ، اشجان انثى بعد و oollaa الله يستر أنا اجازتى غداً والجمعة ولألأسف ما عندى كمبيوتر بالبيت خسارة بتوحشونى ، زوجى قال لي اليوم ما بيجى على الغدا الله يستر ، والله يعدى هاليومين على خير ومن دون مشاكل من فعايلة ، اتمنى هو يلتزم بالإتفاقية علشان انا بعد التزم ، ليكون هو متزوج وبيروح لها ألحين :eek2: وبغاها من الله اسكت :o هاها ها راح اشيل هالفكرة من بالي.
اتواصل معاكم واعطيكم اخباري انشاءالله صباح يوم السبت.
الله معاكم ومع السلامة .

عزيزتي .. نودو

افرحني حقيقة التطورات الجديدة .. والله يدووووومها يا رب عليكم

بس لازم تكوني بالويكند كوووووووول ... عشان ما تخربي الي عملتيه والتزمي بنصايح الاخت عسووولة ولا تتصلين عليه ابدا ... عشان هو الي يحن لك ويتصل فيكي ... يعني تدللي شوي:cool2: ... وحلو بعد مثل ما قالت تهدينه هدية عشان تتوثق علاقتكم اكثر .. الله يهديه ويبعد عنه اولاد الحرام يااا رب.

طمنينا عنك اكثر .. ودعواتنا القلبية الحارة لك :smile:

لا تنسوني من خالص دعواتكم :confused:

http://www.3roos.com/forums/showthread.php?threadid=111082&referrerid=14651

اتمنى تقرين هالرابط و تطبعينه لو ماشفتيه قبل لانه وايد مفيد
وبحاول ادور لك في المنتدى على اللي ممكن يكون قريب على مشكلتك

وانشاء الله مايهمك شي خلاص زوجك ورجعلك شو هالطمع بعد

اختي لو كان متزوج ع الاقل احسن من الخيانه بس لاتطرينله الموضوع وطنشي كل الظنون اللي تخطر في بالك


وخليه يحس ان الويك اند ماك طعمه غييييييييييييييييييير فاهمه قصدي:D2

اختي العزيزة الله يكون بعونك وفراق الزوج خاصة اذا تحبية مش سهل ابد بس خيانته ليكي ماهي شي سهل ايضا وكرامتك فوق كل اعتبار وما راح نقول لو لان لو الحين ابد ما ترجع اللي صار بس نقول خلي كرامتك فوق كل شي علشان يحس فيكي ويلين قلبه عليكي لان الرجل ما يحب الشي السهل يحب الوحده الصعبة وانا ما املك الا ادعي لك الله يرجع اللي بينكم ويلين قلبه لك ويهديه

اللهم يامقلب القلوب قلب قلب زوجي لي
اللهم اجعلني في قلبه واجعله في قلبي
اللهم يامن جمعتني معه في الدنيا..اجمعني معه في الاخرة
اللهم جملني في عينه وجمله في عيني
اللهم اغننا بحلالك عن حرامك
اللهم احفظ لزوجي عقله ودينه
واحفظه من الفتن ماظهر منها وما بطن
ومن فتن النساء
اللهم اكتب لي الصلاح معه
اللهم احفظنا جميعا وذريتي
اللهم انك قادر علي ذلك


هذا دعاء كتبت لي اياه قبل فتره الاخت قلب العصفوره

جزاها الله خير
اتمنى يعجبك لما ترجين من اجازتك :up:

الله يوفقك

ويسخر لك زوجك ويهديه ويرزقك بالذريه الصالحه
اللهم آمين

السلام عليكم ورحمة الله وبركاته


والله يا اختي.. انا تميت صاحيه للصبح أقرا كل الردود على مشكلتج..
ما شاء الله عليش عاقلة وواعيه..انا عكسش تماما بعصب واحتمال أكسر البيت فوق راسه على بوكسين في وجهه :D2 طبعا بعدني ما تزوجت ..

ربي يهديه.. ويعينه على الطاعه.. وترك أصدقاء السوء
ويسخره لكم.. ويحنن قلبه عليكم

انتي طيبة تستاهلين كل خير.. وانا حاسه ان الله بيجازيش خير

طمنينا عنش

:shy:

الله سبحانه وتعالى يصيرج ويكون في عونج ..

الله يصبرك.....

الحمد لله أختي ندو على هذي التطورات الطيبة

الله يهديكم و يصلح بالكم

:pain:ماشاءالله ، :clap: دعواتكم حلوة لي والله اني فرحانة على الهم اللي انه فيه :eek2: ، الله يخليكم يارب ويبعد عنكم الهم ، وادعوا الله يفرج كربتى.
اخباري من يوم الأربعاء:
1ـ .طبعاً على الغدا ما جاه البيت وما اتصل جانى الساعة التاسعة والنصف وذهبنا للمجمع وتعشينا وسألنى تريدين تذهبين للسينما او تروحين البيت ونجلس مع ابنتنا نلعب معاها..:shy: قلت له خل نروح البيت نلعب مع البنت بصراحة هي توحشنى كثير لين افارقها ، وكانت تبكي لين خرجت معاه.
2. الخميس تغدينا ، وبعدها العصر كان بيبدل ليخرج (طلع من المخبى) رصيد وشهق وعمل حركات بعينه ، يعنى افهمى يا غبية انا شاري شي بهذا الرصيد ، وتهاوشت معاه الا تراوينى شنو بهذا الرصيد ، قال والله انا شاري شي حق وحده ، وانا كنت متضايقة قلت وصلت فيه المواصيل يشتري حق وحده شي وانا لا ، المهم جنني وجنني الى ان فلت الرصيد علي وقال اذا ظلمتينى مرة ثانية حلف ان ما يرجع البيت وينام ، المهم الرصيد كان (رصيد أكلنا الليلة اللي قبلها من المجمع :pain:) ، وانا قلت له لازم تيجي البيت وتنام بسك ، تعبتنى قال خلاص باجر باجي الليلة مستحيل ، المهم خرج وما اتصل طبعاً البنت الساعة 11 بالليل كانت تبكي وتناديه آبي بابا آبي بابا ، قمت واتصلت فيه وكلمته عادي هاي بنتك تريد تكلمك المهم كلمها وقاللها انت نامي مكاني على السر انا باجي بعدين وبنام جنبك.
3. جاه البين الساعة الرابعة صباحاً.... وسويت روحي نائمة.
4. بالأمس يوم الجمعة ذهبنا لمنزل أهله ، انا كنت بالغرفة وهم بالصالة البنت كانت تبكي تريده ، وانا نازلة لهم كنت اسمعه يتحدث عند أمه عنى.:confused: :confused: :confused: :confused: :confused: :confused:
من القهر ناديته بغضب وقلت له تعال اخذ بنتك وانا ذهبت للغرفة وصكيت الباب بقوة... طبعاً حس ان فينى شي .
5. خرجنا من منزل اهله وذهبنا للمجمع وانا مقهورة منه أن ليش يعقر فينى عند امه .. المهم ودينا البنت للألعاب وعشاني واحنا بطريقنا للبيت قلت حق بنتى ماما اتصلي بالشرطة خل يجون ياخذون بابا ، بابا موب شاطر يعقر في ماما عند اهله .. :pain: ، بعدين قال انا ما عقرت امي سألتنى تريد تطمن علينا شخبارك مع زوجتك صرتوا احسن الحين (وانا رديت عليها :eek2: (كنا بنصير احسن لكن هي خربت كل شي) كل تظلمنى وتظلمنى وانا قلبي حنون كل اسامحها ، المهم قلت له انت ما لك حق تجلس وتعقر فينى عند أمك ، قال ليش امى موا عدوتك تريد تطمن علينا وما تريدنا تفترق ، الحق يقال بصراحة امه تعرف ان ولدها غلطان بس كل تنصحنى وتقول صبري يا بنتى بتحصلين اجر عند الله لا تخربين بيتك تحمليه راح يتغير بالنهاية ، اهم شي انه يحبك ويحب ابنتك وشاريك.
المهم واحنا بطريقنا للمنزل وضحت له اني واحبه واني احاول المستحيل ان احافظ على البيت واستقرارنا ، قلت له البنت صارت تفهم كل شي وانا مش مستعدة اعيش بنتى بمشاكلنا علشان تتعقد ، اذا انت مش راضي تتغير وتعمل المشاكل دائماً فنتطلق وايد احسن ، رد علي وقال والله انا اللي احبج وآموت فيج بس انت عقلج صغير وكل تظلمينى وانا ما احبك تفتشين بأغراضي وخصوصياتي.. المهم طبعاً البارحة عيد الميلاد كان(الكريسماس) كشخ وطلع ما اعرف بأي داهية ذهب ورد لي الساعة الثانية والله ان البنت ما نامت مسكينة كانت جالسة تنتظره ، بعد مارجع الا يقول لي عندى لك سفرة معتبرة ، ما اعرف وين راح يسفرنى بالنهاية.
هاي آخر اخباري خلال هاليومين.

المهم نسيت آقول لكم اليوم بيعطينى 30 دينار لكي اشتري بهم مستلزمات البيت ، والشهر القادم بيدفع لي ثمن الأجار بعد.
الله يهديه ويبعد عنه بنات الحرام ، واصدقاء السوء ، والحقيرة المنحطة سكرتيرته الوسخة الي عنده بالمكتب.. الله يزولها ويمحيها محي من الدنيا.

اختي معليش انتظري هاليومين يمكن الله يهديه
لانه صار شوي شوي يتعدل والله يهديه
والله كريم سبحانه يوم من الايام بتشوفين الفرج من عنده ولاتيأسين
وبنتك حاولي اذا شفتي المسأله فيها مشاكل ابعديها عنكم ووديها غرفتها او عند الخدامه واسأليني انا والله بتتأثر
والله يهدي زوجك والله كريم الله كريم ردديها في قلبك الله كريم

حبيبت قلبي اسمحيلي بس انا اليوم زعلااااانه:down: منك حيييييييييل لانك في هاليومين هدمتي السور اللي بنيتيه خلال كل هالفتره الطويله
(u)


. (((((الخميس تغدينا ، وبعدها العصر كان بيبدل ليخرج (طلع من المخبى) رصيد وشهق وعمل حركات بعينه ، يعنى افهمى يا غبية انا شاري شي بهذا الرصيد ، وتهاوشت معاه الا تراوينى شنو بهذا الرصيد ، قال والله انا شاري شي حق وحده ، وانا كنت متضايقة قلت وصلت فيه المواصيل يشتري حق وحده شي وانا لا ، المهم جنني وجنني الى ان فلت الرصيد علي وقال اذا ظلمتينى مرة ثانية حلف ان ما يرجع البيت وينام ، المهم الرصيد كان (رصيد أكلنا الليلة اللي قبلها من المجمع ) ، وانا قلت له لازم تيجي البيت وتنام بسك ، تعبتنى قال خلاص باجر باجي الليلة مستحيل )))

زوجك الله يهديه قاعد يلعب باصابك لانه عاجبنه انه يحس عمره مطلوب و عنده حد يغار عليه وموهامنه انه بهالشي يحرق اعصابك
وانتي خليتيه يتمادا و تمادا في تصرفاته وكانه يبي عليك الدقه عشان يتضارب ويمسك عليك هالشي وكل شوي يذلك ويقول بطلع من البيت
والدليل انه تعمد يطلع الرصيد و يتمقل فيها ويسوي حركات لانه يبي يلفت انتباهك و يحرق اعصابك :eek2::eek2:
الظاهر كان يبي يمزح معاك وانتي فهمتي غلط وخربتي على عمرك او انه كان يبي يتضارب عشان يقدر يتمادا بالسهر ع كيفه وانتي للاسف ساعدتيه ع السهر بره :s2

((((الجمعة ذهبنا لمنزل أهله ، انا كنت بالغرفة وهم بالصالة البنت كانت تبكي تريده ، وانا نازلة لهم كنت اسمعه يتحدث عند أمه عنى.
من القهر ناديته بغضب وقلت له تعال اخذ بنتك وانا ذهبت للغرفة وصكيت الباب بقوة... طبعاً حس ان فينى شي .))))

اولا حتىلو سمعتيه ولا سمعتي حد من اهله يغلط عليك المفروض تخلينهم :up:يستحون على دمهم بطريقه جدا راقيه مو بالضرابه وتكسير البيبان سوري بس هذي حركات يهال انك تكسرين الباب و تعصبين لانك تبين الكل يتكلم عنك بالخير لا لا لا انت لازم تجبرينهم انهم يتكلمون عنك بالطيب بطريقه ثانيه بقولك كيف

انتي داشه الصاله سمعتيهم يتكلمون عنك ردي الغرفه و هدي اعصابك بس لاتتاخرين عشان مايكونون لحقوا يغرون الموضوع ونسوه دخلي عليهم بابتسامه جميييييييييييييييييييله وساحره وسلمي واقعدي قريب من اللي كان يحش فيك وابدي اي موضوع حلو مثلا عمتك اللي كانت تتكلم عنك قوليلها ماشاء الله عليك يا عمتي انتي اليوم ناويه تذبحيني اكلك يجنن كلت لين حسيت عمري بموت ولا دوري شي جديد في البيت و تكلمي عنه و هن ذوق اللي مختارينه :up:

وخليك لطيفه و حبوبه عشان الكل يخجل من نفسه وصدقيني انا مجربه هالشي تدرين اني كنت اشوفهم يلتفتون لبعض و يغزون اللي كان يحش فيني وفي عينهم ميت سؤال واستنكار كانهم يقولون حرام عليك خليتنا نظلم البنت وهي اميره وحبوبه :cool2:

حياتي خذي اللي حوالينك بالسياسه :shy:والمسايسه مو بالضراااااااابه

وقلتلك من قبل بدون مد بوز وضرابه
وبصراحه صدقه زوجك انتي خربتي كل شي لما استوت سالفت الرصيد ) حاسبها صح يبيك تطلعين انتي غلطانه عشان يبري ذمته قدام امه

تفادي المشاكل مهما كان السبب واهم شي لاتتكلمين قدام البنت ابد عن الضرابه:pain:
يابعد عمري ماقلنا عطيه بولبااااااااااااااااااس يعني طنشي طنش طنشي ولاتذكرين البنات الثانيات خير شر لاقدامه ولا من وراه:down:

وبعد حبيبة قلبي تذكرين لما قلت لك سوي لسته عن الايجابيات والسبيات ؟مادري سويتيها ولا لا بس ابيك تسوين نفس اللسته لنفسك هالمره وتكتبين فيه اللي يقوله زوجك عنك وحاولي تصلحين اخطائك وتصرفاتك بدلما اتخلين زوجك يمسك عليك اشياء صغيييييره ويكبرها لان الاشياء الصغيره سواء كانت سلبيه ولا ايجابيه لما تتراكم تكون نتيجتها كبيره جدت

ارجو اني اكون ماجرحتك يالغاليه بس حبيت اكون صريحه واكلمك بعقل مو بالعواطف لانك محتاجه للنصيحه مو المجتمله :pain:

لاتنسين اللي يقول (يابخت من بكاني:eek2: وبكا عليه:confused: مو اللي ضحكني:D2 وضحك الناس عليه:down:)

ام انوار ، عزونه ، h.b.a مشكورين على دعواتكم لي والله انا مستحيييييية منكم وايد وايد :o :o :o :o انا ما اقصد اني اخرب صج انا اعرف اني هدمت وزوجي يقول انتى ما قاعدة تلتزمين بالإتفاقية انت طول عمرك جيذي عمرك ما بتتغيرين الشك بيذبحك وبيذبحنى معاك ، وانت عقلك صغير ، بس لا تلوموني تره صعب اذا انا اعرف ان يخونى وانشاءالله اكون ظالمته وساكته ، تره احس ان قلبي يحترق اشوف زوجي يعامل ويكلم ويضحك ويعطى وقته لغيري وانا لا ، آموت ت ت ت ، تره صدقونى الي امر فيه مو سهل ما اعرف احس انى تشبعت من عمايله ان حتى ما فينى طاقة للمشاكل ، الحين قاعد يقول ويعطينى مقدمات ليلة راس السنة بيطلع مع أصدقائه نفس البارحة ، قلت له تحلم اصلاً كفاية البارحة كنت معاهم وكانت ليلتى وليلة راس السنة بتكون ليلتى اريدك تكون معاي ، ان قلت بتروح مع أصدقائك والله لا اعمل لك المشاكل ،، الله يستر انا قصدي نروح مطعم ثم نرجع البيت والحمدالله ما احب اذهب للفنادق او الأماكن اللي بيها السهر والشرب بالعكس اريده بس حوالي على الأقل بهالليالي اللي بها مسخرة وقلة ادب يكون مع زوجته ولا ان يكون مع غيري ، انا ما اعرف اصلاً البارحة طز بأي داهية ، ولا بيقول لي ، آه لو تعرفون ما ذقت النوم البارحة لأني كنت افكر وين كان واكيد كان مع بنات الحرام واصدقاء السوء انا متأكدة ، لأن احنا المسلمين ما عندنا حفلات بهاللليلة فأكيد استغفرالله ما اريد بعد اظلمه يمكن كان مع الحقيرة سكرتيرته طلعها وونسها واشترى لها هدية عيد الميلاد.
آه ما تصدقون بطنى يعورني لين افكر هو مع من ، ما تتصورون النار اللي فينى احس قاعدة آمو و و و ت ببطىء من فعايله.... يارب الى متى اعيش حياتى جيذي ، حسبي الله ونعم الوكيل ، الله لا يوفق اي وحدة ناويو تخرب حياتي وتلهف زوجي منى انشاءالله تصيدها السكتة قبل ما تفكر تاخذ زوجي ، واتمنى زوجي يرجع لرشده ويفكر فينى وفي بنته شوي البنت تموت فيه ، ما اريد احرمهم من بعض حرام. . وحرام اللي يسوي فينى يخلينى جيذي على طول دموع بعينى وموب مستانسة بحياتى.