كاتب الرسالة الأصلية : amaladel
على فكرة يا بنات انا كمان جربت intemate wash - female hygine اللي قالت عليه برايد و انصحكم باستخدامه لانه فعلا ممتاز و احسن من الصابون
و على فكرة نزلت منه مناديل زي المناديل المعطرة كده تقريبا انا لسة مجربتهاش بس طلبتها الشهر ده و حاشوف اخبارها ايه و اقولكم
كاتب الرسالة الأصلية : amaladel
تعرفي انا جربت من لونا بلاشر بس و كان جميل بس معجبنيش روجاتها قوي، اما اماندا جربت منها الماسكرا السوداء و هي فعلا حلوة و عندي درجة روج منها رقم 8 و اسمه Amanda Mega Shine بصراحة درجة على روز لون الشفايف و ناعمة و رقيقة جداا
كاتب الرسالة الأصلية : bridetobe
:confused:ازيك يا سمسم
أبدا مش عارفة أنزل الصور بتاعة فرحي في الأول كان بتطلع لي ماسيج انه غير مسموح بتحميل أكثر من 5000 بس والله كانت الصورة أقل كثير دلوقت مش بينزلها خالص من أساسه ولا في حتى ماسيج :confused::confused: والسايت فظيع وبطيييييييييييييئ بشكل :pain:
ما علينا وانت كمان اختى ياجميلة ربنا يجعلنا كلنا من المتحابين في جلاله ويظلنا في ظل عرشه يوم لا ظل الا ظله
شوفي المرتبة كويسة قوي ومش هتلاقي غير دول في مصر احنا مش متعودين على السفنج أبدا يعني مش بنستسيغها في جهاز العروسة فهماني بما ان زوجك وأهله مصريين :shy: فانتي لاما تجيبي قطن لاما تجيبي المراتب دي ووالله مش هتندمي لو جبتيها صدقيني:up:
أنا جربت من أوريفليم غسول اسمه intemate wash - female hygine حاجة كده ده غسول للمناطق الحساسة رائحته هايلة وجميلة وطبعا أحسن من الصابون
بصراحة الروج بتاعهم ما عجبنيش وغالي بس في افون (على فكرة في مصنع في مصر اسمه افون في 6 أكتوبر)
بالنسبة لأماندا فيها نفس الحكاية بس بـ 15 جنيه وعبواتها مش بنفس شياكة لونا بس برضه جميلة. أماندا كمان عاملة بلاشر بألوان جديدة تحفة وسعره ايه 13 جنيه (تصوروا ) كمان الأي شادو بتاع لونا هايل (مائي) 3 ألوان بـ 20 جنيه.
عندك طبعا في ألوان السواريهات والجليتر في بوبا (لا يعلى عليها) بس سعرها غالي يعني 4 ألوان افتكر بـ 150 جنيه.
على فكرة بقى في نوع شور جيل هايل مصري مية في المية وتحفة اسمه بودي أند ناتشر ، بالفواكه طبعا وأنا بأموت في الفراولة عنده والتوت وسعره 12 جنيه 500 ميلي يمكن تلاقوه دلوقت بـ 15 جنيه مشكلته انكم مش ممكن تلاقوه في أى حتة يعني أنا كنت بألاقيه في سوبر ماركت مترو فرع المساحة وفي الجراند مول المعادي في صيدلية في الدور الأول أفتكر
أتمنى أكون أفدتكم
نسيت أقوللكم على الروجات في تشاو (مصري برضه) وفي لونا وأماندا بس أنا جبت كله من تشاو عندهم لون بالجليتر للسهرات جميل وجبت بني وروزات لأني بأموت في الروزات وسعر قلم الروج 10 جنيه لونا أفتكر كان بـ 27 جنيه والاثنين حلوين ومصري في طبعا ماركة فرنساوي اسمها سارة على ما أظن دى برضه حلوة قوي وسعرها كان 27 جنيه بس أنا مسكت نفسي وتمسكت بالمقاطعة وقلت المصري يكسب (الفرق مش كير قوي على فكرة) وأنا شخصيا شايفة ان لونا واماندا وتشاو في الروج أحلى من افون وأوريفليم
كاتب الرسالة الأصلية : bridetobe
انتي فين يا سمسم؟
كاتب الرسالة الأصلية : eman_s25
ازيكم يا بنات عاملين ايه
انا معلش هاخصص ردي انهارده لياسمين لاني حاسه انها محتاره ومشتته
بصي يا ياسمين اول حاجه انصحك بيها انك تكتبي كل معلةمه تفيدك البنات بيقولوهالك علشان ما تنسيش وتسالي عليها تاني وطبعا قسميهم يعني الفرش لوحده والنجف لوحده والستائر وكروت الفرح والكوافيرات والماكيرات وغيره وغيره فاهمه قصدي
ثانيا هقولك على محلين للفرش اعتقد هتلاقي عندهم الموديلات اللي انتي عايزاها بس هما اسعارهم غاليه شويه
البيت الابيض وده هتلاقي فرع له في العقاد مول
والتاني الهابيتات وهتلاقي فرع له في اول عباس العقاد وواحد في اركيديا مول وكمان في محلات صغيره في مدينة نصر ومصر الجديده زي ما البنات قالولك
وياريت يا ياسمين تتابعي معارض الديكور والاثاث اللي بتتعمل في قاعة المؤتمرات او فندق سمراميس زي معرض لاكازا واندور وغيرهم هتلاقي فيهم حاجات تعجبك
اما بالنسبه للاضاءه عندك ثري برازر وكمان السراج ودول في مصر الجديده شارع الحجاز وعندك في مدينة نصر هاني مكس بالاضافة طبعا لباقي الحاجات اللي البنات قالولك عليها
بالنسبه للستائر اشهر محل هو قصر بيان اللي في مصر الجديده بس اسعاره غاليه نار
اما الوكاله فيها حاجات حلوه قوي واسعار معقوله بس بالفصال ومكانها زي ماقالتلك برايد على الكورنيش جنب مركز التجاره على طول ولو عايزه تروحيها وتبقى فاضيه روحي اي يوم فترة الظهر من الساعه 11 لحد 3 هتلاقيها معقوله
طبعا كل محلات الستائر بتفصل او بتدلك على حد يفصلك الستائر فممكن تتفقي عن طريقهم
اما بالنسبه لدرب البرابره فهي معروفه جدا في العتبه سهل توصليلها بتاكسي او المترو وبرضه تنزلي وقت الظهر علشان الزحمه هتلاقي هناك بتوع النجف بس الموضو محتاج منك لفه كويسه لانك ممكن تلاقي عندهم بالصدفه كده حاجات على زوقك وتعجبك وكمان عندهم تابلوهات اما الورد المجفف فانتي ممكن تخليهم يعملوا ليكي على زوقك
وكمان عندهم شمع العروسه وسبتت الورد وكل الحاجات اللي ممكن تحتاجيها
الناحيه التانيه من الشارع هتلاقي بتوع الكروت وفعلا عندهم كل الاشكال والانواع واكيد هتلاقي حاجه تعجبكم عندهم واشهرهم فعلا خطاب وله فرع في ميدان الجامع في مصر الجديده زي ما البنات قالولك وفرع تاني في العباسيه بس ميزة درب البرابره ان الاشكال كتيره جدا والاسعار افضل
في بقى ناس اللي بيعملوا تجهيزات الافراح يعني تتفقى معاهم وتقولي لهم على القاعه اللي اختارتيها وهما عليهم الباقي من تنسيق مراسم الفرح والكوشه وزينات المدل وفقرات الفراح وكسوة الترابيزات والكراسي وكروت الفرح وتورتة الفرح وشمع العروسه والجيرب بتاعها وكل حاجه تخص العروسه والفرح ودول تلاقيهم في معرض تجهيزات العروسه اللي بيتعمل في الصيف والاعياد في فندق ماريوت او في مجلات زي ويدنج ايجبت وا بلاك اند وايت وهتلاقي المجلات دي في كارفور او الفا ماركت او وسط البلد
بالنسبه لمستحضرات التجميل انا عن نفسي معظم حاجاتي من ايفون واوريفليم انا ارتحت في منتجاتهم
اما بالنسبه لللانجيري فحبيت اقلك ان في ماركتين انا اشتريت منهم حلوين قوي بس غاليين شويه يعني السعر يبدا من 100 جنيه لحد 350 مثلا
اول واحده اسمها اوليفيا لينز ودي معقوله شويه وموديلتها رقيقه قوي وكمان الوانها جديده شويه
الثانيه اسمها دوريل ودي غاليه شويه بس حاجاتها حلوه
اما بالنسبه للجيرب ففي محلات ورد كيتير قوي في المهندسين والزمالك ومصر الجديه ومدينة نصر عندهم كتالوجات تختارى منها الشكل اللي يعجبك او ممكن تجيبلهم صورة عجبتك يعملوهالك بس خلي بالك ان انواع الوردكمان ليها مواسم
يعني مثلا الجيرب بتاعي اللي انا نزلت صورته عملته عند واحد في الزمالك وكلفني 130 جنيه ووصلهولي لحد البيت يوم الفرح
اما اخر حاجه عايزه اقولهاك ان الكوافيره او الماكيره مش لازم تكون مشهوره علشان تبقى كويسه لان فعلا في منهم بقوا مغرورين وغاليين على الفاضي المهم انها تبقى حبوبه وانتي مرتحاله وتضمني اناه هتلتزم معاكي في المواعيد ومش هتقلب شغلها معاكي علشان تلحق شغل تاني
