وسيم و شهد

يالله..شوي وابكي...يلا ريمي كمل نحن فانتظار

يا الله ريمي والله قلبي وجعني كملي حنا في انتظارك

ظلت شهد جالسه على الارض لفتره اوكلما كانت تحاول تقوم من مكانها ما قدرت .. فشهد منذو ارتباطها مع وسيم وهي كل يوم كانت تبني لها حلم حتى صارت عندها مدينة احلام بكاملها .. تصوروا مدينه كانت تشتغل في بنائها لمدة سنه ونص ليل نهار .. صيف وشتا وفي لحظه اوفي طرفة عين ينهدم ويتحول الى ركام .. صدقوني ما اعرف كيف اصف لكم حالها بس كل الي اقدر اقوله ان قلمي عجز ان يكتب عن معاناة شهد .. حاسه ان قلمي لاول مره يخوني وعباراتي ماتت قبل ما تشوف نور حبرقلمي .. فهي صارت تفكر في كلام وسيم لها فكل كلمه من كلاماته انحفر في قلبها اوظلم حفور حتى بعد مرور 16 سنه عليه .. فمو هين على شهد تسمع من وسيم عن خطوبته .. انا أعتقد ما بيكون هين على اي وحده تسمع من حبيبها عن ارتباطه بشخص اخر سواء كانت خطوبه او زواج .. فهي تألمت واكثر شي الي خلاها تتألم أنها ما راح تسمع صوته . .ما راح تسمع ضحكاته وسوالفه عن عمله وأهله .. عن احلامه وطموحاته .. فهي راح تحن لدلاله لحبه لكلماته .. واكثر شي راح تحن لدفتر خواطره ولقلادته
هي حست انها تبي تكلم حد .. تخبر حد عن الي صار معاها بس منو؟ شوي شوي حاولت تقوم من مكانها وراحت لمكتبة ابوها .. شافته لابس نظارته اوقاعد يطالع كتابه .. هو شافها تدخل بهدوء وعيونها منتفخه وحمرا .. وقفت قدامه اوقالت لابوها : انا اووسيم انفصلنا
ابوخليل انصدم بس تمالك نفسهورد : خير .. ليش؟
شهد : ما اتفقنا وهو خطب بنت عمته
ابوها حس بألم بنته اوما سألها عن سبب خطبت وسيم .. هوراح لها اوقعدها على كرسي اوهو قعد قبالها وقال لها : وانتي ليش حزينه .. لانكم انفصلتوا ولا لانه خطب وحده غيرج؟
شهد : الاثنين بس صدقني يابوي انا فرحانه له
ابوخليل : المفروض تفرحين لنفسج بعد
شهد : ليش افرح لنفسي؟
ابوخليل : لانج خضتي تجربه علمتج معنى الحب .. علمتج كيف تحبي اوتعطي .. شهد الحب خلاج انسانه قويه .. انسانه متمسكه بمبادئها وبالقيم والافكار الي تؤمن فيها .. ما ابيج تشوفين من منظار مظلم .. من منظار ان وسيم راح عنج واخذ وحده غيرج .. ابيج تشوفين من منظار اخر .. منظار الحياة والعطاء .. انا كل الي ابيه منج الحين انج ما تضعفي ولا تنهاري لان الحياه حلوه فليش نعيش في خرامة ابره والحياه اكبر من هاي الخرامه
شهد ارتاحت من كلام ابوها بس ظل الالم والحزن مسيطر عليها وبصراحه ما تنلام .. فعلى الحب الي حبوا بعض ما كان هين عليها .. اوما اقول غير الله يصبرها على بلائها
وسيم لما سكر تليفون عنها حس بألم في ضلوعه .. فهو ظن انه لما بيقول لشهد عن خطبته راح يشفي غليله .. راح يحس بطعم الانتصار .. لكن كل الي حسه ألم وحزن .. فهو صدقوني الى الان مستغرب حتى بعد مرور سنين من عمره انه كيف قدر يقول لها انه خطب بنت عمته بهاي سهوله .. كيف هان عليه يقول لحبيبته انه راح ياخذ وحده غيرها .. كيف؟
وفي نفس الليله ابوخليل خبر زوجته عن سالفة شهد مع وسيم .. ام خليل استغربت اوقالت : ليش انفصلوا؟ هي ماقالت لك؟
ابوخليل : لا وانا ما سألتها
ام خليل : ليش ما سألتها؟
ابوخليل : لانها لو كانت تبي تقوله لي جان قالت .. انا خليتها على راحتها بس والله البنت عورت لي قلبي
ام خليل : بصراحه انا فرحانه لاني كنت احاتي بعاد شهد عنا كنت افكر في غربتها وعيشتها مع ناس احنا ما نعرفهم
ابوخليل : شوفي يا ام خليل ما ابيج تجيبين ذكر وسيم قدامها ولا اقولج ما ابي اسم وسيم ينذكر في بيتي بعد الحين .. ابي شهد تعيش حياه طبيعيه خاليه من العقد .. سمعتيني؟
ام خليل: ان شاالله من عين هاي قبل هاي
وفي يوم الثاني راحت شهد للجامعه .. اوشافت نور وطفول يتناقشون في موضوع البحث وقالت لهم : هلا بطالبات العلم
نور : هلا فيش .. وينج تأخرت اليوم عن المحاضره
طفول : أكيد كانت تحلم بحبيب القلب وسيم
ولما سمعت شهد اسم وسيم دمعت عيونها
نور : شهد خير شو فيج؟
ظلت شهد ساكته ودامعة العين
طفول : شو صار لج تراج بدموعج طيحتي قلبي في رجولي اوما قادره امشي شوفي
اوسوت نفسها عرجه
هني شهد ضحكت ما بين دموعها وقالت لطفول : والله انج سخيفه وبايخه بس احب حركاتج .. وسكتت شوي واخذت نفس طويل وقالت لهم : وسيم خطب بنت عمته
نور وطفول في نفس الوقت : شو؟؟
شهد ما قدرت تكرر هاي العباره مره ثانيه لانها اذا كررتها راح تنفجر من الصياح فقالت لهم : مثلما قلت لكم
نور : انتي متأكده؟ يمكن الي قال لج غلطان ويبي يمزح معاج
طفول حطت ايدها على جبين شهد وقالت: او يمكن قاعده تحلمين
ابتسمت شهد ابتسامة الحزن وقالتلهم : صدقوني اتمنى اني كنت نايمه أو قاعد حد يمزح معاي بس هاي هي الحقيقه
نور: وانتي شو دراج منو قال لج؟
شهد : امس بالليل وسيم اتصل فيني وخبرني واسمها منال
طفول : بس ليش؟ والله خليني أرجع لاهلي ان ما رحت عنده بالمكتب وشرشحته مب انا طفول .. شو بنات الناس عنده لعبه
شهد : لا تلوميه.. فأنا السبب
نور : كيف؟
شهد : تتذكرون الاغراض الي بعثت له؟ هو على باله اني بعثتهم عشان ابي أنفصل عنه هو ظن اني ما أحبه وما ابي ارتبط بيه .. هو اعتقد اني حطمت كبريائه اودست على كرامته وحبه
طفول : وانتي يالغبيه ليش ما قلتي له الحقيقه؟
شهد دمعت عيونها وقالت : كيف اقول له؟ بالله عليكم قولوا لي كيف اقول له؟ وهو اول ما اتصل فيني قال لي عن خطوبته وطاح فيني يأنبني على فعلتي .. حسيت في ذيج اللحظه ان لساني انعقد من زود الصدمه .. ما قدرت اشرح له .. حسيت ان ارسالي لاغراضه في نهايه طلع لصالحه فأهله ارتاحوا لفكرة خطوبته لبنت عمته ومثلما يقولون القريب أولى من الغريب
طفول وهي تقلد شهد: القريب أولى من الغريب .. سمعيني عاد يا شهد انا ما كنت اتصور أني راح بصادق وحده غبيه مثلج .. ليش ما قلتي له الحقيقه .. كيف تقبلين واحد ياخذ عنج فكره انج انسانه مستهتره وغير مباليه؟ وأنا استغرب من معتوه هذا الي أسمه وسيم .. كيف يستعجل ويروح يخطب وحده خلال اسبوع من دون ما يتصل فيج بصراحه أنتوا كنتوا ملائمين لبعض فأثنينكم أغبيه وما تعرفون كيف تتصرفون
نور : تدرين لاول مره اتفق مع طفول .. انتي كان مفروض عليج توضحي له وتخبريه بالحقيقه وتخليه ساعتها هو يحكم ويختار
شهد : كيف اخبره يا نور؟ انا اذا قلت له الحقيقه ساعتها أنا متأكده انه راح يفسخ خطبته مع بنت عمته .. وانتوا تعرفون شو معنى هذا؟ معناته راح تصير له مشاكل مع أهله او يمكن قطيعه بسبة منو؟ طبعا انا . .فأنا ما صدقت الامور مشت في صالحه تبوني الحين اجي أخرب عليه كل الي سواه؟
طفول : بس انتي منو حتى ترسمين له حياته؟ انتي منو حتى تحكمين شو في صالحه؟! انتي منو أصلا حتى تعرفين شو زين له؟ شو هو ولد صغير ما يعرف كيف يدبر أموره؟ لا يا شهد أنا أعتقد انج ظلمتيه مثلما هو ظلمج اوبعدين اموت بس أعرف هو كيف هان عليه يروح يخطب غيرج وحده هو حتى ما يحبها صج انه غبي مثلما انتي غبيه
نور: والله يا طفول طلعتي مب هينه .. صرتي ترمسين مثل دكتور فيل الي يجي بتلفزيون
طفول: منو فيل هذا ... أصلا انتو ما تعرفون قيمتي .. انا دكتوره طفول النفسانيه الي ضايعه ما بين ناس امثالكم
نور : يا الله عاد مصختيها .. خلاص يا شهد انسي الموضوع والي فات مات اوكل واحد ياخذ نصيبه
طفول : اي نصيب و اي خرابيط .. انا اعتقد في سالفه ان وأخواتها
شهد : ما فهمت
طفول : معقوله واحد يحب وحده بهاي شكل ويكافح عشانها وفي نهايه يروح بكل سهوله يخطب بنت عمته؟ بصراحه السالفه ما تدش العقل .. انا أعتقد ان حد مسوي له شي
ضحكت نور : والله انج رجعتي لأصلج يا طفول صج انج بدويه وتفكيرج رجعي .. شو حد مسوي له شي
طفول : ليش مو وارد؟
شهد : لا مو وارد ولا أنا أؤمن بهاي الخرافات وبصراحه انا ما أؤمن ان هاي نصيبي وقدري
نور : ما فهمت عليج
شهد : مثلما قلت لج .. فأحنا صرنا نرمي فشلنا في الحياه اما على نصيب وقدر واما على خرابيط طفول وكأنهم شماعه نعلق عليهم فشلنا.. فأنا اووسيم كل الي سويناه كان بأرادتنا ومحد جبرنا عليه

تدرون شهد معاها حق في هاي الكلام .. فالمولى تعالى اعطانا كل شي .. أعطانا نعمة العقل والبصر والسمع والكلام .. فهل من المنطق يجي يسلب منا نعمة الاختيار؟.. صحيح الانسان في امور هو مسير فيها بس في امور وايد هو مخير فيها .. فالانسان عادة يكون مسير في اشياء خارجه عن ارادته مثل العمر والمرض والرزق .. بس بقية امور حياتنا اعطانا الزمام بأيدنا .. فالله عزوجل فتح لنا ابواب الدنيا على مصرعيها بس احنا الي ما قاعدين نشوفه .. فالعجب بينا احنا بني البشر لما نتوفق في حياتنا واختياراتنا نقولا حنا تعبنا وكافحنا عشان كذي نجحنا بس لما نفشل في محطه من محطات حياتنا ما نجي ندور سبب .. ما نجي نحاسب انفسنا فكل الي نقوله والله هاي نصيب وقدر!! فأحنا اذا ماجبنا درجات عاليه واخترنا تخصص ما يعجبنا نرمي السبب على القدر!! واذا تغيرت احوالنا الى اسوء نقول اكيد حد حسدنا ومسوي لنا شي .. فقله القليله منا الي يعترفون بتقصيرهم .. بخطأهم لحسابات حياتهم ... فمثلا احيانا واحد يكون متزوج وحده وما مرتاح معاها بس متحملها عشان اولاده او العكس صحيح .. هاي شخص ما يقدر يجي يقول هاي نصيبي لانه هو اختار انه يكمل معاها ويتحملها .. صحيح ان اختياره في محله بس في نهايه كان اختياره .. فمو كل اختياراتنا لازم تسعدنا .. ففي عوامل تلعب وتخلينا نختار اشياء احنا ما مقتنعين بيها بس في نهايه مثلما قلت كان (اختيارنا) وكل من هاي الاختيارات لها ثمن لازم ندفعها لان دنيا واقفه على معايير تبادل وعلى اسس المحاسبه والثمن (فمن يعمل مثقال ذرة خيرا يره ومن يعمل مثقال ذرة شرا يره) فحتى الله تعالى ما جبرنا ان نعبده وانما عطانا حرية الاختيار ولكن لكل شيء ثمنه (فأما شاكرا واما كفورا)..فهو جلا وعلا جمع بين قلبين وسيم وشهد وسهل عليهم امور كثيره من موافقة شهد لوسيم الى رضى ابوها على حبهم بس اول معضله حطه قدامهم وهم ما قدروا يتجاوزوه .. فوسيم محد ضربه على ايده عشان يروح يخطب منال فهو اختارها بأرادته وبرضاه وشهد محد قال لها ترسل الاغراض وبعدين ما تشرح له ... كل ما في سالفه انهم اختاروا واخطئوا في حساباتهم او تقدروا تقولوا ان وسيم غلبه عناده وشهد غلبها كبرياءها



بس تعتقدون ان وسيم وشهد بيظلوا يمشون بدون ما يحاسبون نفسهم؟



تابعوني

اعطوني ردودكم وانطباعكم وشو تتقوعون يصير بعدين ؟


بانتظاركم

ريمي مشكورة بجد

بس تدري هالقصة مو بس رومنسية فيها معاني كثيرة ممكن نتعلمها
على سبيل المثال اذا حبينا نخلص في حبنا
واذا زعلنا مع شخص لازم ما نفكر ولا نقرر وقتها لانها ممكن قرار منا في اللحظة هذي يهد كل الي بنيناه

انا في تصوري مستحيل احد يحب بصدق ويلاقي فرصة يرجع حبيبه ويتاخر اكيد انه راح يرجعون لبعض بس بعد ما كل واحد يحاسب نفسه ويعيد حساباته مثل ما يقول مقطع هالاغنية
بعد الغياب حلو العتاب
اسمع وتسمعني
حيهزنا صوت حبنا
واكيد حترجع لي

في انتظار باقي الاجزاء لا تتاخري علينا

يلا ياريمى مستنينك اتاخرتى اووى
وهى القصه حلووه وفى شوق لنعرف بقيتها

انتظر يوصلني جزء 18 علشان احط لكم

فانتظروني

يلالالالالالالالالا
حرام عليك
كم لك
والله اعصابي تلففففففت

مرت الأيام وأسابيع .. تقدرون تقولون مر تقريبا شهرين على انفصال وسيم وشهد .. وفي هاي الفترة شهد كانت تخبي حزنها تحت غطاء الضحك والدراسة .. هي حاولت تحسس الناس إلي حواليها إنها طبيعيه وما فيها شي بس أبوها كان دائما يشوف الحزن فيعيونها ... هي حاولت تنسى وسيم .. صدقوني حاولت وايد لكن في حد ينسى نفسه؟ في حد ينسى مدينة أحلامه وأماله؟ بس منو يدري يمكن الزمن كفيل بأن يخليها تنسى وتبدأ حياة جديدة وحلوه

أهل شهد كانوا مشغولين بترتيبات عرس ولدهم خليل من نور ... الكل كان مربوش فألي مشغول بالديكور والي مشغولة عند المصمم حق الفستان والي عند المجوهرات وألي وألي ... ولائحة تطول وما راضيه تخلص ... وفي هاي الفترة صديقتنا طفول إنخطبت! تدرون منو خطبها؟ أخو نور .. واسمه محمد دارس في استراليا بس كيف خطبها تعالوا نشوف ..


في مرة طفول كانت واقفة عند باب كليتها تنتظر نور وشهد وكانت متضايقة لان اليوم عبايتها اطرطرت في الكلية وانكب العصير على أوراق بحثها والامتحان كان صعب .. وهي قاعدة تكلم نفسها وتقول : أوه شو هاليوم الزفت إلي أنا فيه .... وهي مشغولة بنفسها شافت شخص يسألها وطبعا هالشخص كان محمد اخو نور بس هي ما كانت تعرفه : عفوا أي صوب كلية أدارة الأعمال؟
طفول من زود ضيقها ردت : من صوب جهنم
محمد قال في داخله : حشى مو بنت هاي كبريت
ودخل محمد الكلية عشان يدور على أخته وفي نفس الوقت طلعوا شهد ونور وشافوا طفول متعصبة
شهد : شو فيج كأن حد مسكر باب في ويهج
طفول : لا قولي بوابة مو باب
نور تضحك : خير شو صار لج؟
طفول : بصراحه شباب هاي الزمن ما فيهم حشيمه ولا أدب من يشوفون بنت واقفه بروحها يتحرشون فيها .. صحيح جمالي مايقاوم بس الحشيمه زينه
شهد : يا الله عاد دوم هاي البنت تمدح عمرها .. اكيد حد اتحرش فيج .. ياالله قولي شو سوا فيج روميو الخليج؟
طفول : واحد شكله مو من طلاب الجامعه المعفوسين الي عندنا .. سألني عن باب كليتنا .. قلت له صوب جهنم .. قال لي اذا من صوب جهنم يطلعون بنات حلوات كذي عيل نعم الكليه
شهد : اووف اووف صج طلع اخونا روميو الخليج
نور : وانتي شو رديتي عليه؟
اومن وراهم سمعوا واحد يرد عليهم ويقول : قالت له روح حطب نار جهنم تاكلك
كلهم لفوا ونور شافت اخوها محمد وسألته : شو جابك اليوم وين السائق؟
محمد : امي ماخذته حق مشاوير عرسج
شهد سلمت عليه : هلا محمد كيفك؟
محمد : الحمدلله .. كيفج شهد وشو اخبار معرسنا؟
شهد :مخبوص ما يعرف ليله من نهاره
وهني انصدمت طفول وتيبست في مكانها اومن زود الحيا ما عرفت وين تخبي روحها .. اومن هني محمد اعجب بطفول وسأل عنها وخلال شهر راح خطبها ..

شهد كانت عايشه الفرحة فرحتين .. فمن هني فرحة عرس اخوها الغالي خليل من نور .. ومن طرف الثاني فرحة خطوبة محمد وطفول ... وشهد مع انشغالها في دراستها وبترتيبات عرس اخوها كانت كل يوم تتذكر وسيم وتتذكر كلامه وضحكاته وسوالفه عن شغله واهله .. وفي مره حنت لدفترها الي كانت تكتب فيها خواطرها ومشاعرها لوسيم ... فهاي شي الوحيد المتبقي من حبها .. وبعد تفكير قامت واتصلت بوسيم
وسيم : ألو
شهد :هلا .. كيفك وسيم؟
وسيم لما سمع صوت شهد وهي تناديه بأسمه غمض عيونه .. فهو حن لصوتها .. فشهد كانت اذا تكلمت تسحر قلبه واذا تحدثت تلهب مشاعره
وسيم : هلا والله .. الحمدلله وانتي كيفج؟ اوكيف الامتحانات معاج؟
شهد : ماشيه .. وانت شو اخبارك؟
وسيم : عايش .. مشغول وايد بالشغل
شهد : شو اخبار منال؟
وسيم : زينه .. مشغوله بترتيب اتعرسها
وهني انقبض قلب شهد وسألته : متى الساعه المباركه؟
وسيم : تقريبا على نهاية العام
شهد :ابي منك طلب
وسيم : أمري
شهد : تسلم .. ابيك تبعث لي دفتر خواطري وصورتي .. دخيلك ارسلهم لي
وسيم حس وكأنه تلقى ضربه قويه في بطنه .. ما قدر يتنفس ولا يتحرك ..كل الي قدر عليه هو وقوفه في مكانه
وسيم : ليش ؟
شهد : لانها مو ملكك ولانك الحين خاطب وحده ثانيه وراح تتزوجها بعد 3شهور .. شو بتسوي فيهم؟
وسيم : اخذتي كل شي مني .. احلامي وامالي وحتى حبي الحين جايا تاخذين مني دفترج وصورتج
شهد : وسيم ارجوك طرش لي اغراضي وابني حياتك الجديدة مع منال .. وشكلي على نهاية السنه بتكون عندي بدل فرحة فرحتين
وسيم : ما فهمت
شهد : على نهاية العام مو بس انت الي بتعرس احنا بعد عندنا عرس
وسيم وقف قلبه لا يكون شهد انخطبت وراح تتزوج
وسيم : مبروك عرس منو؟
شهد : عرس خليل و نور
وهني اتنفس وسيم وحس براحه
شهد : دفتري كانت أمانة عندك وانا اليوم جايه اطلب امانتي
وسيم : ما بيصير في خاطرج الا طيب .. عمري ما رفضتلج طلب
شهد : ادري فيك نشمي وصاحب اصول
شهد بعد ما سكرت تليفون حست بالغضب لان وسيم خان حبها .. ودمر مدينة احلامها الي كانت مقدسه بالنسبة لها .. فهم كان من المفترض يشكلوا زوج و زوجة .. تقدرون تقولون ثنائيا سعيدا .. فهي ما ظنت ان وسيم بعد 3 شهور راح يعرس .. وبهاي السرعه وكأن ما كان بينهم شي .. هي راحت لا اراديا فتحت صندوق ذكرياتها وطلعت منه قميص نومها وحطت في بالها تعطيه لنور هدية عرسها فأذا هي ما تهنت بالقميص خلي غيرها يتهنى وهي قاعدة تطلع اغراضها طاحت بطاقة من بين قمصانها ولما شافتها تذكرت هاي البطاقة وسيم كان معطيها مع القلادة .. قعدت تقرأ خاطرته

حبيبتي ممكن طلب
ممكن تعيشين معاي نص ساعه
بس لاتحسبين الوقت والساعه
لاني برسم حلم انتي تدلينه
ما ابي منج اكثر
ما ابي كلامي يكثر
ابيج تحسين بلمسة ايدي
وشفتي وشلون ترجف
ابيج تناظري فيعيني
وشلون غيرج ما تعرف
ابيج الحين بيدج تمسحي دموعي
الي جرفها قسوة بعدج
ابيج تحظنيني الين تلمسين ضلوعي
الي في دمي يسري حبج
وان قلت لج ضميان اسقيني بكلمة أحبك
وان قلت لج بردان دفيني في ساعة قربك
ممكن اخر طلب..
قربي اذنج
ابيج تعيشين معاي على طول
ما باقي غير ثواني وتخلص نص ساعة
وش رايج انطولها ليوم قيام الساعة
وهذا طلبي وهاي مناي
ابي اعيش معاج حياتي لمماتي
وشقلتي يالغالي؟

وهني تدمعت عيون شهد واخذت ورقة وقلم .. كانت تبي تعاتب وسيم .. تعاتبه على عناده وعلى استعجاله لخطوبته ... كانت مصدومه ومجروحه منه .. تدرون شو كتبت له؟؟ تعالوا نشوف

وش تبيني اقول لك؟
اقول لك عن ايامي الي راحت من بعدك
راحت بسبة عنادك
وش تبيني اقول لك؟
اقول لك عن دموعي الي جفت من بعد رحيلك
جفت بسبة كبريائك
وش تبيني اقول لك؟
اقول لك عن احلامي الي ما شافت نور شمسك
ماتت بسبة استعجالك
وش تبيني اقول لك
اقول لك عن رحيلك من زهرة لزهرة او من وردة لوردة
رحلت ويبست بسبة غرورك
تدري شو كان ودي؟
كان ودي اسقيك بكلمة أحبك وادفيك وادفي أضلاعك
كان ودي امسح دمع عينك والمس رجفت شفايفك
كان ودي أداويك واشفي جراحك
كان ودي اطولها معاك الى مماتي ومماتك
هاي كان ودي اوكان في خاطري وفي احلامي
انت سألتني وش قلتي
اسأل عنادك وغرورك وكبريائك وحتى استعجالك
اسألهم وهم راح يقولون لك وش ابي اقوله
ولا انت وش رايك؟

ومن هني يخلص الفصل بس انتو تعتقدون ان وسيم بيهون عليه يتزوج وحده غير شهد؟
بيهون عليه اسمه يقترن بأسم غير اسم شهد؟
بيهون عليه يرفع الطرحه ويشوف وجه غير وجه شهد؟
او يخلف ولد من صلبه بس من رحم مو رحم شهد؟



وهني انا اطلب منكم كلكم طلب وارجوكم ما تردوني وطلبي هو انكم تبعثوا لي رايكم بنعم او لا..يعني تقدرون تقولون ابي منكم تصوتون هل وسيم راح يعرس شهد ولا لا ، ابيكم تصوتون لانكم جزء من هاي القصة الي حبيتوها وحبيتكم



انتظر ردودكم على احر من الجمر



ودمتم احبتي اينما حللتم

اتوقع ان راح يتزوج منال بس زواجه ماراح يكتمل وفالنايه راح يرجع لشهد

ياخي حماس كأنه فيلم هندي خخخخ

أكيد راح يرجع لحبه الأول لأنها كل حياته

امممممممم
واضح من الكلام انه بالنهايه راح
يرجع لها
بس ان شاء الله
تكوون الاحداث حلوووه

بإنتظار باقي القصه

هلا..

وأخيرا وصلنا للفصل الاخير..

فصل الي الكل يترياه يمكن حتى انا كنت اترياه...

تصدقون كنت متحيره هل أعرسهم واكلل حبهم بالوصال؟ولا لا ما اعرسهم وأخلي كل واحد يروح لحال سبيله؟وتميت فترة متحيره فقلبي كان يقول لي شي وعقلي يقول لي شي ثاني..وبالمناسبة حابه اشكر كل الي صوت في فصل 18سواء بنعم او لا..

تبون تعرفون شو صار في حبايبنا وسيم وشهد؟.. تعالوا نشوف

تمت شهد تنتظر وصول دفتر خواطرها وفي خلال هاي الفترة نور كانت متوترة لان عرسها ما باقي له الا شهر وبصراحة مو بس نور الي كانت متوترة حتى شهد وأهلها كانوا متوترين .. الكل كان مشغول وصار بيت ابوخليل ولا خلية نحل الي طالع والي داخل حتى نوف وعيالها وجدتها وعمتها اتحولوا لبيت ابوخليل عشان يكونوا قريبين منهم وحتى يعيشوا لحظة بلحظة فرحة خليل .. وما ننسى أخوهم الصغير صالح كأنه هوالي قاعد يعرس مو أخوه فكل حين وساعه يجيب كندورته(دشداشته) ويراوي أهله ومره يغير رايه ويجيب بدلته .. الشيخ ما عارف شو يلبس في عرس اخوه .. وشمه أختهم الصغيرة صارت في أخر لحظة عارضة أزياء .. فكل حين والساعه تبدل فساتينها .. ويحليلها أم خليل مربوشه مابين بطاقات الدعوة والمعازيم وترتيبات عرس ولدها الغالي .. ومسكين ابوخليل رايح وجاي يعق بيزاته يمين وشمال .. اما المعرس فمحد يكلمه مشغول ومو عارف ليله من نهاره .. وفي وسط هاي المعمعه كانت شهد الي هي نور بيتهم ومدللة عيلتهم تعيش أجواء الفرحة لدرجة انها نست همومها لفترة الى ان مره دخل أبوها غرفتها وشافها قاعدة ترتب اغراضها
شهد:هلا يابوي
ابوخليل:هلابالغاليه..كيفيج؟خلصتي امورج كلها؟
شهد:هي بس باقي استلم فستاني..الله يعطيك العافيه يابوي ما قصرت..أشوفك تعبان اليوم خير
ضحك ابوخليل:وكيف ما تبيني اتعب وكل وحده فيكم صاعده ونازله تبي فلوس مره امج ومره انتو وجدتكم حتى هاي العصعوص صالح صاير يبي فلوس..وكأن ابوي ورثني بنك وانا ما ادري عنه
ضحكت شهد:يا الله عاد احنا كم خليل عندنا والله يخليك ذخر لنا يابوي يا تاج راسي
ابوخليل:ياالله عاد عن المكر الزايد..ابيج في موضوع
شهد:خير
ابوخليل:بسألج سؤال وابيج تردين علي بكل صراحه وبدون لف ولادوران
شهد:أمر
ابوخليل:شهد انتي مازلتي تحبين وسيم؟
شهدانصدمت:اوليش تسألني هاي السؤال يابوي؟
ابوخليل:ابيج تردين علي بنعم او لا
شهد ما عرفت شو ترد على ابوها فهي انصدمت من سؤاله وبصراحه اخذتها الحيا من ابوها..وظلت ساكتة ما عارفه شو ترد عليه
ابوخليل بكل حنيه:ها يا شهد ما رديتي علي؟
شهد:تقدر تقول اني مانسيته
ابوخليل:انا ما سألتج انج نسيتيه ولا لا سؤالي واضح اتحبينه ولا لا؟
شهد تدمعت عيونها وطالعت في ويه ابوها وبعدين نزلت راسها وسكتت
ابوخليل:اقدر افهم من سكوتج انج مازلتي تحبينه؟
شهد:ليش تسأل؟
ابوخليل:لاني دايما اشوف الحزن في عيونج وهاي الحزن يقلقني..انا ابيج تعيشين سعيدة في حياتج ابي اشوف الفرحة في عيونج
شهد:لا تحاتي يابوي عطيني فرصة فزمن كفيل انه يخليني انساه وأبدأ بحياة جديدة
وفي يوم الثاني رجعت شهد من عند المصمم وشافت عدال بيتها سيارات..قالت:اكيد هاي اولاد عمي اوخالي جايين يركبون الزينه في البيت..هي صعدت لغرفتها وبعدها بشوي دخل ابوها وقال لها:اخيرا وصلتي وينج تأخرتي
شهداستغربت:رحت عند نور عشان اساعدها في ترتيب اغراضها وبعدها رحت اشوف فستاني عندالمصمم..خير
ابوخليل:تعالي ابيج في حجرة مكتبي..والبسي عباتج
شهد:ان شا الله
شهد راحت لمكتبة ابوها وشافت نوف قاعدة تسولف مع شخص..شخص هي تعرفه زين وطالعت في ابوها ومليون سؤال في بالها
ابوخليل:هاي وسيم حاب يكلمج في موضوع..ابيج تسمعيه زين وانا الحين اخليج معاه ونوف بتكون موجودة معاكم
شهد ظلت وافقه ومصدومه وما قادره تنطق حتى بحرف وهني وسيم تكلم وقال لها:كيفج؟
شهد ظلت ساكته وتطالع في ويه نوف
نوف:ردي على ريال قاعد يسألج
شهد كانت متوتره ومتألمه اوبصراحه كانت معاتبه عليه
وسيم:ما بتسلمين علي
هني شهد تكلمت واول كلمه طلعت من فمها وقالت:هنت عليك؟
وسيم غمض عيونه لفتره ..هو تمنى شهد تقوله اي شي الا هاي العباره..وظلت في قلبه الى يومنا هذا
وسيم:لا والله ما هنتي علي عشان كذي انا جايلج اليوم
شهد:ما فهمت
وسيم:انا اليوم جاي اوجايب اهلي معاي مو عشان يخطبونج حقي..انا جاي عشان المج مره وحده
شهدانصدمت:شو..كيف اوليش اومتى؟
وسيم ابتسم وكلم نوف وقاللها:اختج دوم هاي طبعها تسأل 3 اسئله في سؤال واحد؟
نوف:هاي طبعها من وهي صغيره
شهد:بس انت خاطب منال
وسيم:كنت خاطبها..احنا انفصلنا تقريبا من اسبوعين
شهد:شو سبب؟
وسيم:السبب هو انتي...لاني ما قدرت اتأقلم معاها كنت كلما اكلمها تجين في بالي..لدرجه اني وصلت لمرحلة شوي واناديها بأسمج..وهني حسيت اني اذا تزوجتها راح اظلمها وباظلم نفسي معاها فصارحتها بالموضوع ..وهي طلعت بنت حلال واتقبلت الواقع فهي ما كانت وايد متشجعه على الزواج لانها تبي تكمل دراستها..فأتفقنا انها هي الي تفسخ الخطبه بحجة انها تبي تكمل دراستها وانها ما مستعدة حق الزواج والمسؤليات
شهد:لكن اهلك كيف وافقوا انهم يجون معاك اليوم؟
وسيم:اقترحت عليهم الحل الوسط..وهو اني ابني لي شقه صغيره في حوش اهلي واعيش معاهم لفترة وبهاي الطريقه انتي بيكون لج شقتج وبظل عايش معاهم قريب منهم..شو رايج؟
شهد:انا ما فاهمه شي..فسخ خطوبه..ملجه
وسيم:انا افهمج فأحنا ما نحتاج لمرحلة الخطوبه لان بصراحه عديناها وانتي باقي لج سنه على الدراسه وفي هاي الفترة ببني شقتنا في بيت اهلي..واقترحت على ابوج الملجه
شهد:واذا قلت لك مو موافقه
وسيم:مو كيفج انا اليوم جاي ابلغج بالملجه مو أخذ رايج
شهد:شو السالفه غصب؟
وسيم ابتسم:لا مو غصب بس أن اوان ان واحد فينا يتحرك..وانا ادري انج مانسيتيني
شهد؟شو دراك؟
وسيم:الله يخلي ابوخليل
شهد:ما فهمت
وسيم:قبل اسبوع اتصلت فيه وخبرته اني ناوي اجيب اهلي عشان الخطبه..طبعا هو في البدايه ماوافق وتميت احاول وياه الى ان وصلنا الى حل وسط..انه يسألج اذا كنتي ما زلتي تحبيني او لا واذا قلتي لا ساعتها كل واحد يروح لطريقه واذا قلتي اي ساعتها في يوم الثاني اجيب اهلي وتميت انتظر اتصاله..واليوم انا هني على وعدي
الحين عرفت شهد ليش امس ابوها كان يسألها هاي السؤال
نوف:والله قصتكم ولا فيلم هندي
وسيم ناول شهد دفترخواطرها وقال لها:هاي امانتج اوسامحيني لاني في أخر الصفحه كتبت لج شي فيه..ويالله جهزي حق الملجه لانها راح تكون في نفس يوم عرس خليل
شهدانصدمت:شو؟ مستحيل انا ما مجهزه حالي
نوف:الا مجهزه ونص نسيتي فستانج الي راح تلبسينه في عرس خليل والله انه يجنن
وسيم:افهم من كلامج انج موافقه؟
شهد:عطيني فرصه افكر
وسيم:مستحيل ما عندج خيار
وهني استحت شهد وقالت له:طيب على شرط
وسيم مسك قلبه:أمري
شهد:انك تناديني بأسمي ولو لمره وحده
ابتسم وسيم:ما طلبتي شي..انا رايح اكلم اهلي واقول حق ابوج يجهز روحه حق ملجة بنته
وبعدما طلع وسيم عنهن قامت نوفا وحضنت اختها:مبروووك يالغاليه تستاهلين كل الخير
شهد مازالت مصدومه وما مصدقه:انا نازله تحت وبقول لابوي اني ما مستعده حق الملجه
نوف:انتي اكيد جنيتي ليش ما مستعده؟ فستان وبتستلمينه بعد اسبوع وكوافير حاجزه..شو ناقصج..يكفي ريال فسخ خطبته مع بنت عمته عشانج واليوم جاي وجايب اهله معاه عشان يخطبونج..شو تبين اكثر؟ احمدي ربج انه رجع لج وسيم مره ثانيه في حياتج..وسيم الي حبج اوحبيتيه..هو برهن حبه لج والحين دورج انج توقفين معاه اوتقبلين بالملجه
وطلعت نوف عنها وهني جلست شهد على كرسي وفتحت دفتر خواطرها وشافت وسيم كاتب فيها:

مجنون انا وزدتني بجنون
واول جنوني يوم اني عرفتج
أقول ما احبج وانا فيج مفتون
وان قلت بانسى غصب عني ذكرتج
سألت قلبي وأحسبه لي انا عون
فرعون قلبي ما نصحني بعدج
ودي اخونج لكن القلب مايخون
وان جيت اخونج زاد حبي وصنتج
حتى عيوني ما تبي غيرج عيون
قلي شسوي دام كلي عشقتج

طبعا ام شهد ما كانت مرتاحه من السالفه بس لما شافت الفرحة في عيون بنتها تغير مزاجها الى180درجه
خليل:مبرووك يالعروسه..واخيرا
شهد وهي يحليلها مستحيه:الله يبارك فيك ياخوي
وبعدها بشوي رن تليفونها
شهد:ألو
طفول:مبروووووك يالبايخه
شهد تضحك:وانتي شو دراج حشي مركبه كاميرا في بيتنا
طفول:يا الله عاد..تعالي احنا نترياج
شهد:وين؟
طفول:تحت في سياره يالهبله
شهد:الحين؟
طفول:هي الحين عندج مانع؟
شهد:نطروني الحين جايا
طفول:اوكي
اوركبت شهد سياره..واستقبلتها نور بالاحضان والقبلات
نور: الف الف مبروك يالغاليه صج انج تستاهلين كل الخير
شهد تضحك من الفرح:الله يبارك في حياتج
طفول:احم احم نحنو هنا..وحضنت شهد وقالت لها:مبروك يالعروسه واخير الخبل بياخذ الخبله
شهد:بس انتو كيف عرفتوا بالسالفه؟
طفول:الله يخلي مراسلنا في بي بي سي اخوج خليل
شهد:نور انتي ما عندج مانع تكون ملجتي في يوم عرسج؟
نور:ابدا يالغاليه بالعكس احس الفرحه بتصيير فرحتين
شهد:طفول شو رايج تملجين انتي بعد في نفس الليله
نور:والله فكره اوهاي الساعه المباركه..خليني اتصل بأمي واكلمها
طفول:مستحيييل ولا والف لا
شهد:ليش؟
طفول :شو قالوا لكم عرس جماعي..انا شخصيا ما ابي حد يزاحمني في ليلة عرسي..وبصراحه هاي في صالحكم لاني اذا ملجت معاكم في نفس الليله ترى والله بصك عليكم بجمالي ..وما تنسون انا توني مخطوبه ما صار لي الا 4 اشهر..خلوني اعرفه زين
شهد:دوم هاي البنت تحب تمدح عمرها
وفي يوم 28 ديسمبر تجملت قاعة العرس بالورد والياسمين ... شهد كانت لابسه فستان بتدرجات البنفسجي اوفيها نجوم صغيره منثوره على فستانه ا.. وكانت حاطه مكياج خفيف اومنزله شعرها بتسريحه حلوه .. كانت طالعه حلوه وايد كأنها حوريه نازله من السما .. وكل الاهل كانوا موجودين لان الليله الغالي بياخذ غاليه
وشوي سكرت الاضواء الا ضوء واحد ودخلت نور بفستانهاالابيض وبطرحه طويله تتمختر على الارض .. كانت طالعه حلوه ولا ملاك .. وبعدها بشوي دخل خليل مع ابوه والكل كان يهلل وينثر الورد عليه .. حتى ام خليل صاحت من الفرحه وتمو يقصون الكيك ويصورون مع الاهل وهني رن تليفون فاطمه اخت وسيم
وسيم:هلا فاطمه
فاطمه:هلا بالغالي هلا بالمعرس..الف الف مبروك
وسيم:الله يبارك فيج وفي عيالج..ابي اشوف حرمتي
فاطمه:بعدين مو الحين
وسيم:شو بعدين..اقولج الحين تقولين لي بعدين
فاطمه:اسكت تراك بتفضحنا قدام الناس..انطر شوي توه خليل داخل القاعه
وسي:شوتوه داخل حرام عليج صار له نص ساعه اوتقولين لي توه داخل..يالله ابي اشوف شهد
فاطمه تضحك:انزين عطيني 10دقايق وارد عليك
وسيم:صار بس مو اكثر من 10دقايق
وفي هاي اللحظه خليل اخذ نور وراحوا لغرفة التصوير عشان يصوروا بروحهم ... وفاطمه راحت لعند شهد وقالت لها:شهد حبيبتي زهبي حالج ترى اخوي يبي يدخل
شهد وقف قلبها:ليش؟
فاطمه تغمزلها:يبي يشوف حلاله
شهد هني ماتت من الحيا:الله يسلمج يافاطمه قولي له موالحين خليها لبكره
فاطمه تضحك:والله ان قلتله جي راح يذبحني
طفول قاعده تسمع حوارهم وقالت:يالله ياشهد قومي صعدي المسرح خلي روميو وسيم يدخل
وهني قامن نوف او طفول صعدوا شهد على المسرح وغطوا وجهها بطرحه لونها بنفسجي فاتح
شهد لطفول:تمي وياي ولا تخليني بروحي
طفول:ان شاالله عمتي بس خليني البس عباتي واجي لج
شهد:لاتتأخرين
فاطمه اتصلت بوسيم:هلا اوغلا
وسيم:ها شو الوضع
فاطمه:حياك ادخل نترياك
وبعدها بخمس دقايق دخل وسيم اوعينه على المسرح بس ماقدر يشوف شهد لان وجهها كان مغطاي ولان اهله كانوا محاوطينه .. هاي تبوسه اوهاي تنثر الورود والفلوس .. هاي تجبل اوهاي تهلل .. الى ان صعد المسرح


ادري فيكم قاعدين تبتسمون وفيكم فضول تبون تعرفون شو صار بينهم ... شو رايكم اوقف هني؟..


هاهاها قاعده امزح يا الله خلونا نشوف شو صار


شهد تهمس لطفول:والله حاسه اني بموت روحي قولي له يسلم من بعيد اويطلع
طفول تضحك على خبال ربيعتها:يالله عاد مصختيها خليج قويه ولا تفشلينا جدام الريال واهله
وسيم صعد المسرح وبصراحه كان مرتبك فهو ما متعود يشوف شهد بهاي الطريقه وغير الاهل ما شاء الله الكل قاعديشوفه .. اولما وصل لعند شهد .. قامت طفول ساعدت شهد اووقفتها عشان تستقبل وسيم
هني فاطمه قالت لاخوها:ارفع عنها طرحتها اوبوس جبينها
وسيم رفع عن شهد طرحتها البنفسجيه اوشافها ... شاف حب عمره الي تعب وكافح عشانه ... شافها وهي متحنيه اومتجمله عشانه .. هو شم ريحة العود والبخور ... بأختصار شاف حلاله .... وسيم كان لو ود وده تتوقف عقارب الساعه ... هو لو ودوده يتم يناظر فيها طول ليله .. هو لو ود وده....
شهد كانت منزله راسها من الحيا .. حست ان قلبها راح يطلع من بين ضلوعها ... وهني وسيم قبل مايسوي شي او يقول لها شي .. دخل ايده في جيبه وطلع قلادتها ..

تتذكرون قلادتها الي كان كاتب اسمه عليه ... اوقام اما الكل لبسها وهو قاعد يلبسها همس في اذنها وقال لها: احبج يا شهد وباس جبينها


صدقوني هني شهد وقف قلبها .. معقوله وسيم لبسها قلادتها ... معقوله ناداها بأسمها.. معقوله؟ .. ورفعت عيونها وطالعت فيه .. واخيرات حقق حلمها بعد كل هاي المحن .. وهو ابتسم وقال لها:هاي اول واخر مره اناديج بأسمج عشان تعرفين اني ما ارد لج طلب
فاطمه:يالله لبسها شبكتها
بس شهد رفضت تلبس شبكتها لان اي شبكه ما راح تكون احلى واقرب الى قلبها من هاي القلادة .. لكنها وافقت انه يلبسها الدبله وهني مسك وسيم ايدها وحس انها باردة مثل الثلج وشافها ترتجف من الحيا .. والله انه خاف عليها .... وبعدها راح عنها لان خليل ونور خلصوا من التصوير
نزلت شهد من على المسرح والكل كان يطالع في قلادتها بس محد يدري شو سالفتها لا طفول اونور.. وبعدها بشوي جات فاطمه وقالت لشهد:هاي اخوي يبي يكلمج
اخذت شهد تليفون وكانت مستحيه كأنها اول مره تتكلم معاه
شهد:هلا
وسيم:هلا وغلا بالحبيب
شهد ساكته اوما قادره ترد عليه
وسيم:ابيج تلبسين عباتج اوتغطين عمرج اوتطلعين لي برع
شهد انصدمت:ليش؟
وسيم:ابا اطلع مع حرمتي عندج مانع؟
شهد:او شو بقول حق اهلي؟
وسيم:ما يحتاج تقولين لهم شي انا ماخذ الاذن من ابوج..كلها نص ساعه اوبنرجع
شهد:وين بنروح؟
وسيم:بتعرفين بس غطي عمرج عدل وتعالي
راحت ودعت نورا وباست اخوها خليل اولبست عباتها وغطت عمرها وطلعت من قاعة العرس الا وتشوف وسيم واقف لها عند الباب
صدقوني انها حست بقشعريرة في جسمها .. وركبت معاه السياره ولانها كانت مغطيه عمرها ما قدرت تشوف هم وين رايحين وطول الطريق هم ساكتين..الى ان وصلوا
وسيم:بأمكانج تشيلين شيله عن ويهج
وهني شالت شهد الشيله عن وجهها وشافت البحر...وسيم يعرف ان شهد تحب البحر
وسيم:مبروك
شهد ساكته اوما ترد
وسيم:ليش ساكته
شهد:شو اقول؟
وسيم:اي شي يخطر على بالج
شهد:شكرا على القلاده
وسيم:انتي تعرفين اني سويتها حقج اومحد غيرج راح يلبسها ...ت درين كنت انتظر اليوم الي البسج ياها
وهني مسك ايدها وقال:تعرفين انا لو ود ودي اشيلج دوم على صدري اوما اخليج تمشين ... انا احبج
وسيم:دخيلج ردي قولي شي
شهد:حتى انا
وسيم:حتى انتي شو؟
شهد:الي قلته
وسيم:انا ما قلت شي
شهد اتحيرت:بس انت قلت
وسيم:شو قلت اظاهر المكياج اوريحة العود والبخور مأثره عليج
شهد:انت قلت لي انا متأكده
وسيم:انزين قولي شو قلت لج
شهد بكل براءة:انت قلت لي احبج وانا قلت لك حتى انا احبك
وسيم ابتسم:فديتج اوفديت هاي الكلمه الي طالعه منج..عسى ما احرم منها
شهد انتبهت اوحست ان وسيم سوا وياها مقلب شهد:صج ماتستحي
وسيم ضحك:اوليش استحي
وهني شد على ايدها اوقال لها:اوعديني انج دوم بتظلين وياي لاخر عمري .. او لو شو ما صار لانج توأم روحي .. انتي عيوني الي اشوف الدنيا بيها .. انتي حياتي الي ابي اعيشها بحلوها ومرها
شهد دمعت عيونها وقالت:وعد مني اني دوم بظل جنبك .. بس ابيك توعدني بشي
وسيم:أمري
شهد:انك طول عمرك ما تناديني بأسمي ودوم تكون بجنبي..حتى يوم الي انام ابي احس فيك ويوم الي اقوم ابي اطالع فيك..اوعدني انك عمرك ما بتخليني وما تحب حد غيري..اوعدني يا وسيم انك ما تبيعني وتشتري ثاني
وسيم حضنها اوقال:وعد يا بعد عمر وسيم..تراج ما طلبتي شي



وهني توتة توته اوخلصت الحدوده

مشكووورة حبيبتي

نهاية حلوة كثييير أعجبتني

كنت حاسة انهم رح يكونون لبعض

في انتظار المزيد

و للاسف الميزان مو راضي