من
عجبي!!!!
مساكين الشرطة الي يلبسون ابيض ... لو قاعدين في مكتب والا في مكان بارد ونظيف معليه لكن الي في الشارع بهالحر والرطوبة وريحة الديزل مادري شحالهم .... ماعتقد في واحد منهم يلبس قميصة يومين ورى بعض ... اصلا القميص اذا انغسل يبيله اسبوع يفركونه لين ماتطير لبقع الي فيه ..... الي اختار هالبدله ظلمهم بصراحة ... عاد ياريت بعد يعطونهم كل شهر بدله والا بدلتين .. الظاهر في السنة 2 او ثلاث ... ماتكفيهم شهر ... ترى اذا تموا على هالحال بيصير شكلهم مب حلوا في الشارع كانهم طبابيخ مطاعم من لبقع الي فيهم ... ساعدوهم تراهم يستاهلون وايد يتعبون .... او اذا مافي ميزانية حطوا شعار مع تايد مافي مستحيل على القميص والشركة بتعطيهم صابون ببلاش ... او ودوهم حق الي غسل البيزات ييغسلهم !!!!!!!!!
الحين اذا في حفلة عيد ميلاد حق واحد والا وحدة من الشباب الهاي ... لازم اييبون بناتية عشان جو الحفلة يصير حلو ... لا ويدفعون لهم بالمئات ويترجونهم عشان بس يحضرون.... جان زين بعد اشكالهم اتسر النفس كل واحد جنه يذع حاطين عليه ليفة .... الحين أي واحد يبي شوية بيزات بس يلبس ويتعدل ويتميع ويدور له حفلة يدخل من وراها جم فلس ... وزادوا هالأشكال وبيزيدون دام الشغله فيها بيزات .... صبروا شوي ان ماجفتوا البنقالية سوو لهم طريج عشان يصيرون بناتية .... عاد نبي من المجلس الموقر يسوي تصاريح خاصة عشان نحفظ حقوق المواطن مب كله التصاريح حق الأجانب .. عاد شيكتبون في التصريح مادري تصرفوا (الجنسية : بحريني ... المهنة : بناتي مصرح له ) !!!!!!!!!!!
كنت بدورة ومعاي مجموعة من شباب دول المجلس ربي يذكرهم بالخير ... وكل واحد يطلع يلقي محاضرة اقعد اغربله ... اطلع له الساني واسوي له حركات عشان يضحك ويتوهق ..... كذا واحد منهم وقف وماقدر يكمل ومساكين مايقولون شنو السبب عشان مايحرجوني جدام المحاضر ..... عاد يه دوري وجهزت المحاضرة وقمت امشي بكل ثقة وتوني بقول بسم الله الرحمن الرحيم ... والا كل الي معاي في الدورة مطلعين السانهم وايسوون حركات بويهم ... بصراحة ماستحملت .... ضحكت لي قلت بس .. والمحاضر يقول شفيك عسى ماشر .... قلت له سلامتك بس طرى على بالي شي .... قال بعصبية شنو ضحكنا معاك .. توهقت شاقول له الحين .... قلت له تذكرت مرة كنت بالهند وجفت سيابيل وايد ... كل مالتفت اجوف واحد مطلع لي السانه .... مادري ليش .... كل الأخوان الي داخل المحاضرة ردوا السانهم .... ولكن غربلوني بعدها ... القصد يا اخوان كل ما اتسوي سوالف في الناس بيي يوم بيسوون لك اخس من الي سويته .... وهذا درس لي .. ولكني بصراحة للحين ماتبت !!!!!!!!!!
وحده ربي يعطيها الصحة والعافية يابت لها خدامة اكبر من امها .... الظاهر ان عيون ريلها زايغه او انها تبي تبعد عن الشك عاد ودتها عند امها عشان اتعلمها شغل البيت .... مرت ايام وراحت تبي تتطمن عليها وعلى مستقبلها معاها .. يوم دشت والا جافت امها اتغسل لها ثيابها ... وابوها يسوي لها الريوق واختها اتهمزها ... وصينية القدوع جدامها ... جافتها المسكينه الخدامة تبي توقف حق المدام مب قادره ... ياو اثنين من اخوانها شالوها .... سالت امها يمممممممممممه شنو ذي ... قالت لها فقيرة مسكينه عيووووز مافيها شده اتسوي شي ... عاد قلنا ناخذ فيها اجر وانربيها .. واحلفت عليها ماتطرشها ديرتها ... طيبين اهل البحرين ربي يحفظهم وياريت هالطيب عند الكل ... ولكن الحين تغيرت لنفوس مافي رحمة .... على فكرة الحين قاعدين يدورون لها ريل عشان تستمتع بآخر ايامها !!!!!!!!!!!!
سمعنا كلام ان سعادة المحافظ الشاب اليديد المبجل العالم الجليل يبي يقصر فترة موسم البر .... الحين مادورت شي اتسويه الا هالسالفه .... يعني أي شي حلو وببلاش في الديرة اتنقصون على الأوادم فيه .... يا اخي انت تقدر اتروح تقنص ولك تذاكر ببلاش ومخصصات حق السفر بتروح سويسرا ولندن وقندهار اذا تبي اتجوف اكشن ( اللهم لاحسد عليك بالعافية ) هالفقارة وين بيروحون .... لا صيف يقدرون يسافرون ... ولا في لشتى يقدرون يتدفون .. كلها جم شهر بيروحون يحرقون جم لوح وبيشوون تكه وبيشمون هوى مغبر وحالته لله وبعد تبون اتقصرون عليهم .... هذا بدل ماتخلونهم براحتهم على الاقل يتنفسون شوي بدل هالضغط الي فيهم .... عقب سنتين بعد بتطلع لنا بطلعه .. الدخول في البر بتذاكر ... بعد لو برنا مثل الأوادم مادري شسويت .. اتمنى يكون هالقرار اشاعه يا سعادة المحافظ ... والا ترى بشتكي عند المسئول
!!!!!!!! في مجموعة من الشباب يتيمعون في الساحات او الباركات مالت المسايد وكالعادة طبعا يطقون باليس لين يدهم اتطيح ... ويشترون بيبسي بعد ولومي ويسوون خلطة حق التايرات ... واهو السانه طالع برع من العطش ماعنده ربية يشتري له غرشة ماي ..... يأذن لعشى ... واهم رايحين ولا جنهم يسمعون .... لا ويطول على الأغنية الي تردح في السيارة عشان مايسمع صوت الأذان يبي يقص على روحه .... تعال عاد قوله ياخوي الصلاة .. بيقوم عليك قومة .. جيف ما اسمع انا والا اصمخ .... والا ماتجوف يدي مشغولة شلون اروح المسيد وانا بهالحالة .... يعني ماتدري يا الأملح ان الصلاة هالحزة ؟؟؟؟ كل واحد يبي يحاجي واحد يطق باليس حزة الصلاة يبرز روحه بيطقونه اهو والسيارة باليس ويمكن رايبون اذا في وقت !!!!!!!!!!!!!!
مسكينه الرقاصة تفاحة .. تترزق الله وتقعد اتقاحص في لعروس .... وآخرتها يصورونها وينشرون صورها ... صج اهي ربي يهديها ويهدينا كلنا ماسترت روحها بس عيب يابنات اتصورون بنات مثلكم حرام عليكم باجر بتنفضحون مثل مافضحتوها .. خافوا ربكم في بنات يمها ونسوان يمكن يطلعون في الصورة .... ولا عاد ذيج الي تمت اتناديها ليما بلاعيمها طلعوا .. تفااااااااااااااااااااحه تفااااااااااااااحه تعالي هني .... ويوم يات حتى نص دينار ماقطت عليها .... وياتفاحتنا الحايفه ستري على روحج ربي يهديج !!!!!!!!
حكومتنا الرشيده .. متى يعني هالمساكين البحرينيين بعيشون بخير ونعمه ؟؟؟ تبونهم يصيرون مثل الصينيين حتى اذون لبقره ياكلونها ؟؟؟ والا تبونهم ياكلون فيران وزهيوية عشان يسدون يوعهم .... ترى اذا تم الحال مثل ماهو .. حتى تكة ذبان بياكلون ... حرام عليكم الواحد صار تفكيره بس شلون ياكل مايفكر بشي غير اكله واكل عياله .... وعقب عاد حتى لعيون بتصير صغيره والخشم جنه كناره ... بعدين شلون بتفرقون بينهم ؟؟؟ ماتعرفون الفراش من الوزير .... تخيلوا بس صيني لابس بشت !!!!!!!!!!!!
اليوم رحت يم يم تري في محرق .... لفيت يمكن 4 مرات عشان اجوف لي بارك عدل .... من حظي الزين ان واحد طلع او وقفت مكانه ... دخلت داخل وخذيت لي بلعه ...طلعت والا سيارة واقفه وصاكه علي .... نطرت شوي في السيارة 5 دقايق 10 .... عقب شوي بديت اطبخ .... عقب ثلث ساعه ... يات البدره تتمخطر على سعتها وبكل برود حطت بلعتها في السيارة ... ولا حتى التفتت على سيارتي ..ولا جنها موجوده .... بصراحة كان خاطري اكسر بيض على بريكات سيارتها عشان كل ماتطق بريك اتشم ريحة خايسه .... نزلت الدريشة وصيحت لها هرن خفيف عشان ما اجرح مشاعرها .... نزلت الدريشة والا اتقولي من غير نفس نعم ... قلت لها لا اختي بس حبيت اعتذر لج لأني صاك عليج من مساعه ... ماستوعبت الموضوع .... ولا افهمت قصدي .. ومشت الله لايوفقها الا بالتوفيق الحسن .... ترى الأعتذار من التحضر والرقي .... والا بس التحضر شرب الخمر والتفصخ جدام الناس !!!!!!!!!!!!
يقولي واحد من الأخوان انه كان يتمشى مع ولده لصغير في السوق عاد في ياهل ثاني يه صوبه ودزه وطاح .... قام صديقنا قال حق ابو الياهل ترى ولدك ياخوي دز ولدي وطاح ... ياريت بس اتخبره ان مب زين يسوون جذيه ... عقب ماسمع ابو الياهل آخر حرف اهمده على سابعته همده طيحته في الأرض ... مع رفسة على الطاير ... قام اخونا ايود الأبو عن ولده .... شوي والا ابو الياهل قالب على اخونا وتم يسبه ويبي يتهاوش معاه ..... يقول اخونا في الله ... بصراحة انا جفت يده وتخيلتها نازله على ويهي ... مب يد كانها طابوقه بس لها اصابع .... وقلت يمكن على الاقل بتم اسبوع مغمى علي ..... عاد وعى حق روحه وقال حق ابو لصغير عندك اياه ماعليك مني .... ترى الكلمة الطيبة احيانا تكفي والعتب على الطفل افضل بالف مرة من الطق والترفس .... انا لو مكان اخونا جان بقول حق ولدي اتصل بأمك عشان اتييني الطوارئ بسرعة عشان اجوفها قبل ما اموت ... اذا ماقدرت اشيل عليه طبعا !!!!!!!!!!!
معانا واحد في الشغل عمره ماطب المسيد ... ذاك اليوم دش علينا والا مرطخ ماي من فوق لي تحت كانه ياهل مسويها في روحه .... قال يالله شباب صلاه ... قلنا زين والله يمكن ربنا هداه ومن اليوم بيصلي معانا جماعه .... رحنا المسيد مال الدوام والا قاعد يراكع يصلي السنة ويده او ويهه للحين يرطخون ماي .... شوي والا الوزير والوكلاء داشين بيصلون .... حزتها عرفنا السبب .. اسود الويه حتى في الصلاه بينافق .... بعد ماتم احد مادزه عشان يروح يم الوزير يصلي .... يمكن عباله في تصوير والا بيوزعون هدايا ... انا لو من الوزير اخليه يصلي امام عشان يتوهق .. وطبعا مايقدر يقول لا للوزير .. عاد حزتها بيقرى من الأنجيل هالمنافق .... ربي يهديه !!!!!!!!!!!!!
