بسم الله الرحمن الرحيم
والصلاة والسلام على اشرف الانبياء والمرسلين
احبتي ...
بإذن الله سيكون هذا الموضوع شاملا لعنايتي الليلية
واتمنى ان يستفيد الجميع ولو بالقليل كما استفدت انا
الموضوع ليس فقط للمشاركة بالمسابقه.. فعلا اتمنى الفائدة لكل عروس في هذا المنتدى
نبدأ ...
عنايتي الليلية عبارة عن:
** الوجه **
~ ماسك يومي ~
~ تقشير اسبوعي ( مرتين ) ~
~ ترطيب يومي ~
** الشفاه **
~ تقشير اسبوعي ( مرتين ) ~
~ ترطيب يومي ~
** العين **
~ عناية للرموش ~
~ عناية للهالات ~
....
** الاسنان **
~ تنظيف ~
~ غسول ~
** التغذية **
~ مشروب ~
** الوجه **
اقوم بعمل ماسك يومي بسيط جدا مكون من:
روب ( زبادي )
ماء ورد
فعلا ماسك سهل متوفر للكل .. نتايجه عجيبة في تصفية الوجه وتفتيحه.. اهم نقطة تصفية الوجه
المقادير ... ملعقة روب ... ملعقة ماء ورد
تمزج وتوضع على الوجه والرقبة لمدة ثلث ساعة او حتى تجف تماما من الوجه
احيانا انشغل وما احصل الوقت الكافي لوضع الماسك مدة طويلة
ف اقوم باحضار قطن الاقراص الدائري
وامسحه في الماسك ثم امسحه على وجهي بهدوووء
ف يكون اسرع في الجفاف
بعد غسل الوجه رشي ماء ورد على وجهك ورقبتك واعملي مساج لوجهك وهو رطب بماء الورد
المساج يكون بشكل دوائر او موجات
الاهم ان يكون المساج بعد الماسك وماء الورد على وجهك
طبعا هذا الماسك يكون بعد صلاة المغرب لاني انام بعد صلاة العشاء بساعه .. لازم يكون هناك وقت كافي بين الماسك وبين الشاور وغسل الوجه بالصابون
بعد صلاة العشاء بساعه اخذ شاور واغسل وجهي بصابونة سيباميد
وعند الانتهاء من الشاور اجفف وجهي واضع القليل من زيت اللوز المر على اطراف اصابعي وافرك وجهي ورقبتي بحركات دائرية ..
واروح انام بكيييييير عشان بشرتي ترتاح زين
اول ما تصحوا من النوم ع طول اغسلوا الوجه بصابونة سيباميد ورشوا ماي ورد
فائدة زيت اللوز المر... توحيد البشرة وازالة بقع الحبوب والبثور.. طبعا يبيله استمرار
انا اسبوعين تقريبا او اقل ظهرت نتايجه عندي.. لكني مستمرة عليه عجبني في الترطيب
بالنسبة للتقشير ... ملعقة سكر ... نص ملعقة زيت زيتون
استخدمه مرتين .. الاثنين والخميس .. بعد صلاة المغرب وعلى طول بعد التقشير احط الماسك المذكور سابقا وامشي على نفس الخطوات
يعني بالايام العادية احط الماسك ع طول.. اما الاثنين والخميس احطه بعد التقشير
** الشفاه **
عناية بسيطة جدا .. لكن سبحان الله نتايج حلوه
استغرب من الوصفات الطويله العميقة .. واصلا احنا عندنا وصفات بسيطه بس نستهين فيها
المهم عنايتي الاسبوعيه تقشير مرتين الاثنين والخميس مع الوجه بنفس المكونات( زيت زيتون وسكر)
فيه بنات يستخدموا الفرشاه للتقشير.. لكن انا افضل بالانامل تكون ارق ع الشفاه وتتركها ناعمه
بعد التقشير احط المرطب اللي ما استغنى عنه ( اللبيلو الوردي)
طبعا اللبيلو استخدمه طول اليوم مب بس وقت النوم
والايام العاديه اللي مافيها تقشير استخدم لبيللو لحاله بدون شي
بنات مالي مصلحه اكذب عليكم .. هالعناية البسيطه بس مخليه شفايفي وردية وناعمه
تخيلوا اخوي مره كان مركز فيني وقال ليش حاطه روج وردي وين بتروحي
وانا كنت انظف ف البيت ولا حاطه شي .. ما صدقني لما قلتله مب حاطه شي
المهم اني فرحت وايد^^
** العين **
اهتمامي بالرموش كان اهم شي عندي..
وانا اقول (كان) لان اللي ابيه وصلتله ولله الحمد
احضرت ماسكارا نظيفه وغمستها ف فازلين وكل يوم قبل النوم احط ع رموشي
والله بنات رموشي طولت وايد والكل لاحظ.. تقريبا بانت معي النتيجه بعد شهر.. لكني استمريت لاربع شهور كنت ابي اطولهم زياده
والحمدلله وصلت للطول اللي ابيه واحين وقفت ما استخدم الوصفه
بالنسبة للهالات .. يكفي زيت اللوز المر اللي تحطينه ع الوجه.. حطي تحت عينج وافركي بشكل دائري قبل النوم
بإذن الله بتختفي الهالات مع الوقت
** الاسنان **
بالنسبة للاسنان.. شي بسيط وسهل يمكن تستغربوا
لكن يبيله شجاعة
ما استخدم معجون ولا فرشاه لاسناني ابداااااا
فقط استخدم سواك.. ولله الحمد راحه ونظافه ولا عمري حسيت بوجع اسنان ولا عندي اصفرار
الحمدلله اسناني بيضا
واللي تخاف من الريحه.. اقول لها انتي جربي وشوفي النتيجه بعينج
نحن ما دمرنا الا هالمواد اللي نحطها
يكفينا ان الرسول صلى الله عليه وسلم وصانا بالسواك
طبعا السواك مب بس بالليل.. قبل كل صلاه ولما تصحي من النوم
والاهم قبل النوم تنظيف شامل
بالنسبة لاستخدامه.. اول ما تشترينه انقعيه ف ماي عشر دقايق
وبعدها استخدميه
عضي راس السواك باسنانج حتى يصير نفس الفرشاه العادية
واستخدميه .. بعد كل يومين او ثلاث ايام قصي راس السواك واستخدمي جهه نظيفه
وقبل النوم تمضمضي بغسول مكون من بيكربونات الصوديوم وماي
ملعقه بيكربونات مع كوب ماي.. حطيهم ف زجاجة ف دورة المياه
** التغذية **
بالنسبة لهالشي عندي مشروبي اللي دوم وياي
يشهد له خبراء الاعشاب والتجميل بفوايده للبشرة ونضارتها
~ عصير البرتقال والجزر ~
يمكن البعض ما يستسيغ طعمه لكنه فعلا رائع.. تحسين بحيويه باشراق
فعلا جربوه يوميا.. انا اشرب منه بعد وجبة العشاء .. وبعد وجبة الغداء
بس الاهم عندي بعد وجبة العشاء لان عنايتي تكون مركزة بهالوقت
...
هذي كل العناية الليلية عندي واتمنى ما اكون نسيت شي
ويارب يارب يارب تستفيدوا
اتمنى فعلا لكم الافادة وتنتهي مشاكل الوجه عند كل بنت مثل ما انتهت عندي
والله يوفق الجميع يارب
في حفظ الله...
...