تجمع حلم الامومة

الله يسعدكم حبيباتي النور نوركم .. يازين تجمعكم ماشاء الله فيه نشاط :037:

أعرفكم بنفسي .. أم لولد عمره 4 سنين قبلها جلست 5 سنين أتعالج وفي السنة السادسة ربي اكرمني والحمدلله .. وبعد مافطمته على سنة و 8 شهور بديت برحلة العلاج قلت في نفسي خليني أبدا من بدري يمكن تطول رحلة العلاج مثل الأول ولي سنتين أتعالج
عندي الدورة مو منتظمة وعندي تكيسات وفي خلال هالسنتين عملت تلقيح صناعي مرتين و فشلت والحمدلله على كل حال
كنت استخدم كلوميد وابر تفجيرية وكمان وصفت لي الدكتورة الميتفورمين عشان التكيسات <<< :cold: بس هذا سبب لي تعب نفسي وجسدي كرهته لدرجة ماعاد أقدر أتقبله فسبته
وبعدين بدت معاناتي مع الإلتهابات :EYdyQ: في البداية كانت خارجية وبعدها صارت داخلية وخلال هذه الفترة كنت أتعالج في مستشفى حكومي
والله يابنات سنتين و الدكتورة ذبحتني بالكلوميد و ابر التفجير تعبت منها لدرجة أنا احسب لنفسي فترة العلاج بالمنشطات وبعدها آخذ لنفسي استراحة من تأثيرها والمشكلة أنه التكيسات ماراحت ومن آخر عملية تلقيح صناعي في شهر 4 بالهجري تركت المتابعة بالحكومي ..
وبديت أتعالج في مستشفى خاص عن الإلتهابات الداخلية فكشفت علي الدكتورة فطلعت قرحة وتعالجت منها وبعدها استخدمت البروجلتون 3 شهور لوحده بدون أي منشطات ..
وبعدها رجعت الإلتهابات الداخلية وعالجتها ... ورجعت لي بعد عيد الفطر وكشفت فقالت لي الدكتورة بداية قرحة فعالجتها الحمدلله لي اسبوعين من انتهاء المعالجة بالمضاد الحيوي وتحاميل البوتيل قبلها استخدمت حبوب الدوفاستون عشان تنزل الدورة ونزلت وتابعت عند الدكتورة التبويض وبعدها وصفت لي الدوفاستون لمدة 10 أيام
وأنا الآن لي يومين من استخدامي للدوفاستون وبعد بكرة موعد دورتي

بس فيه معلومة قالتها لي الطبيبة اللي تابعت عندها قبل اسبوع فرحتني يارب لك الحمد
لما رحت لها عشان متابعة التبويض لأني أول مرة أتابع عندها قلت لها أنا في تكيسات .. وكشفت علي بالسونار ( داخلي ) قالت مافي تكيسات من خلال الكشف ماعندك تكيسات
الحمدلله حمدا كثيرا فرحت فرحة لما خبرتني لي سنتين أتعالج منها ....

سألت أخصائية تغذية تعالج من خلال الموازنة بين المعادن عن مشكلتي مع التكيسات ..
فجاوبتني هذا بسبب زيادة الكالسيوم في الجسم ..
فكان العلاج كالتالي :

1- مقاطعة جميع أنواع الأجبان واللبنة <<< لأن الجبن السبب الرئيسي في المشكلة ( ومقاطعة منتجات الألبان والحليب لفترة مؤقتة )
2- شرب كوب من منقوع التين المجفف صباحا على الريق
3- شرب مصل اللبن 3 مرات يوميا
4- ختم أي وجبة بالزيتون الأخضر من 3 - 7 حبات

بديت بالنظام في رمضان يوم 12 وتابعت الحمدلله عليه وبعد العيد كمان
ولما نزلت علي الدورة آخر شهر 10 أول مرة تكون مختلفة علي لأنها ( جاية على أحمر سائل وبعدها نزلت علي الله يكرمكن دم متجمد لونه أسود وألم شوي شديد أسفل البطن جهة المبيض الأيسر وبعدها اختفى الألم استمر ينزل لمدة ثلاث أيام وبعدها بدت تخف وفضلت معي من بدايتها حتى نهايتها 6 أيام

هالأخصائية ذكرت أنه لما تتابعي بالنظام تنزل الدورة دم أسود متجمد لمدة ثلاث أيام .. فهذه علامة على نزول التكيسات
وسبحان الله نفس كلام الدكتورة حصل معي

ولما بشرتني الدكتورة أنه مافي تكيسات قلت يمكن سبحان الله جعل الشفاء من خلال تغييري في نظام أكلي فله الحمد والشكر هو الشافي أولا وأخيرا