ان شاء الله بخير جميعا ً أنتو والكتاكيت ..
مااطول عليكم الأسبوع اللي فات مرضت بنتي وسخنت وخشمها يسيل وكحة خفيفة وبلاغم في صدرها بس المشكلة بالسخونة والبنت طبعاً ماتآكل والشرب اوقات واوقات ..
هي عموما تمر بتسنين وطبيعي تضعف المناعة والأجواء متقلبة والجو يحمل فايروسات مكروبات
وأبوها قبل كذا مرض والظاهر انه انتقلت لها العدوى وقبل كذا جتها نفس الأعراض ..
بس هذي المرة قويت قلبي انا وابوها وماوديناها دكتور بتقولون لي ليش ؟
السبب ان كل مارحنا لدكتور كتب لنا مضاد وانتو عارفين ان المضاد يقتل دفاع الجسم ويصير كل مامرض يبغا شي اقوى واحيانا الاقي الادوية ماتناسب سنها مو مكتوب بالروشته او حتى الجرعه ماتناسب سنها غير الاثار الجانبية ..
استعنت عالشقى بالله وصبرت من حالة القلق وصرت اعطي البنت سوائل وكل ماارتفعت سخونتها وقربت على 38 ونص اعطيتها مخفض وسويت لها كمادات بمويه عادية ( طبعا انواع البكاء ) وتميت على هذا الحال 3 ايام ماذقت فيها راحة ونوم متواصل ..بس الحمد لله كانت السخونة ربوع وخميس
وجمعة وكان ابوها متواجد ومافي دوام وكانت السخونة مستمرة ..وماتهدأ الا نادرا وتوصل للمعدل الطبيعي يعني البنت مسخنة حتى مع المخفض بس انه سخونتها تكون مفيدة وانتو عارفين ان السخونة المفيدة تكون بين سبعة وثلاثين ونص الين ثمانية وثلاثين واربعه من عشره ..هذي السخونة معناته الجسم بيقاوم المرض ..
المهم هي لو اخذت مضاد راح تسخن ثلاثة ايام وتروح السخونة فما فرقت معي .. بس فيه شي جازفت واستخدمت مع بنتي مع انه عمرها سنة وسبعه شهور ..وهو :
مشروب الشاي الأخضر بالزنجبيل والعسل ,,( يعتبر مضاد طبيعي )
انا بعمله لنفسي وطريقته ( ملعقة حلا شاي اخضر وقد اصباعين زنجبيل اخضر مقطع واصب عليه مويه حارة بترمس واخليه ينقع اقل شي ساعتين ..
كنت بعطيها عصير فواكه بالقارورة لين 120 واكمل لين 180 من المشروب بعد مااحليه بملعقة حلا عسل ..واعطيها تشربه لانها مابتحب طعمه لما اعطيها هو وحده ..
اللي راح تقولي زنجبيل حار وماعرف ايش او انه حرام طفلة تآخذ شاي ..انا راح اقولكم ان الزنجبيل افضل من الكيماويات والمضادات اللي تهد مناعة الجسم والشاي ضرره بالكافيين والكافيين موجود حتى بالشوكولاته والمشروبات الغازية والكميه اللي بستخدمها مجرد ملعقة حلا مسطحة في ترمس صغير ..يعني شي لايذكر ..والكمية اصلا قليلة وكنت بعطيها هوا مره باليوم ..
بعد ماراحت السخونة ولله الحمد استمريت اسبوع احطلها بالعصير فقط منقوع زنجبيل بدون شاي او عسل والحمد لله مافي لابلاغم ولااوساخ وصدرها صار تمام ماشاء الله يارب لك الحمد ..
كمان شربة الدجاج مفيدة جدا في حالات زي كذا خصوصا ً مافي شهية
فـ قبل ماتطبخي دجاجه اسلقيها بمويه ماتكون مويه كثير وبعدين شيلي الدجاحه اطبخيها عادي ومرقة الدجاج حطي فيها بصلة كامله بدون تقطيع وفصين توم او ثلاثة وحبة طماطم كامله بس تشقيها من فوق شقين وحطي اي خضار مبشورة عندك بس لاتكثري وحطي المكرونة اللي على شكل حبات رز نسميها ( لسان العصفور ) وذا تبغي الشوربة تثقل حطي شوفان ملعقين كافي ..وحطي فلفل اسودولاتكثري لما يكون الطفل صغير وكمان حطي كمون ..
اخيرا ً ان اصبت فمن ربي وان اخطأت فمن نفسي و من الشيطان ..
أسأل الله ان يحفظ ابناءانا وبناتنا من كل مكروه ..
دعواتكم بالحفظ والعفو والعافية لبنتي ولوالداي وزوجي واخوتي ولي ..بارك الله فيكم .