الامير عبد العزيز ابن سعود ((السامر))

الله لا يهـــينك





ليت كل الناس شافوني بعينك
بس أبيهم ما يشوفونك بعيني

الوفا لو هو نفس بيني وبينك
ما انقطع والناس من بينك وبيني

ما تصورت بحياتي مثل زينك
وكان ما صدقتني بحلف يميني

لا تضيّق صدر حلمة فرقدينك
ولا تقول إني معك ضاعت سنيني

أمر مستقبل غلانا في يدينك
أكتبه واقراه بين النجمتيني

نظرتي لحظات في صافي جبينك
تمسح التالين هم والأوليني

لو تدقق من يسار ومن يمينك
شفتني من خدك أمسح دمعتيني

وحدةٍ عنوانها الله لا يهينك
واختها يبقى نداها في يديني

طـفت الـزمان





كل ما أراه يذكرني بفهد العرب ذلك الفهد الذي تجلى في الأفق حاملاً معه راية الإسلام والسلام وحب الشعب فهد بن عبدالعزيز رحمه الله وأسكنه فسيح جناته كلما رأيت نجله عبدالعزيز تذكرته بكل ما فيه من صفات حميدة قيادية ورّثها ذلك النجل العظيم عبدالعزيز بن فهد0 هو ذلكم البلسم الذي تفيق مواجع الشعب على كرمه ونبله الذي لا يُحد لأنه يضع أبجديات الشفاء لكل المواجع. لذلك قلت فيه.

طفت الزمان وطاف الانذال ركبك
من نبل غاياتك ومن طيب ذاتك

قاموا وطاحوا كلهم دون دربك
ما فيهم أحدٍ يا أبيض الوجه فاتك

الله من كسر ٍ عسير ٍ جبربك
دجله وفاك وطيب راسك فراتك

كم واحدٍ للي محال ٍ عبربك
منتب تخلي ركعةٍ من صلاتك

عن مجد فهد المملكه ما عثربك
حظٍ يا بو تركي سمت به صفاتك

رمــز الجــمال

يا سيدي زاد تعذيبك وطال الجدال
وأنا أشوف انك تهدي وشف وش ترا

ياللي غلاك أكبر من الوصف مالك ومال
الصده اللي تعيّفني لذيذ الكرا

وصلّتني في محبتك النجوم العوال
ورجعتّني في تغليك وصدودك ورا

مشيت معك وسكت وقلت عل الليال
تذكره في تواضعنا وهو ما درا

يا اقرب من الماء لكفي وانت صعب المنال
الله يبيحك من اللي قلت واللي جرا

يا ميّس القد يالفاتن يا رمز الجمال
سرّيت قلبي على دربك ويمك سرا

يا شادٍ الريف لا يطغى عليك الجفال
وأنا بجنبك وصدري لك ملاذ وذرا

عظيم أشواق



داعي عظيم أشواق قلبي ندبني
بعيونه الثنتين حب وكرامه

وأطرق وسلهم بالرموش وكتبني
في صفحة أموات الهوى من غرامه

وقف وناظرني وصد وسلبني
من قلبي اللي فيه مثل القيامه

وبسلاح روس رموش سودٍ غلبني
عكشٍ تنوش الخد نوشة سلامه

وفوق الجياد الصفر غار وكسبني
خذني أسيرٍ فارسٍ فيه شامه

فيه الغلا والملح والزين يبني
بنات حواء كلهن في بهامه

هذا الذي حبه ظمي وشربني
وشرب الهوى ما فيه عيب وملامه

الله لغضات الصبايا وهبني
لكن هذا فارقٍ باحترامه

فزعة ضحى



أنسني قلبي الجبار صد ونسى
ما جرى له بحبك وانشغل بالجديد

راح وقتٍ أردد به ياليت وعسى
جعل هاك الليالي بيننا ما تعيد

لا تحاول لمن هو صد عنك وقسى
خالي الود مثلك ودك إنه بعيد

يا هلا بالهموم ويا هلا بالأسى
يومها حققت لي كل ما كنت أريد

يحسبني أفكر فيه صبح ومسا
ما درى قلبي الشفاف عود حديد

مركبي في مراسيه الجديدة رسى
وبالغرام اهتنينا والمحبة تزيد

حوريتي

ما أحلى دلاله وما أحلى بالغلا فنه
إن راح عني على ما راح ودوني

حوريتي كنها حورية الجنه
ما شفت أبد في حياتي مثل مظنوني

والحب ربي لخلقه والغلا سنه
وعيونها بالغلا المختال وصوني

قلبي يحب الحبيب اللي على ظنه
من حبها باح لهل الحب مكنوني

شوفي خذنه محاجرها وردنه
حوريتي حبها ما وقف من دوني

أنا أشهد أن الغلا له ياعرب عنه
أعن للشوف عنه وارد شطوني

القناعة


كن حمرة خدها حمرة شفق
من سدول الليل وإقباله يضيق

وكن رمش العين للوجنة رفق
يوم هام بشوفها عيا يفيق

والشعر فوق النحر يوم اصطفق
استذار بعاتقه حرٍ طليق

راح عمري معه أنا أبحث عن وفق
قبل ما ياقف بنا رأس الطريق

في هواها القلب والشوف إتفق
والقناعة مقضب العهد الوثيق

مرني طاريه والخافق خفق
مثل خفقة بالثمر غضٍ وريق

يا غاية الروح


يا غاية الروح طول الصبر مليته
راحت طراة العمر والصبر يطويني

عليك هم الليال السود خاويته
في غربة الحب همك ما برح عيني

الهاجس اللي يجي بك طيف حبيته
عن حرة الشوق والضيقة يواسيني

أسرفت في جرح قلبي من توليته
تبعدني اليوم من كيفك وتدنيني

عليه ما تدري إنك جرت وأخطيته
وأصغر خطاياك يومك ما تداويني

والموت لا غبت عن عيني تمنيته
كله علشان شوفك شوف يحييني

فنجال همك على شانك تقهويته
متى متى بالوصل تقدر تقهويني

يا ما من الهم والغربال قاسيته
على أمل تجبر الخاطر وترضيني

عنك العزا ما يعزي لو تعزيته
عزاي ودي مثل ما أغليك تغليني

خذيت سلم الهوى وراك ما أديته
منك أشتكي لك عليك وما تشكيني

قصة قصيدة بلغت السلام

كان سمو سيدي والدي الأمير سعود بن محمد بن عبد العزيز في مدينة الطائف وعندما جئت لأودعه متوجهاً لمدينة الرياض سألته إن كان يريد أن يوصيني بشييء معين ، فقال لي إذا وصلت الرياض فسلم عليه وعندما إقتربت من مدينة الرياض وأصبحت على مشارفها بلغت سلام والدي ، كما أوصى بهذه القصيدة

الله من ظنٍ كبيرٍ هلك لي وماني
على تفسير الأحلام محدود

بصبر لعل الله يدير الفلك لي
يوم الصبر في كل الأحوال محمود

طير الليال الماضية ما أملك لي
والعين شرهه والدهر يطلب الزود

وقتٍ بدربي ناصبٍ الشرك لي
حقايقه مرة وآماله وعود

إن ضقت من وضع الليالي ضحك لي
مقدار ما أفرق حد بيضه من السود

وما نيب أحب اللي يدق الحنك لي
الواضح أحلي يا هل الطيب والجود

وأواه من ناسٍ تبيع الكلك لي
تسلم بكفٍ فيه ورده وبارود

علم خبولٍ ينحتون الدرك لي
ما ياسع أحلامي من القبر ملحود

روح وريحان



عظيم من عظم الحسن في جمالك
سبحان من صورك زاهي وفتان

غيرك عصاه الحسن وأنت إهتدى لك
أصبح لك أطوع من هوى قلب ولسان

الأوله يوم ابتدأ الخلق جالك
نفحٍ من العنبر وروحٍ وريحان

والثانية ما معك أحد في دلالك
وما تهدي عيونك على كل ولهان

العاشق اللي عاف غيرك صفا لك
لا تجرحه بالصد ظلمٍ وبهتان

الروح قبل أروح قدمتها لك
هدوٍ ولا للهدو في طبعنا أثمان

F:مساجلهF:

السامر &الشيخه صنعاء بنت مانع بن راشد آل مكتوم



F:شعر الأمير/ عبد العزيز بن سعود F:


يا مرخصٍ في خاطري كل الاحباب
اهلاً هلا بك كل مااصبحت وامسيت

لك انفتح قلبي مع فتحت الباب
وتفرقت شوفات شوقي وهليت

يامرحبا ياسيد تلّعات الأرقاب حبٍ
مسح من قلبي الحي والميت

الجو في لندن بكم كلكم طاب
وطابت ليالي فرحتي وسفهليت

أغلا سلامٍ صار من عكش الأهداب
يوم اللتوى شوقي عليها وفزيت

فزت محبٍ شاف بالعين غياب
كله على شاني على شوفك اثنيت


F:رد الشيخه صنعاء بنت مانع بن راشد آل مكتوم يرحمها اللهF:



جت القصيده ياحلا قول طراب
خلٍ لخله صافي الود والصيت

مخلص على عهده مع أصحاب وحباب
صافي وداده في معانيه ماريت

بو جادلٍ ضافي على امتب ماشاب
ضافي شليله بعالم الكون سميت

يحميه في دنياه وفي الوقت ماخاب
مع صاحبٍ يهواه مثله فلاريت

ويديم لم الشمل بالطيب واطياب
ويبقى الفرح دايم ياشيح حييت

انته أمير وانت من ناسٍ أطياب
وانت سعودي الأصل يا حظ مين ريت

يابو تركي

عَشقَتْك ما هي خفرةٍ عند اهلها
ولا رصيد بنوك عالية الارقام

ما دلل النخوه غرام وكفلها
غيرك يابو تركي حفيدٍ لحكام

حِيل المراجل طيب راسك فحلها
من زاعمك بالطيب لا طاح ماقام

ويجزا النفوس الطيبات بعملها
ربٍ لغيب الكون والخلق علام

مواقفك بالطيب تمشي قبلها
ما تلتفت لخلاف والدرب قدام


المقصود بأبو تركي هو صاحب السمو الملكي الأمير عبد العزيز بن فهد بن عبد العزيز آل سعود

العيب


يكون لتفاعل المجتمع مع الحياة تفاعلات تثير المشاعر بمثل هذه القصيدة



الضايعه تبدأ من القيل والقال
لو كان ما للخلق عندك مطاليب

دنياك لو تغري مقامك بالاقبال
عن وجهها جوّد لكفك مقاضيب

اقضب عنان العقل عن كل مختال
ولا توقف ما قف الشك والريب

كم هرجةٍ يفرط بها حرص عذال
تظهر فوات الحرص عند الاجانيب

ويركب ظهرها كل مبغض وختال
ويسوقها سوق العرب للمناجيب

الناس دون احساس ماترحم الزال
إلا عليه يوثقون التعاجيب

مشاكل أيامك عريضات وطوال
تفرق بها خبث النوايا من الطيب

هذا وحظي طول الايام ما مال
راسي رفيع ٍ عند سَال ومجيب

حنيفي ٍ بالفعل من حومة ابطال
حقي من التاريخ بيض المكاتيب

من فضل رب ٍ بالخفا يعلم الحال
نارد على عسر الموارد لياهيب

ياللي تحَسْب العز في كثرة المال
فقد الجماله والتجمل هو العيب

العود لو هو ميت ٍ جاله ظلال
جاله ظلال ٍ عن سموم اللواهيب

المال مثل الفيّ في كل الاحوال
حظ من اللي يعلم السر والغيب

من لا يموت الحظ به مات ماطال
ولا غنم يوم السعد بالمواجيب

الدين عز ورايته طيب الاعمال
وفزعة خفا علي النقا للأصاحيب

وثّق كلامك فالمواقف بالافعال
ولا تطاول من على حق ومصيب

اصبر على الميلات والرب حلاّل
الصبر مفتاح ٍ لصاف المشاريب

الصبر مفتاح الفرج مابه اشكال
يرقا به الرجّال روس المراقيب

هذا وانا بَوْصيك بمبادر الفال
الفال يا رجّال ما يلطمه ذيب

ما تدري انك بين وارد ومارود
وتطلق عنان المخطيه ما تبالي

ومن رام عز النفس يصبر على الكود
ليت أوّ لات الوقت مثل التوالي

كم واحدٍ من جاير الجور ملهود
يضحك وكنه من عنا الوقت خالي

اقضب لسانك عند غايب وموجود
وتفوز برضا الله عزيز الجلالي

احذر تسَمّع هرج حاسد ومحسود
هم ٍ حرام وهم عنده حلالي