تجمع امهات مايو 2012 (1)

هلا بنات شخبااااركم وحشتووووووني
أبشركم الحمدلله ولدت ويبت أحلى بنوته

من زمان كنت أبي ادخل بس ما كنت أقدر من تعب الولادة

ههههه صج الولادة برنامج رعب

والخياطة حدث ولا حرج ما توقعتها جذي .. الحمدلله ع كل حال

بسالكم متئ تطيح الخيوط ،، الحين صار لي 11 يوم .

واستخدم الميبو

وإحاتي هالخيوط ،، وأخاف أجوف المنطقة

بروحي بصعوبة اتحرك

واللي يستخدم المره ؟؟ شلون الطريقة ؟

وأيي في سؤال محرج شوي :$

شلون تنظفون المنطقة ؟؟ قلت بستخدم الموس بس أخاف يأثر ع الخياط ماعرف شلون

همسه
تو الناس عالحلاقه احس مدري يمكن لان انا قبل مااولد بيومين كنت منظفه هههههه ماتعبت بالنفاس
المره انا اغسل فيها او اذا تبين حطي شوي على قطنه وامسحي المنطقه فيها طبعا منقوع المره
الخيوط لاتحاتينها بتطيح انا اخر شي طاح قبل نهاي الاربعين بيومين خخخخ هذي الداخليه بس الخارجيه مدري عنها=)لاشفتها ولا ابي اشوفها خ خ خ خ
ياريت تعطينا تاريخ ولادتك وايش جبتي وايش سميتي=) عشان نضيفك عالقائمه

امس اخر اختبار ياااي الحمدلله يارب مايروح تعبي وانجح بدرجات حلللللللللوه^_^الحين بفضى لنفسي العبايات تخلص بعد كم يوم وسويت شوبينق على خفيف ووصيت على اشيا من لبنان وباذن الله برجع شقتي الاسبوع الجاي=)

همسة ,, الحمدلله على السلامة ومبروووك ماجبتي وتتربى بعزكم ودلادكم ان شاء الله ..

الخيوط تطيح على حسب جسمش انتي ! وهو بالعادة يتراوح مابين اسبوع الى شهر او حتى اربعين يوم ... انا الخارجية بدت تطيح بعد 6 ايام واما الداخلية قبل الاربعين بجم يوم كملوا كلهم .. في حين ان اختي بدوا يطيحون لها بعد 3 اسابيع ... انتي استمري على الميبو 3 الى 4 مرات باليوم لانه يلين الخيووط وممتاز للالتآم و تنقعي بماي دافي وتقدرين تحطين فيه غسول البيتادين للتطهير ..

تنظيف المنطقه الحساسة بدري خيوتي! على الاقل يصير لش 20 الى 25 يوم يكون الجرح كله التأم ونص الخيوط طاحت احسن وانظف وعشان مايصير لش التهاب ! ..
عن نفسي استخدمت الترم تبع البراون كان بعد ال20 يوم ولمناطق صغيرة لان بذاك المكان ياخذ له وقت على مايطلع بسبب الخياط ...

اي صح تفاحه اذكر قصه اختج اللي كتبيتها
ولدت؟؟
شنو جابت ؟

مشكووورين خواتي ع الرد

ولدت تاريخ 3/6 ---> طبعا مطوفة موعدي ب 4 أيام :p
و سميناها فاطمة :)

تفاحة في شيء خاص حق التنقع ؟؟ أو بالطش ؟

والميبو شكث تمتيتي تستخدمينه ؟ لأن الدكتورة كتبت لي لمدة أسبوع بس ما جفت سي طاح

مرحباً أمهات مايو
شخباركم
شخبار البيبي والسهر

انه ولدت تاريخ 3-5-2012
وجبت بنوته سميتها زينب
وكانت ولادتي قيصرية :)

:074:قائمة الامهات:056:
~engineera83~ عبدالله 19-5-2012
الحوراء الانسيه~منى 7-4-2012
احلى~حلوه~جويل 30-4-2012
&&شهد&&~ هند 11-5-2012
التفاحه الجناويه~مريم 3-5-2012
تواشيح الغسق~زهراء 10-5-2012
حواء الفاتنه~مريم 6-5-2012
فتافت~جلنار 8-4-2012
om noranz~نوران 27-4-2012
اجاصه~ -ولد-12-5-2012
احلى دلع2011~زينب 3-5-2012
همسة قمر~فاطمه 3-6-2012

ياعيني عالتجمع نصه والدين بابريل والنص الثاني بـ جون لووووول

جوفان حبيبتي ,, اختي للحين ماولدت انا سابقتها بتقريبا 5 شهور خخخخ ياسلام ,, الحين هي بالسادس وان شاء الله داخلة على السابع والنونوو بيطلع معرس باذن الله ..

همس ,, عنوني تاخذين قيصرية اللي يسمونه بالانجلش bedpan من الصيدلية وهي مخصصه تنحط على التواليت وتحطين فيها شوية بيتادين وتضيفين عليه الماي الدافي وتقعدين فيه فترة قد ماتقدرين بالنسبة لي حدي دقيقه الى دقيقتين لان مريومة حزاتها مو خوش مع روحة الحمام ههههههه بنتي حاطين لها منبه ... و الميبو تواصلين عليه حتى لبعد ماتطيح الخيوط لانه ممتاااز للالتآم السريع وبنفس الوقت يعدل المكان شكليا مثل مانقول يسبطه ههههه ومكتوب بالورقة تبعه هالشي وعن نفسي ظليت استعمله لليوم ال38 تقريبا وبعدها وقفت وماعليش من اللي تقوله الدكتورة ! هم عندهم انه بعد الاسبوع يكون الجرح قاعد يلتأم او على وشك ينهي التآمه هذا من ناحية علمية من جذي قالت بس اسبوع !! واكوو اقولش اختي 3 اسابيع مع انه سووا لها بس غرز خارجية مو مثلي خارجي وداخلي وعميييق ...

إيه علييج أختي تفاحه ردودج تعطيني دفعة ايجابية

تعرفين في أي صيدلية أقدر. أحصلة ؟

همس ,, بكل الصيدليات بس الافضل تروحين الصيدليات الكبيرة مثل ناصر, جعفر, واللي برويان هاذلين معظمهم يضمون اشيا اكثر .. انا اللي عندي كانت تبع اختي وهي قالت لي لاتشترين بجيبها لش وان شاء الله بنورثها لاختي اللي بتولد قريب هههههه .. بدور لش صورتها عشان احطها ,,, وعلى الجرح فعلا كووني ايجابية اناا شنو صار فيني اول الايام لان اول مرة يصير لي جرح جذي! وانفكت الخيوط من سادس يوم وتميت اصيح وحالة نفسيه وحكة وألم وعدم راحة وزوجي وداني للدكتورة بعدها استوعبت الموضوع طبيعي وهالاعراض تدل ان الجرح قاعد يلتأم! وشوي شوي قمت اتحمل بنفسي واحقر الشكل الخارجي والحين الحمدلله رجع مثل قبل اللهم تغير بالفتحة الخارجية ,, وانتي ان شاء الله جذي ..

ام ميمي
ههههههههههههههه ماصارت مرهم بير هذه اللي تتواثونها خخخ

جوفان ,, هههههههه شفتي عاد من جيل الى جيل وتتوارثها الاجيال مثل زبدة لورباك وفيمتو ههههههه ... دووووم هالضحكة ياااارب جوووفاني وش اخبار الموعد مع الدكتورة؟؟

ازف احلى خبر صفصف على اجناحي
حملت السعد كله بقلبي وابراحي
رزقني ربي اكبر نعمة واغلاها
هلا ب أحمد هلا وابتدت افراحي




الحمدلله رب العالمين رزقني ربي ب احلى احمد ,,,


اشكر كل من سال عني سواء على الخاص او العام ,,,

مشكورين من القلب


من ولدت ما فتحت النت ابدا ,,,

بكتب لكم قصة ولادتي ,,


الله يسلمككم انا كان موعدي 25-5 ,, طوفت الموعد وتضايقت كثير وصرت ما اروح الدوام من تاريخ 24 خلاص طفشت ,,
كان عندي موعد تاريخ 26 ف الخاص رحت حولوني المستشفى الي بولد فيه على اساس ان الماي ناقص اكثر من اول رحت لهم وهم ولا مهتمين فحصتني قالت معدل الماي زين المهم شافتني فاتح 1 سم قالت بعده وقت

من يوم الاحد بدء عندي الم بس كان خفيف . الاثنين حسيت بالم دورة وكان يذبحني ومسكت نفسي ببالبيت وماخبرت احد بس انا وزوجي ونزل علي دم رحت الثلاثاء وانا عندي الم كل 5 دقاىق ومتعب كثير وكنت 2 سانتي المهم دخلوني الملاحظة والرحم يغتح ببطى والالم ما بحتمل

المهم شيكت بعد 3 شاعات توني 3 ونص :'( عطتني اره مهدىه تنومني بس يكون الالم بشكل اخف

عطتني جزاه الله خير وريحت شوية
على 12 بليل قالت بدخلني غرف ولاده وصلت 6 سانتي اختي وامي انو معاي اختي اتصلت ف زوجي ودخلت الغرفة وبدء الطلق بمعنى الكلمة وفجاه وصلت تقريبا 8 ونص واقولهم بولد تقولي الدكتورة لا انتظري بعد

فجاه تشوف على جهاز الدقات دقات حماده ربي يحفظه زادت كثير وقامت تدور على الراس حصلته قلب الوضعية زوجي كان يسمع صياحي من وراء الستارهواختي وامي حالة بكاء ربي يخليهم لي
دخلوه عندي عشان يهدئني وبعدها قالو ما ننتظر لازم عملية خطر على الاثنين ووقعنا ودخلت العملية ,, زوجي يقول ماظولت بالكثير نص ساعه او اقل وطلعت دكتورة تقوله زوجتك جابت ولد وطلعت وراها السستتر وحماده ف يدها والحمدلله

وانا لما طلعوني فجاه صحيت من البنج واسئلهم عن ولدي كل سستر بغباها تقولي ما اعرف انا هنا خفت وفجاه اشوف امي واختي اسئلهم وين ولدي يقولولي ولدك بخير ويشبهك هنا تطمنت وتدخرت

والحمدلله رب العالمين كلها كتبت ربنا

لين اخر لحظة كنت بولد طبيعي لكن ربنا ما اراد والحمدلله حمدا كثير اF:,,,

كاني طولت ,,, يمكن في كلمت مخبوصه كتبت بسرعه بسرعه خفت لا حماده يقوم وما اقدر اكمل لكم ,,

تميت ف المستشفى 5 ايام وكانهم دهور :(
بس الحمدلله ليل ونهار كلهم كانو عندي وكانه بالبيت :p
امس كملت اسبوعين والحمدلله ربي يعدي الايام على خير ,, ويعينا على تربية عيالنا :L:

الحمدلله على السلامة ام فجووورة ويتربى احمدي بعزكم ان شاء الله ... سبحان الله كتبه الله ومشيئته بكل شي ! يعني انا عكسش كنت مفترض عملية وكنت من الم الطلق الصناعي اطلب منهم يودوني عمليه ! وبالاخير سبحانه ربي نط التوسع من 3 الى 8 بغضون دقايق وولدت طبيعي ! الحمدلله على كل حاال ...

انا امس رجعت بيتي والله اشتقت لراحة الليل مع الوالدة لما تمسك مريومه عني وانا رايحة بالنوم خخخخخ ..

باقي الامهات شخباركم ؟؟

السلام عليكم ورحمه الله وبركاته

كيف الحال نفوسات ؟؟ وكيف البيبيات ؟؟

مبروووك للي ولدوو وحمدلله ع سلامتكم يارب

ام فجورة .. حمدلله ع سلامتك وسلامة حمادة ربي يحفظه لك من كل شر و تشوفيه معرس يارب

تفوحة .. حلوة .. شلون ميمي و جوجو ؟؟ نونا تسلم عليهم كثيير السلام ..

جوفانة .. اخبارك الغلا ؟؟ و الحمدلله سمعت انك تشافيتي من القرحة .. مبرووك وعقبال ما ابارك لك بالبشارة قرييب يارب
ممم دبوه حبيت اسألك اذا قد جربتي التمريخ ؟؟ و اذا حملتي قبل كذا طبيعي بدون اي علاجات ؟

,,,


بالنسبة لأخباري .. للحين ماني مستوعبة انه خلاص بناتنا بيكملوا الشهرين ماشاء الله
الوقت مر بسرررعة .. !!

ممم قبل اسبوع كان عيد زواجي .. و بصراحة ما عملت شي لانه امس رديت بيتي بعد ترفيييع حق 3 شهور
و خلاص حيلي انهد دا شيء و الشيء الثاني انه بعد بكرة زوجي عامل عقيقة وعازم كل اهله واهلي عندنا بالبيت ..
الله يعين ..

و بعد يوم الاربعاء ابدأ امتيازي اللي مدته سنة .. وشايلة هم كبييير لان الدوام 12 ساعة
مدري كيف بستحمل غيبتي عن نونا دا الوقت كله :(

وعن الخياطة .. انا حسيته التأم زييين ..
لكن قبل كم يوم .. بعد الاحم احم احس مكان الخياطة يألمني وكأنه انفتح الجرح من جديد " رغم انه ماحصل ايلاج " ..!!
هالشيء خلاني انفر و اقلق ..

عن الرضاعة الطبيعية .. نانة ما تشبع من حليبي فأضطريت اعطيها مكس كم رضعة مني وكم رضعة من حليب رونالاك
حد جربت هالحليب ؟؟ وكيف نتايجه معاك ؟؟
انا احسه زين وياي ..

عن وزني للأسف خسرت 10 كيلو :( مع اني كان ودي وزني يثبت ع ال 50 لكن ان شاء الله ما انزل اكثر
ماودي ارجع عصلك ام 39 كيلو .. رغم انه ثيابي صغرت علي لكن عادي ابي اكون كذا بدا الوزن لانه مثالي
و الاكل اكل زين لكن احيانا مالي نفس شيء من قلة النوم ..

والنووووم وما ادراك ما النوم .. طبعا مثلي مثلكم ودعت النوم العميق و نومي تخربط معاها
لانها احيانا الصبح تقعد صاحية و احيانا آخر الليل .. فلما اجي انام تصحى
فقلت نامي معاها واصحي معاها .. و زوجي صار مثلنا خخخ

مع كل دا التعب .. نظرة ولا ضحكة وحدة من نوران .. انسى كل شيء

ربي يحفظها لي ويخفظ لكم كتاكيتكم ويحميهم يارب


يلا قرقرت واايد بس لاني من زمان ما دخلت وشقرت عليكم .. حبيت افضفض

واستوعبت للحين اني مانزلت قصة ولادتي او موضوع استقبالي والصور .. لكن وين اللي يفضى ..!
لي نزلتهم بحطلكم الروابط :)


و اموااح للحلوات ارنوباتكم ..

انا اليوم ان شاءالله برجع بيتي والنفسهي دااون احس بشتاق لاهلي مررره
ام نوران
رونالاك ماانصحك فيه لو تلاحظي انه مايذوب زين سواء بماي حار او ماي دافي كلش!يبقى تكتلات بسيطه وقريت خبر بجريدة عكاظ انه انمنع من السوق لهذا السبب وطبعا الصيدليات مخلينه عشان يخلص الي عندهم!اذا تبين سوي بحث واقري
انا عندي غيرت لبنتي وجبت لها نوفالاك وصفه لها الدكتور

قووة بنات شخباااركم شمسوين ويا بيبياتكم ؟



مشكووووورة اختي تفاحة ع نصايحج

سلام شخباركم انشالله بخير
وشخبار بيبياتكم

بسالكم بالنسبة للنفاس أربعين يوم
بس ليحين ماخلصت من الدورة
فما ادري أهي الدورة الشهرية نزلت عليي لو ليحين مال نفاس
واني عمليه قيصرية

احلى دلع
اتوقع دوره,
وينكم ياامهات! لاتكون جاتنا عين خخخخ