موضوع شاغلني وقاهرني

السلام عليكم

أختي العزيزة شريفة

حابه أفضفض لج عن اللي يشغلني وقاهرني

أنا أم ل3 (بنتين وولد) ولدت قبل 5 شهور ويبت أحلى بنوته وسميتها (مريم) على أسم جدتها أم أبوها

وهني الشي اللي مضايقني

صار موقف بسيط قبل أكثر من شهر بيني وبين الجدة ( أم زوجي ) _ ولقرب السكن بين بيتي وبيتها حيث أننا نعيش في بيتين منفصلين ويحيطنا كمبوند

فهي على طوول _ الجدة_ تمرنا البيت وتشوف عيالي

وكل يوم أثناء فترة نفاسي كانت تمرني الصبح علشان تمسك بنتي لصغيرة علشان أوصل عيالي الثانيين للروضة وأرجع

يوميا كان هالشي

بداية شهر 3 فكرت أعلم شغالتي شلون تهتم ببنتي الرضيعة علشان لما أرجع لعملي تكون تعلمت . وأكون متطمنه.

اتصلت الصبح في الجدة وقلت لها: انا اليوم خليت مريم عند الشغالة علشان تتعلم تراعي الياهل بس بجربها _ على ماأوصل عيالي للروضه

هي شكلها الجدة زمرت وقالت: مو مشكلة خل تيودها الشغالة اذا حبيتي اليوم وكل يوم بعد

ويبين من صوتها أنها غضبانه

ومن يومها أختي شريفة ماتدخل بيتي ولاتقرب صوبه .. تخيلي .. وأنا ماسويت شي غير أني أبي الشغالة تتعلم شلون تمسك الياهل وتهتم فيها.. المشكلة أن الجدة ضنت أني مابيها تتدخل في حياتي .. من جذي صارت ماتقرب بيتي .. وأساسا في خلاف بينها وبين ولدها اللي هو زوجي..

شاسوي يااختي حاولت أتصل في الجده وأخذ من خاطرها أتصلت مره .. ورجعت رحت بيتها مره وحبيتها على راسها وقلت لها أنتي أمنا وانتي الكل .. احنا مانعرف بدونج .. وانا أذا باعلم الشغالة بس علشان تساعدني.. أنا أنتي تبقين جدتها وأمها.

شاسوي أكثر من جذي .. وانا أساسا ماغلطت في شي

ألحين العلاقة متوترة صايره بيننا

تصدقين حتى تأسفت أني سميت بنتي باسمها غلطت ليتني مسميتها على كيفي

لدرجة حتى ماتمر تشوفها الصبح فترة اللي أكون في الشغل .. تخيلي

أرجو أنج تتحمليني لأني طولت وتعبتج

لكن شالحل معاها ..هل أقدر أغير أسم بنتي

شرايج أختي في الموضوع