مساء الخير بنات
توني رادة من المستشفى قلت بكتب لكمـ قصة ولادتي
طبعاً مثل ماكنت أقول لكمـ انهـ من دخلت التاسع والتقلصات والتحجير متواصل معاي لدرجة انهـ أنامـ بصعوبة من الألمـ
بس بتاريخ 20 بالليل زاد الألمـ أكثر وأبداً ماخطر على بالي انهـ ممكن تكون ولادة حسبالي نفس كل يومـ
حاولت أنامـ ليلتها ماقدرت الألمـ مو طبيعي تميت أتقلب وأتلوى من الألمـ لي الصبح
كان السبت تاريخ 21 قمت رحت الحمامـ تكرمون أجيكـ إذا طاحت السدادة أو شي ماشفت ولا شي استغربت قلت عيل مو ولادة
بس قلت خل أسبح وأقعد زوجي أقولهـ نروح نتمشى يمكن يخف الألمـ ويومـ زوجي شافني أتعصر من الألمـ أصر انهـ يوديني المستشفى وأنا طبعاً مو راضية على أساس انهـ كل يومـ جذي ومالهـ داعي
قلت لهـ خل نطلع نتريق ونتمشى وعقب يصير خير
قالي احنا أوردي رايحين المستشفى بندفع لهمـ مقدمـ خلي الدكتورة تفحصج لني بسافر اليومـ عالأقل أسافر وأنا مطمن عليج
وافقت حزتها ورحنا تريقنا طبعاً ماقدرت آكل كان الألمـ لا يحتمل
رحتا المستشفى قلت لمالت الرسبشن ماعندي موعد بس أبي الدكتورة تفحصني شاكة اني بولد
أول شي مارضت قالت نطري يخلصون اللي عندها المواعيد عقب انتي قالها زوجي أنا بسافر بعد شوي وكلها دقايق تفحصها عشان أطمن عليها
كلمت الدكتورة قالت لها دخليها بسرعة
كانت الساعة 10 إلا شي دخلتني سوت لي سونار لقطة سريعة وفحصتني الفحص الرهيييب اللي خلى صوتي يطلع لأول مرة في مستشفى
جان تقولي خلاص لازمـ تقعدين متوسعة 2 سانتي ونص
أنا بطلت عيوني أقول لزوجي شنو..؟ جان تقول اي أتوقع على العصر أو بالليل بتكونين والدة انشاللهـ
تمينا أنا وزوجي كل واحد يطالع الثاني ونضحك مو مصدقين جنها مزحة بصراحة
قلت لها لكن دامـ بس هالكثر متوسعة بروح البيت وبرجع بعدين أبي اجهز أغراضي
وأنا أصلاً ماعندي شي بس مابي اقعد بالمستشفى
قالت لي مو مشكلة بس أول سوي تخطيط وإذا طلع أوكي روحي براحتج سوت لي التخطيط وقالت لي خلاص تقدرين تروحين
وأنا طالعة كلمت أمي أقولها ترى متوسعة واليومـ ولادة بس برجع البيت وعقب برد أروح المستشفى
عصبت علي ليش تروحين وماتقولين ومادري شنو خبرتها السالفة
المهمـ رحت البيت والألمـ يابنات ذابحني قامت أمي مسكينة سوت لي ماي وزعفران قرت عليهـ سورة البينة وتدعس في جبدي من الرطب كالعادة ههههـ
حسيت الألمـ قاعد يزيد أمي خافت قالت نوديج الحين قبل مايزيد عليج وماتقدرين تتحركين بعدين
وزوجي قعد يحن بعد وأنا مالي خلق قلت لهمـ انزين وودوني المستشفى
دخلوني غرفة الولادة الساعة 12 وشي خذوا ضغطي وعطوني حقنة شرجية تكرمون ومن يشوفوني قاعدة قالولي سوي امسي امسي ذبحوووني من المشي وهذا اللي تعبني زيادة
على الساعة 2 يات الدكتورة فحصتني قالت وصلت 4 سانتي استانست أنا قلت ياللهـ مابقى شي انشاللهـ وأرتاح
ومن بعدها يابنات ماشفت راحة
خو ماكنت نايمة مواصلة من الألمـ طول الليل وبديت أرجع تكرمون مع كل نوبة طلق تميت على هالحالة للساعة 5 فحصتني مرة ثانية انصدمت تقولي للحين 4 سانتي ماتغيرت
قاموا يعطوني أبر على أساس تساعدني في التوسع
الساعة 7 ونص فحصتني مرة ثانية ونفس الشي قامت بطلت جيس الماي على أمل يزيد الطلق وأتوسع أكثر
تخيلوا يابنات اني ظليت 12 ساعة من 2 الظهر لي 2 الفجر على هالأربعة سانتي مو قادرة أتوسع أكثر وهلكانة من قلة النومـ والترجيع والألمـ كان مو طبييييعي كنت بين الطلقة والثانية أغيب عن الوعي من التعب مادري منو يدش منو يطلع وبس يرجع الألمـ جسمي يقعد يرجف بقووووووة حسيت روحي بتطلع خلاص وكل شوي تيي تفحصني تعذبني أكثر
وبعد ماقاعدة أتوسع مع انهـ الألمـ كان خرااافي
وكل هذا يابنات والبيبي مازال فوووق راسهـ مانزل بالحوض والدكتورة مستغربة اللي قاعد يصير وياي مو طبيعي
على الساعة وحدة الفجر كلمت زوجي قالت لهـ بعطيها مهلة ساعتين بالكثير إذا مابدت تتوسع بسويها قيصرية
وكان المفروض انها ماتنطر وتسويني قيصرية لني وصلت للموت خلاص ومافيني طاقة لأي شي ولا حتى اني أدفع لو توسعت
بعدها قمت أحس بضغط تحت واني أبي أضغط وقمت أضغط جيكتني الدكتورة وصلت 8 سانتي ماصارت 3 الا أنا متوسعة كامل وخلاص شعر البيبي بدا يبين لنهمـ كل ما ضغطت كانوا يضغطون على بطني ينزلون البيبي لنهـ مو راضي ينزل
وأمي كانت وياي مسكينة ماسكة ريولي ودافعتها على صدري بقوة ووحدة من الممرضات صاعدة فوق السرير تضغط بطني بقوووة وأنا أحاول أدفع وبنص الدفعة أغيب عن الوعي
يابنات أكثر من مرة راس البيبي يطلع ويرجع داخل لني ماقدر أدفع من التعب
عقب قالت لي الدكتورة هذي آخر دفعة إذا مادفعتي عدل بييب مكينة الشفط كيفج
آخر دفعة دفعتها وطلع حبيبي عبد اللهـ على الساعة 3 وربع بتاريخ 22-1
طاح على السرير بنات أطالعهـ جثة هامدة لا نبض ولا نفس شالوهـ وهم يقصون الحبل السري ويركضون فيهـ حتى ماطلعوا المشيمة مني
تخيلوا حالتي أقول لهمـ ولدي مات..؟
أمي تقولي لا ياعمري مامات الحين بتسمعين صوتهـ
أقولها لا ولدي مات واللهـ مات أنا ذبحتهـ أنا قتلتهـ كلهـ مني
مرت دقايق جنها ساعات وأنا ودي أقومـ أروح أشوف ولدي شفيهـ بس مو قادرة أتحركـ من مكاني
رجعت الممرضة تطلع المشيمة وأنا أكلمها وأسألها وهي ماترد علي بس كل اللي تقولهـ انهـ ولدي عند الدكتور
طبعاً المأساة اللي صارت بعدين حق ولدي قصة ثااانية مابي أطول عليكمـ أكثر
الحين ولدي نقلوهـ السلمانية من أمس ادعولهـ يقومـ بالسلامة