ساعدوني في قراري الأخير

السلام عليكم ورحمة الله وبركاته



بعد ماضاقت فيني الدنيا مالقيت احد اشكي له غيركم

أنا سبق وكتبت مشاكل لي في هالقسم والحمدلله ماقصرتوا استفدت من مشورتكم وارائكم

لكن هالمره حاسه اني محتاجه لاي احد ياخذ بأيدي ويريح قلبي بأي كلمه او رأي او نصيحه

لأني امر بظروف صعبه وحالة أكتئاب لايعلم فيها الا الله

وأول سبب في اكتئابي مشاكلي مع زوجي وكنت كاتبه موضوع من قبل عن مشاكلي معه

وزادت حالتي النفسيه سووء بعد ان صدمنا بخبر وفاة زوج اختي واللي هو اخوي وبشكل مفاجئ بسكته قلبيه وهو مازال في ريعان شبابه

وفقده سبب لي صدمه وازمه وفراغ كبير لكن اطلب من الله ان يرحمه ويجمعنا فيه في جنات النعيم



مشكلتي مع زوجي من بداية زواجنا وكان سبب المشاكل الاختلاف بين تفكيري وتفكيره ولاختلاف في البيئه والفرق في العمر


هو من بيئه مختلفه جدااا ومنفتحه بالنسبه لعائلتي وكان هالشي بداية المشاكل
كان يبيني اتصرف نفسهم واقعد مع اخوانه وعايلته واكشف عنهم بحجة انهم متعودين على هالشي ولمن اعترضت وقلت له انا ماتعودت اكشف وجهي عن احد صار يعايرني باهلي انهم متخلفين ومعقدين

وللأسف جاريته بهالشي بس عشان اعجبه واصير منفتحه وبما اني اعيش في بيت اهله ومع اخوانه وخواته صرت اقعد وآكل معهم مع اني من داخل مو مقتنعه ومو مرتاحه


وبعد كذا صرت اشوف امور ماتعجبني وتضايقني وتثير غيرتي بسبب اسلوبه مع نسوان العايله وصرت استغرب كيف يتكلموا معه بكل حريه ويجلسوا جنبه ويجلس جنبهم واحيانا يصافحهم

وامووور كثيره طيرت العقل مني وسببت لي قلق لاني ماتعودت في عايلتي اني اشوف هالامور

ولمن كنت اعاتبه واقوله انا مارضى اني اشوفك تجلس يم هالبنات وتجلس تضحك معهم وتمازحهم ويجلسوا بدون حشمه

يصير يوجه لي الانتقادات ويتهمني اني مريضه نفسيا وماعندي ثقه في نفسي ولان اهلي عقدوني وووووو


ومن كثر ماكان ينتقدني ويقولي ان ماعندي ثقه في نفسي بدا هالشي يكون حقيقه وصرت افقد الثقه في نفسي تدريجيا مع العلم اني قبل لاارتبط فيه كنت مختلفه تماما

اثق في نفسي لدرجة الغرور والحمدلله املك من الجمال والرشاقه وخفة الدم والثقافه مايكفي لان اكون ملكه في حياته

لكن بسبب اسلوبه وانقاداته بدأت افقد الثقه وافقد كل ماكنت املكه


كنت احاول باي طريقه ان اتقرب منه حتى لو سويت شي انا مو مقتنعه فيه بس حسيت يوم بعد يوم اكتشف اني بعيده عنه كل البعد

يوم بعد يوم اكتشف فيه امور تكرهني فيه اكثر عدم مسؤليه وبخل عاطفي فضيييع وبعد نفسي وجسماني سب وشتم وقذف لاتفه الامور

اكثر من مره وجه لي قذف وقذف صريح ويهمني اني اسوي امور من وراه واطلع من وراه واني شايفه لي شوفه ثانيه على حد قوله وتصير سالفه ومشاكل ويرجع ينكر ويقول ماقلت
مع العلم اني مااطلع لاي مكان الا لبيت اهلي ولازم يكون عنده علم بس لاحظت انه يشك


عندي منه بنت وهذا الشي الوحيد اللي طلعت فيه من هالزواج واحمد ربي عليها ليل ونهار

بنتي تعاني من اعاقه في رجليها ومن الوقت اللي اكتشفت اعاقتها وانا احاول انه يساعدني في علاجها نحاول نسال عن دكاتره كويسين او مراكز علاج طبيعي لكن رافض ويقول اصلا هي مافيها شي وانا ماصدق كلام الدكاتره ان عندها ضمووور


ضليت فتره طويله انا اوديها مستشفى حكومي يوم واحد في الاسبوع حق علاج طبيعي مع انه مايكفي يوم واحد بس هدا اللي اقدر عليه وكنت اطلب من اهلي يودوني لانه هو مو عايش معنا اساسا يشتغل في مدينه ثانيه ويغيب مده عننا مانشوفه

استمرت حيانتا على هالحال من اهمال وبخل مادي وعاطفي وغياب الى ان صارت المشكله اللي قصمت ظهر البعير على مايقولوا

كنت وقتها خلاص اعد ايام حياتي معه بسبب المشاكل المتراكمه من سنين وفجرها انه مد يده علي وسبني وقالي كلام فضيع طبعاا كنت متعوده منه هالكلام وقت ماتصير مشكله لكن هالمره السب طال اهلي والدين والعياذ بالله وكان وقتها مثل المجنون

طبعا من بعدها انا رحت بيت اهلي والحين صار لي تقريبا 9 شهور في البدايه ماقلت لاهلي اي شي بس تكلمت مع اخوي على اساس يتفاهم معه لكن شفت مافيه اي فايده كلام اخوي

ومن وقتها ماكلمني ولاحاول انه يكلم ابوي او يصلح ابداااا اهله قاطعوا اهلي ماصاروا حتى يسلموا لو شافوا احد من اهلي

وبنتي معي بس بين فتره وفتره يجي ياخذها يوم او يومين وبعدين يجيبها

مصروف لي ولبنتي مايجيب بس يجيب حليب وحفايض لبنتي بس ولمن كلمه اخوي جيب مصروف للبنت لانها تحتاج اشياء كثير غير الحليب مارضى

صرت اي شي احتاجه لبنتي اجيبه انا او ابوي

اخر شي صارت جلسة صلح من شيخ من معارفنا واتصل على زوجي وجى هو وابوه وخاله وصار خاله هو اللي يتكلم ويشرط ويتشرط وهو ساكت يعني الامر صار بيد اهله

ولمن سالني الشيخ انا وش رايي قلت انا شرطي للرجعه تكون لي شقه مستقله عن اهله او انه ياخذني معه مكان عمله ويلتزم فيني وفي بنتي

رد خاله اي البيت فيه ملحق صغير وله مدخل خارجي خاص خلاص نعطيها اياه وهو طبعا ساكت

يعني الناهي والآمر هو خاله

انا رفضت لأن المكان صغيررر حيل ومغلق غرفه وحده بس وحمام ومطبخ متر ,قلت ابي الشقه اللي انا فيها بس يسوو لها مدخل ويستوي لها لكنه رفض


هو مايبي يخسر ولا ريال ومايبي يتحمل مسؤليه تعود اني اكل مع اهله واي شي ينقصني قالي روحي اخذي من اهلي

بس انا طفشت ابي احس اني متزوجه ولي مكان خاص فيني اطلع وادخل ماالقى احد يراقبني ويسألني وين رايحه ووين جايه

وحتى اهلي من تزوجت مادخلوا شقتي ولاشافوها لان الشقه داخل البيت

طفشت من جلساتهم وجمعاتهم اللي كلها اشياء تحرق الدم واذا هو يحب يحضر جمعاتهم ماراح امنعه بس انا مابي اختلط فيهم لأن اللي جاني منهم مو شوي

كنت اسمع الكلام عني وانا قاعده معهم واسوي نفسي مانتبهت

اسمع تعليقاتهم وغيررر قلة الحياا اللي يتصرفوا فيها مع زوجي وهو مبسوط ومايبيني اتكلم او اغار




المهم


اخر شي انه مو راضي يسوي لي مدخل خاص لشقتي ولا يبي يستاجر شقه وياخذني معه ونستقر مع بعض

يبيني اجلس في الملحق اللي يقول عنه

ولمن قلت له خلاص خلينا ننفصل افضل حل قال مااطلق الا اذا عطيتيني كل شي خسرته وتتنازلي عن بنتي



ادري اني طولتها كثيررر بس من جد اللي في قلبي اكبر من كذا بكثيررررررر ومحتاجه لاي احد يقولي وش اسوي

اللي حولي كلهم يقولوا الطلاق افضل حل

وعقلي يقول الطلاق هو الحل

بس اذا شفت بنتي اخاف اني اظلمها بهالقرار صحيح هي من انولدت ومسؤليتها علي انا واهلي بس من جد محتاااره

الطلاق بيرد لي ثقتي بنفسي ويمكن بترجع الابتسامه اللي فقدتها
وبنتي مستحيل اني اتنازل عنها خاصة انها مريضه ومحتاجه لرعايتي انا
بس اخاف لو اصريت على الطلاق ياخذها ويحرمني منهاا