mooney608;15773956:
السلام عليكم و رحمة الله و بركاته
ازيكو يا بنات يا رب تكونو بخير
أمبارح رحت جنين كان جوزى كلم دكتور مصطفى و قاله ممكن نعمل شفط للكيس فى نفس اليوم و رحت اول ما دخلت لقيت دكتور مصطفى قالى انتى صايمه قلتله شربت نسكافيه الساعة 9 الصبح قالى مفيش مشاكل و دخل و بعت أخد الملف بتاعى دخله لدكتور حسام شويه و انا دخلت لدكتور حسام سألنى فى إيه خير ؟ قلتله على الوجع اللى حاسة بيه و انى مش بقدر اقعد و حاسة بضغط ووجع شديد و مش قادرة اتعامل من غير مسكنات و عمل سونار و طول كتير فيه و بعدها قالى كدة
اقعدى علشان نتفاهم قالى بصى الوضع مش حلو خالص و أى تدخل منى او من غيرى ناحية المبيض دة معناه اننا نشيله لأن وضعه مش كويس قلتله هل اننا نشيله دة الحل قالى اولا انتى لسة صغيرة اوى على كدة ثانيا انا مش عايز أفقد نصف مخزون البويضات اللى عندك لو شلنا المبيض معناها بنشيل نصف مخزون البويضات و حرام عليا أعمل كدة
الحل اننا ناخد حقنة زولادكس 3 شهور تهدى الأمور شوية و توقف نشاط الكيس و بعد ال3 شهور دول نعمل تنشيط و حقن وربنا يكرم بالحمل إن شاء الله و لو ربنا اراد انه يحصل حمل هيوقف نشاط الكيس طبيعى و دة احسن حل و قالى معلش استحملى وجع الكيس و خدى مسكنات و مع الزولادكس لما أثر الهرمونات يقل الوجع هيقل كتير بس دة أفضل حل و قالى انه مكانش متوقع الحالة كدة و قلتله انا جاية مستعدة نعمل شفط قالى وانا مجهز اوضة العمليات لكدة بس لو عملنا كدة هنشيل المبيض حرام عليا أعمل كدة
و قالى انا عارف انك هتكونى متضايقة قلتله يا دكتور لو الوضع كدة أحسن يبقى الحمد لله قاللى ابقى طمنينا عليكى فى الفترة دى قلتله لو الوجع مراحش هجيلكو قالى احنا تحت أمرك فى أى وقت و سألته فى حاجة ممكن أعملها او اتجنب حاجة معينى قالى فى الفترة دة قللى جدا من منتجات الألبان و الجبن و اللحوم يعنى بمعنى أصح الحاجات اللى بنقلك كترى منها وقت الحقن
وفعلا أخدت امبارح أول حقنة زولادكس ربنا يعيننى على تعبها و الحمد لله على كل حال يا رب الوضع يتظبط
و الله يا بنات انا راضية بكل اللى ربنا يقضيه بس نفسي ربنا يكرمنى بالأولاد و كله يهون بعد كدة
رب لا تذرنى فردا و انت خير الوارثين
اللهم اشفنى و اشف مرضانا و مرضى المسمين شفاءا لا يغادر سقما برحمتك يا رحمن يا رحيم
اللهم ارزقنى و ارزق أخواتى فى الله و كل المسلمين بالذرية الصالحة عاجلا غير أجل يا أرحم الراحمين
امين يامونى ربنا يشفيكى ويعلفيكى يااااارب على فكرة انا ليا خالة شالت مبيض وهى صغيرة برضه وماشاء الله حملت 3 مرات بمبيض واحد:)مفيش حاجة فوق ارادة ربنا المهم بس امشى ورا كلام الدكتوور وان شاء الله خير
ان شاء الله تميمة تجيلنا بخبر سعيد ان شاء الله:)