« تجهيزات عرائس ' ليبيا ' لشهر ذو الحجه 1432 - 2011 م / الجزء : 24 »

رد مخالف

مش رح نزيد شي علي هنو وقنوعه
كارولين مش عاااااااااااااااااااااااااااادي و مميز

تحكمني قناعاتـي;15709173:
سؤال مخالف بماانكم تحكوا ع عطور :

انا باذن الله عطري سكادا فراشة


فشنو رايكم فيه ؟

رأي حلوووو ومميز ومن أفضل عطور أسكادا بس يا نحكمتي حاولي يكون ست كامل أحسن وخليه للمناسبات الخاصه مستقبلا
أحسنتي الأختيار ياعروسة

رد مخالف لهنو : ماهو من شطارتي جبته من غير ست باذن الله حنوصي يجبولي يعني تمام تسلمي عسول

قصدي زي ماقتلك تحكمتي يعني بدي لوشن وشاور جل لو تحصليهم ميه ميه تقعدي تفحفحي من بعيد
بس نصيحه يابنات لما تحطو العطر ماتقربوشي من لاجلد رشو عن بعد ولا على الروب أحسن حاجه على الروووب
لأنه طعمة الجلد تقعد مرره ردو بالكم وأنتو فهمكم كفايه عاد ;)

بالنسبه لي موضوع الكوافيره جيجي :
هي مكانها في الكيش تسكن في حوش مع أهلها عيله محترمه جدا ومدايره مكان خاص للعرائس وشغلها
لأنه أهلها ناس محافظين ويفضلو تشتغل في الحوش طبعا المكان أمن جدا معاها أمها وخواتها
وميزته الأهتمام كله ليك تلقيهم بخرين المكان ونظافه وراااحه وطبعا مرافقه مافيش تمشي بروحك وهي ممتازه في كل شئ وعندها تفاهم مش عادي تعرفي تخليك ماتحسيش بالضغط متاع العرس نهائي وتضحكي وخلاص هههههههههه
وباقي التفاصيل لو تبيها بأذن الله نبعتهالك على الخاص .

رد مخالف

قنوعه حلو العطر بس زي ماقالت هنو خودي بدي لوشن وشاور جل

جواب مخالفة لملوكة

عطورك يهبلو وحتي اني نضم صوتي لصوت البنات انك تستعملي حاجة خاصة ليوم الحفلة..وبالنسبة لمعطر الشعر حتي اني ننصحك تفوتيه
والحق السي اتش اني مش مجرباته لكن اني نقولك اللي نحبهم ونحسهم يمشوا حفلة وطبعا هاذي حاجة تختلف من شخص لتاني وهذا اختياري الشخصي

سؤال مخالفة للعرائس

انا عرسي قريب و كنت مقرره نمشي لفاطمة شعيب وشعري بيكون لونه اسود لكن حماتي خدت الفكره بعد ماسألتني
شن تبي تديري في عرسك ودارت نفس فكرتي ونفس المزين , عرسها كان الاسبوع اللي فات صدمتني الصراحه
المهم نبي الحل توا , نبي مزين في خبرة فاطمة شعيب لأني بنموت عليها ونبي افكار حلوة للشعر بليز بنات ساعدوني

عندي خيبت أمل كبيرة من سنتين وانا نتابع في التجمع باش خديت الفكره :'(:-o:-#:(:confused::!!::sleep::badly:

رد مخالف:

لا أله الا الله محمد رسول الله
عليك سم قهرتني حسها
أهو نقولك ياسموحه عادي فيها خيره أنتي غير ياريت تكتبي مواصفاتك يعني لون عيونك لون بشرتك طول شعرك نوعه رسمة وجهك طويله قصيره مليانه ضعفونه
عشان نقدرو نساعدوك ،،،، وبأذن الله مانقصروش معاك

السلام عليكم


سؤال مخالف:

بنات نبي افكار للتقديم في الفضانيه والتلبيسه لوسمحتم واسماء المحلات للتسوق اني من طرابلس جزاكم الله خير

هنو السمحه;15712680:
سؤال مخالفة للعرائس

انا عرسي قريب و كنت مقرره نمشي لفاطمة شعيب وشعري بيكون لونه اسود لكن حماتي خدت الفكره بعد ماسألتني
شن تبي تديري في عرسك ودارت نفس فكرتي ونفس المزين , عرسها كان الاسبوع اللي فات صدمتني الصراحه
المهم نبي الحل توا , نبي مزين في خبرة فاطمة شعيب لأني بنموت عليها ونبي افكار حلوة للشعر بليز بنات ساعدوني

عندي خيبت أمل كبيرة من سنتين وانا نتابع في التجمع باش خديت الفكره :'(:-o:-#:(:confused::!!::sleep::badly:

رد مخالفة
معليشي حبيبة وفيها خيرة واهو الحمدلله خديتي درس بش معاش تقولي افكارك لحد ..ياريت لو تحطي لون شعرك الاصلي وطولك ولون الفيلو بش نقدروا نعطوك افكار للون الشعر والتسريحة

nanna2011;15713447:
السلام عليكم بنات نبي افكار للتقديم في الفضانيه والتلبيسه لوسمحتم واسماء المحلات للتسوق اني من طرابلس جزاكم الله خير

وعليكم السلام ورحمة الله وبركاته

بالنسبة للفضانية حبيبة
عندك الرزاطة والعبمبر هادم ضروري وماتقدريش تغيريهم لان اغلبية الرجالة مايحبوش يجربوا حاجات جديدة ..والصراحة هما الزوز ماليهمش بديل
وبعدها شاهي وحلاوات ..وهادم تقدري متلا تنوعي مابين شاهي اخضر واحمر ..والحلوات انتي وامكانياتك وتقدري تنوعي في طريقة تقديمهم يا اما في توزيعات منفصلة وهذا الاحسن بش اللي ماكلاهمش يروح بيهم للحوش..او تقدميهم في متارد

والعشي يا اما المسقي يا اما بوفيه
المسقي طبعا احسن ويبي معاه حاجتين او تلاتة رقيق ومسير وسلاطة
و الخيار الثاني البوفيه وهذا متعب اكتر ويبي تنويع

وبعدها الفواكه والبكلاوة

بالنسبة للعبمبر عندك العالم يدير فيه حلو غير مشكلته مرات تكون احجامه مختلفة على بعض..وعندك محل رويدة في الكازا لانجس حتي هو العبمبر متاعه ماشاء الله

والحلاوات عندك فضيلة قرادة وابتسام جلول حاجة ماشاء الله غير غاليات شوية ..وحتي العالم حلواته كويسات

والعشي المسقي ماعنديش طباخة معينة في بالي لكن فيه طباخ راجل ماشاء الله علي ايدياته صاحبة اختي دارت عنده وجابلها كل شي للحوش واتي بالسلايط للرقيق

والبكلاوة احلي بكلاوة الشطشاط اللي في سوق المتلت عنده البكلاوة الزمنية

وطبعا بالنسبة ليا اني نحب نختار ثيم لون معين و فضانياتنا نحاولو نديروا الوان تمشي مع الجلسة اللي مقعمزين فيها الرجالة..والاماعين طارق بركة عنده حاجات حلوة للمناسبات هدي

في فضانيتي اني درت ديكور للسفر متاع الشاهي والرزاطة ودرت صندوق فضة وفيه البخشات ..وشريت طبلات وزعتهم على الطاولات للمدخنين ..وطبعا التباسي لونهم زي لون الجلسة ..والفاكهة حطيناها في سلات مزينات كل نوع بروحه ودرتهم على طاولة زي البوفيه وقدموهم في الاخير ..هذا حبيبة اللي نقدر نفيدك بيه ولو عندك اي سؤال اتفضلي

بالنسبة للتلبيسة ياريت تقولي قداش معازيمك

سؤال مخالفة ...
بنات ف نجمة لما بنلبس بدلة كبيرة وبنطلع للناس ... ومش عارفه شنو بيصير بعدين ...
المهم نطلع مسكرة .. ولما بيفتحوا عليا .... وبنروح شنو مفروض نلبس ؟؟؟
لان البدلة الكبيرة بنلبسها تاني ف المحضر صح ؟؟

Mella2;15713746:
سؤال مخالفة ...
بنات ف نجمة لما بنلبس بدلة كبيرة وبنطلع للناس ... ومش عارفه شنو بيصير بعدين ...
المهم نطلع مسكرة .. ولما بيفتحوا عليا .... وبنروح شنو مفروض نلبس ؟؟؟
لان البدلة الكبيرة بنلبسها تاني ف المحضر صح ؟؟

رد مخالفة لملوكة

بتلبسي البدلة ياحنة وبتطلعي لعزوزتك تحنيك وتعطيك الشمبير زي مانتفكر ويدخلوك تاني..لما تخشي بتحولي البدلة الكبيرة وبتلبسي البودري اكيد بش تطلعي لما يروحوا حوش العريس بش الزمزامة تغني عليك وربي يهنيك ويكمل عليك

سؤال مخالفة :
1) حابة نسئل على اردى عل[COLOR=Black]م الاستقلال ...فى بنغازى بكم الاسعار ؟؟...انى شبحته فى سبها لقيت العادى اللى يقولوه "برمبخ " 150 دينار ...ولقيت الحرير من 500 الى 600 دينار ودزاينات مختلفة ...
بس سمعت وحدة فى المحل اتقول لصاحبتها ارداوات علم الاستقلال اللى فى بنغازى احسن ...من عندها فكرة عليهم وبكم الاسعار ؟؟؟
2)وبخصوص طقم من بودي شوب...يعنى منتجاتها وين نلقاهم فى بنغازى ؟؟؟
3) سيت CH وين نلقاااه فى بنغازى حتى هوة ..والا زى ماقالت هنو ربى يحفظها وبناويت بنغازى عند عمو عصمان ؟؟؟يعنى مانحتارش نمشيله ونلقى كل حاجاتى ..والست من شرت زيه ...؟؟؟
4) وحابة نسئل على الزى الشعبى اللى يقولوه العبروق ومعاه اكسسورس"اكسسوارات"
"[/COLOR]العبروق الليبي العبروق عبارة عن غطاء للرأس ويلف الجزء الأخير حول الرقبة "



بكم تاجيره قالولى فى شارع عشرين ..بس مش عارفة بالزبط وسعر الايجار بقداش..وهل يمشى معاه ردى علم الاستقلال

بنات نسئل على طناجر الضغط حجم كبير او متوسط ...من الستيل او التيفال ...؟؟؟بيش تنصحونى بااى ماركة الالمانية التوربو والا الفرنسية السيب ...وين نلقاهم فى بنغازى والاسعار ياابنات والنبى ماتنسو تذكرولى رنج الاسعار لاافضل نوعية متوفرة فى بنغازى مش شرط الانواع اللى قلتهم ..؟؟؟ حتى انواع انتم مجربينها ...

ياريت تبعتيلي رقم المراة اللي تدير في الحلوة باش انكلمها وصحيتيF:

جواب للمخالفة وفي نفس الوقت ناخد رايكم ............بالنسبة للفضانية .........
اول ما يخشو بنمد لهم شكلاطة ...حاجة نازكة وحلوة ومزينة بالورد
وبعدها رزاطة وعبمبر
وبعدين العشاء مسقي وحاجتين رقاق ....وسلاطة عربية ..ومسير وزيتون ...واكيد معاهم مشروب وطواسي المية ......
بعدها طول نحط الفواكه
وبعدين شاهي باللوز
وفي الاخير بكلاوة في باكوات عليهم نفس الورد الي علي الشكلاطة
وكل الحاجات الي نستعملهم الماعين والكلينكس علي الوان متقاربة ويطلعو علي الجلسة ...
هدا الي بنديره ان شاء الله الاسبوع الجاي
شن راااااااااااااااااايكم ؟؟؟؟؟؟؟؟؟؟
وكان واحدة عندها ملاحظة ياريت تنبهني ليها قبل ما توصل الفضانية بش نغيرها