persian_moi;15738419:
بكتب لكم تقريري عن امس
رحت اول شي بسكوتو عاد الفلبينية اللي هناك ذبحتني كلما اسألها شي احس ماتعرف تجاوب شكلها يديدة
راوتني اشكال الكوكيز وسألتها اذا ابي اشكال ثانية قالت على حسب راوينا شنو تبين واحنا نخبرج
وتقول ماعندهم ستاند اظن يحطونهم في صينية او شي جذي
وحتى سامبل ماعندهم عشان اجرّب ماعجبني المحل وخليته يولي
بس عطتني بسكوت على سمسم وطعمه كلش ماعجبني وجفت شي للضيافة وايد عليه اوردر خذيته بس لحد الحين ماذقته
وتقول الكوكيز لازم على جوكلت مافي طعم ثاني
المهم بعدين رحت جم محل على شارع الخدمات وجدعلي اجوف الستاندات و تزيين باب المستشفى
الاسعار وايد بالنسبة حق الستاندات يعني الستاند اقل شي 20 وفوق غير انه ماعجبني احس دفش وقديم
وسألتهم اذا بزيّن باب المستشفى بس جهة وحدة بالونات
اقل محل حصلته يسوي هالشي بـ 20 دينار وفي بعض المحلات حتى ياخذون على التوصيل زيادة
نفس هالصورة بس على صوب واحد مو قوس كامل جذي احس وايد بيصير
اسم البيبي ماجفت شيء يديد كله فلين واقل شي يسونه بـ 10 دينار
المهم تركتهم رحت محل في الغربي اسمه اورنج شغله حلو بس الاسعار نااااار
يعني تعليقة اسم البيبي مثلا يوسف بـ 45 دينار شدعوة ^o)
عجبتني الفكرة صايرة غير عن الفلين نفس خشب وكل حرف بروحه ويكون معلق بالطول
بعدين رحت روشان اللي في بوكوارة وانا حاطة في بالي انه اسعاره بتكون اكثر من محلات جدعلي
الا طلع شغله احلى والاسعار ارخص
يعني مثلا البالونات قالي يسويهم بـ 15
وحصلت عنده ستاند كلش ناعم بدون تزيين بـ 10 دينار واقدر استخدمه بعدين
تقريبا شكله جذي بس بدون الخرابيط اللي عليه وقالي عطينا ميزانيتج وفكرتج احنا نزينه لج على حسب المبلغ اللي عندج
في منه ألوان ابيض و وردي و ازرق
وعندهم ستاندات ثانية حلوة على عربانة بيبي وغيره بس اسعارهم من 20 و رايح وطبعا كله بيع مافي ايجار
المهم تعليقة الباب من الفلين وشغله احلى من محلات جدعلي
اذا بس اسم يسويه بـ 5 دينار ارخص من باقي المحلات
وعنده بأسعار اكثر واشكال ثانية بس انا كله ادور شي ناعم وبسيط ماحب خرابيط ودفاشة
المهم بعدين لما رجعنا البيت انا و زوجي دورنا في موقع اي باي على الحروف اللي من خشب تخيلو نفسه بالضبط اللي جفته في الغربي 6 حروف اسم يوسف بـ 11 دينار بس ! لا واختار الخط اللي ابيه واللون ولون التعليقة بعد
بس قلنا بنجوف شكثر بيكلفنا الوزن واذا يسوى بطلب من اي باي ارخص بـ وايد من هني
غيره انه بستفيد منه حق بعدين يعني جفت الاجانب معلقينه في غرفة البيبي بطريقة حلوة
اممم اي ونسيت اقولكم رحت مري وجفت اشكال البسكوت و الكب كيك عندهم عجبوني بس لحد الحين محتارة اسوي توزيعات او اكتفي بالضيافة سؤال صعب ^o)
الحين تقريبا خذيت فكرة بحاول اقرر شنو ابي بالضبط عشان افتك
الضيافة العادية بخلي امي تسوي كلشي
هي تعرف اكثر مني بهالسوالف
نفس الحال برشونه تعبت وادور ستاند مو محصله بس الي مخلتنه وايد حلو نفسه حصلت بدون تزيين عند نوال ب 20 وروشان 10 وايد زين وابي دب نحلة مو محصله لان مسويه كل شي ثيم النحلة وابي الدب انقرضو طبعا لان انه ابغي خخخخخ وبالنسبه حق محل اورنج سمعت عنه وايد عندهم اشيا حلوه بس اسعاره نار