✿... اللمة الثانية لبنات ليبيا الحرة ...✿

اميرة عرائس ليبيا

اني لتوة نطمن في روحي
ممكن نخش الثلاثين ونكون مع حسن ههههه
لان اني مواليد 3 نوفمبر
زي ما تقولي السنة هذي نسكر 29 ونخش 30
خاطري كل خاطري نسكر الثلاثين معاه
مش عارفة علاش
بس اهو نطمن في روحي وخلاص
على اساس خذي بنت العشرينات خخخخخخخخخخ

المهم
اني قصتي والله بكل
تي اني انتظرت لين خلاص
وحلمت وادلعت ودرت كل الحاجات الحلوة مع نساوين اللي عندها ولاد
عرفتي علا متاع عايزة اتجوز
اني نسخة منها
من كثر ما بابا وماما يزنو علينا اني واختي
سبحان الله هو نصيب من الله

لما قعمزت وقلت طز في الرجالة
جي الراجل لحد عندي

والمشكلة اني كشخت عليه
كل ما نتفكر طريقة تعرفي بيه
نضحك من وسط خاطري

الحمد لله

اني الاء
مخطوبة حاليا
ونبي نتزوج خلاص
لاني مليت من البتات والتبضيع
وصاير فيا حوسة من سؤال الناس امتى العرس امتى العرس
كرهوني في عيشتي اني واختي
ونبي حاجة ثانية
نبي نضعف
:'(

نخدم في جامعة طرابلس
عضو هيئة تدريس

حتى طالباتي يقولو ليا امتى العرس لين كرهت المحاضرات:mad:

شنو تاني ممممممممممم
اسالي واني نجاوب طول

مواليد 1976

القصة ان بابا يشجع فينا على القراية
طبعا مافيش راجل يبي الشغل والقراية
فقعدنا اني واختي في قرابيز ماما وبابا خخخخخخ
اللي يجي يخطب يقول الحوش مافيش شغل

واني بديت نتنازل
عادي ناخذ كبير
عادي ناخذ مطلق
عادي ناخذ مش متعلم
المهم يرضى بشغلي

بعدين فديت قلت شنو هذا معقولة نقعد نتنازل شنو ناقصني اني
حسيت كرامتي وجعتني
وقلت طز فيهم
شنو كان عندهم عقاب حوش ومعاش بيتحكمو فينا
والله ماني معدلة
سبحان اللي بعد كلمتي اهيا باسبوع كلمتني وحدة معاي في الشغل
قالت ليا فلان يبي يخطبك
اني طبعا قلت ليها طول اني منحباااااااااااش
ماهو صاير ليا قبل موقف معاه في شغلي

هو يبي شغل مني مشي اني كشخت عليه وقلت ليه ممنوع
ودرت روحي فالحة وهكي
متاع جو اني فاهمة ماهو هو يتجكتر على اساس انه يحضر في دكتوراء
هو اعجب باسلوبي لما رديت عليه
سال عليا ولانه يتحشم كلم وحدة تكلمني
وبعدين صار النصيب والحمد لله

وسبحان الله ما تنازلتش على اي شئ نبيه
سبحان الله حتى قناعاتي زي قناعاته

الحمد لله