التجمع الخامس لحوامل شهر سبتمر 2011

ahknz;15524386:
زهور كيف حالك على قولتكم
ماولدتي؟ انتي متى موعدج؟

الحمدلله بخير ، موعدي 24 -9 بس عندي الماء زائد حول الجنين شوي فاحتمال اولد بعملية

رتاج الف مبروووك وحمدلله على سلامتكم ، طائر حمدلله على سلامة الوالده

زهور إذا المائ زايد بعد مشكلة سبحان الله كل شيء ربي خلقه بمقدار معين

بس يارب تولدي طبيعي و كلنا طبيعي و لا تحتاجئن ولا حد يحتاج لعمليات قولوا ان شاء الله بس .....


ضايق خلجي اليوم نفسيتي تعبانة

عروس لايضيق خلقك ترى مو زين و وكلي أمرك الله

وان شا الله نولد طبيعي

بس طبيبه قالت لي لازم عملية

وطبيبة ثانيه قالت لي ان شاء الله طبيعي بس
اذا جاء موعد ولادتك ولا ولدتي في هالحاله بنولد
بعمليه مابنقدر نعطيك زياده

طبعا امس عندي تحليل للسكر ويوم السبت موعدي
وان شاء الله السكر مو مرتفع عشان ماحتاج تنيم

ع ـذبة المشاعر;15532121:
قصه ولادتي


**

طبعاً كان موعد ولادتي تاريخ 5/9
وبالالتراساوند 7/9

بس يوم الثلاثاء تاريخ 30/8 قعدت الصبح الساعه 10 وعندي الام مثل الدورة بس ما كنت منتظمة . وكنت كل شوي ادخل الحمام احس شي بينزل وكانت ملابسي الداخليه على طول مترطبه بس ما نزل عليي دم ولا ماي .. كان زوجي حزتها قاعد وقلت له عندي الم قال لي قومي نامي وارتاحي :worn_out: لانه كلش ما كنا متوقعين انه الم ولاده .. قمنا عشان ننام اهوه نام عني واني حاولت انام ما قدرت لانه الالم بدأ شوي شوي يزيد وينتظم وصرت كل ساعه ادخل الحمام .. حتى جيت كتبت في التجمع انه عندي الم وكانت صدفه ثلوج بعد عندها الم

صار الالم يزيد شوي شوي وكنت مستحمله لحد قريب اذان المغرب قعدت زوجي من النوم عشان يصلي ويتفطر وقلت له انه الالم للحين عندي من الصبح وماقدرت انام , قال لي خلني اوديج المستشفى قلت له لا مو الحين اصبر نتفطر اول ونصلي بعدين نروح لانه حدي جوعانه :p قال لالا الفطور لاحقين عليه خلني اوديج اول ونتطمن .. ولبست عبايتي وطلعنا ورحنا مستشفى جدحفص على طول , اول ما وصلت جيكو وزني وطولي وبعدين فحصتني ممرضه كانت يدها شوي ثقيله عورتني بس مو ذاك الالم اللي يوصفونه البنات في المنتدى :| يعني ألم عادي .. وقالت لي مفتوحه 3 سانتي

بس يوم جافت فايلي اني مسويه عميله من قبل في الظهر قالت لي ليش ما رحتي السلمانية ؟ قلت لها مادري سيده جيت هني , قالت لي عندج مشكله في الظهر واحنا ماندري الولاده بتأثر عليج ولا لأ .. وبتولدين طبيعي ولا لأ ؟ قالت لي صبري بنادي الدكتورة اسألها ونادوا لي دكتورة هنديه وجت فحصتني مرة ثانية وصلت 4 سانتي , قالت هذه شكلها بتولد سريع يعني ما بتطول ولازم ندخلها غرفه الولاده وسألتني اذا عندي مضاعفات ثانية من عمليه ظهري وقلت لها لا كل شي اوكي والعمليه كنت مسويتها قبل 7 سنين تقريباً .. فقامت اتصلت للسلمانية وشرحت لهم حالتي وجذي وقالوا لها خلوها تولد طبيعي واذا ما قدرت سووها عمليه قيصريه بنج كامل ( طبعاً في هالاثناء وصلت ثلووج للمستشفى واهيه تصيح وعلى طول دخلوها غرفه الولاده )

وبعدين سيده دخلوني غرفه الولاده على الساعه 6 ونص تقريباً وقلت لهم عطشانه ابي مااااي قالوا لي ما يصير لانه احتمال نسويج عمليه فلازم صايمة :-# وكنت جوعانه حدي ووعطشانه , صارت الساعه 8 وتوسعت 6 سانتي بس , قلت في خاطري شكلي مطوولة بعدين جت الممرضه وعطتني ابرتين قالت هذه بتخدرج شوي وبتسرع الولاده وفعلا بدا الالم يصير كل 3 دقايق وزادت حدته وكنت اجود حاجز السرير واتألم ولما يروح الالم احاول ارتاح واغمض عيوني واذا رد رجع الالم اخذ نفس عمييييق وهالشي ساعدني وااااااااااايد في تخفيف الالم .. بس لانه ما كان عندي باور كنت اخذ نفس مرتين واتعب .. الساعه 9 جت فحصتني وقالت 8 سانتي خلاص ولاده اذا صادش الم حاولي تدفعين

وصرت ادفع لما يجيني الالم بس بصراحه كنت خايفه ادفع :-# لما تجي الدكتورة صوبي ادفع ولما تروح ما ادفع هههههه ,, بعدين قالت لي لازم تدفعين عشان ينزل البيبي قلت لها مااااقدر ماعندي قوووة عالاقل اعطوني ماي عشان اقدر ادفع . وراحوا جابوا لي قلاص ماي وشربته وجت الدكتورة قعدت قبالي وشالت نص السرير ورفعت رجولي على ستاند وقالت لي خلاص 10 سانتي الحين اذا وصل الالم ادفعي بقوة .. وبعدين حسيت اني ابي ادفع واهيه تقول لي عصررري عصرري بقوة .. سويت بوووش اول مرة ما طلع . سويت بووش ثاني وهني شقتني وطلع الراس وفي البووش الثالث طلع الجسم كااااااامل وطلع على الدنيا مُحسني حبيبي الساعه 10 الا 10 وحطوه على صدري وقام يصيح وبعدين شالوه عشان ينظفووونه

وعقب 5 دقايق ظغطت على بطني وطلعت المشيمه بس ظلت قطعتين داخل وطلعتهم لي , ألمني شوي بس قالت لازم نطلعهم عشان لا يصيدج نزيف وبعدين ظربتني ابرتين بنج وخيطتني . صادني خياط من داخل ولما وصلت لبرى احس البنج قعد يروح وقلت لها تعطيني بنج ثاني تقول ما يصير .. كنت احس بغزة الابرة بس كان الالم يحتمل يعني

والساعه 11 طلعوني برى لاهلي عشان يشوفوني :)

عذبة ما شاء الله قصتش تبرد على القلب و حليوة :biggrin:

ألف ألف مبروك و الحمدلله على سلامتش و سلامة البيبي F:

ahknz;15534497:
شخبارج العروس الفاتنه متى تولدين انتي الحين اول وحده فينا صح؟

بخير المفروض اولد تاريخ 12 :)

tatee82;15534796:
اني انتظر العروس تولد واني وراها مباشرة ...
من بيسبقنا .. يالله همتكم ..

لا تنتظروني :lol: اولدووو لاني كل يوم اقول بولد ولا ااولد بيجي الموعد ولاني شايفه شي :worn_out:

زهور بنفسجيه;15535363:
عروس لايضيق خلقك ترى مو زين و وكلي أمرك الله

وان شا الله نولد طبيعي

بس طبيبه قالت لي لازم عملية

وطبيبة ثانيه قالت لي ان شاء الله طبيعي بس
اذا جاء موعد ولادتك ولا ولدتي في هالحاله بنولد
بعمليه مابنقدر نعطيك زياده

طبعا امس عندي تحليل للسكر ويوم السبت موعدي
وان شاء الله السكر مو مرتفع عشان ماحتاج تنيم

ان شاء الله كل شي اوكي ولا تحتاجين عملية وتولدين طبيعي والله يسهل

وردة محمدية ان شاء الله انتي بعد تولدين بسهالة وتجين تكتبين القصة

زهور بنفسجيه;15534825:
الحمدلله بخير ، موعدي 24 -9 بس عندي الماء زائد حول الجنين شوي فاحتمال اولد بعملية

يعني أخر دوره لج تاريخ18ـ12نفسي بس انا بعدو موعدي 26ـ9ولا المفروض موعدي 24نفسج ولا تحاتين إذا الماي زايد انا الماي عندي زايد والسكر مرتفع ودمي نازل ومخلتها على الله حماتي عندي في البيت لما تحمل يكون الماي عندها زايد وتولد طبيعي الحمدالله
وان شاءالله نولد كلنا طبيعي من غير عمليه
انتي اول حمل لج ؟

زهور .... ان شاء الله مو مرتفع عندك السكر لأنه يبهذل أنا ما شية على طريقة من دكتورة تغذية. الله يسلمش وواجد استفدت منها غطتني فايل كامل ؤش أكل و المدة بينهم و احلل بعد ساعتين

شوفي الرز و الخبز و البطاطس و كلها تنقلب لنا سكر فلازم ناكل منها كمية قليلة و نكثر سلطات و بروتينات سمك وذجاج و لحم. و طبعا الحلويات

اليوم كنت متضائقة فكلت لي صحن رز والعادة أكل كوب واحد مع سلطة كبيرة أو تبولة

فلما تغذيت صحن عيش ما جات ساعتين إلا دخت و نمت من السكر ارتفع والحين أخش رحت كلت لي يمكن سبع سمبوسة حلوة

فحأولي ما تأكلي خبز يعني بذل ساورما دجاج خدي صحن شاورما دجاج مع سلطة و بابا عنوج أو متبل. و تبولة أنا أسوي جدي

و الله يارب يسهل عليش ولادتش و ما تحتاجئن عمليات يارب

ؤاني خائفة من اتعسر نفس في الولادات الإولئ و الثانية حتى زوجي يقول من أسمعج تقولين وجع قلبي يرقع لأن دخل وايائيي في ولادة بنتي في مابه أذكر التفاصيل بس رفغني من أبطيني و يعرف الولادة و عصري و خدي نفس طويل

عروس المنامة;15535083:
زهور إذا المائ زايد بعد مشكلة سبحان الله كل شيء ربي خلقه بمقدار معين

بس يارب تولدي طبيعي و كلنا طبيعي و لا تحتاجئن ولا حد يحتاج لعمليات قولوا ان شاء الله بس .....


ضايق خلجي اليوم نفسيتي تعبانة

ليش لايضيج خلجج خليها على الله ترى موزين على الجنين

أتكنز اتصدقين عاد اني اخر دورة بعد سباتعش اثنعش اياكم بكون .... كل ما قرب الموعد خفت ..... زوجي سافر الامارات هارب من ولادتي

يارب ولادة سهلة لي و ليكم و لكل حامل يارب

طائر ما بينت لايكون عصر عصر الله يهون عليها اجا عصر عصر

عروس المنامة;15535782:
زهور .... ان شاء الله مو مرتفع عندك السكر لأنه يبهذل أنا ما شية على طريقة من دكتورة تغذية. الله يسلمش وواجد استفدت منها غطتني فايل كامل ؤش أكل و المدة بينهم و احلل بعد ساعتين

شوفي الرز و الخبز و البطاطس و كلها تنقلب لنا سكر فلازم ناكل منها كمية قليلة و نكثر سلطات و بروتينات سمك وذجاج و لحم. و طبعا الحلويات

اليوم كنت متضائقة فكلت لي صحن رز والعادة أكل كوب واحد مع سلطة كبيرة أو تبولة

فلما تغذيت صحن عيش ما جات ساعتين إلا دخت و نمت من السكر ارتفع والحين أخش رحت كلت لي يمكن سبع سمبوسة حلوة

فحأولي ما تأكلي خبز يعني بذل ساورما دجاج خدي صحن شاورما دجاج مع سلطة و بابا عنوج أو متبل. و تبولة أنا أسوي جدي

و الله يارب يسهل عليش ولادتش و ما تحتاجئن عمليات يارب

ؤاني خائفة من اتعسر نفس في الولادات الإولئ و الثانية حتى زوجي يقول من أسمعج تقولين وجع قلبي يرقع لأن دخل وايائيي في ولادة بنتي في مابه أذكر التفاصيل بس رفغني من أبطيني و يعرف الولادة و عصري و خدي نفس طويل

مو قالو المشي ينزل السكر صح ولالا؟؟؟ انا الحين امشي على شان تتسهل الولاده

عروس المنامة;15535788:
أتكنز اتصدقين عاد اني اخر دورة بعد سباتعش اثنعش اياكم بكون .... كل ما قرب الموعد خفت ..... زوجي سافر الامارات هارب من ولادتي

يارب ولادة سهلة لي و ليكم و لكل حامل يارب

طائر ما بينت لايكون عصر عصر الله يهون عليها اجا عصر عصر

ليش ريلج يهرب العكس اناابيه وياي انتي قبلنا بيوم انا المفروض موعد ولادتي 24بس قالولي الحمل متأخر واخروني 26 وطائر موعدها بعدي بيوم يعني 27
كلنا نخاف بس بنرتاح نبيها تجي كلها ان شاءالله ساعات ونرتاح
انا ببنتي الحمد الله سهاله ولادتي
امين ربنا يسهل ولادتنا جميعاً

أي المشي زين لمرضئ السكر بس مشكلة الحامل مع السكر ثقل و سكر .... ...

بس تعرفين المجمعات الكبيرة لفيها لفة وحدة تولدين :). يعني نفس ستي سنتر عندنا يوم جاني طلق في ولدي كنت رائحة أمشي في سيتي سنتر و يجيني زلزال مو طلق رجعت البيت و على المستشفى على طول :). متعب سيتي سنتر .....

عروس المنامة;15535820:
أي المشي زين لمرضئ السكر بس مشكلة الحامل مع السكر ثقل و سكر .... ...

بس تعرفين المجمعات الكبيرة لفيها لفة وحدة تولدين :). يعني نفس ستي سنتر عندنا يوم جاني طلق في ولدي كنت رائحة أمشي في سيتي سنتر و يجيني زلزال مو طلق رجعت البيت و على المستشفى على طول :). متعب سيتي سنتر .....

:lol:زلزال حلوه إي سيتي سنتر ولا كار فور متعب
إحنا تحتنا مدرسه الف المدرسه وارد واتعب حامل وعندي السكر ورجولي يعورني مااقدر امشي وايد على طول اتعب و يوم الأثنين رحت عند رفيجتي امشي جريبه مننا رجعت من كثر الألم قلت ولاده وماولدت والحين أكل اناناس بس المشكله انه جاب لي الأسهال وانا عندي بواسير وبطلت فيه

أتكنز الأناناس يسهل الولادة ..... تصدقين يوم كنت حامل ببنتي و متوحة أرجع أمي تجيب لي أناناس تقول للوعة زين

منتفخة رجولي تخوف صائره رجل فيل ما عندكم فكرة أيش يخففها لي

طائر وينهي من بينت ؟
ان شاء الله سوتها وافتكت ... طمنينا عليش طائر

العروس الفاتنة;15534155:
عذوب قصتج حليوة الله يسر لش الحمدلله والفال لي ولباقي الحوامل يارب

رتوووج حمد لله علسلامة وننتظر القصة بعد

اي الحمد لله كلها تساهيل من الله
بس بعد من قبل كنت على طول حاطة في بالي انه الولاده سهله ومو مثل ما يكتبون عنها في المنتديات .. والحمد لله الله رزقني بولاده سهله ببركة اهل البيت , امي كانت في العراق وكانت تطلب وتدعي لي والحمد لله على كل حال

ثلوج الحب;15534346:
الحمد لله اهم شي هو

اي اهم شي .. الحين ولدي صاده ابو صفار وقمت اعطيه ماي الحندبان .. ولانه عندي تشققات في الحلمة صرت اعطيه حليب صناعي وسبب له مغص شووي امي طبخت له حلوة ونعطيه الماي وقلت بشتري له جاي الاعشاب من الصيدليه

ولاء البحرين;15534409:
عذبة ماشاء الله ولادتش سهله وميسررررررررررررره

وعقبال كلللللللللللللللللل البنااااااااااااااااااات

اي الحمد لله

وردة محمدية ♥;15535431:

عذبة ما شاء الله قصتش تبرد على القلب و حليوة :biggrin:

ألف ألف مبروك و الحمدلله على سلامتش و سلامة البيبي F:

الله يبارك في حياتش
حزة الولاده طلبت لبنات التجمع كلهم بولاده ميسره وان شاء الله تكون ولاداتهم سهله وما يحتاجون لعمليات





***


كروشات

ما عندكم حل حق تشققات الصدر لاني تعبت بصراحه ؟؟

وسؤال ثاني

الفحص اللي يكون بعد الولاده في المركز الصحي لازم اروحه ؟؟ :worn_out: مابي اروح ويردون يفحصوني هههه

محد موجود اسولف وياه :p

قعدت من صياح ولدي وطار النوووم

اليوم بتجي لي المراخه البيت بتمرخني وامي شرت لي من عندها ملحه ( معمول ) مثل التحميله تقول ينظف الرحم ويطلع الاوصاخ بس يحرق هههه وللحين ماستخدمته .. وصار لي جم يوم البس كورسيه عشان تروحه الكرشه

بس بطني صاير لونه اسود شووي وفيه خطوط مال الحمل - مالهم حل ؟؟

هلا حبيباتي ..مبروك للي ولدو وعقبال الباقي..ابسالكم وش لون ماء الجنين لاني اليوم صحيت على مويه نزلت مني شفافه وشوي مو كثير واصلا معي الم بالظهر من امس...وش رايكم..