₪||■. مطاعم مملكة البحرين من خلال تجاربنا "الجزء الخامس"...وأكيد بالصور.■||₪

خواتي الحبيبات مس كلرز وسويت كيك
حبايبي صدقوني انا اعرف ان الناس اذواق ويمكن غلطتي عزمت الناس قبل ما انا اروح واجوف واحكم لكن مثل ما قلت لكم مو بس موضوعكم حتى في منتدى ثاني بعد موضوع عن الاكل ويمدحون وايد فخلوني اقرر بدون ما اجرب وتعرفون عقب الحنة والشطة والنطرة وايد تفشلت وانصدمت بس عادي انا ما قلت كريه حلو بس عادي ما يستحق الهالة الاعلامية اللي محاوطته:lol:
ووحدة منكم قالت شنو تاكلون عادي حبيبتي كل شي بس السي فود مو كلش وياه بس الربيان اوكي ويعطيكم الف عافية حبايبيF:

كلووورة
عوافي على قلوبكم

عسايل
عوافي على قلوبكم انا رايحه قبل فترة بسيطه كان سعر البرانش مال يوم اليمعه ب 17 دينار ونص رفعوه مرة وحده لي 26 دينار :| بس لان جافو الناس طايحين فيه

مساء الخير

المطعم : توني روماس
نوع الاكل : عالمي
تقيمي للمطعم: 8 /10
التقرير قديم شوي فمب متذكرة كل اسامي الاكل
ناتشوز


بافلو وونغز



نسيت اسم طبقي بس كان دياي مشوي مع صلصه سبانخ وجبن







لاتنسون الميزان

صباح الورد
مافي احلى من الريوق في مكان مفتاح في هالجو الحلو :adore:
عصير برتقال



شاي بالنعناع




فطور انجليزي



فطور شرقي



الفاتورة 13 دينار وخرده

ه

M!ss CoLoRz;15785235:

عوافي حصوص

شهيتيني آبي أتريق بره :adore:

لاشوكولا صح؟؟؟

ميزانج رافض بس راجعة ل
ه

=======

السؤال للكل

الأسبوع الياي إجازة طويلة مثل ما تعرفون

انزين مثل ما نعرف للأسف مادري ليش نتعاقب ويصكون معظم الأماكن
هل يصكون تايع وعاشر ولا تاسع بس

ومن تجربتكم وين الأماكن المفتوحة لا هنتوا

حصاصي;15785315:

اي لاشوكولا بس نسيت اكتب اسم المطعم :-#

اغلب الاماكن اللي ملاكها شيعه يسكرون يوم تاسع وعاشر والسينما تسكر اتذكر العام الستي كان ثلاث ارباعه مفتوحه محلاته وامواج اتوقع بعد بتكون المطاعم مفتوحه

مشكورة حصوص

اي والله امواج راحت عن بالي

زين ذكرتيني

ba7rainya1;15781957:
شلونكم بنات ديرتي الحلوين :)
بنات سامحوني بس بفضفض شويتين صراحة مقهورة شوي بس ما عندي احد افضفض له مسوية فيها قوية عقب الفشيلة اللي تفشلتها في كوكوز :cool:
مثل ما قلت لكم عزمت ريلي واختي وريلها على كوكوز عقب المدح اللي جفته هني كلكم تمدحون وتعطونه 10\10 ولا وحدة فيكم الله يهداكم قالت عادي او حلو وبس لا حسستوني ان اكله فلته واااااااااااااااااو يعني فتميت احن على كوكوز اسبوعين قبل لما اقنعتهم ورحنا واول صدمة الانتظار قبلنا 7 قلت لازم تنتظرون على ضمانتي الاكل واو وما بتندمون ومادري شعندي فشلت روحي بصراحة على هالشطة والنطرة خلوني اطلب لهم على اساس خبيرة وانا اجوفكم هني اكثر شي تطلبون جيكن قريل وجيكن سيزر سلط فطلبت للكل جذي واجوفكم تمدحون الهامور بس محد منا ياكل سمج المهم الحين وصل الاكل وانا شاطة روحي انتظر النتيجة اول واحد فشلني ريلي قال لي انعم الله عليج بطريقة كأن يقولي هذي اللي سندرتينه عليه :confused:
اختي تاكل بسكات ما تبي تفشلني بس يبين مو مستمتعة وريلها الوحيد اللي قال حلو بس ما يستحق النطرة اللي نطرناها ^o)
وانا جذي :-# من هول الصدمة من حجيهم وعني انا جفت الاكل حلو بس مثل قال نسيبي ما يستحق النطرة يعني مو مثل ما فهمت من كلامكم انه وااااااااااااااااااااااااااااااااااو لا حلو بس عادي يعني اذا ما كان في مكان ما يستاهل الانتظار بروحه المكان لوية واكثرهم اجانب سامحوني يعني بنات بس وايد انصدمت يعني توقعته وااااااااااااااو طلع حلو بس عادي وايد تفشلت مع اللي حنيت عليهم اسبوعين قبل وعلى ضمانتي ومادري شعندي :'(
بنات الله يخليكم بيضوا ويهي عقب هالفشيلة ودلوني على مطعم لين حنيت عليه ما اتفشل وصج ابيض الويه :D
انتظركم بنات وجزاكم الله الف خير على هالموضوع الحلو يعطيكم الف عافية F:

حياج الله بحرينية
طبعا الناس أذواق "ولولا اختلاف الأذواق لبارت السلع"
انه عن نفسي من اروح كوكوز اطلب أطباق محددة مجربتها قبل وعجبتني
اما سالفه النطره هاذي اخس شي في كوكوز على كثرة ماروح صرت اعرف الايام والاوقات الزحمة فاتجنبها عندج في الويكند استحاله اروح والايام العاديه اروح يا 7 او 10 الحمدالله ماننتظر ونحصل طاوله.
ان شاءالله المرة الياية تختارين مطعم حلو وتعوضينهم عن الفشيلة

كلورة
كللووووش واخيرا رحتي
عليكم بألف عافيه
العام الستي كان امبطل بس مو كل المحلات والمطاعم فاتحة

سويت كيك
عليكم بألف عافيه
صار خاطري اجربه
زوجي مو شجعني

حصاصي
عليكم بألف الف عافيه
في هالاجازة قلت ليش ماغير واروح اتريق بس ماتشجعت لاني ماحب الريوق فماخربت نومتي
بس عوضتها في العشا وانشاءالله احطلكم التقرير

عسايل
عليكم بألف الف عافيه

الليوان

الموقع: جز أمواج



مجبوس دجاج مادري ليش حسيته طبخه ثانيه



شيش طاووق حلو



مشويات مشكله رووووعه والسوس لذيذ

وطلبنا 3 دايت كولا

تقييمي: 8/10

يسلموووووووو حبيبتي على الموضوع الرائع

اخــ القمر ــت;15788519:

عليكم بألف عافيه

كلورة انا كل سنه في مكه بس هالسنه بتييني الحلوة ومابي اخذ حبوب اخاف

قبل سنتين اتذكر رحنا السيف كان كئيــــــــــــــــــــــــــــــــــب بس قعدنا في مايا ومشينا مادري شلون هالسنه :(

اخت القمر

اي إحنا واايد عجبنا
اهوه البوفيه يكون السلطات والمقبلات والشوربات
والطاولة ايبون لج 4 انواع مشويات
وطبعا كل يوم غير يعني إحنا يابوا لنا فخوذ دياي باربيكيو وتركي ونوعين لحم
ساعات يسوون بحري بعد
والسعر الغدا 9 دينار والعشا 11 او العكس
جربيه

بالنسبة حق سؤالج الثاني ما أنصحج ببوفيه دام وياكم يهال
بقترح عليج كذا مكان يصلح حق طلعة عائلية وفي حدود ميزانيتكم وتقدرين ترجعين للأجزاء القبلية حق التقارير:
1. كوكوز
2. نينوز
3. قيصر في العدلية .. خذيت منه تيك أواي قبل فترة وانصدمت من الجودة !!!!! واااايد لذيييييذ والكمية راهية :thumbs_up:
4. الليوان في امواج .. الجو هناك فظيع وصحووبة قالت عندهم بوفيه راجعي تقريرها .. بسسسسسسسس تأكدي تكونون هناك قبل الساعة 3 بفترة كافية .. في العيد رحته ويا الأهل على 3 وربع قالوا لنا 3-7 مصكوك !!!
5. لوباتو فرع الجفير ولو انه فرع البديع اشرح وأحلي .. براحتج اي فرع !!! المهم عندهم اشية حليوة ومنوعة واسعارهم وخدمتهم حلوة .

بفكر لج بعد في مطاعم وأقول لج
 

اخــ القمر ــت;15788713:

كــلـــوورة هذي اللي في السيف اييبون كل انواع اللحوم؟؟؟

بـجـم البوفيه؟

وصـج حلو اكله ؟

بنات ابي مســاعــــده :)

خطيبي يبي يعزم بيتهم في مطعم اهمه كلهم تقريبا 10 يعني امه وابوه وخواته وعيالهم وريالهم وين ترشحون لنا مطاعم ;)

قالي بوفيه في حدود 6 - 7 انا اللي اعرفه رنديفو ومب وايد يعجبني اكله و شذى اخر مره رحناه ماعجبني واللي حطته عسايل بس قالي مايبي سي فود يبي منوع لانه بعضهم ماياكلون بحري بس ماعرف وين :confused:

حتى لو مب بوفيه بس مطعم اسعاره معقوله يعني البدجت في حدود ال 70 - 80 اللي تعرف تفيدني بليـــــز لان يبي حق يوم اليمعه على الغدى

بوفيه رندفو كلش مايعجبني
عندج فرندا حلو بوفيهم والليوان الشخص ب 6 بس كل مره غير ساعات يسونه بمشويات وساعات بدون اتصليلهم يوم الخميس وتأكدي من المنيو
نينو اكيد بيعجبهم بس يعتمد على طلباتهم
كوكوز مانصحج فيه لان العدد وايد والمكان ضيق غير ان بيكون ويكند
ورد ليلي جربته حلو واسعاره في هالحدود
فرايديز وفدركرز
لاشوكلا بس احس المنيو محدود جداً
اخت القمر اخيلج فره على التقارير يمكن يعجبج شي