أرجووكم محتاجتلكم .. =(

فارس الأحلام الخيالي : وسيم ، غني ، واااثق من نفسه جدا ،، يحبني جدا جدا لكن عليه دقات وعنده خطوط حمرا يعصب فيها ،، عنده أشياء ومواصفات اني افتقدها وأتمنى لو أحصلها ،، عنده اطلاع ديني بالحد الأدنى ..

زوجي الحالي : شكله عادي وسمين شوي ،، واثق من نفسه في تعامله مع الغير ولكن عنده اشياء واجد يريد يحققها في نفسه بس مو قادر يحققها ، يحبني جدا لكن يدلعني لدرجة ساعات اطلب منه طلبات سخيفة يعني يرجع مسافة طويلة مثلا عشان شي جدا سخيف ويلبي لي هالشي ،، فأحس هذي الصفة فيه مخليته يفقد جزء من هيبته عندي ،، ما حس ان عنده مواصفات افتقدها انا في نفسي .. عدا علاقاته الناجحة وصداقاته المتعددة مع الناس وهذا انا افتقده لأني انسانة منعزلة وما عندي ثقة بتاتا في تعاملي مع الآخرين وهو عكسي في هالشي .... كنت اتمنى ان يكون عنده اطلاع ديني ولو بسيط ,,, ولكن زوجي للأسف ما يعرف اجوبة ابسط المسائل مثل السهو في الصلاة مثلا او الشك والطهارة وغيرها .....!! وفي معلومات بسيطة في الحياة يصدمني انه ما يعرفها ... مثلا كان ما يعرف او مو حاط في باله هالمعلومة ان درجة حرارة الانسان الطبيعية 37 درجة ........ على الرغم أنه جامعي وعنده بكالوريوس..... وهو بعد نساي واجد يعني كثير ينسى .... ،، يعني في معلومة مثلا في موقف من المواقف يقول ل كانا هالمعلومة اول مرة اسمع فيها ... وفي موقف ثاني نفس المعلومة يقول لك اي اعرفها هالمعلومة اكيد ،، ويستغرب جدا ان في موقف سابق قال ان هو ما يعرفها ...!!! وكل هذا بسبب النسيان ...!
نجي للوضع المادي ... زوجي يشتغل في وظيفة حكومية ... والدخل الحمدلله لا بأس .... جزء من المعاش يروح للقسط تبع القرض ..الحالة المادية في بيت أبوي أعلى من بيت ابو زوجي ،، بس الحمدلله في بيت ابو زوجي لا بأس بحالتهم .... تخيلو زوجي من اول اسبوع خطوبة يقول لي .. ادري ابوكم الله يخليه ما يقصر عليكم بشيء .. وانا بعد بحاول ان ما ينقصش ششيء في يوم من الايام ... ولو صار وطلبتي شي وما قدرت البيه لك .. فاعلمي ان انا بحاول البيه لك عاجلا ام آجلا ... يعني انا بحاول البي كل طلباتك بس يمكن ما البيها فورا وبالسرعة الي كنتي تحصلين فيها طلباتك في بيت ابوك .... !!! هو نيته زينة بهالكلام بس مادري حسيت روحي انكسرت وهو يخبرني هالكلام من اول اسبوع خطوبة ...
ثاني موقف كنا نبني الشقة .. والحمدلله شقتي كبيرة وواسعة .. وفي فترة من الفترات خلصت الميزانية تقريبا ... او بالاحرى زوجي كان ينتظر والده يعطيه جزء من الفلوس بس والده كان مسافر ... وكان زوجي يقول حرام طول فترة سفر ابوي الشغل في الشقة يتم واقف ... وانا كان عندي مبلغ في البنك عبارة عن مهري وفلوس بعثة دراستي كنت ما استخدمها ... وكنت كم مرة اقوله وش رايك اعطيك من الفلوس الا عندي نكمل فيها الشغل في الشقة ... وهو يرفض وكنت أؤكد عليه اني ما احتاجها ....... وفي يوم من الأيام جا وقال لي يلا نروح البنك نسحب المبلغ الا عندك ........ وعلى الرغم اني انا الا خبرته بالفلوس الا عندي وقلت له اني ما احتاجهم ... بس يوم طلبهم مني حسيت بشعور مو حلو .. وقلت شلون يرضى ياخذ من عندي فلوس ... خاصة اذا اسمع صديقاتي يقولون ان اذا ازواجهم يحتاجون فلوس ويقولون لهم بنعطيكم من حسابنا يرفضون رفض قاطع ويعصبون بعد من هالكلام .............!!!
وفوق هذا ايام ما كنا نبيني الشقة .. حسيت زوجي ما عنده تخطيط .. وقاعد يتخبط ... يعني قاعد يبني ويبني بدون ما يدري جم قاعد يصرف وبدون ما يدري ميزانيته تكفي لو لا ... والنتيجة ان للحين علينا ديون للمقاول على الرغم قريب بنكمل سنتين من زواجنا ...

والي خلاني ارسخ في مخي فكرة ان زوجي ما عنده تخطيط ... تخيلوه الشهر ،، واحد جا طلب من زوجي مبلغ وقدره 200 دينار ... وزوجي عطاه .... وفي الأخير جاي يقولي انا بصراحة متوهق الحين عطيت الرجال الفلوس والحين احنا قاعدين ع الحديدة وما عندنا فلوس لتجهيزات العيد ........!!! وشميت من كلامه ان اطلبي من اهلك فلوس ... لأن من قبل صارت عندنا شوي ضائقة مالية بسبب بعض الظروف وانا اخذت مبلغ من اهلي .. هو كان رافض في البداية بس بعدين تقبل .... والحين مثل ما قلت ليكم قاعدة اشم في كلامه ان روحي اطلبي من اهلك مرة ثانية .. وهذا يرسخ لي فكرة ان عادي يطلب من غيره فلوس مثل ما اخذ من حسابي في المرة الي طافت ..

وآخر شي بغيت اقوله ... زوجي ما يرضى يشتري له ثياب ... او بالاحرى واجد يتهاون في موضوع الثياب .. وعنده ان هذا الشي مضيعة للفلوس وان الاولوية لي ولبنتي وللشقة .. وهذا الشي يضايقني بصراحة لأن مثل ما قلت في مواصفاتي السابقة احب ان يكون زوجي حلو وكشخة .......... وفوق هذا ومسامحة على هالكلام .. زوجي ما يشيل شعر ابطينه ولا شعر المنطقة الخاصة .. وما ادري ليش ... وانا بصراحة ولا مرة تجرأت أقول له أو أفتح اياه هالموضوع ...

بعد كل لي ذكرته ,, قولو لي هل هذي سلبيات عادية لو لا يمكن التغاضي عنها ... لاني بصراحة وبسبب كل هذا احس نفسي ما احب زوجي ما اكرهه بس ما احبه واحس نفسي تسرعت في اختياره خاصة ان الخطبة كانت تقليدية... ولما اقارنه بالمواصفات الا كنت احلم فيها ما احصل فيه الا القليل منها بصراحة ...

ارشدوني ... احس روحي عايشة مع زوجي جسد بلا روح .... احسه كأن عايشة وياه بس عشان لا أقضي حياتي عانس وحيدة ... تعبت تعبت تعبت ,و