ارجع لزوجي ولا اسمع كلام اهلي

الله يوفقك ويريح بالك والله حاسستك متل أختي الله يكون في عونك حبيبتي

life is dream;15436214:
بسم الله الرحمن الرحيم
كل عام وانت بخير بمناسبة الشهر الفضيل
ويؤسفني اني ارجع اشكي واحكي في رمضان بس هذا هو اللي صار


ادري واااااااااايد غلبتكم بنات معاي ومع مشاكلي وزوجي ....بس يمكن هذه تكون اخر مرة لان الموضوع تطور بصورة كبيرة بدخل في الموضوع على طول لانه اصلا طويل




بعد اخر مشكلة صارت واهلي رجعوني لزوجي للمرة الثامنة / حسيت ان ما لي اي مكان في الدنيا / صرت من البيت للشغل ومن الشغل اجيب ولدي وارجع البيت / ركزت اهتمامي في ولدي ونفسي والبيبي اللي قرب ينولد / مرضت ورحت المستفى مرتين وزوجي ما سمح لي اكلم اهلي وخلاني في الطوارئ وانا في الطوارئ كان يهاوشني بالتلفون ويقفل التلفون في وجهي ...بس بشكي لمنو لاهلي ؟؟؟ هم اللي رجعوني لبيته


بدأت اجهز للولادة ...و اركز على ولدي ....وشغلي ....قام زوجي يمنعني اني اجهز اي شي ...يمنعني حتى اني ازور اهلي ... يقوم من النوم يمسح فيني الارض ...يرجع من الشغل بعد نفس الشي ... لو شافني قدامه كاني بسم الله الشيطان واقف قدامه ....حتى لا يجيب اكل ولا يخليني اشتري ...اكل في الدوام واتم صايمه لغاية ما ارجع الدوام وما عندي حد الجأ له ....شكيت لامي وقلت هذه اخر مرة وانا على وشك انفجر ...لو ما استقبلتوني في البيت باجر شقة لي ولولدي ... ولا بروح مركز حماية النساء والاطفال في دبي يستقبلون مثل هذه الحالات


تميت في بيت زوجي وانظف وارتب واغسل واسوي واجباتي كلها ولما زوجي يجي ادخل غرفتي وهي عبارة عن مرتبة ( اسفنجة ) ومفرش اتغطى فيه بس ... لاعندي كبت ولا منظرة ولا اي شي

الكحل احطه بمنظرة سيارتي وهكذا كل يوم... اتجنبه على الاخر
صار يدور على يتمشكل معاي ...لو في الحمام يطق الباب يتهاوش معاي ....لو نايمة يجي يفتح الليتات يتهاوش معاي ....وانا صابرة و املي في الله كبيرة


المهم تهاوشنا يوم الجمعة ما ادري ليش ويوم السبت تهاوشنا كم مرة و يوم الاثنين الصبح ...اول يوم في رمضان قام من النوم تهاوش معاي ...مشيت وطنشت ...رحت المطبخ اجهز لولدي المرضعة ...جا وتهاوش معاي وانا ساكته ومطنشة ... طلع راح الدوام ....كان عندي موعد في المستشفى ...رجع بعد 5 دقايق وتهاوش معاي ومنعني اروح الموعد ...واخذ مفاتيح سيارتي وما رضى يرجعهم ...وقعد يدور في ملابسي واغراضي وشنطتي شاك في شي ما اعرف شنو ؟


منعني اودي ولدي لاهلي ...قلت له حاضر ...منعني اطلع من البيت ...حاضر ... لا تروحين الموعد .... حاضر كل شي حاضر حاضر حاضر ....طلع ورجع تهاوش معاي ورجع قال لي انت مو محترمة ولا متربية ...انفجرت ما قدرت اسكت ....وصرت الكلمة بالكلمة ....رفع ايده وكان بيضربني وتذكر انه صايم ....وطلع ....انا طلعت وراه واخذت ولدي ورحت بيت جارتنا وقلت لها اشهدي اني طالعة من البيت ما ماخذة غير شنطة يدي ومرضعة ولدي ...ورحت الشرطة اشتكيته ...حولوني للمحكمة الشرعية ورفعت عليه دعوة طلاق للضرر...اتصلت بابوي واخوي وامي وقلت لهم على اللي صار وانا تصرفت وما برجع بيته وما بتراجع بترجعوني له مرة ثانية ولا اروح اخذها من قاصرها واقعد مع ولدي في شقة ...جا اخوي واخذني بيت ابوي والحمدلله كلهم وقفوا معاي ....وزوجي رجع البيت ما لقاني جاني بيت ابوي واخوي قال له رفعنا عليك دعوة ...ومن يومها ما شفته ....اتصل فيني ما رديت ....اتصل فيني زوج صديقتي اللي هو صديق زوجي ويشتغل معاه ....وحلفني اعطي زوجي فرصة ما رضيت

اليوم زوجي جاني في الشغل ....وقعد يتكلم معاي من الساعة 8ونص لين قبل نص ساعة يعني 11ونص ...

كان يبكي بدموعه ويعتذر ويقول اني ما اعرف الاسباب ...قلت له قول الاسباب قال عشان هو مضغوط في الشغل قلت له سنتين مضغوط في الشغل ....طيب انا شنو ذنبي... تكلمنا وايد وايد وايد والصراحة انا حسيت ان هو انضرب على راسه ...ما كان مصدق اني بطلق الطلاق فعلا ...وانا احكي له عن اللي سواه فيني ...كانه اول مرة ينتبه ان هو غلط غلط غلط ...اول مرة ينتبه اني تعذبت وتحملت ...اول مرة يحس اني بشر ... لما اذكره بالكلمات اللي سمعني ليها واساله ترضاها لاختك ...يقول لي انا ندمان فعلا اني سمعتك هذا الكلام الفارغ .... واسف ....و دموعه ما وقفت


طلب ان هو يشوف ولده قلت له تعال البيت شوفه ...قال لي ما اقدر ادخل بيتكم ....قلت له برى البيت لاء ...المهم كررها كم مرة والصراحة انا ما استحمل دموع رجال ...قلت له خلاص بعد الفطور بجي باخذ اغراضي مع امي او اختي وبجيب الولد معاي انت العب معاه لين اخلص وبعدها بروح ...قال لي حاضر ...اول مرة يقول لي هالكلمة ...وصرت كل ما اقول له شي يقول حاضر كل اللي تريدينه بيصير ...المهم طلب مني اني افكر في اني ارجع له واذا في امل لو صغير والحياة بتكون بالصورة اللي انا اباها طلبت منه ضمانات وشهود ....على الكلام اللي قاله ...وافق ...اختاري الضمانات واختاري الشهود وما عندي مشكلة بس ارجوك تردي على قلت له انشاء الله
قال لي انا ما بجبرك تعيشين معاي اذا انت ما تبين ... واذا تبين الطلاق انا بطلق من غير محاكم وغيره ...اعرف شرع ربي بخلي العيال معاك عشان هذا الشرع ...اما اذا تبين المحكمة بعد ما اقدر اطلب منك تسحبين الدعوة ...عندك 3 خيارات
فكري ترجعي اذا في امل وتسامحيني وتكون الشروط وكل شي انت تطلبينه
او مستحيل الحياة معاي بطلقك بالاحسان وبنطبق شرع الله في كل شي


او تكملين في الدعوة ولا تسحبيها بس افضل نحل الموضوع بيناتنا





قلت له افكر وارد عليك ....اتصلت امي حكيت لها قالت لي لا ترجعي له ابدا ...ابوي قال لي قول له طلقني الحين ....اخوي احتار معاي





انا الحين ما ابي اخسر نفسي ومستقبلي وعيالي ...وكرامتي وكل شي ....بس في شي مخليني افكر في اني اعطيه فرصة

انصحوني خواتي
انا كل يوم اصلي الاستخارة و اطلب من ربي اني ما اظلم عيالي او نفسي او زوجي


انا موعارفة كيف اتصرف وكنت مكملة عادي ومستانسة في اليومين اللي قعدتهم مع اهلي .... بس اليوم لما شفته ضعفت قدام دموعه

انتى على بالى بقالك فترة بس اعذورينى كنت مشغوله جدا حاولى تكلمينى على الميل وأبعتيلى رقم تليفونك بليييييييييييز
ربنا يصلحلك الحال

انا مع رأى أم سلمى

أسيرة هواه;15436261:
مادري شقولج والله ..
الله يهدي بالج ويفتحها عليج ويسعدج ويدلج عالقرار الصحيح

أنا برايي ..
رغم اني ما اعرف المشاكل بالتفاصيل أو اللي بينكم سنتين (بس كل بيت ما يخلى من المشاكل)
وبما انج عطيتيه فرصة 8 مرات بدون ما يندم ورجعتي له
مافي مشكلة لو رجعتي له للمرة التاسعة بشروطج .. الواضح الحين انه ندمان وموافق على كل اللي تبينه .. فعطيه فرصة أخيرة (واهي فرصة ما راح تندمين لو خذتيها لأن في النهاية القرار لج .. بس لو ما اخذتيها وانفصلتي بتفكرين ألف مرة وبيأنبج ضميرج "لو عطيته آخر فرصة يمكن يتعدل حالنا؟ عيالي حرام بيعيشون بعيد عن أبوهم؟! يمكن كان ندمان فعلاً؟؟ ....... " وبتاخذج وتوديج أفكارج)

وبعدها شوفي
تصلح .. الحمدلله أكو كسبتي بيتج .. وضمنتي مستقبل عيالج بعيد عن التفكك
وإذا رجع الحال مثل ما كان عليه أو ما تصلح شي .. اخذي قرار نهائي (وبيكون أفضل لج ولعيالج لأن عيالج لو كبروا وشافوا حياتكم كلها مشاكل بتصيدهم عقد وما بيتهنون)

هذا رايي وبكل بساطة .. الفرصة الأخيرة ممكن توصلج لقرار صحيح 100%
يا تواصلين للأبد .. أو تنتهي علاقتكم


تحياتي لج

السلام عليكم اختي ...

بالضبط كنت بنصحج نفس الشي ... عطيه فرصه ثانية ... يمكن ينصلح حاله وربي يجمع شملكم غلى خير ويهدي النفوس يارب .... ولا تخربين بيتج بيدج ... ابدئي مرة ثانية وحطي الاسس الصح للحوار والتفاهم مع بعض وحاولي تاخذين الموضوع شو ما كان بهدوء وابتعدي عن العصبية خيتو ....

موفقه ان شاء الله حبوبة ....

طمنينا شو صار معك حبيبتي

هلا حبيباتي ... جيت اطمنكم واقول لكم اخر المستجدات اللي كانت في صفحة اتمنى من ربي انها تكون انطوت من غير رجعة



خلال ال14 يوم اللي مروا وبعد المشكلة كان زوجي يتصل فيني بطريقة شبه يومية ويترجاني اني اسامحه واعطيه فؤصة اخيرة ... وحطيت له شروط ووافق عليها وطلبت منه يدخل اهله في الصورة فكان رافض الفكرة وانا مصرة على موقفي في الاخر خليته يتفاهم مع ابوي اللي قال له طالما ان مافي تدخل من اهلك بالمرة اذا نحنا مضطرين نوثق موافقتك على الشروط في المحكمة .... وانا كنت موافقة على راي ابوي ... زوجي تكلم معاي مرات ومرات عشان ما نروح المحكمة وقال لي بالحرف انا ما اقدر اوفق مع زوجتي وام عيالي قدام القاضي ... فقلت له انا بثبت حقوقي قال لي اذا مصرة انا ما عندي اي مانع بس صدقيني بيكون شي مؤلم للغاية فقلت له مو قد العذاب اللي تعذبته المهم
طبعا انا كنت مواظبة على الاستخارة بشكل يومي ... هذاك اليوم حلمت بالليل ان انا مع زوجي في المحكمة وكنت ولدت خلاص وعيالي في البيت وبما ان نحنا الجلسة الثانية كنا نحضر الجلسة الاولى اللي هي عبارة عن زوجين في نفس مشكلتنا بس هذيل الزوجين في مراحل متقدمة من القضية وعيالهم قد عيالي في العمر سبحان الله كانو هم في القفص والقاضي المفروض يحكم والحكم كانه على العيال مو على الزوج او الزوجة .... وكانوا يصيحون صياح لدرجة انهم مو قادرين يتنفسون بصورة طبيعية ... قمت من النوم وقلبي مقبوض وولدي الحمدلله كان في حضني فقلت يمكن هذا الحلم كانه نتيجة استخارتي

واليوم الثاني جا زوجي المكتب وتكلم معاي وان هو موافق على شروطي سواء في المحكمة او برا ... وكان فعلا انا من داخلي مقتنعة ان هو ندم وتغيير ...بس في شك في داخلي ما اعرف ليش
قررت بيني وبين نفسي اني بصدقه للمرة الاخيرة وبعطيه الفرصة الاخيرة عشان ولدي والبيبي الجاي ... وبعدها صار كل يوم يتصل فيني كم مرة كاننا بعدنا في فترة الخطوبة ويتكلم معاي واتكلم معاه وحسيت براحة ورحت معاه يوم الاحد المحكمة وكان هو واصل قبلي ....تكلمت مع الاخصائية من التوجيه الاسري اللي المفروض ان هي تصلح بينا ... فقلت لها ان نحنا تصالحنا وحطيت شروط وهو وافق عليها واني بعطيه هذه الفرصة عشان عيالي فتكلمت معاي عن المشاكلو حلولها واسلوبه وبعدها طبعت لنا ورق المصالحة ...ونادت زوجي وتكلمت معاه قدامي ومدحتني في اسلوبي وفكرتي وصبري وهو بعد قال لها انا فععلا ندمان لانها درة من الدرر ووقعنا انا وهو على المصالحة وطلعنا من الجلسة وايدينا متشابكة ووصلني لين سيارتي وامس رحت البيت نقلت جزء من الاغراض ...الصراحة ما عرفت بيتي ...لانه غير الديكور وبخر البيت ونظفه واستقبلني استقبال رائع قعدت معاه نص ساعة ورجعت بيت اهلي طبعا هو وصلني ....وبعدها اتصل فيني واليوم الصبح اتصل فيني وطلب اني ارجع البيت بس طلبه كان بخجل ولي الحرية اني ارجع او اقعد لين اولد بس هو وعدني ان ايامنا ما بترجع الا احسن وافضل واسعد من قبل ... خايفة اكون امشي ورا العاطفة من غير تفكير لاني حسيت بالتغيير فيه ...والندم


امي تقول لي الصلح خير وارجع له وحتى اختي اما ابوي فهو للان شايل منه واخوي من راي امي واختي ....شنو راي العروسات ؟؟؟؟؟؟

ربنا يصلحلكو حالكو وطالما راح معاكى المحكمه يبقى هو شاريكى حاولى تروحى انتى وهو تعملو عمرة مع بعض
ربنا يهنيكى يا رب

الحمدلله

في تغير ايجابي يعني

جوفي بقول لج ... احنا قلنا لج قبل صبري وجوفي تصرفاته

حاليا زوجج قاعد يتغير حسب كلامج ويحاول يرضيج ويبين إنه نادم

هالشي واايد حلو ... رايي إنج ترجعين بيتج حاليا .. رمضان شهر خير .. قعدوا مع بعض وانتي بعد اهتمي في البيت وطبخي له

الرياييل بسرعة يتمللون ومثل اليهال يعني إذا ما راويته إن الشي اللي يسويه شي زين ممكن يرد مثل قبل ويقول ما بين في عيونها
اتوقع زوجج ناطر منج تشجيع ومدح على اللي سواه

هاي رايي والله يوفقج يا رب

الحمد لله والله دايما بدعيلك
الله يصلح مابينكم وتعيشوا حياة سعيدة مع أطفالكم الحلوين

الله يصلح ما بينكم ويهدي النفوس يااااااااا رب

استخيري حبيبتي قبل كل خطوة ولا تنسين الدعاء والاستغفار

الله يوفقكم ويسعدكم يا رب

الحمد لله
هادي بداية خير
إنتي الحين مو خصرانة شيئ
إرجعي لبيتك وحاولي إنتي وزوجك تربو عيالكم بطريقة صحيحة
وبتدي معاه صفحة ثانية وشوفي مدام حطيتي شروط ما تخافي
وأكيد أكيد أكيد زوجك بيحبك ولا ما عمل هيك
بس تلاقي شخصيتو هيك وتربا هيك
المهم أنو يتغير معاكي
وإنتي تجددي تربيتو وتشيلي ماضيه

صديقتي قريبة مني في الصداقة والسكن
زوجها بيحبها كثير ومتدين كثير وبيخاف الله كثير وحنا بنعرفو
المهم إكتشفت أنو مدمن مواقع جنسية وبيعرف بنت غيرها وبيقابلها من وراها وبيتكلم مع بنات كثير لما شافت هاذا الشيء كانت رلح تتجنن ووالدا معاه ولدين طلبت الطلاق وبهدلت الدنيا
قام يبكي ويترجاها تسامحو ويحلف أنو ماراح يرجع وووووو
بعد سنة وبعد ما رجعت تيقتها في زوجها وراح الحج في رمضان إكتشفت أنو لسا بيخونها ولسا ما بطل المرأة كانت حتروح فيها
جات لعندي البيت وتصوت والرجال تبعها بس هيا رفضت تكلمو أو تشوف في وجهو المهم فضلت عندي يجي 5 أيام أول ما شفت زوجها تخديت في 5 أيام صار ضعييييف وشاحب مع أنو وسيم ما شاء الله قعد يترجاني أرجعها للبيت بس هيا كل ما كلمتها تتهاوش معاي ورافضة ترجع
وكل ساعة يضق عليها في التلفون
ورسل ليها شيخ يكلمعا ترجع لبيتها
وبما أنها في أمريكا ومو قريبة من أهلها فما عندها حد
وافقت ترجع للبيت بس بشروط أنو ما يكلمها ولا يلمسها لحد ما يطلقها
بعد كم يوم الرجال ما صبر على مرتو وترجاها وحلف لها بالطلاق بالثلاث إذا هوا عرف غيرها
وحلف لها البطلاق إذا هوا نام مع غيرها قبل وهما متزوجين
وأنالخيانة كانت مجرد مقابلات وكلام وبس
المهم كلمتها ترجع وتعطيه فرصة وإذا هوا خان فأصلا ما راح تكون مرتو في الشرع
وكل لي حكيتيه على نفسك كان بيعملو عشان ترجع
والحين مر سنتين وماشاء الله عليهم عايشين مثل السمن على العسل :thumbs_up:
ما بيعمل شيئ حتا صغير بيقول لها عليه
وصار يحبها أكثر
ومن ساعتها ما شتكت منو
وبس

الحييين انتي عايشة في مرحلة حيرة

استخيير الرحمن


والله يهديج لمافية صلاحج ويوقفج ان شاااء الله

أم سلمى2007;15436243:

والله يا اختى مشكلتك مشكلة

وخاصة لما تشوفى الظالم مذلول

الطيب مش بيستحمل يشوف المنظر ده

عامة إنتى عرفتى أى فكرة عن اللى حصل لما عرف إنك رفعتى عليه دعوة ؟؟؟

يعنى المرة اللى فاتت لما كلمتى والده ووالده اجبره يصالحك

عرفتى إنه إتعدل معاك خوفا من والده

لكن المرة دى إيه اللى جبره يرجع يطلب منك الصلح وبنفسه

هل هو فعلا من نفسه فاق وحس بقيمتك

مش عارفة حاسة إن إما معمول بينكم سحر تفريق بين الأزواج

وده سبب تلككه لك على اتفه الامور وإهانته لك على أى سبب بدون مبررات

او إن ده سلوكه الفعلى وحاليا فى تدخل خارجى لإصلاح الامور بينكم

علشان كده حاولى تعرفى من اى حد مقرب لك من اهله رد فعله ورد فعل أهله

لما عرفوا تصرفك فى رفع دعوة عليه

لو عرفتى إنه ماكانش فى تدخل من اهله فى إرجاعك تانى

يبقى فى طلب يكون الفيصل فى رجوعك له او عدمه

وهو ان تذهبا معا لشيخ للتأكد من عدم تعرضه لأعمال سحرية قد تؤثر على

أفعاله

فإن ثبت خلوه من أى سحر فنصيحتى ألا تعودى له مهما حاول ان يصلح الامور بينكما

لان الآن ليس لك ضامن على عدم رجوعه لنفس التصرفات مرة أخرى

أما إن كان مسحورا فشرط الرجوع له أن يعالج تماما

وخلال فترة العلاج تلك تعيشين فى بيت أهلك معززة مكرمة وينفق عليك وعلى

طفلك وعلى جنينك المهم الا تقبلى اى معاملة سيئة مرة أخرى تحت اى مبرر

وإن شاء الله سترين نتيجة إستخارتك فى البقاء معه أو الإنفصال عنه فى تيسير

الامور نحو رجوعك له أو تعسيرها لعدم الرجوع له

وناجى ربك فى هذه الأيام الفاضلة ووقت الإفطار وإدعيه ان ينير لك بصيرتك

ويريكى الخير لك ولأولادك ويسيرك نحوه

ربنا يفرج كربك وييسر لك امرك

أختك فى الله أم سلمى

:thumbs_up:

السلام عليكم ورحمة الله

وكل عام والجميع بخيييير ..


والله ليا فتره طووويله ما رديت في المنتدى بس عن جد تالمت لقصتك انا قريتهاا للاااااخر

واقولك خلاص اللي سار خيره ارجعي وافتحي انتي وياه صفحه جديده والشك اللي جواتك شي طبيعي حبيبتي لان اللي شفتيه منه مو هين خلاك تفقدين ثقتك فيييييه ..

ساعديه ان هو يتغير دامه وااافق ع شروطك وراح معاك للمحكه خلاص هذا بحد ذاته اعتذاااار عن اللي سوااااه فيك ..


ما بكثر كلام ما شاااااء الله عليك ما تحتاجين عقلك كبير وان شااااء الله انك ماشيه صح ..


ربي يوفقكم ويصلح حالكم ويسخر لك زوجك ياااااااارب ...

نصيحتي لك كأخت رجعي لزوجك عطيه فرصه عشاان عيالك بس

هم شو ذنبهم يعيشو بعيد عن ابوهم والله بعدين تندميين

يمكن زوجك تعدل حاله يمكن عرف قيمتك لمى حس انه راح يخسرك

انا شفت صديقتي عاندت وطلبت الطلاق والحيين ندمااانه عشان ولده

تقول اشتريت راحتى على حساب ولدي

استخيري يالغااليه الله يكتب لك الي فيه خير وصلاح لك

الله يصلحه ويسعدكم

دايما عليك بالأذكار والقرآن في البيت

الله يقومك بالسلامة ويرزقكم بر عيالكم

السلام عليكم
ارقي نفسك وارقيه وخلى على طول سورة البقرة شغالة في البيت
لان تقريبا مشاكل بتكبر على حاجات فاضية