سلام كروشات شخباركم؟ عساكم بخير؟ :)
بريشان والجوهرة مشكورين على السؤال عني، وبريشان ليش ازعل الله لا يجيب الزعل ان شاء الله.
بس اللي صار انه من يوم الإثنين لأمس كل ظهري ما اقدر اقعد :'( ، فمن جذي ما اقدر اقعد على اللاب توب واتابعكم بس من الآيفون ، بس اليوم الحمدلله اشوف راح وجع الظهر بس اشوف رجولي تعورني امش واعرج>>> يا ليل ما اطولك مع الألم :rolleyes:
المهم اشوفكم ما شاء الله ما خليتون موضوع الا تكلمتون عنه وصلتون للضيافة واحنا للحين في الخامس :biggrin:، اني للحين ما فكرت في موضوع الضيافة ومخلتنه لآخر شي لأنه شي سهل ما ياخذ وقت ، اختي لما ولدت في نفس اليوم رحت أخذت لها ضيافة وما كثرت لأن بس خلوها يوم واحد بالمستشفى ولما رجعت البيت أخذنا لها ضيافة غير
بالنسبة لي اول شي راح ابتدي فيه هم الفراشات بوصي عليهم لأن ياخذون وقت، واني امس سألت بنات خالتي كم فراش آخذ لأنهم خبرة في هالأمور فقالوا لي اخذي 3 ، 2 منهم خصصيهم للإستقبال والطلعات ويكونون كشخة وواحد للبيت للكرف لأن بعض الجهال كل يرجعون او يسربون ، وقالوا لي ما آخذ الشنط اللي تجي مع الفراشات لأنهم مو عمليين وما راح استفيد منهم وقالوا لي آخذ الشنط اللي مخصصة لأغراض البيبي اللي تنباع في محلات الأطفال مثل سنتر بوينت ومذركير
طبعا اني اقتنعت بكلامهم لأن شفت اختي أخذت لها بس وحدة وما استخدمتها واجد لأنه ما فيها اماكن مخصصة وتجي الأغراض كلها على بعض، واني اتصفح موقع مذركير الأصلي شفت هذي الشنطة وعجبتني حسيتها عملية وفيها جيوب وكل حاجة لها مكان وتفيد لين بروح بيت ابوي او يوم الجمعة اذا رحت بيت خالتي من الصبح لليل تكفي كل أغراضه ، وان شاء الله احصلها عندهم في محلاتهم واذا ما حصلتها بطلبها من النت
في منها الوان بس اني حطيت هذي الصورة لتوضيح الفكرة ، وباخذ بعد شنطتين اصغر للمشاوير الصغيرة
وردة أمل قالت انه هناك تبانات خاصة للسرة ، انا ما اشوف يحتاج ناخذ منهم لأنه اصلا التبانات العادية تجي واسعة على الطفل في البداية فما تضغط على السر ، طبعا هذا راي وكل وحدة ورايها
التوزيعات هذي حيرتي، ما ادري ويش اسوي ، اختي احنا اللي سوينا لها وكانت عبارة عن تولات مسك اطفال في بوكسات شفاف وطلعت روعة بس تعبنا فيها لأن من مكان لمكان واحنا نشتري الأغراض ، لكن الحين ما في احد يسوي لي لأن اختي ولدها ما يسكت واني ما فيني شدة كفاية علي التجهيز
